1. Ndipangadika kayi dinene didi bantu bonso ne bua kuangata?

 LELU bantu badi kumpala kua dipangadika dinene dia kuangata, dia kuditua ku tshia Yehowa, bamuangata bu Mukokeshi wa diulu ne buloba, anyi dia kuditua ku tshia muena lukuna wende mubi menemene, Satana diabolo. Muntu yonso udi ne bua kusungula luseke ludiye. Dipangadika diangatabu nedibambuluishe bua kupeta muoyo wa tshiendelele matuku atshilualua anyi kuwupangila. (Mat. 25:31-33, 46) Mu tshikondo tshia “dikenga dinene,” nebabatue tshimanyinu tshia lupandu anyi tshia dibutuka.​—Buak. 7:14; 14:9-11; Yeh. 9:4, 6.

2. a) Ebelu 10:35-39 udi utukankamija bua kuenza tshinyi? b) Mmunyi mudi mukanda wa Bukabuluibua utuambuluisha?

² Bala Ebelu 10:35-39. Wewe musungule bua kutua bukokeshi bua Yehowa mpanda, udi muangate dipangadika dimpe. Nunku udi ne dijinga dikole dia kuambuluisha bakuabu bua bangate pabu dipangadika dimpe. Bua bualu abu, udi mua kubambuluisha ne malu adi mu mukanda wa Buakabuluibua. Mukanda wa dikema eu udi uleja tshiafikila bantu badi baluisha Yehowa, uleja kabidi ne masanka apeta bantu badi batua bukokeshi buende mpanda. Mbimpe tukonkonone malu malelela a mushinga mukole aa. Kuakonkonona nekukoleshe didisuika dietu dia kutungunuka ne kuenzela Yehowa mudimu. Tudi kabidi mua kuambuluisha bakuabu ne malu atudi balonge bua bangate dipangadika dimpe, kabayi badishintulula.

3. Nkonko kayi ituandamuna mu tshiena-bualu etshi?

³ Mu tshiena-bualu etshi, netuandamune nkonko eyi: Mmalu kayi apeta bantu badi batua bukokeshi bua Nzambi mpanda? Ntshinyi tshiafikila bantu badi baditua ku tshia nyama wa luonji mukunze udibu bakuile mu mukanda wa Buakabuluibua?

4. Ntshisumbu kayi tshia bantu badi Yone mumone bikale ne Yezu mu diulu?

⁴ Mupostolo Yone mmumone mu tshikena kumona bisumbu bia bantu bibidi bitua bukokeshi bua Yehowa mpanda ne bipeta mabenesha a muoyo wa tshiendelele. Tshisumbu tshia kumpala ntshienza ne bantu 144 000. (Buak. 7:4) Mbabangatshile pa buloba bua kuenza mbulamatadi anyi Bukalenge pamue ne Yezu mu diulu. Buonso buabu pamue ne Yezu nebakokeshe buloba. (Buak. 5:9, 10; 14:3, 4) Anu mu tshikena kumona atshi, Yone mmubamone bimane ne Yezu pa Mukuna wa Siona.​—Buak. 14:1.

5. Ntshinyi tshienzekela bashadile ba ku bantu 144 000?

⁵ Katshia ku tshikondo tshia bapostolo too ne lelu, badi basungula bantu binunu bia bungi bua kukumbanabu bantu 144 000. (Luka 12:32; Lomo 8:17) Kadi mbambile Yone ne: anu bashadile anyi bantu bungi bukese ke bikala ne muoyo pa buloba ku matuku a ku nshikidilu. Kumpala kua dikenga dinene kutuadija, “Bashadile” aba nebapete “tshitampi” tshidi tshileja mudi Yehowa ubanyisha. (Buak. 7:2, 3; 12:17) Pashishe tshikondo kampanda mu dikenga dinene adi, bashadile abu nebangatshibue mu diulu bua kudisanga ne bantu bakuabu ba ku bantu 144 000 bakavua bafue ne lulamatu. Nebakokeshe pamue ne Yezu mu Bukalenge bua Nzambi.​—Mat. 24:31; Buak. 5:9, 10.

6-7. a) Ntshisumbu kayi tshia bantu tshidi Yone umona pashishe? Ntshinyi tshitudi mua kumanya bua bena mu tshisumbu etshi? b) Bua tshinyi Buakabuluibua nshapita wa 7 udi ne mushinga kudi bashadile ne kudi “musumba munene wa bantu”?

