1, 2. a) Bua tshinyi mêyi a mu Dutelonome 6:4 mmamanyike bikole? b) Bua tshinyi Mose wakamba mêyi aa?

MUNKATSHI mua bidimu nkama ya bungi, bena Yuda bavua batela mêyi a mu Dutelonome 6:4 mu disambila dia pa buadi divuabu benza. Bavua babikila disambila edi ne: Shema. Shema mmuaku wa kumpala wa mu mvese eu mu tshiena Ebelu. Bena Yuda ba bungi bavua benza disambila edi dituku dionso mu dinda ne dilolo bua kuleja muvuabu balamate anu Nzambi nkayende.

² Mêyi aa adi mu muyuki wa ndekelu uvua Mose muenzele tshisamba tshia Isalele. Mu tshidimu tshia 1473 kumpala kua Kristo, tshisamba tshia Isalele tshivua mu buloba bua Moaba, pabuipi ne kusabuka musulu wa Yadene ne kubuela mu Buloba bulaya. (Dutelonome 6:1) Mose uvua mulombole bantu munkatshi mua bidimu 40, ne uvua musue bua bikale ne dikima bua kutantamena ntatu ivuabu mua kupeta. Bavua ne bua kueyemena Nzambi wabu Yehowa ne kuikala ne lulamatu kudiye. Nunku, mêyi a ndekelu a Mose akabakankamija bua kuenza nunku. Mose mumane kutelela  bantu Mikenji dikumi ne mikenji mikuabu ya Yehowa, wakabavuluija mêyi a mushinga adi mu Dutelonome 6:4, 5. (Bala.)

3. Nnkonko kayi ituandamuna mu tshiena-bualu etshi?

³ Bena Isalele bavua bamanye ne: Yehowa Nzambi wabu udi “Yehowa umue.” Bena Isalele ba lulamatu bavua batendelela Nzambi umue, Nzambi wa bankambua babu. Kadi, bua tshinyi Mose wakabavuluija ne: Yehowa Nzambi wabu udi “Yehowa umue”? Ndipetangana kayi didi pankatshi pa bualu ebu ne dinanga Nzambi wetu ne muoyo wetu wonso ne anyima wetu yonso ne bukole buetu buonso? Mmunyi mudi mêyi adi mu Dutelonome 6:4, 5 atutangila petu lelu?

4, 5. a) Tshiambilu tshia ne: “Yehowa umue” tshidi tshiumvuija tshinyi? b) Mmunyi mudi Yehowa mushilangane ne nzambi ya bisamba bikuabu?

⁴ Nzambi wa pa buende. Tshiambilu tshia ne: “Yehowa umue” tshidi tshiumvuija ne: Yehowa udi Nzambi wa pa buende, kakuena nzambi mukuabu udi diatshimue nende anyi udi bu yeye to. Bua tshinyi Mose wakamba mêyi aa? Kavua muambe mêyi aa bua kulongesha bantu muvua busatu bunsantu bubi to. Kadi uvua muambe bua kuleja ne: Yehowa m’Mufuki wa diulu ne buloba ne Mukokeshi wa bintu bionso. Yeye nkayende ke Nzambi mulelela, ne kakuena nzambi mukuabu udi bu yeye to. (2 Samuele 7:22) Nunku, mêyi a Mose avua avuluija bena Isalele ne: bavua ne bua kutendelela anu Yehowa nkayende. Kabavua ne bua kuidikija bantu bavua babanyunguluke bavua batendelela nzambi ya dishima ya bungi milume ne mikaji to. Bantu abu bavua bitabuja ne: nzambi yabu ivua ne bukokeshi pa bimue bifukibua.

⁵ Tshilejilu, bena Ejipitu bavua batendelela nzambi dîba Râ, nzambi mukaji wa diulu Nout, nzambi wa buloba Geb, nzambi wa Nile Hapi, ne bavua batendelela nyama ya bungi. Yehowa wakaleja ne: uvua mupite nzambi ya dishima eyi kule ne kule pavuaye mutume bipupu dikumi. Nzambi munene wa bena Kanâna uvua Bâla, nzambi wa dishima uvua bena Kanâna bitabuja ne: uvua mufuke muoyo. Bavua kabidi bitabuja ne: uvua nzambi wa diulu ne mvula ne tshipepele tshikole. Miaba ya bungi, bantu bavua beyemena Bâla bua abakube. (Nomba 25:3) Bena Isalele bavua ne bua kuvuluka ne: Nzambi wabu, “Nzambi mulelela,” ngua pa buende. Udi “Yehowa umue.”​—Dutelonome 4:35, 39.

6, 7. a) Muaku “umue” udi kabidi umvuija tshinyi? b) Mmunyi muvua Yehowa muleje muvuaye “umue”?

