1, 2. a) Leja mudi bena panu benda batapulukangana. b) Netuandamune nkonko kayi mu tshiena-bualu etshi?

MUANETU wa bakaji kampanda wa ku Mputu wa kuinshi udi uvuluka nsombelu wende wa kale, wamba ne: “Katshia ku buana buanyi, mvua mmona anu malu mabi. Ke meme kukina malu a tshididi a mu ditunga dietu, kutua ku tshia bantu bavua basue kuashintulula. Munkatshi mua bidimu bia bungi, mvua ne muena dianyi mukuabu wa balume uvua teroriste anyi muena malu a tshinyangu.” Muanetu wa balume mukuabu wa mu Afrike wa kuinshi udi pende umvuija tshivuaye munangile malu a tshikisu wamba ne: “Buanyi meme, tshisa tshietu tshivua tshipite bisa bikuabu, ke meme kubuela mu tshimue tshisumbu tshia tshididi. Bavua batulongesha bua kushipa baluishi betu ne mafuma, kushipa too ne bena mu tshisa tshietu bavua batua bisumbu bikuabu bia tshididi mpanda.” Muanetu wa bakaji mukuabu udi ku Mputu wa pankatshi udi wamba ne: “Mvua ngelelangana meji mabi, ne mvua mukine muntu yonso wa tshisamba tshikuabu anyi uvua kayi nanyi mu tshitendelelu tshimue.”

² Meji avua nawu bana betu basatu aba ke adi nawu bantu ba bungi lelu. Mangumba a tshikisu a bakebi ba dipanda adi enda avula, bisumbu bia tshididi bienda biabulukangana, ne bena mu matunga a bungi mbakine benyi badimu. Anu mukavua Bible muambe, bantu  ba mishindu yonso ‘kabena ne lungenyi lua kumvuangana’ mu matuku a ku nshikidilu aa to. (2 Tim. 3:1, 3) Bu mudi bena panu benda batapulukangana, mmunyi mudi bena Kristo mua kulama buobumue buabu? Mushindu uvua Yezu mupite ne nsombelu kampanda mu bidimu lukama bia kumpala pavua bimvundu bia tshididi bisombeshe bantu kaseke udi mua kutulongesha malu a bungi. Tuandamunayi nkonko minene isatu eyi: Bua tshinyi Yezu uvua mubenge kubuelakana mu mangumba a tshididi? Mmunyi muvuaye muleje ne: batendeledi ba Nzambi kabena ne bua kubuelakana mu malu a tshididi? Mmunyi muvua Yezu muleje ne: kuenzela bakuabu malu ne tshikisu ki nkuimpe to?

3, 4. a) Mmalu kayi avua bena Yuda ba mu tshikondo tshia Yezu batekemene? b) Mmunyi muvuabi bilenge bayidi ba Yezu?

³ Bena Yuda ba bungi bavua Yezu uyisha bavua bajinga bikole bua kupeta dipanda kudi bena Lomo. Bazelote, anyi bena Yuda bavua banange buena ditunga bikole, bavua basaka bantu ku dikeba dipanda. Bazelote ba bungi bavua balonda ngenyi ya Yudasa wa mu Galela uvua Masiya wa dishima wakapambuisha bantu ba bungi mu bidimu lukama bia kumpala. Josèphe, mumanyi muena Yuda wa malu a kale, udi wamba ne: Yudasa eu “uvua usaka bena ditunga ku ditomboka, wamba bavua bitaba bua kufuta bena Lomo tshitadi ne: mbena buôwa.” Bena Lomo bakamushipa. (Bien. 5:37) Bamue Bazelote bakafika too ne ku dienza malu ne tshikisu bua kupeta dipanda divuabu bakeba.

