1. Ntshilejilu kayi tshivua Yezu mushile bayidi bende? Mmunyi muvuabu batshitumikile? (Tangila tshimfuanyi tshia pa tshizubu.)

YEZU uvua ne mmuenenu muimpe wa mudimu wa kuyisha bidimu bionso bivuaye muenze mudimu eu pa buloba apa, ne mmusue bua bayidi bende bikale pabu nende. (Yone 4:35, 36) Patshivua Yezu ne bayidi bende, bavua ne disanka dia bungi dia kuyisha. (Luka 10:1, 5-11, 17) Kadi pavuabu bamukuate bamushipe, muoyo wa kuyisha wakanji kubajika bua tshikondo kampanda. (Yone 16:32) Pakavuaye mubishibue ku lufu, wakabakankamija bua badifile mu mudimu wa kuyisha. Pakavuaye mubande mu diulu, bakayisha ne tshisumi tshia bungi kufikishabi too ne baluishi babu ku didilakana bamba ne: “Tangilayi, nudi buwuje Yelushalema ne malongesha enu.”​—Bien. 5:28.

2. Mmunyi mudi Yehowa mubeneshe mudimu wa kuyisha?

² Yezu uvua ulombola mudimu uvua bena Kristo ba kumpala abu benza, Yehowa wakababenesha, ne bantu ba bungi kuitababu mukenji uvuabu bayisha. Tshilejilu, mu Pentekoste wa mu 33 P.Y., bantu batue ku 3 000 bakabatijibua. (Bien. 2:41) Bungi bua bayidi buakatuadija kuvula bikole menemene. (Bien. 6:7) Nansha nanku, Yezu ukavua muambe kabidi ne: bantu ba bungi bavua ne bua kuitaba lumu luimpe mu matuku a ku nshikidilu.​—Yone 14:12; Bien. 1:8.

3-4. Bua tshinyi mudimu wa buambi udi mua kukola bua kuwenza imue miaba? Ntshinyi tshituakonkonona mu tshiena-bualu etshi?

³ Tuetu bonso tudi tuenza bua tuikale ne mmuenenu muimpe wa mudimu wa buambi. Mu imue miaba mbipepele bua kuikala nende, bualu bantu ba bungi batu basue kulonga Bible, bilomba bua bamue ba kudibu banji kuindila too ne padi Ntemu umueneka bua kulonga nabu! Kadi miaba mikuabu bamanyishi batu batata bikole bua kuyisha bualu kabatu batamba kupeta bantu kumbelu  to; ne bine badibu bapeta kumbelu kabayi nansha batamba kuanyisha malu a mu Bible to.

⁴ Wewe musombele muaba udibi bitatshisha bua kuyisha, ngenyi idi mu tshiena-bualu etshi idi mua kukuambuluisha. Netumone tshidi bamue benze bua kupeta bantu ba bungi mu buambi. Netumone kabidi bua tshinyi mbimpe kuikala anu ne mmuenenu muimpe nansha bantu batuteleja anyi kabayi batuteleja.

5. Nntatu kayi itu Bantemu ba bungi batuilangana nayi?

⁵ Bidi bienda bikolela Bantemu ba bungi bua kupetabu bantu ku mbanza yabu. Bamue bamanyishi mbasombele miaba idi nzubu anyi mpangu itu bantu kabayi mua kubuela tshianana tshianana to. Kudi mua kuikala nsentedi ku nzubu aku anyi ku tshiibi tshia lupangu, udi kayi mua kubueja muntu padi benamu kabayi bamubikile to. Bamanyishi bakuabu bobu badi mua kuyisha ku nzubu ne ku nzubu kakuyi bualu, kadi bapeta anu bantu bakese. Banga bobu batu bayisha miaba ya kule itu anu bantu bakese basombele. Bamanyishi badi mua kuenda ntanta mile bua kukeba muntu umue; muine au bafika kabayi nansha bamupeta to! Tuetu tuyisha miaba ya mushindu eu, katulekedi to. Ntshinyi tshitudi mua kuenza bua kutantamena ntatu yonso eyi ne kupeta bantu ba bungi?