⁶ Nzambi wa lulamatu udi kayi ushintuluka. Muaku “umue” udi mu tshiambilu tshia ne: “Yehowa umue” udi kabidi umvuija ne: malu adiye mulongolole ne adiye wenza nga kueyemena misangu yonso. Yehowa Nzambi kena mutapuluke ne kena ushintuluka to. Utu misangu yonso Nzambi wa kueyemena, udi kayi ushintuluka, muena lulamatu ne mulelela. Tshilejilu, wakalaya Abalahama ne: tunkanunuina tuende tuvua ne bua kusomba mu Buloba bulaya. Yehowa wakenza bishima bia bungi  binene bua kukumbaja mulayi wende eu. Bidimu 430 panyima pa Yehowa mumane kufila mulayi au, malu avuaye mulongolole kaavua mashintuluke to.​—Genese 12:1, 2, 7; Ekesode 12:40, 41.

⁷ Bidimu nkama ya bungi pashishe, Yehowa wakabikila bena Isalele ne: bantemu bende ne kubambilaye ne: ‘Ndi muomumue. Kumpala kuanyi kakuvua Nzambi mukuabu muenjibue, ne panyima panyi kenaku nansha umue.’ Yehowa wakaleja kabidi patoke ne: malu avuaye mulongolole bua kuenza kaavua mashintuluke pakasakidilaye ne: ‘Meme ndi muomumue misangu yonso.’ (Yeshaya 43:10, 13; 44:6; 48:12, NWT) Bushuwa, bena Isalele bavua ne diakalenga dinene dia kuenzela Nzambi uvua kayi ushintuluka ne wa kueyemena misangu yonso mudimu. Tudi ne diakalenga dia muomumue lelu.​—Malaki 3:6; Yakobo 1:17.

8, 9. a) Ntshinyi tshidi Yehowa ulomba batendeledi bende bua kuenza? b) Mmunyi muvua Yezu muleje ne: mêyi a Mose avua ne mushinga?

⁸ Eyowa, Mose uvua muvuluije bena Isalele ne: mushindu uvua Yehowa mubanange ne ubakuba kawuvua mua kushintuluka to. Nunku, Yehowa uvua mutekemene bua bamulamate anu yeye nkayende ne bua bamunange ne muoyo wabu wonso ne anyima wabu yonso ne bukole buabu buonso. Baledi bavua ne bua kulongesha bana babu malu a Yehowa misangu yonso ivuabu bapeta mpunga bua bana kutendelelabu pabu anu Yehowa.​—Dutelonome 6:6-9.

⁹ Yehowa katu ushintulula malu adiye mulongolole bua kuenza to, nunku kakushintulula mikenji idiye muelele batendeledi bende balelela to. Tuetu basue bua ntendelelu wetu asankishe Yehowa, tudi ne bua kumulamata anu yeye ne kumunanga ne muoyo wetu wonso ne lungenyi luetu luonso ne bukole buetu buonso. Yezu wakamba ne: eu ke mukenji udi ne mushinga wa bungi. (Bala Mâko 12:28-31.) Tumonayi mutudi mua kuleja ku bienzedi bietu ne: “Yehowa Nzambi wetu udi anu Yehowa umue.”

10, 11. a) Mmu mushindu kayi mutudi mua kutendelela anu Yehowa nkayende? b) Mmunyi muvua bansongalume bena Ebelu bavua mu Babilona baleje muvuabu balamate anu Yehowa nkayende?

¹⁰ Yehowa ke Nzambi wetu umue ne umuepele. Tudi tumulamata yeye nkayende patudi tumutendelela anu yeye. Katuena mua kutendelela nzambi mukuabu nansha umue peshi kubueja ngenyi anyi bilele bia dishima patudi tutendelela Yehowa to. Kena bu kanzambi kadi ku mutu kua tunzambi tukuabu tuonso anyi kadi ne bukole bua bungi kutupita to. Yeye ke Nzambi mulelela. Tudi ne bua kutendelela anu Yehowa nkayende.​—Bala Buakabuluibua 4:11.

¹¹ Mu mukanda wa Danyele badi bakula bua bansongalume bena Ebelu aba: Danyele, Hananiya, Mishaele ne Azaliya. Bakaleja muvuabu balamate anu Yehowa pavuabu babenge kudia biakudia bivua kabiyi bimpe bua batendeledi ba Yehowa. Balunda basatu ba Danyele aba bakabenga kukukuila lupingu lua tshiamu tshia or luvua Nebukadenesâ muenze. Buabu bobu, Yehowa uvua pa muaba wa kumpala. Bavua bamulamate ne muoyo mujima.​—Danyele 1:1–3:30.

