1. Bilondeshile Kolosayi 2:4, 8, Satana utu wenza tshinyi bua kukuata meji etu?

SATANA mmusue bua tuele Yehowa nyima. Bua bualu abu, udi ukeba bua kushintulula ngelelu wetu wa meji, tuambe ne: kukuata lungenyi luetu bua tuikale tuenza malu mudiye musue. Udi utufikisha ku ditaba malu kampanda anyi utushima ku diambuluisha dia malu atu atusankisha anu bua tumulonde.​—Bala Kolosayi 2:4, 8.

2-3. (a) Bua tshinyi mbimpe tuteye ntema ku didimuija didi mu Kolosayi 2:8? (b) Netumone tshinyi mu tshiena-bualu etshi?

² Satana udi bushuwa mua kutupambuisha anyi? Eyowa! Vuluka, Paulo kavua mufundile bantu bavua kabayi bena kuitabuja didimuija didi mu Kolosayi 2:8 to. Uvua mudifundile bena Kristo bela manyi a nyuma muimpe. (Kolos. 1:2, 5) Tshikondo atshi Satana uvua mua kupambuisha bena Kristo, nansha lelu kabidi udi mua kutupambuisha bibi be! (1 Kol. 10:12) Bua tshinyi? Bualu bakadi bamuimanshe pa buloba, ne wende wonso udiye nawu ngua kupambuisha batendeledi ba Nzambi ba lulamatu. (Buak. 12:9, 12, 17) Tudi kabidi mu tshikondo tshidi bantu babi ne badingianganyi batungunuka ne “kunyanguka bibi menemene.”​—2 Tim. 3:1, 13.

³ Mu tshiena-bualu etshi netuakule bua mudi Satana ukeba kunyanga ngelelu wetu wa meji ne “mashimi a patupu.” Netumone “bienzedi bia budimu” anyi “mayele” ende asatu patupu atuye unyanga nawu meji a bantu. (Ef. 6:11; dim.) Pashishe mu tshiena-bualu tshialonda, netumone tshitudi mua kuenza bua  kuakaja meji etu adiye mua kuikala mumane kunyanga. Kadi tuanji tumone muvua Satana mupambuishe bena Isalele pakavuabu babuele mu Buloba Bulaya ne tshidibi mua kutulongesha.

4-6. Bilondeshile Dutelonome 11:10-15, mmushindu kayi mupiamupia wa kudima bia pa madimi uvua bena Isalele ne bua kulonga pavuabu bafike mu Buloba Bulaya?

⁴ Satana wakateta bena Isalele ne budimu buonso bua kutendelelabu nzambi ya dishima. Uvua muenze tshinyi? Uvua mubuelele pa dijinga diabu dia kupeta biakudia. Pavua bena Isalele babuele mu Buloba Bulaya, bavua ne bua kushintulula mushindu wa kudima bia pa madimi. Pavuabu mu Ejipitu, bavua bapandila mâyi a musulu wa Nile tujila bua atalaje madimi abu. Kadi mu Buloba Bulaya kamuvua misulu minene to; mvula ne lumuma ke bivua bikolesha bia pa madimi. (Bala Dutelonome 11:10-15; Yesh. 18:4, 5) Ke bualu kayi bena Isalele bavua ne bua kulonga mushindu mupiamupia wa kudima bia pa madimi. Kabivua mua kuikala bipepele to, bualu bantu ba bungi bavua ne dimanya nansha dikese dia malu a madimi bavua bafuile mu tshipela.

⁵ Yehowa wakumvuija bena mu tshisamba tshiende pakavuabu pa kubuela mu Buloba Bulaya ne: nsombelu wabu uvua mushintuluke. Ke yeye kubadimuija bua bualu kampanda buvua kabuyi bumueneka diakamue ne: buvua bupetangana ne malu a madimi. Wakamba ne: “Nudimuke bua kanulekedi mioyo yenu isesuishibua ne bua kanutendeledi nzambi mikuabu ne kanuyinaminyi.” (Dut. 11:16, 17) Bua tshinyi Yehowa uvua mubadimuije bua ditendelela nzambi ya dishima pende wakula bua malu a madimi?

⁶ Yehowa uvua mumanye ne: muoyo wa bena Isalele uvua mua kubasaka bua kuya kudi  bampangano bavua babanyunguluke bua kulonga imue mishindu ya kudima. Kakuyi mpata, bena mutumba babu abu bavua bamanye malu a madimi kubapita. Nunku bena Isalele bavua mua kulongela mishindu kampanda ya kudima kudibu, kadi kuvua njiwu. Bidime bia mu Kanâna bivua bitendelela Bâla, ne ngelelu wabu wa meji uvua munyanguke ne malongesha a mu ntendelelu wabu. Bavua bamona Bâla bu muena diulu ne mulokeshi wa mvula. Yehowa kavua musue bua bashime bena mu tshisamba tshiende ne malongesha a dishima aa to. Kadi bena Isalele bakatendelela Bâla misangu ne misangu. (Nom. 25:3, 5; Bal. 2:13; 1 Bak. 18:18) Mpindieu, tumonayi muvua Satana mufike ku dikuata meji a bena Isalele.