⁶ Panyima pa Yone mumane kumona tshisumbu tshia mu diulu, udi umona “musumba munene wa bantu.” Mbashilangane ne bantu 144 000 bualu bobu badi bungi kabuyi kubala. (Buak. 7:9, 10) Ntshinyi tshitudi mua kumanya bua bena mu tshisumbu etshi? Mbambile Yone ne: “Aba mbantu badi bafume mu dikenga dinene, ne mbasukule mizabi yabu, bayitokeshe mu mashi a Muana wa mukoko.” (Buak. 7:14) Papanduka bena mu “musumba munene wa bantu” eu mu dikenga dinene, nebasombele pa buloba apa ne nebapete masanka a dikema.​—Mis. 37:9-11, 27-29; Nsu. 2:21, 22; Buak. 7:16, 17.

⁷ Nansha bobu batusungule bua kuya mu diulu anyi bua kushala pa buloba, tudi ne bua kuikala batuishibue ne: netudimuene dikumbana dia malu adibu bambe mu Buakabuluibua nshapita wa 7 eu. Netshikale tshikondo tshia disanka dia bungi bua bisumbu bionso bibidi bia bantu ba Nzambi ebi! Netuikale ne disanka dia bungi bua mutudi basungule bua kutua bukokeshi bua Yehowa mpanda. Ntshinyi tshikuabu tshidi mukanda wa Buakabuluibua utuambila bua dikenga dinene?​—Mat. 24:21.

8. Dikenga dinene nedituadije mushindu kayi? Ntshinyi tshienza bantu ba bungi?

⁸ Anu mutuvua bamone mu tshiena-bualu tshishale, bena tshididi bakadi pa kuluisha Babilona Munene udi nsangilu wa bitendelelu bia dishima bia pa buloba bujima. (Buak. 17:16, 17) Dimuluisha edi nedikale ntuadijilu wa dikenga dinene. Abi nebienze bua bantu ba bungi bangate dipangadika dia kubuela mu ntendelelu mulelela anyi? Tòo, kadi Buakabuluibua nshapita 6 udi uleja ne: mu tshikondo tshikole atshi, bantu badi kabayi batendelela Yehowa nebanyemene mu ndongoluelu wa malu a tshididi ne wa bungenda mushinga bua kukeba bukubi. Badi bafuanyikija ndongoluelu eyi ne mikuna. Bu muabengabu kuditua  ku Bukalenge bua Nzambi, Yehowa neabamone bu baluishi bende.​—Luka 11:23; Buak. 6:15-17.

9. Mmushindu kayi wamueneka bantu ba Yehowa bashilangane ne bantu bakuabu mu tshikondo tshia dikenga dinene? Ntshinyi tshienzeka?

⁹ Bushuwa, batendeledi ba Yehowa ba lulamatu nebamueneke bashilangane ne bantu bakuabu mu tshikondo tshikole menemene tshia dikenga atshi. Anu bobu ke batungunuka ne kuenzela Yehowa Nzambi mudimu pa buloba apa, babenga kutua “nyama wa luonji” mpanda. (Buak. 13:14-17) Didisuika diabu dia kuenza nanku nedijule baluishi ba Yehowa luonji. Ntshinyi tshienzeka? Matunga madisange nealuishe bantu ba Nzambi pa buloba bujima. Bible udi ubikila dibaluisha diabu edi ne: buluishi bua Goga wa ku Magoga.​—Yeh. 38:14-16.

10. Anu mudi Buakabuluibua 19:19-21 uleja, ntshinyi tshienza Yehowa paluishabu bantu bende?

¹⁰ Ntshinyi tshienza Yehowa paluishabu bantu bende bibi nanku? Udi utuambila ne: “tshiji tshianyi tshikole netshiteme.” (Yeh. 38:18, 21-23) Buakabuluibua nshapita wa 19 udi umvuija tshienzeka pashishe. Yehowa udi utuma Muanende bua kukuba bantu bende ne kutshimuna bena lukuna babu. Yezu kakubaluisha nkayende to, neikale ne “biluilu bia mu diulu,” mmumue ne: banjelu ba lulamatu pamue ne bantu 144 000. (Buak. 17:14; 19:11-15) Mvita eyi neyenze tshinyi? Neyibutule bantu bonso ne malongolodi onso bidi biluisha Yehowa butubutu!​—Bala Buakabuluibua 19:19-21.