12. Patudi tulamata anu Yehowa nkayende, ntshinyi tshitudi ne bua kudimukila?

 ¹² Yehowa udi ne bua kuikala pa muaba wa kumpala mu nsombelu wetu. Tuetu basue kumulamata anu yeye nkayende, tudi ne bua kuikala ne budimu bua bintu bikuabu kabiangatshi muaba wende. Bintu ebi bidi mua kuikala binganyi? Mu Mikenji dikumi, Yehowa wakamba ne: bantu bende kabavua ne bua kutendelela nzambi mikuabu to. Kabavua ne bua kutendelela lupingu kayi luonso to. (Dutelonome 5:6-10) Lelu, kudi mishindu ya bungi ya kukukuila mpingu, ne imue ya kudiyi idi mua kuikala mikole bua kuyijingulula. Kadi Yehowa ki mmushintulule mikenji yende to. Utshidi anu “Yehowa umue.” Tumonayi mutudi mua kuepuka ditendelela dia mpingu lelu.

13. Mmalu kayi atudi mua kutuadija kunanga bikole kupita mutudi banange Yehowa?

¹³ Kolosayi 3:5 (bala) udi wakula bua bintu bidi mua kunyanga bulunda bukole butudi badie ne Yehowa. Tudi tumona ne: lukuka ludi lupetangana ne ditendelela dia mpingu. Mushindu kayi? Tuetu ne dijinga dikole dia kupeta tshintu kampanda bu mudi makuta a bungi anyi bintu bia mushinga mukole, dijinga edi didi mua kulombola nsombelu wetu anu bu nzambi kampanda wa bukole. Malu mabi onso adibu batele mu Kolosayi 3:5 adi apetangana ne lukuka, ne lukuka ludi mushindu kampanda wa ditendelela mpingu. Nunku, tuetu ne dijinga dikole dia malu aa, tudi mua kutuadija kuananga bikole kupita mutudi banange Nzambi. Dîba adi, Yehowa kakuikala “Yehowa umue” kutudi to. Katuena basue bua bualu ebu butufikile musangu nansha umue to.

14. Ndidimuija kayi divua mupostolo Yone mufile bua dinanga dietu dia Nzambi?

¹⁴ Mupostolo Yone wakakula bua bualu bua muomumue. Wakadimuija ne: muntu yeye munange bintu bia pa buloba, mmumue ne: “majinga a mubidi, majinga a mêsu, ne didileja bua bintu bia mu nsombelu,” “dinanga dia Tatu kadiena munda muende” to. (1 Yone 2:15, 16) Nunku, tudi ne bua kudikonkonona misangu yonso bua kumona ni tudi banange bintu bia pa buloba. Tudi mua kumona ne: tudi batuadije kukokibua ku dijikija dia lutetuku anyi kudi bantu ne mishindu ya mvuadilu ne ya didilengeja bia mu bulongolodi ebu. Peshi tudi mua kuikala basue kuenza “malu manene” pa kukeba bua kulonga tulasa tutumbuke. (Yelemiya 45:4, 5) Bulongolodi bupiabupia bukadi pabuipi menemene. Nunku, tudi ne bua kuvuluka mêyi a mushinga avua Mose muambe. Tuetu bumvue ne bitabuje ne muoyo mujima ne: ‘Yehowa, Nzambi wetu, udi biende Yehowa umue,’ netumulamate anu yeye nkayende ne netumuenzele mudimu mu mushindu udiye musue.​—Ebelu 12:28, 29.

15. Bua tshinyi Paulo uvua muvuluije bena Kristo ne: Nzambi udi “Yehowa umue”?

¹⁵ Tshiambilu tshia ne: “Yehowa umue” tshidi tshituambuluisha bua kumvua ne: Yehowa mmusue bua batendeledi bende bikale mu buobumue ne bikale ne tshipatshila tshia muomumue mu nsombelu wabu. Mu tshisumbu tshia bena Kristo ba kumpala muvua bena Yuda, bena Greke, bena Lomo ne bantu ba mu matunga makuabu. Bavua ne nsombelu ne bibidilu  bishilangane, ne malu avuabu banange avua mashilangane. Ke bualu kayi bivua bikole bua bamue ba kudibu kuitaba mushindu mupiamupia wa kutendelela Nzambi anyi kulekela malu avuabu benza kumpala. Ke bualu kayi Paulo wakabavuluija ne: bena Kristo badi ne Nzambi umue Yehowa.​—Bala 1 Kolinto 8:5, 6.

16, 17. a) Mmulayi kayi wa buprofete udi wenda ukumbana mu matuku etu aa, ne mbipeta kayi bidi bimueneke? b) Ntshinyi tshidi mua kunyanga buobumue buetu?