⁴ Pa kumbusha Bazelote abu, bena Yuda bonso bavua bindile ne muoyo mujima bua Masiya alue kulongolola malu a tshididi. Bavua bindile bua Masiya atuadile tshisamba tshiabu butumbi ne atshiumbushe ku bukokeshi bua bena Lomo. (Luka 2:38; 3:15) Bantu ba bungi bavua bela meji ne: Masiya uvua ne bua kujadika bukalenge pa buloba mu Isalele. Pavuaye wenza nanku, bena Yuda miliyo ya bungi bavua baye ku babende bavua ne bua kupingana kuabu. Vuluka muvua Yone mubatiji muebeje umue musangu ne: “Wewe ke Yeye udi ulua anyi tudi ne bua kuindila mukuabu?” (Mat. 11:2, 3) Pamuapa Yone uvua musue kumanya bikalabi ne: muntu mukuabu ke uvua ne bua kupikula bena Yuda. Pashishe, Yezu mumane kubishibua ku lufu, wakapetangana ne bayidi babidi mu njila wa ku Emause; bakamba pabu ne: bavua batekemene bua Masiya kupikula Isalele. (Bala Luka 24:21.) Panyima pa matuku, bapostolo ba Yezu bakamuebeja ne: “Mukalenge, udi upingajila Isalele bukalenge tshikondo etshi anyi?”​—Bien. 1:6.

5. a) Bua tshinyi bantu ba mu Galela bakasua kuteka Yezu mukalenge? b) Mmunyi muvua Yezu muakaje ngelelu wabu wa meji?

⁵ Kakuyi mpata, malu avua bena Yuda batekemene bua Masiya akumbaje akasaka bena mu Galela bua kujinga kuteka Yezu mukalenge. Pamuapa bavua bela meji ne: Yezu uvua ne bua kuikala mfumu wa pa buende bualu uvua ngamba-malu wa dipoko, wondopa babedi, ne udiisha too ne bantu bavua ne nzala. Yezu mumane kudiisha bantu balume batue ku 5 000, bantu bakakema bikole, yeye kujingulula tshivuabu basua kuenza. Bible udi wamba ne: “Bu muvua Yezu mumanye ne: bavua bakeba kulua kumukuata bua kumuteka mukalenge, wakumbuka kabidi kuyaye ku mukuna anu yeye nkayende.” (Yone 6:10-15) Dituku diakalonda, bantu abu bakavua pamuapa batukije. Ke Yezu kubumvuija tshivua mudimu wende menemene. Uvua mulue bua kuambuluisha bantu mu nyuma, ki nku mubidi to. Wakabambila ne: “Kanuenji mudimu bua biakudia bidi binyanguka to, kadi enzayi mudimu bua biakudia bidi bishala bua muoyo wa tshiendelele.”​—Yone 6:25-27.

6. Mmunyi muvua Yezu muleje patoke ne: kavua ukeba bukokeshi mu malu a tshididi pa buloba? (Tangila tshimfuanyi tshia ntuadijilu tshia tshiena-bualu.)

⁶ Matuku makese kumpala kua Yezu kufua,  wakajingulula ne: bamue bayidi bende bavua batekemene bua yeye kujadika bukalenge pa buloba mu Yelushalema. Wakabapesha tshilejilu tshia mina bua kuakaja meji abu au. Mu tshilejilu etshi, “muntu . . . wa mu dîku dia bantu banene,” mmumue ne: Yezu, uvua ne bua kuenza luendu lua matuku a bungi. (Luka 19:11-13, 15) Yezu wakaleja kabidi bakokeshi ba bena Lomo muvuaye kayi ubuelakana mu malu a tshididi. Pontio Pilato wakakonka Yezu ne: “Wewe udi Mukalenge wa bena Yuda anyi?” (Yone 18:33) Pamuapa nguvena eu uvua utshina ne: Yezu uvua mua kusaka bantu ku ditombokela bena Lomo. Yezu wakandamuna ne: “Bukalenge buanyi ki mbua pa buloba ebu to.” (Yone 18:36) Kavua musue kubuelakana mu malu a tshididi to, bualu Bukalenge buende buvua ne bua kuikala bua mu diulu. Wakambila Pilato ne: mudimu wende pa buloba uvua wa “kumanyisha bulelela.”​—Bala Yone 18:37.

