Uvuaku mubale bibejibeji bia Tshibumba tshia Nsentedi bishale ebi bimpe menemene anyi? Nanku, anji tangila ni udi mua kuandamuna nkonko idi ilonda eyi:

Mmalu kayi anayi atudi mua kuenza bua kuakaja ngimbilu wetu?

Tudi ne bua kuimana bimpe, babandishe mukanda wa misambu kuulu. Tudi ne bua kukoka mieyelu bikole. Patudi tukangula mukana bikole ne tuimba ne dîyi dikole, nunku dîyi dietu nediumvuike bimpe.​—w17.11, dib. 5.

Ntshinyi tshidi tshitusankisha bua miaba ivuabu bateke misoko ya kunyemena mu Isalele ne bua njila ivua ifikishamu?

Kuvua misoko ya kunyemena isambombo miabanya mu Isalele, ne njila ivua ifikishamu ivua milongolola bimpe. Nunku muntu uvua mua kufika mu musoko wa kunyemena ne lukasa kakuyi lutatu.​—w17.11, dib. 14.

Bua tshinyi dipa dia Nzambi dia tshia kupikulangana natshi tshia Yezu ndipa ditambe buimpe ditudi bapete?

Dipa adi didi dikumbaja dijinga dietu dia kutungunuka ne kuikala ne muoyo, ne ditupikula ku mpekatu ne ku lufu. Bu muvua Nzambi munange bana ba Adama bikole, wakafila Yezu bua bualu buetu patutshivua benji ba mpekatu.​—wp17.6, dib. 6-7.

Mmunyi muvua Misambu 118:22 mudianjile kuakula bua dibishibua dia Yezu?

Bantu kabakitaba ne: Yezu uvua Masiya to, ne bakamushipa. Bua yeye kulua “dibue dinene dia mu ditumba,” uvua ne bua kubishibua ku lufu.​—w17.12, dib. 9-10.

Mulongo wa bankambua ba Masiya uvuaku ulonda bukenji bua buanabute anyi?

Kudi misangu ivua mulongo wa bankambua ba Yezu ulonda bukenji bua buanabute, kadi kabivua nanku misangu yonso to. Tshilejilu, Davidi kavua muanabute wa Yishai to; kadi uvua nkambua wa Masiya.​—w17.12, dib. 14-15.

Mu Bible mudi mêyi kayi manene adi atangila malu a makanda a mubidi?

Bilondeshile Mikenji ya Mose, bavua bateka bantu bavua ne masama wabu muaba. Bantu bavua ne bua kuowa mâyi pavuabu balenga tshitalu. Mikenji ivua ilomba kabidi bua bantu kujibikila bunyawu. Bavua ne bua kutengula muana dituku dia muanda mukulu dia diledibua diende, bualu divua dituku ditambe buimpe divua mashi mua kukama lukasa.​—wp18.1, dib. 7.

Bua tshinyi ki mbibi bua muena Kristo kudinanga mu mushindu muakanyine?

Tudi ne bua kunanga mukuetu mutudi badinange. (Mâko 12:31) Balume badi ne “kunanga bakaji babu bu mibidi yabu bobu bine.” (Ef. 5:28) Kadi muntu udi mua kudinanga kunekesha yeye kayi mutangile bimpe.​—w18.01, dib. 23.

Ngamue malu kayi atudi mua kuenza bua kukola mu nyuma?

Tudi ne bua kulonga Dîyi dia Nzambi, kuelangana meji a malu adimu, ne pashishe kutumikila malu atudi tulonga. Tudi kabidi ne bua kulekela nyuma muimpe ulombola meji etu ne muoyo wetu, ne tudi ne bua kuitaba diambuluisha dia bakuabu ne dianyisha dionso.​—w18.02, dib. 26.

Bua tshinyi katuena mua kukeba kumanya malu adi matuindile kumpala ku diambuluisha dia lubuku lua mitoto anyi dia dimona malu atshilualua?

Kudi malu a bungi atudi katuyi ne bua kuenzela nanku. Kadi bualu bunene budi ne: Bible udi ukandika lubuku.​—wp18.2, dib. 4-5.

Tuetu bamane kuitaba dibikila dia kuya kudia kua muntu, tshitudi ne bua kuenza ntshinyi?

Tuetu bamane kuitaba dibikila dia kuya kua muntu, tudi ne bua kunemeka dîyi dietu. (Mis. 15:4) Katuena ne bua kulua kubenga dibikila adi tshianana tshianana to. Muntu udi mutubikile au udi mua kuikala muditatshishe bikole bua kulamba biakudia biende.​—w18.03, dib. 18.

Balume badi ne midimu badi mua kulongela tshinyi ku tshilejilu tshia Timote?

Timote uvua bushuwa uditatshisha bua bantu bakuabu ne uteka malu a mu nyuma pa muaba wa kumpala. Uvua wenza mudimu wa tshijila bikole ne utumikila malu avuaye ulonga. Wakatungunuka ne kudibidija ne uvua weyemena nyuma wa Yehowa. Bakulu ne bantu bakuabu badi mua kuidikija tshilejilu tshiende.​—w18.04, dib. 13-14.