1-2. Umvuija mudi mêyi manene mua kulua ne mushinga wa bungi menemene kutudi padi nsombelu ushintuluka.

 DITUKU ditu mukaji ne mulume baselangana, batu bateleja muyuki wa dibaka wa mu Bible udibu babenzela, bawuteleja bimpe bimpe. Nansha mukadibu bamane kumanya mêyi manene a mu Bible adibu babumvuija au, kadi kubangila ku dituku adi, malu adibu babumvuija au adi apeta diumvuija dinene. Bua tshinyi? Bualu mpindieu nebaatumikile bu bena dibaka.

² Ke mudibi kabidi padi bena dibaka balua baledi. Imue misangu mu kupita kua bidimu bakadi bumvue miyuki ya bungi idi yakula bua dikolesha bana. Kadi mpindieu mibelu ya mu miyuki ayi idi ilua ne mushinga wa bungi menemene kudibu, bualu nebapete muana wa bobu kukolesha. Si mbujitu bunene be! Bushuwa, patu nsombelu ushintuluka, imue mvese itu ilua ne mushinga wa bungi menemene kutudi. Ke bualu kayi batendeledi ba Yehowa batu babala Mifundu minsantu ne belangana meji a malu adibu babala “matuku onso” a muoyo wabu, anu muvuabu bambile Bakalenge bena Isalele bua kuenza. ​—Dut. 17:19.

3. Netukonkonone malu kayi mu tshiena-bualu etshi?

³ Nuenu baledi bena Kristo, kulongesha bana benu malu a Yehowa ndiakalenga dikuabu dinene menemene dinudi nadi. Kadi pa kumbusha dibalongesha malu a Nzambi patupu, mbimpe nubalongeshe bua bamunange bikole. Ntshinyi tshinudi mua kuenza bua nuenu kubafikisha ku dimunanga? Mu tshiena-bualu etshi, netukonkonone mêyi manene a mu Bible anayi adi mua kunuambuluisha. (2 Tim. 3:16) Netumone kabidi mudi mibelu ya mu Bible miambuluishe bamue baledi bena Kristo pavuabu bayitumikile.

4. Ndimue dîyi dinene kayi didi mua kuambuluisha baledi bua kufikisha bana babu ku dinanga Yehowa? (Yakobo 1:5)

⁴ Dîyi dinene dia 1: Keba buludiki bua Yehowa. Lomba Yehowa bua akupeshe meji bua wambuluishe bana bebe bua bamunange. (Bala Yakobo 1:5.) Yeye ke udi mukumbane menemene bua kukupesha mibelu. Kudi malu a bungi adi atusaka bua kuamba nanku. Tuakule bua abidi. Bua kumpala, Yehowa udi ne dimonamona dia malu dia bungi menemene bua dikala muledi. (Mis. 36:9) Buibidi, mibelu mimpe ituye ufila itu anu yambuluisha bantu.​—Yesh. 48:17.

5. a) Mbintu kayi bidi bulongolodi bua Yehowa bupatule bua kuambuluisha baledi? b) Anu mudibi bileja mu filme, mushindu uvua muanetu wa balume au ne mukajende bakoleshe bana babu udi ukulongesha tshinyi?

⁵ Yehowa udi unupesha malongesha a bungi mangatshila mu Bible ku diambuluisha dia Dîyi diende ne dia bulongolodi buende. Malongesha aa adi mua kunuambuluisha bua nukoleshe bana benu, nubalongesha bua banange Yehowa. (Mat. 24:45) Tshilejilu, udi mua kupeta mibelu mimpe mu biena-bualu bia ne: “Diambuluisha bua bena mu mêku” bivuabu bapatula munkatshi mua bidimu bia bungi mu tshibejibeji tshia Tabulukayi! (Mu Mfualansa), kadi lelu bidi mu site wetu wa Enternete. Kudi kabidi filme ya bungi idi mu site wa jw.org eu ya diela bantu nkonko ne ya manaya bidi mua kuambuluisha baledi bua kutumikila mibelu ya Yehowa mu dikolesha dia bana babu. *​—Nsu. 2:4-6.

6. Ntshinyi tshidi tatu kampanda wamba bua buludiki budi Yehowa umupesha yeye ne mukajende ku diambuluisha dia bulongolodi buende?