7. Bua tshinyi ki mbipepele bua kubenga kutua mangumba a tshididi mpanda nansha munda munda?

⁷ Anu bu Yezu, patudi tumanya bimpe menemene tshidi mudimu wetu, katuakutua mangumba a tshididi mpanda nansha munda munda to. Kadi ki mbipepele to. Mutangidi wa tshijengu kampanda udi wamba ne: “Bantu ba muaba utudi badi benda anu bakeba kushintulula malu. Bantu badi ne lungenyi lua buena muetu, ne ba bungi badi bitaba ne muoyo mujima ne: bantu badibu basue bobu bakokesha, nsombelu wabu nealengele. Diakalenga, bena Kristo netu mbalame buobumue buabu bualu badi bayisha lumu luimpe lua Bukalenge bikole. Badi batekemena bua Nzambi alue kujikija malu mabi ne ntatu idibu batuilangana nayi.”

8. Fila tshilejilu tshia muvua bena Yuda ba mu bidimu lukama bia kumpala bamona kasuba.

⁸ Malu mabi adi enzeka atu atamba kusaka bantu bua kubuela mu malu a tshididi. Mu matuku a Yezu, difutshisha bantu bitadi ke diakasaka bantu ba bungi bua kubuela mu malu a tshididi. Mu bulelela, Yudasa muena Galela wakatombokela bena Lomo bualu bavua bafunda muntu yonso ku mikanda bua ikale ufuta bitadi. Bavua bafutshisha bantu bavua ku bukokeshi bua bena Lomo bitadi bia bungi bua bintu bivuabu nabi, bua bitupa bia maloba, bua nzubu, ne bua bintu bikuabu; munkatshi muabu muvua bantu bavua bateleja Yezu. Bu muvua balambuishi ba bitadi banange mishiku bikole, bena Yuda bavua bamona kasuba. Bamue balambuishi ba bitadi bavua bapesha bakokeshi bena Lomo makuta bua babapeshe bukokeshi bua bungi, pashishe bavua benza mudimu ne bukokeshi abu bua kulua babanji. Zakayi uvua mfumu wa balambuishi ba bitadi ba mu Yeliko wakalua mubanji bua makuta avuaye udia  bantu. (Luka 19:2, 8) Pamuapa balambuishi ba bitadi bakuabu bakalua pabu babanji mu mushindu au.

9, 10. a) Mmunyi muvua baluishi ba Yezu bakeba kumubueja mu malu a tshididi? b) Diandamuna dia Yezu didi ditulongesha tshinyi? (Tangila tshimfuanyi tshia ntuadijilu tshia tshiena-bualu.)

⁹ Baluishi ba Yezu bakamuteta bua aleje luende luseke mu tshilumbu tshia difuta bitadi bua kumukuata mu buteyi. “Tshitadi” tshivuabu bakuila tshivua tshia ndenaliyo umue uvua bena Lomo bafutshisha bantu bavuabu bakokesha. (Bala Matayi 22:16-18.) Bena Yuda bavua bakine tshitadi etshi bikole bualu tshivua tshileja ne: bavua ku bukokeshi bua bena Lomo. “Bena dia Helode” bavua batete Yezu abu bavua batekemene ne: yeye mubenge difuta bitadi, bavua bamuamba ne: uvua utombuesha bantu. Kadi yeye muambe ne: bivua bikengela kufuta bitadi, bantu bavua balekela kumulonda.

¹⁰ Yezu uvua mudimuke bua kubenga kutua ku luseke lumue anyi ku lukuabu. Wakamba ne: “Nufute Kaisa bintu bia Kaisa, kadi nufute Nzambi bintu bia Nzambi.” (Mat. 22:21) Yezu uvua mumanye bimpe ne: balambuishi ba bitadi bavua badia mishiku bikole. Kavua musue bua bualu ebu bumubueje mu ditanaji to. Kadi wakadifila bikole bua kuleja bantu ne: anu Bukalenge bua Nzambi ke buajikija ntatu yabu. Nunku, mmushile bayidi bende bonso tshilejilu tshia kulonda. Kabena ne bua kubuelakana mu malu a tshididi nansha bua kabingila kayi to. Bena Kristo badi bakeba Bukalenge bua Nzambi ne buakane buende. Kabena ne bua kuleja mudi mapangadika a bena tshididi mikale mimpe anyi mabi, peshi kuakula bibi bua malu mabi adibu benza to.​—Mat. 6:33.