11. Mbualu kayi bua pabuabu bua mushinga mukole menemene buenzeka?

¹¹ Anji elabi meji mumvua bena lulamatu bikala pa buloba papandukabu ku kabutu ka bena lukuna bonso ba Nzambi! Netshikale tshikondo tshia disanka dia bungi be! Nansha muikalaku diela dia mbila mikole ya disanka mu diulu bua dibutuka dia Babilona Munene, nekuikale bualu bukuabu buafila disanka dia bungi menemene. (Buak. 19:1-3) Ke bualu bunene menemene bua mu mukanda wa Buakabuluibua, bua “dibaka dia Muana wa mukoko.”​—Buak. 19:6-9.

12. Anu mudi Buakabuluibua 21:1, 2 uleja, dibaka dia Muana wa mukoko nedienzeke dîba kayi?

¹² Dibaka edi nedienzeke dîba kayi? Bantu bonso 144 000 nebikale mu diulu pikala mvita ya Armagedone pa kubudika. Kadi atshi ki ntshikondo tshienzeka dibaka dia Muana wa mukoko to. (Bala Buakabuluibua 21:1, 2.) Nedienzeke panyima pa mvita ya Armagedone mimane kujika ne bena lukuna ba Nzambi bonso bamane kubutudibua.​—Mis. 45:3, 4, 13-17.

13. Dibaka dia Muana wa mukoko nedienzele bantu badidi ditangila tshinyi menemene?

¹³ Dibaka dia Muana wa mukoko nedienzele bantu badidi ditangila tshinyi menemene? Anu mutu dibaka dituangaja mulume ne mukaji pamue, ke mudibi kabidi bua dibaka dia Mukalenge Yezu ne bantu 144 000, badi benza “mukaji musela.” Tshibilu tshinene netshibanjije mbulamatadi mupiamupia wakokesha buloba munkatshi mua bidimu 1 000.​—Buak. 20:6.

14-15. Buakabuluibua nshapita wa 21 udi ufuanyikija bantu 144 000 ne tshinyi? (Tangila tshimfuanyi tshia pa tshizubu.)

¹⁴ Pashishe Buakabuluibua nshapita wa 21 udi ufuanyikija bantu 144 000 ne tshimenga tshilenga menemene tshidi Bible ubikila ne: “Yelushalema Mupiamupia.” (Buak. 21:2, 9) Tshimenga etshi ntshiashila pa mabue a bishimikidi 12 ne mbafundapu “mêna 12  a bapostolo 12 ba Muana wa mukoko.” Bua tshinyi bualu ebu budi bukoka ntema ya Yone? Bualu udi umona dîna diende difunda pa dimue dia ku mabue au. Diakalenga dinene be!​—Buak. 21:10-14; Ef. 2:20.

¹⁵ Tshimenga tshia mu tshimfuanyi etshi katshiena tshimueneka bu tshimenga kayi tshionso etshi to. Tshidi ne mutshi munene wa or mukezuke, biibi 12 bia mabue a busanga, bimanu ne bishimikidi bilenga, bienza ne mabue a mushinga mukole, ne tshidi bunene ne bule bukumbanyine bimpe menemene. (Buak. 21:15-21) Kadi bidi bimueneka ne: kudi tshintu tshidi tshipangike! Mona tshidi Yone wamba pashishe: “Tshivua mumone ntempelo munda muatshi to, bualu Yehowa Nzambi Wa Bukole Buonso udi ntempelo watshi, ne Muana wa mukoko kabidi. Tshimenga etshi katshiena dijinga ne dîba anyi ne ngondo bua kutshikenkesha to, bualu butumbi bua Nzambi buvua butshikenkesha, ne muendu watshi uvua Muana wa mukoko.” (Buak. 21:22, 23) Bantu badi benza Yelushalema mupiamupia eu badi ne mushindu wa kufika muaba udi Yehowa buludiludi. (Eb. 7:27; Buak. 22:3, 4) Nunku Yehowa ne Yezu ke badi ntempelo mu tshimenga etshi.

