1-2. Nntatu kayi itu Bantemu ba bungi batuilangana nayi?

MUPOSTOLO Paulo uvua mukankamije Timote, mukankamije kabidi bena Kristo bonso, bua kukumbajabu mudimu wabu wonso menemene. (2 Tim. 4:5) Tuetu bonso tudi tulonda mubelu wa Paulo eu ne muetu muonso. Kadi imue misangu bitu bitukolela. Bua bena Kristo netu ba bungi, bidi bikengela dikima dia bungi bua kuyisha. (2 Tim. 4:2) Tshilejilu, elabi meji bua bana betu badi mu matunga mudibu bakandike mudimu wetu anyi bawulondakaja bikole. Badi benza mudimu eu bamanye bimpe ne: dimue edi badi mua kubela mu buloko!

² Batendeledi ba Yehowa badi batuilangana ne ntatu mishilashilangane idi mua kubatekesha mu maboko. Tshilejilu, ba bungi badi benza mudimu mêba mavule anu bua kukumbajila mêku abu majinga a nshindamenu. Badi mua kujinga kudifila bikole mu mudimu wa diyisha, kadi patudi tufika ku ndekelu kua lumingu badiumvua bapungile bikole. Bakuabu pabu badi ne mushindu wa kuyisha anu kakese menemene bua masama a munanunanu peshi bua bukulakaja; bakuabu mene kabayi nansha ne mushindu wa kupatuka pambelu. Kudi badi pabu badipisha misangu yonso badiambila ne: kabena ne mushinga ku mêsu kua Yehowa to. Muanetu mukuabu diende Mary * udi wamba ne: “Pantu mutekete mu maboko, bitu bindomba ndienzeje bikole bua kuluisha meji mabi, bindia too ne makanda onso. Pashishe ndi ntuadija kudipisha bua mundi njimija dîba ne makanda a kufila mu mudimu wa buambi.”

3. Ntshinyi tshituakonkonona mu tshiena-bualu etshi?

³ Nansha tuetu mu nsombelu wa mushindu kayi, Yehowa udi mua kutupesha makanda a kutantamena ntatu bua tutungunuke ne dimuenzela mudimu mutudi bakokeshile. Kumpala kua kumona mushindu udi Yehowa mua kutuambuluisha, tuanji kumona muvuaye mupeshe Paulo ne Timote bukole bua kukumbajabu mudimu wabu nansha muvuabu ne ntatu.

4. Nntatu kayi ivua nayi Paulo?

⁴ Paulo uvua ne ntatu ya bungi. Uvua dijinga ne bukole nangananga pavuabu bamukuma, bamuasa mabue, ne bamuele mu buloko. (2 Kol. 11:23-25) Paulo wakamba kayi welakana ne: imue misangu uvua uluangana ne ditekeshibua mu maboko. (Lomo 7:18, 19, 24) Uvua kabidi ne “dieba mu mubidi” divua mua kuikala disama kampanda, divuaye ujinga bikole bua Nzambi amumbushe.​—2 Kol. 12:7, 8.

5. Mmushindu kayi wakakumbaja Paulo mudimu wende nansha muvuaye utuilangana ne ntatu?

⁵ Yehowa uvua mupeshe Paulo bukole bua kukumbajaye mudimu wende wa diyisha nansha muvuaye utuilangana ne ntatu yonso ayi. Mona mushindu wakakumbajaye mudimu wende. Pavuaye ku Lomo mu nzubu muvuabu bamuele mu buloko, wakamanyisha lumu luimpe ne tshisumi kumpala kua balombodi bena Yuda, pamuapa kabidi ne kua banene ba mbulamatadi. (Bien. 28:17; Filip. 4:21, 22) Wakayisha kabidi basalayi balami ba mukalenge wa bena Lomo ba bungi ne bonso bavua balua kumutangila. (Bien. 28:30, 31; Filip. 1:13) Mu tshikondo tshimue tshimue atshi, nyuma wa Nzambi wakenzeja Paulo bua kufundaye mikanda ivua miambuluishe bena Kristo balelela ba tshikondo atshi, too ne ba lelu eu kabidi. Bualu bukuabu, tshilejilu tshia Paulo tshivua tshikankamije bena mu tshisumbu tshia ku Lomo, kupeteshatshi bena Kristo nende “dikima dia bungi bua kuakula bua dîyi dia Nzambi kabayi batshina.” (Filip. 1:14) Nansha muvuaye imue misangu kayi ne mushindu wa kuenza tshionso tshivuaye musue kuenza, wakadifila ne muende muonso, ne malu ‘akenda bimpe bua kutantshisha lumu luimpe.’​—Filip. 1:12.