11. Mmushindu kayi muimpe utudi mua kuluisha malu mabi?

¹¹ Bantemu ba Yehowa ba bungi mbafike ku dilekela malu a tshididi avuabu banange kumpala. Muanetu wa bakaji kampanda wa mu Grande-Bretagne udi wamba ne: “Pangakajikija tulasa tua iniversite tua malu a mu nsombelu wa bantu, ngakabanga kujinga bua kushintulula malu. Mvua musue kuakuila manême etu tuetu bantu bafiike, bualu bavua batuenzele malu mabi a bungi. Nansha mumvua ntshimuna bilumbu bia bungi, mvua anu ndiumvua bibi. Tshivua mumanye ne: bua kujikija kansungansunga ka makoba, bidi bikengela kumbusha malu adi akakebesha mu mioyo ya bantu to. Kadi pangakatuadija kulonga Bible, ngakamona ne: bivua bikengela ntuadije kumbusha kansungansunga mu wanyi muoyo. Muanetu wa bakaji kampanda mutoke ke wakangambuluisha ne lutulu luonso. Lelu ndi mpanda-njila wa pa tshibidilu mu tshisumbu tshia muakulu wa tumama, ne ndi ndienzeja bua kuyisha bantu ba mishindu yonso.”

12. ‘Nduevene’ kayi luvua Yezu muambile bayidi bende bua kudimukila?

¹² Mu matuku a Yezu, bamfumu ba bitendelelu bavua batamba kudibueja mu malu a tshididi. Mukanda kampanda udi wamba ne: “Bena Yuda bavua mu tusumbusumbu tua malu a Nzambi tuvua tufuanangane ne bisumbu bia tshididi bia lelu.” (La vie quotidienne en Palestine au temps de Jésus) Ke bualu kayi Yezu wakadimuija bayidi bende ne: “Kangulayi mêsu; nudimukile luevene lua Bafalese ne luevene lua Helode.” (Mâko 8:15) Pavua Yezu mutele Helode uvua mua kuikala wakula bua bena dia Helode. Bafalese bavua batua bena Yuda mpanda mu malu a tshididi bua bumbuke ku bukokeshi bua bena Lomo. Mukanda wa Matayi udi uleja ne: Yezu wakambila kabidi bayidi bende bua badimukile Basadoke. Bobu bavua basue bua bena Lomo bikale anu bakokesha bualu bavua babapesha bukokeshi bua bungi. Yezu wakadimuija bayidi bende ne muoyo mujima bua kudimukila malongesha anyi luevene lua bisumbu bisatu ebi. (Mat. 16:6, 12) Yezu wakafila didimuija edi matuku makese panyima pa bantu bamane kukeba bua kumuteka mukalenge.

13, 14. a) Mmunyi muvua malu a tshididi ne a Nzambi makebeshe tshikisu ne malu mabi? b) Bua tshinyi ki mbimpe kuenza malu ne tshikisu nansha padibu batuenzela malu mabi? (Tangila tshimfuanyi tshia ntuadijilu tshia tshiena-bualu.)

 ¹³ Padi bitendelelu bidibueja mu malu a tshididi, malu a tshikisu adi mua kuenzeka bipepele. Yezu wakalongesha bayidi bende bua kubenga kubuelakana mu malu a nunku. Ke bumue bua ku malu avua masake bamfumu ba bakuidi ne Bafalese bua kuelela Yezu tshifufu bua kumushipa. Bavua bamumona bu muluishi wabu mu malu a Nzambi ne a tshididi. Bakamba ne: “Tuetu bamulekele utungunuka nunku, bantu bonso nebamuitabuje, ne bena Lomo nebalue, nebangate muaba wetu ne tshisamba tshietu.” (Yone 11:48) Nunku, muakuidi munene Kayifa wakangata malu mu bianza bua kushipa Yezu.​—Yone 11:49-53; 18:14.