⁶ Baledi ba bungi mbaleje dianyisha bua mudi Yehowa mubambuluishe kupitshila kudi bulongolodi buende. Tatu kampanda, diende Joe, udi wamba ne: “Kukolesha bana mu bulelela ki mbualu bupepele to. Meme ne mukajanyi tutu anu tusambila Yehowa bua atuambuluishe. Misangu ya bungi tuvua tumona ne: tshiena-bualu kampanda anyi filme kansanga mmufike pa dîba menemene bua kutuambuluisha bua tumone mua kupita ne nsombelu kampanda utuvua tutuilangana nende. Kukeba buludiki bua Yehowa ke  tshionso tshituvua tuenza misangu yonso.” Joe ne mukajende mbamone ne: biena-bualu abi ne filme ayi bidi bibambuluisha bua kusemena pabuipi ne Yehowa.

7. Bua tshinyi bidi ne mushinga bua baledi kuikala tshilejilu tshimpe kudi bana babu? (Lomo 2:21)

⁷ Dîyi dinene 2: Longesha ku tshilejilu tshiebe. Bana batu batangila baledi babu bikole, ne misangu ya bungi batu babidikija. Bushuwa, kakuena muledi udi mupuangane to. (Lomo 3:23) Nansha nanku, baledi ba meji badi benza muabu muonso bua kuikala tshilejilu tshimpe kudi bana babu. (Bala Lomo 2:21.) Tatu kampanda wakamba bua bana ne: “Badi bu bivuare bidi binua bintu bia mishindu yonso.” Udi wamba kabidi ne: “Nebatuambile bikala malu atudi tuenza kaayi apetangana ne bitudi tudienzeja bua kubalongesha.” Nunku tudi basue bua bana betu banange Yehowa. Kadi bidi bikengela tuleje ne: tuetu tudi bamunange bikole.

8-9. Malu adi Andrew ne Emma bambe adi akulongesha tshinyi?

⁸ Kudi mishindu ya bungi idi baledi mua kulongesha bana babu bua banange Yehowa. Mona tshidi muanetu wa balume wa bidimu 17, diende Andrew, wamba: “Misangu yonso baledi banyi bavua anu bandongesha ne: kusambila kudi ne mushinga wa bungi menemene. Dilolo dionso, tatuanyi uvua usambila nanyi, nansha meme mumane kusambila. Baledi banyi bavua bamvuluija ne: ‘Udi mua kuyukila ne Yehowa misangu bungi buudi musue.’ Mushindu udibu bandongeshe eu mmuenze bua ngangate disambila ne mushinga wa bungi menemene, lelu mbipepele bua meme kusambila Yehowa ne kumumona bu Tatu wa dinanga.” Baledi wetu, ikalayi bavuluke ne: dinanga dinudi banange Yehowa didi mua kuambuluisha bana benu bua bamunange pabu.

⁹ Tuakule bua tshilejilu tshikuabu tshia Emma. Pavua tatuende mulekele dîku, uvua mushiye mamuende ne mabanza mapite bungi. Emma udi wamba ne: “Misangu ya bungi mamu uvua upeta lutatu lua makuta, kadi uvua anu wakula bua mutu Yehowa utabalela batendeledi bende. Mvua mmona muvua nsombelu wende uleja muvuaye mutuishibue bushuwa ne: Yehowa udi utabalela bantu bende. Mamu uvua wenza bivuaye uyisha.” Dilongesha didi ne: “Baledi badi mua kulongesha bana ku tshilejilu tshiabu nansha mu nsombelu mikole.”​—Gal. 6:9.

10. Mpunga kayi ivua baledi bena Isalele nayi bua kuyukila ne bana babu? (Dutelonome 6:6, 7)

¹⁰ Dîyi dinene 3: Ikala uyukila ne bana bebe. Yehowa uvua muambile bena Isalele ba kale bua bikale ne tshibidilu tshia kulongesha bana babu malu ende. (Bala Dutelonome 6:6, 7.) Baledi abu bavua ne mpunga ya bungi munda mua dituku bua kuyukila ne bana babu ne kubasaka bua banange Yehowa. Tshilejilu, muana wa balume uvua wambuluisha tatuende munkatshi mua mêba a bungi bua kukuna bia pa madimi anyi kubinowa. Muana wa bakaji uvua yeye wambuluisha mamuende munkatshi mua mêba a bungi bua kutela bilamba anyi bintu bikuabu, ne bua kuenza midimu ya ku mbelu. Padi baledi ne bana babu benza midimu pamue, bidi bibambuluisha bua kuyukila malu a bungi a mushinga. Tshilejilu, badi mua kuakula bua buimpe bua Yehowa ne bua muvuaye wambuluisha dîku diabu.