6. Bilondeshile 2 Kolinto 12:9, 10, ntshinyi tshivua tshiambuluishe Paulo bua kukumbajaye mudimu wende wa diyisha?

⁶ Paulo uvua mumanye ne: tshionso tshivuaye wenza mu mudimu wa Yehowa, uvua utshienza ne bukole bua kudi Nzambi, kabivua ku bukole buende yeye to. Wakamba ne: bukole bua Nzambi buvua buenda “buvuijibua bupuangane mu butekete.” (Bala 2 Kolinto 12:9, 10.) Nansha muvua Paulo mutuilangane ne ntatu bu mudi dikengeshibua, diedibua mu buloko, ne ntatu mikuabu, Yehowa uvua mumupeshe bukole bua kukumbajaye mudimu wende wa diyisha bimpe menemene ku diambuluisha dia nyuma wende muimpe.

7. Nntatu kayi ivua Timote ne bua kutantamena bua kukumbajaye mudimu wende wa diyisha?

⁷ Timote mulunda wa Paulo utshivua nsongalume uvua pende weyemena Nzambi bua amupeshe  bukole bua kukumbajaye mudimu wende wa diyisha. Uvua ufila Paulo mu ngendu mile ya bumisionere. Paulo uvua umutuma kabidi miaba mikuabu bua aye kukumbula bisumbu ne kubikankamija. (1 Kol. 4:17) Timote uvua ne bua kuikala mudiumvue kayi mukumbane to. Pamuapa ke bualu kayi Paulo uvua mumuambile ne: “Muntu nansha umue kapetudi bunsonga buebe nansha kakese.” (1 Tim. 4:12) Tshine tshikondo atshi, Timote uvua pende ne diende dieba mu mubidi, uvua ne “tusamasama.” (1 Tim. 5:23) Nansha nanku, uvua mumanye ne: nyuma muimpe wa Yehowa udi ne bukole bua bungi ne uvua ne bua kumupesha bukole buvuaye nabu dijinga bua kuyishaye lumu luimpe ne kuambuluisha bena Kristo nende.​—2 Tim. 1:7.

8. Ntshinyi tshidi Yehowa mulongoluele bantu bende lelu eu bua kubapesha bukole?

⁸ Lelu eu, Yehowa udi upesha bantu bende “bukole budi bupite bua pa tshibidilu” bua batungunuke ne kumuenzela mudimu ne lulamatu. (2 Kol. 4:7) Tukonkononayi malu anayi adi Yehowa mutulongoluele bua kutupesha bukole ne kutuambuluisha bua tushale ne lulamatu kudiye. Ngowu aa: disambila, Bible, bena Kristo netu, ne mudimu wetu wa diyisha.

9. Mmushindu kayi udi disambila mua kutuambuluisha?

⁹ Bakolesha mu disambila. Anu mudibu baleje mu Efeso 6:18, Paulo udi utukankamija bua kusambila Nzambi “dîba dionso.” Yeye neatuteleje ne neatuambuluishe. Muanetu Jonnie wa mu Bolivie uvua mumone muvua Yehowa mumuambuluishe pavuaye mutuilangane ne ntatu milondangane. Mukajende ne baledi bende bonso babidi bavua basame bonso mu tshikondo tshimue. Jonnie wakatata bikole bua kubatabalela bonso basatu. Mamuende kufuaye, biobi kuangata kabidi matuku a bungi bua mukajende ne tatuende kumvuabu bimpe. Padi Jonnie uvuluka tshikondo atshi, udi wamba ne: “Pamvua ndiumvua mufimpakane bikole, tshivua tshingambuluisha misangu yonso nkusambila Yehowa ne kumuambila yanyi yonso ya munda.” Yehowa wakapesha Jonnie bukole buvuaye nabu dijinga bua kunanukila. Muanetu Ronald, mukulu wa mu Bolivie, uvua pende mupete mukenji ne: mamuende uvua ne disama dia kansere. Wakafua panyima pa ngondo umue. Ntshinyi tshivua tshimuambuluishe tshikondo atshi? Udi wamba ne: “Kusambila Yehowa kuakangambuluisha bua kupumuna muoyo wanyi kumpala kuende ne kumuambila yanyi yonso ya munda. Ndi mujadike ne: udi ungumvua bimpe bitambe kupita muntu kayi yonso, kumpita ne meme muine.” Imue misangu, tudi mua kumvua malu matupite bukole peshi katuyi bamanye tshia kuamba mu disambila. Nansha nanku Yehowa udi utulomba bua kumusambila nansha biobi bitukolela bua kumvuija mutudi tudiumvua.​—Lomo 8:26, 27.