¹⁴ Kayifa wakatuma basalayi butuku bua kukuata Yezu. Yezu uvua mumanye tshifufu atshi, ke bualu kayi pavuaye udia ne bapostolo bende bua musangu wa ndekelu, wakabambila bua bangate miele ya mvita. Miele ibidi ivua mikumbane bua kubapesha dilongesha dia mushinga. (Luka 22:36-38) Butuku abu, Petelo wakangata muele, kutapaye umue wa ku bantu bavua balue kukuata Yezu. Kakuyi mpata, uvua ne tshiji bualu bavua balue kukuata Yezu kayi ne tshivuaye muenze. (Yone 18:10) Kadi Yezu wakambila Petelo ne: “Pingaja muele webe wa mvita muaba wawu, bualu muntu yonso udi wambula muele wa mvita, neafue ku muele wa mvita.” (Mat. 26:52, 53) Dilongesha dia mushinga divua Yezu mufile edi didi dipetangana ne bualu buvuaye mulombe mu disambila mêba makese kumpala butuku abu, bua ne: kabena ne bua kuikala ba pa buloba. (Bala Yone 17:16.) Anu Nzambi ke udi mukumbane bua kujikija malu mabi.

15, 16. a) Mmunyi mudi Dîyi dia Nzambi diambuluishe bena Kristo bua kuepuka bilumbu? b) Ndishilangana kayi didi Yehowa umona pankatshi pa bena panu ne bantu bende?

¹⁵ Muanetu wa bakaji wa ku Mputu wa kuinshi utukadi batele, wakapeta dilongesha adi. Udi wamba ne: “Ndi mumone ne: tshikisu katshitu tshilela malu makane to. Bantu ba bungi batu benza malu ne tshikisu batu batuilangana ne lufu. Bakuabu batu bashala ne tunyinganyinga. Ndi ne disanka dia bungi bua mudi Bible mundongeshe ne: anu Nzambi ke udi mua kujikija malu mabi pa buloba. Ke bualu bundi nnyisha bantu kukadi bidimu 25.” Muanetu wa balume wa mu Afrike wa kuinshi au mmulekele difuma, muangate “muele wa mvita wa nyuma,” mmumue ne: Dîyi dia Nzambi, bualu udi uyisha bantu nende mukenji wa ditalala, nansha bobu ba mu tshisa kayi. (Ef. 6:17) Pakalua muanetu wa bakaji wa ku Mputu wa pankatshi au Ntemu wa Yehowa, bakamusela kudi muanetu wa tshisa tshivuaye mukine kumpala. Bana betu basatu aba mbashintuluke bualu bavua basue kuidikija Kristo.

¹⁶ Mbimpe tushintuluke petu anu bu bobu! Bible udi ufuanyikija bukua bantu ne mbuu udi usampuka kayi mua kubatama, bualu kabena ne ditalala to. (Yesh. 17:12; 57:20, 21; Buak. 13:1) Padi eku malu a tshididi ajula bantu luonji, abatapulula, ne abafikisha ku dienza malu ne tshikisu, tuetu tudi balame ditalala ne buobumue buetu. Padi Yehowa umona mudi bena panu batapuluke, udi usanka bikole bua mudi bantu bende mu buobumue.​—Bala Sefanya 3:17.

17. a) Leja mishindu isatu itudi mua kulama buobumue buetu. b) Mbualu kayi butualonga mu tshiena-bualu tshialonda?

¹⁷ Tudi balonge ne: bua kulama buobumue buetu, tuenze malu manene asatu aa: 1) Tutekemene bua Bukalenge bua Nzambi bua mu diulu bulue kujikija malu mabi, 2) tubenge kubuelakana mu malu a tshididi, ne 3) tubenge malu a tshikisu. Kadi misangu mikuabu, meji mabi adi mua kuluisha buobumue buetu. Tshiena-bualu tshialonda netshituleje mutudi mua kupita bimpe ne lutatu elu anu bu bena Kristo ba mu bidimu lukama bia kumpala.