11. Tela mpunga umue udi nende baledi bena Kristo bua kuyukila ne bana babu.

¹¹ Bikondo mbishintuluke. Mu matunga a bungi, baledi ne bana babu kabena ne mushindu wa kusomba pamue munda mua dituku to. Baledi badi mua kuikala ku mudimu, bana eku mu kalasa. Nunku baledi badi ne bua kukeba mpunga ya kuyukila ne bana babu. (Ef. 5:15, 16; Filip. 1:10)  Ntendelelu wa mu dîku ngumue wa ku mpunga eyi. Muanetu wa balume utshidi nsonga, diende Alexander, udi wamba ne: “Tatu utu ulongolola malu misangu yonso bua ntendelelu wa mu dîku, katu ulekela bua tshintu nansha tshimue tshitudie dîba dia kusomba pamue edi to. Patu ntendelelu wa mu dîku ujika, tutu tuyukidilangana bua malu makuabu a mushinga.”

12. Ntshinyi tshidi mfumu wa dîku ne bua kudienzeja bua kukumbaja mu ntendelelu wa mu dîku?

¹² Biwikala mfumu wa dîku, ntshinyi tshiudi mua kuenza bua ntendelelu wa mu dîku ikale usankisha bana bebe? Bua tshinyi kanuenaku mua kulonga ne bana benu mukanda wetu muimpe mupiamupia wa Shala ne muoyo kashidi! Dilonga mukanda eu didi dinupetesha mpunga muimpe menemene wa kuyukila nabu bilenga. Utu musue bua bana bebe bakuambile idibu nayi munda ne idi ibatonda, nunku tshikondo tshia ntendelelu wa mu dîku ki ntshikondo tshia kubamba anyi kubatandisha to. Bobu bamba bualu budi bubengangana ne mêyi manene adi mu Bible, kufiiki munda to. Kadi sanka bua mudibu bamba malu malelela adibu nawu mu muoyo, ne ubakankamije bua bikale bakula badilekelele. Wewe mumanye mudi bana bebe badiumvua menemene, neubambuluishe mu mushindu mutambe buimpe.

13. Mpunga kayi mikuabu idi baledi nayi bua kuambuluisha bana babu bua kusemena pabuipi ne Yehowa?

¹³ Nuenu baledi, kebayi mpunga munda mua dituku bua kuambuluisha bana benu bua basemene pabuipi ne Yehowa. Kanuindidi anu tshikondo tshinutu nulonga nabu Bible bua kushisha kubalongesha malu a Nzambi wetu wa dinanga to. Mona tshidi mamu kampanda, diende Lisa, muambe: “Tuvua tuyisha bana betu malu a Yehowa ku diambuluisha dia bintu bidiye mufuke. Pavua mbua wetu wenza tshintu tshivua tshisekesha bana betu, tuvua tubambila ne: bidi bileja mudi Yehowa muikale Nzambi wa disanka ne mmuenze bua tuikale ne disanka ne tuikale petu tusanka ne bintu bidi bitusekesha.”

14. Bua tshinyi bidi ne mushinga bua baledi kuambuluisha bana babu bua kusungula balunda bimpe? (Nsumuinu 13:20)

¹⁴ Dîyi dinene 4: Ambuluisha bana bebe bua basungule balunda bimpe. Dîyi dia Nzambi  didi dileja bimpe ne: balunda badi mua kutusaka bua kuenza malu mimpe anyi mabi. (Bala Nsumuinu 13:20.) Baledi, nudi bamanye balunda ba bana benu anyi? Nukadi batuilangane nabu ne bapitshishe nabu dîba pamue anyi? Ntshinyi tshinudi mua kuenza bua kuambuluisha bana benu bua badie bulunda ne bantu badi banange Yehowa? (1 Kol. 15:33) Bua kubambuluisha mushindu eu, bikila bamue bena Kristo badi mu malanda mimpe ne Yehowa bua balue mu dîku dienu bua nuenze nabu malu kampanda.​—Mis. 119:63.