10. Anu mudibu baleje mu Ebelu 4:12, bua tshinyi kubala Bible ne kuelangana meji a bitudi tubalamu kudi ne mushinga?

¹⁰ Bakolesha ne mêyi a mu Bible. Paulo uvua mueyemene Dîyi dia Nzambi bua kupeta bukole ne busambi, tuetu petu tudi mua kumuidikija. (Lomo 15:4) Patudi tubala Dîyi dia Nzambi ne tuelangana meji a bitudi tubalamu, Yehowa udi mua kutuambuluisha ne nyuma wende muimpe bua tuetu kujingulula bimpe mudi malu atudi tubala mua kutuambuluisha. (Bala Ebelu 4:12.) Ronald utukavua batele au udi wamba ne: “Ndi ne disanka dia bungi dia mumvua mubange tshibidilu tshia kubala Bible dilolo dionso. Ntu ngelangana meji a ngikadilu ya Yehowa bikole ne bua mutuye wenzela bantu bende malu mu dinanga. Pantu ngenza nanku ntu mpetulula makanda.”

11. Mmushindu kayi uvua Bible mupeshe muanetu wa bakaji uvua mufuishe bukole?

¹¹ Patudi tuelangana meji a Dîyi dia Nzambi, netuikale tumona ntatu itudi nayi mu mushindu muimpe. Mona muvua Bible  muambuluishe mukaji mukamba kampanda uvua mufuishe. Mukulu mukuabu uvua mumuambile bua kubala mukanda wa Yobo bua kulongaye malu avua mua kumuambuluisha. Pavuaye muwubale, uvua muanji kutuadija kupisha Yobo bua ngelelu wende wa meji mubi. Uvua udifuanyikijila mu lungenyi wenda umubela ne: “Yobo wetu! Lekela kutuma meji anu ku ntatu yebe!” Kadi pashishe kuluaye kumona ne: yeye pende uvua wela meji anu bu Yobo menemene. Wakakajilula mmuenenu wende wa malu, yeye kupeta bukole bua kutantamena kanyinganyinga ka muvuaye mufuishe bayende.

12. Mmushindu kayi udi Yehowa utupesha bukole kupitshila kudi bena Kristo netu?

¹² Bakolesha kupitshila kudi bena Kristo netu. Mushindu mukuabu udi Yehowa ukolesha batendeledi bende nku diambuluisha dia bena Kristo nabu. Paulo wakafunda ne: uvua ne dijinga dikole dia “kukankamijangana” ne bena Kristo nende. (Lomo 1:11, 12) Mary utukadi batele mmunange kuikala munkatshi mua bena Kristo nende munangilamu. Udi wamba ne: “Yehowa uvua muntumine bena Kristo netu bavua kabayi nansha bamanye ntatu imvua nayi to. Bavua bangambila mêyi avua ankankamija anyi bamfundila makuabu, ke tshimvua natshi dijinga menemene. Bidi kabidi biambuluisha bua kuyukila ne bana betu ba bakaji bavua pabu bapitshile mu lutatu lua muomumue elu ne kumanya tshivuabu benze. Bakulu batu pabu benza bua ngikale ngumvua ne: ndi ne mushinga mu tshisumbu.”

13. Ntshinyi tshitudi mua kuenza bua kukankamijangana mu bisangilu bietu?

¹³ Muaba muimpe mutambe utudi mua kukankamijilangana mmu bisangilu bietu. Patudi tubuela mu bisangilu, mbimpe tuikale tukoleshangana ne mêyi mimpe a dinanga ne a dilejangana nawu dianyisha. Tshilejilu, dimue dituku kumpala kua bisangilu kutuadija, mukulu kampanda diende Peter uvua muambile muanetu wa bakaji mukuabu udi ne mulume kayi muena kuitabuja ne: “Bidi bitukankamija bikole patudi tukumona muaba eu. Misangu yonso udi ulua ne bana bebe basambombo badilongolole bimpe bua kuandamuna mu bisangilu.” Binsonji biakatengebela muanetu wa bakaji au mu mêsu bua dianyisha divuaye nadi bua mêyi au, kumuandamunaye ne: “Kuena mua kuikala mumanye dijinga dikole dimvua nadi dia kumvua dîyi adi lelu to.”

14. Mmunyi mudi mudimu wa buambi utuambuluisha?

¹⁴ Bakolesha ne mudimu wetu wa diyisha. Patudi tuyisha bantu bulelela bua mu Bible, bidi bituenza bimpe ne bitupa bukole, nansha bantu batuteleje peshi babenge. (Nsu. 11:25) Muanetu kampanda wa bakaji diende Stacy wakamona ne: mudimu wa diyisha udi ufila bukole. Pavuabu bipate muena mu dîku diabu mu tshisumbu, biakamubungamija bikole, kutuadijaye kudiebeja ne: ‘Kuvuaku bualu bukuabu bumvua mupange kuenza bua kumuambuluisha anyi?’ Bualu abu kabuvua bumumbuka mu lungenyi to. Ntshinyi tshivua tshimuambuluishe bua kutantamena kanyinganyinga kavuaye naku? Mudimu wa buambi! Pavuaye upatuka mu buambi, uvua utamba kutuma meji kudi bantu bavua ne dijinga dia diambuluisha diende. Udi wamba ne: “Mu tshikondo atshi, Yehowa wakampesha mulongi wa Bible uvua uya kumpala lukasa. Biakankankamija bikole. Bualu budi bungambuluishe bikole mmudimu wa buambi.”