6. Mmunyi mudi bamanyishi ba lumu luimpe bafuanangane ne balobi?

⁶ Yezu wakafuanyikija mudimu wa kuyisha ne mudimu wa kuloba. (Mâko 1:17) Bamue balobi badi mua kuloba matuku a bungi kabayi bakuata tshintu to. Kadi kabatu balekela to. Badi bashintulula dîba dia kuloba, muaba wa kulobela, anyi mushindu wa kuloba. Tudi petu mua kushintulula malu a muomumue mu mudimu wetu wa buambi. Tumonayi mutudi mua kuenza.

7. Ntshinyi tshidi mua kuenzeka tuetu tuyisha mêba mashilashilangane?

⁷ Yisha mêba mashilashilangane. Tudi mua kupeta bantu ba bungi tuetu tuyisha mêba atudi mua kubapeta ku nzubu; bualu muntu wetu yonso eu utu anu ne diende dîba dituye upingana ku nzubu. Bana betu ba bungi batu bamona ne: bitu bimpe kuyisha mu mapingaja anyi ku dilolo bualu batu bapeta bantu ba bungi mêba au. Kabidi mêba au ngatu bena kumbelu bakadi basombe badilekelele ne muntu udi mua kuyikila nabu bipepele. Peshi pamuapa lungenyi lua muanetu kampanda udi mukulu diende David ludi mua kukuambuluisha. Udi uleja ne: Pakadibu bamane kuyisha mu teritware kampanda ne udibu bapatuke nende mu buambi, batu bapingana ku nzubu ivuabu kabayi basangane bantu. Udi wamba ne: “Bitu binkemesha bualu tutu tusangana bantu ba bungi bakadi ku nzubu yabu patudi tulua kubatangila musangu muibidi.” *

8. Mmunyi mutudi mua kutumikila Muambi 11:6 mu buambi?

⁸ Katulekedi to. Mvese wa tshiena-bualu etshi mmutuvuluije mmuenenu utudi ne bua kuikala nende. (Bala Muambi 11:6.) Muanetu David utukadi batele kavua mulekele to. Wakalua kupeta muntu ku nzubu pine apu mumane kulua kumutangila misangu ne misangu kayi umupeta to. Muntu au uvua musue kulonga malu a mu Bible ne wakamuambila ne: “Ndi muaba eu bidimu bitue ku muanda mukulu, Ntemu nansha umue katu muanji kulua kuanyi eku to.” Muanetu David udi wamba ne: “Ndi mulue kumona ne: paudi ulua kupeta bantu ku nzubu, misangu ya bungi batu bateleja malu atudi tuyisha.”

9. Biobi bikole bua kupeta bamue bantu, Bantemu bakuabu batu benza bishi bua kubapeta?

 ⁹ Shintulula miaba ya kuyishila. Bu mutubi bikole bua kupeta bamue bantu ku nzubu, bamue bamanyishi mbashintulule muaba wa kuyishila. Tshilejilu, kuyishila bantu mu njila anyi kuyisha ne tumatempu tua kutekela mikanda nkuambuluishe bikole bua kuyisha bantu batu basombele miaba idibi kabiyi bianyishibue bua kuyisha ku nzubu ne ku nzubu. Kuyisha kua nunku kudi kuambuluisha Bantemu bua kuyukila ne bantu ba miaba ayi mpala ne mpala. Bualu bukuabu, bamanyishi ba bungi mbamone ne: patubu bayishila bantu miaba itubu bapitshishila kapepe, mu bisalu, anyi miaba idibu bendela mishinga, bitu bipepele bua bantu kuyukila ne kuangatabu mikanda yetu. Mutangidi wa tshijengu mukuabu wa mu Bolivie diende Floiran udi wamba ne: “Tutu tuya mu bisalu ne miaba itu bantu bendela mishinga pankatshi pa dîba dia 1 too ne dia 3 mu mapingaja pakadi bangenda mushinga basulakane. Tutu tuyukila nabu bimpe, tutuadija too ne dilonga ne bakuabu Bible.”

