Badi tshimfuanyi tshia biluilu bia mu diulu bivua biambuluishe pabi mu dibutuka dia Yelushalema, nebiambuluishe kabidi mu dibutuka dia bulongolodi bubi bua Satana ku Armagedone. Eu ngumvuilu muakajilula. Bua tshinyi bivua bikengela kumuakajilula?

Kumpala kua tshidimu tshia 607 kumpala kua Yezu, Yehowa wakaleja Yehezekele mu tshikena kumona malu avua ne bua kuenzeka mu Yelushalema kumpala kua kumubutulabu. Mu tshikena kumona atshi, Yehezekele wakamona malu mabi a bungi avua enzekamu. Pashishe wakamona bantu basambombo, muntu ne muntu muikale ne ‘tshilonda tshiende mu tshianza tshiende,’ mmumue ne: uvua ne tshia mvita tshia kutayisha natshi mu tshianza tshiende. Kuvua kabidi muntu mukuabu uvua nabu ‘muvuale bilamba bia lin,’ muikale ne ‘kalondo ka mâyi a mukanda ka mufundi.’ (Yehezekele 8:6-12; 9:2, 3) Bakambila muntu eu bua kupitshila mu tshimenga ne ‘kufunda tshimanyinu pa mpala ya bantu badi bapumuna muoyo ne badi badila bualu bua malu a bundu adi bakuabu benza munkatshi muatshi.’ Pashishe, bakambila bantu basambombo bavua ne bia mvita bua kushipa bantu bonso ba mu tshimenga bavua kabayi ne tshimanyinu. (Yehezekele 9:4-7) Mmalongesha kayi atudi mua kupeta mu tshikena kumona etshi? Muntu udi ne kalondo ka mâyi a mukanda a mufundi nganyi?

Yehezekele wakamona tshikena kumona etshi mu 612 kumpala kua Yezu. Tshivua mulayi wa buprofete uvua mukumbane musangu wa kumpala panyima pa bidimu bitanu, pavua Yehowa muanyishile tshiluilu tshia bena Babilona bua kubutula Yelushalema. Mu mushindu eu, Yehowa wakakuata mudimu ne bena  Babilona bua kunyoka bantu bende bavua babenge kumutumikila. (Yelemiya 25:9, 15-18) Kadi netuambe tshinyi bua bena Yuda bavua benza malu mimpe bavua kabayi banyisha malu mabi onso avua enzeka mu tshimenga? Yehowa uvua muenze bua ne: bapanduke.

Mu tshikena kumona, Yehezekele kavua mutue muntu nansha umue tshimanyinu tshiena dîna anyi muenze pende mudimu wa kubutula tshimenga to. Kadi banjelu ke bavua balombola dibutuka dia Yelushalema. Nunku mulayi wa buprofete eu udi utuambuluisha bua kumona malu adi enzeka mu diulu. Yehowa uvua muambile banjelu bende bua kulongolola dibutuka dia bantu babi ne kuenza bua bantu bakane bapanduke. *

Mulayi wa buprofete eu neukumbane kabidi mu matuku atshilualua. Tuvua tuamba ne: muntu udi ne kalondo ka mâyi a mukanda ka mufundi uvua tshimfuanyi tshia bela manyi batshidi ne muoyo pa buloba. Tuvua tuamba kabidi ne: bavua batua bantu tshimanyinu bua kupanduka pavuabu bateleja lumu luimpe lutudi tuyisha ne baluitaba. Kadi matuku mashale aa, mbimueneke patoke ne: bivua bikengela bua tuetu kushintulula mushindu utuvua tumvuija mulayi wa buprofete eu. Tudi balonge ne: mu Matayi 25:31-33, Yezu ke udi ulumbuluisha bantu. Neenze bualu ebu mu matuku atshilualua mu tshikondo tshia dikenga dinene. Mu tshikondo atshi, bantu bangataye bu mikoko, nebapanduke, ne bantu bangataye bu mbuji, nebabutudibue.

Nunku tshikena kumona tshia Yehezekele tshidi tshitulongesha tshinyi? Tshidi ne malongesha atanu aa:

1.  Kumpala kua kubutulabu Yelushalema, Yehezekele ne Yelemiya ne Yeshayi bakadimuija bantu bua malu avua ne bua kufikila tshimenga etshi. Bavua anu bu batentekedi. Lelu, Yehowa udi wenza mudimu ne kasumbu kakese ka bela manyi bua kulongesha bantu bende ne kudimuija bakuabu kumpala kua dikenga dinene kutuadija. Bushuwa, bantu ba Nzambi bonso, mmumue ne: bena mudimu ba Kristo, badi benza mudimu eu wa kudimuija bantu.​—Matayi 24:45-47.

2.  Yehezekele kavua mutue bantu bavua ne bua kupanduka tshimanyinu to. Nansha bantu ba Nzambi lelu kabena batua bantu bapanduka tshimanyinu to. Badi bayisha patupu bantu ne babadimuija bua malu enzeka mu matuku atshilualua. Mudimu wa diyisha udi wenzeka pa buloba bujima eu, udi wenzeka ne diambuluisha dia banjelu.​—Buakabuluibua 14:6.

3.  Bantu bavua bapanduke tshikondo tshia Yehezekele kabavua babatue tshimanyinu tshiena dîna pa mpala yabu to. Lelu, bantu bapanduka mu matuku atshilualua kabakubatua pabu tshimanyinu tshiena dîna to. Ntshinyi tshidi bantu ne bua kuenza bua kupanduka ku dikenga dinene? Padibu bumvua didimuija, badi ne bua kulonga bua kuidikija Kristo, kudilambula kudi Nzambi, ne kuyisha lumu luimpe bua kuambuluisha bana babu ne Kristo. (Matayi 25:35-40) Mu tshikondo tshia dikenga dinene, bantu aba nebapete tshimanyinu, mmumue ne: nebabasungule bua kupanduka.

4.  Muntu udi ne kalondo ka mâyi a mukanda udi tshimfuanyi tshia Yezu. Mu tshikondo tshia dikenga dinene, Yezu neatue bena mu musumba munene tshimanyinu padiye ubangata bu mikoko. Pashishe nebapete mushindu wa kusomba kashidi pa buloba apa.​—Matayi 25:34, 46. *

5.  Lelu, bantu basambombo badi ne bia mvita bia kutayisha nabi badi tshimfuanyi tshia biluilu bia mu diulu bidi bilombola kudi Yezu. Nebibutule mu katupa kîpi emu bisamba ne nebijikije malu mabi onso.​—Yehezekele 10:2, 6, 7; Buakabuluibua 19:11-21.

Malongesha atudi bapete mu tshikena kumona etshi adi atuambuluisha bua kuikala ne dishindika dia ne: Yehowa kakubutula bantu bakane pamue ne bantu babi to. (2 Petelo 2:9; 3:9) Malongesha aa adi kabidi atuvuluija ne: mudimu wa diyisha udi ne mushinga wa bungi mu tshikondo tshietu etshi. Muntu yonso udi dijinga ne kumvua didimuija kumpala kua nshikidilu kulua!​—Matayi 24:14.