15. Ntshinyi tshidi baledi mua kuenza bua kuambuluisha bana babu bua basungule balunda bimpe?

¹⁵ Tuakule bua tatu kampanda, diende Tony. Udi umvuija tshivuaye yeye ne mukajende benze bua kuambuluisha bana babu bua bapete balunda bimpe. Udi wamba ne: “Mu kupita kua bidimu, meme ne mukajanyi tuvua tubikila bana betu ba balume ne ba bakaji ba bidimu bishilangane ne ba nsombelu mishilangane. Tuvua tudia nabu ne tuenza nabu ntendelelu wetu wa mu dîku. Eu ke mushindu munene wa kufika ku dimanya bantu badi banange Yehowa ne bamuenzela mudimu ne disanka. Tuvua tuakidila batangidi ba bijengu, bamisionere, ne bantu bakuabu munda mua matuku. Malu abu mamonamona, tshisumi tshiabu, ne lungenyi luabu lua didipangisha malu bivua ne buenzeji buimpe menemene kudibu, biobi kubambuluisha bua kusemena pabuipi ne Yehowa.” Baledi wetu, ikalayi badisuike bua kuambuluisha bana benu bua basungule balunda bimpe.

16. Ntshinyi tshiwenza muanebe yeye wamba ne: kena musue kuenzela Yehowa mudimu?

¹⁶ Tutekabi ne: udi muenze muebe muonso bua kuambuluisha bana, kadi umue wa kudibu udi wamba ne: kena musue kuenzela Yehowa mudimu; ntshinyi tshiwenza? Kuambi ne: kuena muenze mudimu webe bimpe bu muledi to. Yehowa mmutupeshe tuetu bonso, pamue ne bana bebe, tshipedi tshia kudisunguila malu, tshidi tshituambuluisha bua kusungula bua kuenzela Nzambi mudimu anyi kubenga kumuenzelawu. Muanebe yeye mulekele Yehowa, kuteketshi mu maboko to, ikala anu mutekemene ne: dimue dituku nealukile.  Vuluka tshilejilu tshia muana mujimine. (Luka 15:11-19, 22-24) Nsongalume au wakapambuka, kuya kule menemene ne njila wa buakane; kadi ndekelu wa bionso wakalukila. Bamue bantu badi mua kuamba ne: “Atshi ntshilejilu tshifila patupu, bidi mua kuenzeka anyi?” Eyowa bidi mua kuenzeka! Ke tshivua tshienzekele nsongalume mukuabu, diende Elie.

17. Mmunyi mudi bualu bua Elie bukukankamija?

¹⁷ Elie udi wamba bua baledi bende ne: “Bavua benza muabu muonso bua nnange Yehowa ne Bible, Dîyi diende. Kadi pamvua tshitende, ngakabanga kutomboka.” Elie wakatuadija kuenza malu mabi mu musokoko, ubenga bionso bivua baledi bende benza bua kumuambuluisha bua kusemena pabuipi ne Yehowa. Pakumbukaye kuabu, wakaditua mu bikadilu bibi. Nansha nanku, kuvua misangu ivuaye uyukila malu a mu Bible ne umue wa ku balunda bende. Udi wamba ne: “Bu mumvua ntamba kuambila mulunda wanyi malu a Yehowa, ngakadimona nkadi ngela meji bua Yehowa. Ku kakese ku kakese, ntete ya bulelela bua mu Bible ivua baledi banyi badienzeje bua kukuna mu muoyo wanyi yakatuadija kukola bimpe bimpe.” Panyima pa matuku, wakalukila mu bulelela. * Ela meji bungi bua disanka divua baledi bende nadi bua muvuabu badienzeja bua kumulongesha ku buana buende bua kunanga Yehowa!​—2 Tim. 3:14, 15.

18. Ntshinyi tshiudi umvua bua baledi badi badienzeja bikole bua kulongesha bana babu bua kunanga Yehowa?

¹⁸ Baledi wetu, mbanupeshe diakalenga dia dikema, tuambe ne: dia kukolesha tshipungu tshipiatshipia tshia batendeledi ba Yehowa. (Mis. 78:4-6) Ki mmudimu mupepele to. Nunku tudi tunuela kalumbandi ne muoyo mujima bua munudi nuenza bionso bia kuenza, kanuyi nutshioka bua kuambuluisha bana benu! Nuenu nutungunuka ne kuenza muenu muonso bua kubambuluisha bua banange Yehowa, ne nubakolesha ne mibelu yende ne didimuija diende, nenuikale batuishibue ne: Tatu wetu wa mu diulu udi usanka.​—Ef. 6:4.