10. Wewe kuyi upeta bantu, ntshinyi tshikuabu tshiudi mua kuenza bua kubayisha?

¹⁰ Teta kuyisha mushindu mukuabu. Tutekabi ne: udi mutete kumonangana ne muntu misangu ne misangu. Udi muye kumutangila mêba mashilashilangane kuyi anu umupeta kumbelu to. Kudiku mishindu mikuabu iudi mua kuteta bua kumupeta anyi? Muanetu Katarína udi wamba ne: “Ntu mfundila bantu bantu tshiyi muanji kupeta kumbelu abu mikanda, mbaleja tshimvua mua kuikala mubambile tuetu bamonangane nabu mpala ne mpala.” Bidi bikulongesha tshinyi? Paudi uyisha mu teritware webe, enza bua uyishe muntu yonso mu mushindu kampanda anyi kansanga.

11. Bua tshinyi bantu bakuabu kabatu basue kuteleja malu atudi tuyisha?

¹¹ Bantu bakuabu kabatu basue kuteleja malu atudi tuyisha to. Kabena bamona ne: bidi ne mushinga bua kumanya Nzambi anyi Bible to. Bu mudibu bamona makenga a bungi pa buloba, kabena bitabuja Nzambi to. Badi babenga Bible bualu badi bamona bamfumu ba bitendelelu benza malu mabi a bungi pabu bamba mudibu batumikila Bible au. Bakuabu bobu badi bela meji anu bua midimu yabu, bua mêku abu, ne bua ntatu yabu dîba dionso, bibapangisha bua kumona mudi Bible mua kubambuluisha. Ntshinyi tshitudi mua kuenza bua kulama disanka padi bantu batudi tuyisha kabayi bamona ne: malu atudi tubayisha adi ne mushinga?

12. Mmunyi mudi ditumikila mêyi adi mu Filipoyi 2:4 mua kutuambuluisha mu buambi?

¹² Ikala ubatabalela. Bantu ba bungi bavua babenga bua kuitaba lumu luimpe kumpala mbalue kuluitaba pavuabu bamone ne: bantu bavua babayisha bavua babatabalela ne muoyo mujima. (Bala Filipoyi 2:4.) Tshilejilu, David utukadi batele udi wamba ne: “Muntu yeye mutuambile ne: ki mmusue malu atudi tumuambila, tudi tupingaja Bible ne mikanda yetu mu bibuta tumuambila ne: ‘Tuambila koku tshiudi uabengela.’” Wewe utabalela bantu, nebadimuene bobu nkayabu. Badi mua kupua tshituvua babambile muoyo, kadi badi mua kuvuluka mutuvua babatabalele. Nansha muntu utudi tupeta ku nzubu mutupangishe bua kuakula, kudituala kuetu ne tshilunji tshietu tshia mpala bileje ne: tudi tumutabalela.

13. Ntshinyi tshitudi mua kuenza bua malu atudi tuyisha asankishe batudi tuyisha?

¹³ Tudi tuleja mutudi tutabalela bantu patudi tubayisha bilondeshile malu adibu nawu dijinga ne adi abasankisha. Tshilejilu, kudiku tshintu tshidi tshikuleja ne: muena ku nzubu au udi ne bana anyi? Baledi badi mua kukuteleja wewe ubaleja mibelu ya mu Bible ya mua kukolesha bana bimpe anyi ubaleja tshidiye wamba bua kuikala ne nsombelu wa disanka mu dîku. Ku tshiibi tshiende kudi bikuvu bia bungi anyi? Tudi mua kuyukila nende bua malu a tshikisu adi enzeka lelu ne bua buôwa budi nabu bantu. Tuetu benze nanku udi mua kusanka bua kumvua ne: tshikisu tshikadi pa kujika. Dîba dionso diudi upeta bantu badi basue kuteleja, bambuluisha bua bumvue mudi mibelu ya mu Bible mua kubambuluisha. Katarína utukadi batele udi wamba ne: “Ntu mvuluka mudi bulelela bua mu Bible bushintulule nsombelu wanyi.” Ke bualu kayi utu wakula ne dituishibua, ne bantu batuye uyisha batu bamona ne: udi ne dituishibua adi.