7. Pavua bena Isalele babuele mu Buloba Bulaya, bavua bapete diteta kayi?

⁷ Satana wakakuata bena Isalele ne diyele dia kumpala. Wakabuelela pa dijinga ditu bantu nadi dia kumona mvula iloka. Mu Buloba Bulaya, kubangila ku ndekelu kua ngondo muinayi too ne ku wa tshitema mvula kayivua itamba kuloka to. Mvula ivua ituadija nangananga mu ngondo bu wa 10 ke ivua yambuluisha bena Isalele bua kupeta tshiakudia ne kukumbaja majinga abu ne kupeta kabidi bia pa madimi bia bungi. Satana wakafikisha bena Isalele ku ditaba ne: bua kupetabu biakudia, bavua ne bua kuditua mu bilele bia bampangano bavua babanyunguluke. Bena mutumba babu abu bavua batuishibue ne: bivua bikengela kuenza bilele kampanda bua nzambi yabu ibalokeshile mvula. Bantu bavua kabayi ne ditabuja kudi Yehowa bavua bela meji ne: bua kuepuka minanga ivua inenga bikole, bavua ne bua kuenza bilele abi. Ke bualu kayi bakaditua pabu mu ditendelela Bâla, nzambi wa dishima.

8. Ndiyele kayi dibidi divua Satana mukuate nadi bena Isalele? Umvuija.

⁸ Satana wakakuata bena Isalele ne diyele dibidi. Wakabasaka bua kukumbaja majinga mabi a masandi. Bisamba bia bampangano bivua biditua mu malu a masandi mabi menemene mu ntendelelu wabi. Mu ntendelelu mubi eu muvua ndumba ya ku ntempelo, ya balume ne ya bakaji. Bavua bitaba disangila dia bantu ba mubidi umue ne mishindu mikuabu ya malu a masandi, ne bikavua bilue tshibidilu. (Dut. 23:17, 18; 1 Bak. 14:24) Bampangano abu bavua bashindike ne: bilele abi bivua bisaka nzambi yabu bua yifukishe buloba. Bilele bia bampangano bia malu a masandi ebi biakasankisha bena Isalele ba bungi, kubafikishabi ku ditendelela nzambi ya dishima. Mu bulelela, Satana ke uvua mubakuate.

9. Bilondeshile Hoshea 2:16, 17, ntshinyi tshivua Satana muenze bua kunyanga mushindu uvua bena Isalele bamona Yehowa?

⁹ Satana wakakuata bena Isalele ne diyele disatu. Wakanyanga mushindu uvuabu bamona Yehowa. Mu matuku a muprofete Yelemiya, Yehowa wakamba ne: baprofete ba dishima bavua bafikishe bantu bende ku dipua dîna diende muoyo “bua bualu bua Bâla.” (Yel. 23:27) Bidi bimueneka ne: bena Isalele bakalekela kutela dîna dia Yehowa, kutuadijabu kutela dia Bâla didi diumvuija ne: “Muena bintu” anyi “Mfumu.” Bualu ebu buvua mua kubapangisha bua kumona dishilangana divua pankatshi pa Yehowa ne Bâla, bienza bua bikale bipepele bua bobu kubueja bilele bia ntendelelu wa Bâla mu ntendelelu wa Yehowa.​—Bala Hoshea 2:16, 17 ne dimanyisha dia kuinshi kua dibeji.

10. Lelu Satana udi ukuata bantu ne mayele kayi?

¹⁰ Lelu Satana udi ukuata bantu ne mayele amue amue au. Udi ubuelela pa majinga abu a ku tshilelelu, ubasaka bua kukumbaja majinga  mabi a masandi, ne unyanga mushindu udibu bamona Yehowa. Tuanji tuakule bua diyele diende dia ndekelu edi.

11. Mmunyi mudi Satana munyange mushindu udi bantu bamona Yehowa?

¹¹ Satana udi unyanga mushindu udi bantu bamona Yehowa. Panyima pa lufu lua bapostolo ba Yezu, batontolodi bakabanga kulongesha malongesha a dishima. (Bien. 20:29, 30; 2 Tes. 2:3) Bakatuadija kupangisha bantu bua kumanya Nzambi umuepele mulelela. Tshilejilu, bakalekela kufunda dîna dia Nzambi mu Bible ivuabu bafundulula, kutuadijabu kufunda mianzu bu mudi “Mukalenge.” Pavuabu bumbushe dîna dia Nzambi bapingaje muanzu wa “Mukalenge,” biakalua bikole bua mubadi wa Bible kumona dishilangana didi pankatshi pa Yehowa ne “bakalenge” bakuabu badibu batele mu Bible. (1 Kol. 8:5) Bakabikila Yehowa ne Yezu mu muanzu umue umue wa “Mukalenge,” bitatshisha bantu bua kujingulula ne: Yehowa ne Muanende mbantu babidi bashilangane. (Yone 17:3) Tshibuejakaji etshi tshiakapatula dilongesha dia Busatu Bunsantu didi Bible kayi ulongesha. Ke bualu kayi lelu eu, bantu ba bungi badi bamona ne: mbikole bua kumanya Nzambi. Dishima dia katshia!​—Bien. 17:27.