¹⁶ Netuambe tshinyi bua tshisumbu tshia bena Kristo lelu? Muprofete Yeshayi wakamba ne: ‘Mu tshikondo tshia ku ndekelu kua matuku,’ bantu ba mu bisamba bionso bavua ne bua kudisangisha pamue bua kutendelela Yehowa. Bavua ne bua kuamba ne: ‘Yeye neatulongeshe njila yende, ne netuendele mu misesu yende.’ (Yeshaya 2:2, 3, NWT) Tudi ne disanka patudi tumona mudi mulayi wa buprofete eu wenda ukumbana lelu! Bana betu ba balume ne ba bakaji badi bafumina miaba mishilangane, bakula miakulu mishilangane ne badi ne bibidilu bishilangane. Nansha nanku, tudi tutendelela Yehowa mu buobumue. Kadi, bu mutudi bashilangane bikole, ntatu idi mua kumueneka.

¹⁷ Tshilejilu, mmunyi muudi udiumvua bua bana betu ba balume ne ba bakaji badi ne  bibidilu bishilangane ne biebe? Muakulu wabu, mvuadilu wabu, mushindu wabu wa dienza malu ne biakudia biabu bidi mua kuikala bishilangane bikole ne biebe. Udiku ubepuka ne utamba kupitshisha dîba dia bungi ne bantu badi ne bibidilu bu biebe anyi? Mmunyi muudi udiumvua bua bakulu ba muaba uudi musombele badi bakunyi kuudi anyi ba dikoba dikuabu peshi badi ne bibidilu bikuabu? Tuetu katuyi badimuke, tudi mua kulekela dishilangana edi ditunyanga ne dinyanga buobumue buetu.

18, 19. a) Mmubelu kayi udi mu Efeso 4:1-3? b) Ntshinyi tshitudi mua kuenza bua tshisumbu kuikalatshi mu buobumue?

¹⁸ Mmunyi mutudi mua kuepuka ntatu eyi? Paulo wakapesha bena Kristo bavua basombele mu Efeso, tshimenga tshia bubanji tshivua ne bantu ba miaba mishilashilangane mubelu uvua ne bua kubambuluisha. (Bala Efeso 4:1-3.) Paulo uvua mutele ngikadilu bu mudi budipuekeshi, bupole, lutulu ne dinanga. Ngikadilu eyi idi bu makunji makole adi enza bua nzubu imane. Kadi bua kulama nzubu bimpe, bidi bilomba kabidi kuenza mudimu mukole. Paulo uvua musue bua bena Kristo ba mu Efeso benze mudimu mukole “bua kulama buobumue bua kudi nyuma.”

¹⁹ Tuetu bonso tudi ne bua kuenza muetu muonso bua kulama buobumue bua tshisumbu. Mmunyi mutudi mua kuenza nanku? Tshia kumpala, tudi ne bua kudienzeja bua kupeta ngikadilu ivua Paulo mutele eyi: budipuekeshi, bupole, lutulu ne dinanga ne kuyileja kabidi. Tshibidi, tudi ne bua kudienzeja bikole bua kukuba “tshisuikidi tshia ditalala.” Dibenga kupetangana ku mêyi didi bu mitanta mikese idi miedibue mu buobumue buetu, nunku tudi ne bua kudienzeja bikole bua kumbusha dibenga kupetangana ku mêyi edi bua kulama ditalala ne buobumue munkatshi muetu.

20. Mmunyi mutudi mua kuleja ne: tudi bamanye ne: ‘Yehowa, Nzambi wetu, udi biende Yehowa umue’?

²⁰ ‘Yehowa, Nzambi wetu, udi biende Yehowa umue.’ Mêyi aa adi ne bukole bua bungi! Divuluija edi divua dikoleshe bena Isalele bua kunanukila mu ntatu pakabuelabu mu Buloba bulaya. Mêyi au adi mua kutukolesha petu bua kupanduka ku dikenga dinene ne kutuambuluisha bua kubuela mu Mparadizu mu matuku atshilualua. Tutungunukayi ne kulamata anu Yehowa nkayende. Tudi ne bua kumunanga ne kumuenzela mudimu ne muoyo wetu wonso ne lungenyi luetu luonso ne bukole buetu buonso, ne tudi ne bua kudienzeja bikole bua kulama ditalala ne buobumue munkatshi muetu. Tuetu batungunuke ne kuenza malu aa, Yezu neatuangate bu mikoko ne netumone mudi mêyi ende aa akumbana: “Luayi, nuenu badi Tatu wanyi mubeneshe, nupiane Bukalenge buvuabu banulongoluele katshia ku ntuadijilu kua buloba.”​—Matayi 25:34.