14. Bilondeshile Nsumuinu 27:17, mmunyi mudi bantu badi bayisha pamue mua kuambuluishangana?

 ¹⁴ Itaba diambuluisha dia kudi bakuabu. Mu bidimu lukama bia kumpala, Paulo uvua uleja Timote mishindu ya kuyisha ne ya kulongesha ne wakamukankamija bua kuambuluishaye nayi bakuabu. (1 Kol. 4:17) Anu bu Timote, bana betu bapiluke ba mu tshisumbu badi mua kutulongesha malu a bungi. (Bala Nsumuinu 27:17.) Tuangate tshilejilu tshia muanetu Shawn. Tshikondo kampanda uvua muenze bumpanda-njila mu kamusoko kakuabu muvua bantu ba bungi balamate anu tshitendelelu tshiabu. Wakenza tshinyi bua kulama disanka diende? Udi wamba ne: “Pavuaku mushindu, tuvua tuyisha babidi. Patuvua tumbuka kumbelu kua muntu batangile kua mukuabu, tuvua tuenda tulejangana mutuvua mua kulengeja ndongeshilu wetu. Tshilejilu, tuvua tuyukidilangana pa mushindu utuvua tufuma ku diyukila ne muntu. Pashishe tulejangana mushindu mukuabu utudi mua kuyukila ne muntu mukuabu wa buena au.”

15. Bua tshinyi disambila didi ne mushinga bua mudimu wetu wa buambi?

¹⁵ Lomba Yehowa diambuluisha. Dîba dionso diudi uyisha, ulombe Yehowa diambuluisha. Nyuma muimpe wa Yehowa yeye kayi utuambuluisha, kakuena muntu udi mua kuenza bualu nansha bumue to. (Mis. 127:1; Luka 11:13) Paudi ulomba Yehowa diambuluisha mu disambila, umuambile malu masunguluke. Tshilejilu, mulomba bua akulombole kua muntu udi musue kumumanya ne mudiakaje bua kuteleja. Pashishe wenze malu mu diumvuangana ne disambila diebe, mmumue ne: uyishe muntu yonso uudi utuilangana nende.

16. Bua tshinyi kudilongela kudi ne mushinga bua mudimu wa buambi?

¹⁶ Ikala ne dîba dia kudilongela. Dîyi dia Nzambi didi diamba ne: “Nudijadikile nuenu nkayenu disua dia Nzambi didi dimpe, didi dianyishibue ne didi dipuangane.” (Lomo 12:2) Tuetu ne dituishibua dikole dia ne: tudi bamanye bulelela budi butangila Nzambi, netuikale kabidi ne dituishibua dikole patudi tuyukila ne bantu mu buambi. Katarína utukadi batele udi wamba ne: “Matuku mashale aa mvua mufike ku dimona ne: bivua bikengela nkoleshe ditabuja dianyi mu amue malongesha a mu Bible a nshindamenu. Ke meme kudifila mu dikonkonona bijadiki bidi bileja ne: Mufuki utuku, Bible udi bulelela Dîyi dia Nzambi, ne bia ne: Nzambi udi ne bulongolodi budi buleja mpala wende lelu.” Katarína udi wamba ne: didilongela diende adi ndikoleshe ditabuja diende ne ndienze bua mudimu wa kuyisha wikale umusankisha bikole.