15. Ntshinyi tshidi mêyi a Mary akulongesha?

¹⁵ Bamue badi mua kumona ne: nsombelu wabu kena ubapesha mushindu wa kudifila bikole mu buambi to. Biwikala umvua nanku, vuluka ne: Yehowa udi usanka paudi udifila muebe muudi mukokeshile. Tupingane ku tshilejilu tshia Mary. Pavuaye mumuangale muye muaba uvuabu bakula muakulu mukuabu, kavua udimona kabidi mukumbane bua kuenza amue malu to. Udi wamba ne: “Imue misangu, tshionso tshimvua ngenza nkuakula anu mu mêyi makese, kubadila muntu mvese, peshi kufila  trakte mu buambi.” Pavuaye udifuanyikija ne bakuabu bavua bakula muakulu au bimpe, uvua udimona kayi mukumbane to. Kadi wakashintulula ngelelu wende wa meji. Wakabanga kumona ne: Yehowa uvua mua kukuata nende mudimu nansha muvuaye kayi wakula muakulu au bimpe. Udi wamba ne: “Bulelela budi bupandisha mioyo ya bantu mbupepele, ne bobu abu ke budi bushintulula bantu.”

16. Ntshinyi tshidi mua kuambuluisha badi kabayi ne mushindu wa kupatuka pambelu kadi bikale ne dijinga dia kuyisha?

¹⁶ Yehowa udi umona dijinga ditudi nadi dia kuyisha ne udianyisha, nansha katuyi ne mushindu wa kupatuka pambelu. Udi mua kutupetesha mpunga wa kuyisha badi balua kutulama kumbelu bua mutudi tusama anyi baminganga. Tuetu tufuanyikija mudimu utudi tuenza mpindieu ne utuvua tuenza kumpala, bidi mua kututekesha mu maboko. Kadi tuetu bajingulule mushindu udi Yehowa utuambuluisha mpindieu, nebitupeshe bukole butudi nabu dijinga bua kutantamena lutatu kayi luonso ne disanka.

17. Bilondeshile Muambi 11:6, bua tshinyi mbimpe tutungunuke ne kuyisha nansha kakuyi muntu ututeleja?

¹⁷ Katuena bamanye mamiinu a bulelela atudi tukuna ikala mua kuela miji ne kubanga kukola to. (Bala Muambi 11:6.) Tshilejilu, muanetu Barbara udi ne bidimu 80 ne bia pa mutu utu uyisha pa tshibidilu ku telefone anyi ufundila bantu mikanda. Dimue dituku wakafunda mukanda, yeye kuelamu Tshibumba tshia Nsentedi tshia 1/3/2014 tshivua ne tshiena-bualu tshia ne: “Tshidi Nzambi mukuenzele.” Pakatumaye mukanda au kavua mumanye ne: uvua muye kumata mu bianza bia bena dibaka kampanda bakavua balekele buntemu to. Bakabala tshibejibeji atshi misangu ne misangu. Mulume kumvuaye anu bu ne: Yehowa uvua wakula nende buludiludi. Bobu kutuadija kubuela mu bisangilu, kushalabu babibuela pa tshibidilu ne kutuadijabu kabidi kuyisha, panyima pa bidimu bipite pa 27. Anji elabi meji muvuabi bikankamije Barbara ne bimupeshe bukole pavuaye mumone bipeta bimpe bia mukanda umue uvuaye mufunde au!

18. Ntshinyi tshitudi mua kuenza bua tuetu kupeta bukole bua kudi Nzambi?

¹⁸ Yehowa mmutulongoluele mishindu ya bungi ya kupetela bukole buende bua bungi. Patudi tulonda malu adiye mutulongoluele bu mudi disambila, Bible Dîyi diende, bena Kristo netu, ne mudimu wetu wa buambi, tudi tuleja ne: tudi bamueyemene bualu udi ne dijinga dia kutuambuluisha ne udi ne bukokeshi abu. Nunku tueyemenayi Tatu wetu wa mu diulu misangu yonso, yeye udi usanka “bua kuleja bukole buende kudi bantu badi ne muoyo mujima kudiye.”​—2 Kul. 16:9.