16. Mmalu kayi apeta bantu munkatshi mua bidimu tshinunu biakokesha Bukalenge bua Nzambi?

¹⁶ Padi bela manyi bela meji a tshimenga etshi, badi bumvua disanka dia bungi. Kadi aba badi ne ditekemena dia kusombela pa buloba badi pabu ne bua kuela meji a tshimenga etshi. Munkatshi mua bidimu tshinunu biakokesha Bukalenge bua Nzambi, Yelushalema mupiamupia neatuadile bantu masanka bungi kabuyi kubala. Yone udi uamona apueka bu “musulu wa mâyi a muoyo,” ne ku nseke yawu yonso ibidi kuikale “mitshi ya muoyo” idi ipatula mabeji bua “kuondopa nawu bisamba.” (Buak. 22:1, 2) Bantu bonso bikala ne muoyo nebapete mushindu wa kutshionkomoka ne bintu bimpe bikalabu nabi. Bantu bonso badi batumikila nebavuijibue bapuangane ku kakese ku kakese. Masama kaakuikalaku kabidi, nansha bintu bidi bisama, ne binsonji bia dibungama kabiakuikalaku kabidi to.​—Buak. 21:3-5.

17. Anu mudi Buakabuluibua 20:11-13 uleja, mbanganyi bapeta masanka a mu Bukokeshi bua bidimu tshinunu?

¹⁷ Mbanganyi bapeta malu mimpe a dikema aa? Bantu ba kumpala mbena mu musumba munene bapanduka ku Armagedone pamue ne bana bonso bikala mua kuledibua mu buloba  bupiabupia. Kadi Buakabuluibua nshapita wa 20 udi kabidi ulaya ne: bantu badi bafue nebabishibue. (Bala Buakabuluibua 20:11-13.) Bantu “bakane” ba lulamatu bavua bafue kale pamue ne bantu ‘bavua kabayi bakane,’ mmumue ne: aba bavua kabayi bapete mpunga muimpe wa kulonga malu a Yehowa, nebapetulule muoyo pa buloba apa. (Bien. 24:15; Yone 5:28, 29) Abi bidi biumvuija ne: nebabishe muntu yonso ku lufu mu Bukokeshi bua bidimu tshinunu anyi? Tòo. Bantu bavua meji mabi masake bua kubenga kuenzela Yehowa mudimu kumpala kua bobu kufua, kabakubabisha ku lufu nansha. Dîba divuabu mua kumuenzela mudimu nedikale dimane kupita, ne bavua baleje muvua kupeta muoyo mu Mparadizu pa buloba kakuyi kubakumbanyine.​—Mat. 25:46; 2 Tes. 1:9; Buak. 17:8; 20:15.

18. Malu neikale bishi ku ndekelu kua bidimu 1 000?

¹⁸ Ku ndekelu kua bidimu 1 000, bantu bonso bikala ne muoyo pa buloba nebapetulule muoyo mupuangane. Mpekatu wa mu Adama kakuenzela kabidi muntu bibi to. (Lomo 5:12) Nebumbushe mulawu wa mpekatu wa Adama bua kashidi. Nunku abi bidi biumvuija ne: bantu bikala pa buloba ‘nebapetulule muoyo’ bualu nebikale bapuangane ku ndekelu kua bidimu 1 000.​—Buak. 20:5.

19. Bua tshinyi bidi bikengela ne: diteta dia ndekelu dikalaku?

¹⁹ Tudi bamanye ne: Yezu wakashala ne lulamatu ne muoyo mutoke nansha pavua Satana mumutete. Kadi bantu bapuangane bonso nebikale badiakaje bua kuenza nanku papeshabu Satana mpunga wa kubateta anyi? Yonso wa kudibu neadiandamuine lukonko elu papatulabu Satana mu dijimba ku ndekelu kua bidimu 1 000. (Buak. 20:7) Bantu bashala ne lulamatu mu diteta dia ndekelu nebapete muoyo wa tshiendelele ne ndekelu wa bionso nebapete budikadidi bulelela. (Lomo 8:21) Bantu badi balua bantomboji nebabutudibue pamue ne Diabolo ne bademon bende bua kashidi.​—Buak. 20:8-10.

20. Udi umvua bishi bua mêyi a buprofete adi mu mukanda wa Buakabuluibua?

²⁰ Mmunyi muudi udiumvua panyima pa dikonkonona malu adi mu mukanda wa Buakabuluibua eu mu tshikoso? Kuenaku umvua disanka dia bungi dia kumona mua kukumbanyina mêyi a dikema a buprofete aa anyi? Kabienaku bikupetesha dijinga dia kuambila bakuabu bua badisange netu mu ntendelelu mukezuke wa Nzambi wetu anyi? (Buak. 22:17) Malu atudi bakonkonone enzeka mu matuku atshilualua aa mmatutue ku muoyo bikole, nunku tudi tudiumvua basakibue bua kuamba anu bu mupostolo Yone ne: “Amen! Luaku, Mukalenge Yezu.”​—Buak. 22:20.