17. Bua tshinyi Yezu uvua anu ne mmuenenu muimpe bua mudimu wa kuyisha?

¹⁷ Yezu uvua anu ne mmuenenu muimpe ne wakatungunuka ne kuyisha nansha muvua bamue kabayi basue kuteleja mukenji uvuaye uyisha. Bua tshinyi? Uvua mumanye ne: bantu bavua ne dijinga dia kumanya bulelela ne uvua musue kupesha ba bungi mpunga wa kuitaba mukenji wa Bukalenge. Uvua mumanye kabidi ne: bantu bavua babenga kumuteleja kumpala bavua mua kulua kuteleja pashishe. Mona tshivua tshienzeke mu dîku dia ba Yezu: mu bidimu bisatu ne tshitupa bivuaye muyishe, muanabu nansha umue kavua mulue muyidi wende to. (Yone 7:5) Kadi pakavuaye mubishibue ku lufu, bakalua bena Kristo.​—Bien. 1:14.

18. Bua tshinyi tudi tutungunuka ne kuyisha?

¹⁸ Katuena bamanye bantu balua kuitaba bulelela bua mu Bible butudi tuyisha to. Bitu biangata bantu bakuabu matuku a bungi bua kushishabu kuitaba malu atudi tulongesha. Nansha badi kabayi basue kututeleja batu bamona bikadilu  bietu bimpe ne mmuenenu wetu muimpe wa malu, ne ndekelu wa bionso badi mua kufika ku “ditumbisha Nzambi.”​—1 Pet. 2:12.

19. Mbualu kayi butudi ne bua kumanya bilondeshile 1 Kolinto 3:6, 7?

¹⁹ Nansha mutudi tukuna ne tumiamina mâyi, tudi ne bua kumanya mudimu udi Nzambi wenza. (Bala 1 Kolinto 3:6, 7.) Muanetu kampanda wa mu ditunga dia Etshiopi diende Getahun udi wamba ne: “Ndi muenze bidimu bipite pa 20 muikale anu meme nkayanyi Ntemu mu teritware utubu bayisha anu ku mpukapuka. Kadi mpindieu tukadi bamanyishi 14. Bamanyishi 13 bakadi babatijibue, mu bobu amu mudi mukajanyi ne bana banyi basatu. Muayene wa bungi bua bantu badi babuela mu bisangilu ngua bantu 32.” Getahun udi ne disanka bua muvuaye mutungunuke ne kuyisha eku muindile ne lutulu bua Yehowa akoke bantu badi bakaje muoyo wabu bua kubuelabu mu bulongolodi buende!​—Yone 6:44.

20. Mmu mushindu kayi utudi bu bantu batu bapandishangana?

²⁰ Yehowa utu wangata bantu bonso ne mushinga. Mmutupeshe diakalenga dia kuenza mudimu ne Muanende bua kusangisha bantu ba mu matunga onso kumpala kua nshikidilu wa bulongolodi ebu kulua. (Hag. 2:7) Tudi mua kufuanyikija mudimu wetu wa kuyisha ne mudimu wa kusungila bantu. Tuetu tudi bu bantu badibu batuma bua kupandisha bantu batu bumbula mabanji a muinshi mua buloba badi buloba bubuikidije. Nansha mudibu mua kupeta anu bakese ne muoyo, mudimu udibu benza kudi bapandishanganyi bonso udi ne mushinga. Ke mubidi kabidi bua mudimu utudi tuenza mu buambi. Katuena bamanye bungi bua bantu batuapandisha mu bulongolodi bua Satana to. Kadi Yehowa udi mua kutuma yonso wa kutudi bua kubambuluisha. Muanetu Andreas wa mu Bolivie udi wamba ne: “Meme ntu mmona muntu yonso udi ulonga bulelela bua mu Bible ne ubatijibua bu tshipeta tshia mudimu muenza kudi bantu ba bungi.” Tuikalayiku petu ne mmuenenu muimpe wa buena au bua mudimu wetu wa buambi. Tuetu benze nanku, Yehowa neatubeneshe, ne mudimu wetu wa buambi newikale utupetesha disanka dilelela.