12. Bitendelelu bia dishima mbisake bantu ku tshinyi? Bilondeshile Lomo 1:28-31, bualu abu mbukebeshe tshinyi?

¹² Satana udi usaka bantu bua kukumbaja majinga mabi a masandi. Mu tshikondo tshia Isalele wa kale, Satana wakazangika malu a masandi ku diambuluisha dia ntendelelu wa dishima. Ke tshidiye wenza kabidi lelu. Bitendelelu bia dishima bidi bitaba malu mabi a masandi ne bisaka too ne bantu ku dienza malu au. Ke bualu kayi bantu ba bungi badi badiamba mudibu batendelela Nzambi mbalekele mikenji yende mimpe ya bikadilu. Mupostolo Paulo udi umvuija mu mukanda uvuaye mufundile bena Lomo tshidi bualu abu bukebeshe. (Bala Lomo 1:28-31.) Mu “malu adi kaayi makumbane” mudi malu a masandi mu mishindu yawu yonso, too ne disangila dia bantu ba mubidi umue. (Lomo 1:24-27, 32; Buak. 2:20) Nunku bidi ne mushinga wa bungi bua tuetu kutumikila malongesha mimpe a mu Bible!

13. Ndiyele kayi dikuabu didi Satana ukuata nadi bantu?

¹³ Satana udi ubuelela pa majinga a bantu a ku tshilelelu. Tutu basue kulonga malu adi mua kutuambuluisha bua kukumbaja majinga etu ne a bena mu mêku etu. (1 Tim. 5:8) Misangu ya bungi, bua tuetu kumanya malu aa, tutu tuya mu  kalasa ne tulonga ne tshisumi. Kadi tudi ne bua kuikala ne budimu. Mu matunga a bungi batu balongesha balongi mua kubala, mua kufunda, mua kuenza makumi, ne malu makuabu a muomumue; kadi batu kabidi babalongesha nkindi anyi ngenyi ya bena panu. Batu basaka balongi bua kuelesha dikalaku dia Nzambi mpata ne kubenga kuangata Bible ne mushinga. Batu babambila ne: bantu badi ne meji mbadi bitaba ne: bintu mbidienzekele. (Lomo 1:21-23) Malongesha a nunku adi abengangana ne “meji a Nzambi.”​—1 Kol. 1:19-21; 3:18-20.

14. Meji a bena panu atu asaka bantu bua kuenza tshinyi?

¹⁴ Meji a bena panu atu abengangana ne mikenji miakane ya Yehowa. Kaatu asaka bantu bua kuikala ne dimuma dia nyuma wa Nzambi to, kadi atu abasaka bua kuenza “malu a mubidi.” (Gal. 5:19-23) Adi afikisha bantu ku dilua bena lutambishi, bena didisua, ne “badinangi.” (2 Tim. 3:2-4) Ngikadilu eyi kayena ipetangana ne ngikadilu wa bupuekele anyi wa budipuekeshi idi batendeledi ba Nzambi ne bua kuikala nayi to. (2 Sam. 22:28) Bena Kristo bakuabu badi balonge tulasa tua iniversite bakadi bela meji bu bena panu pamutu pa kuikala ne meji a Nzambi. Tumonayi tshilejilu tshimue patupu tshia bualu budi mua kutufikila.

15-16. Bualu buvua bufikile muanetu wa bakaji mukuabu budi bukulongesha tshinyi?

¹⁵ Muanetu wa bakaji mukuabu ukadi ne bidimu bipite pa 15 mu bumpanda-njila udi wamba ne: “Bu munkavua Ntemu mubatijibue, mvua mubale ne mumvue batubela bua njiwu ya dilonga tulasa tua iniversite, kadi tshivua muteye ntema nansha mikese to. Mvua ngela meji ne: mibelu ayi kayivua intangila meme to.” Nntatu kayi yakapetaye? Udi wamba ne: “Mvua ndifila  bikole bua kulonga bia mu kalasa ne bivua bingangata dîba dia bungi, bimpangisha too ne bua kusambila Yehowa bikole mumvua nsambila kumpala. Mvua ntshioka bikole, bintonda ne bua kuyukila malu a mu Bible ne bantu, ne bimpangisha bua kulongolola bisangilu bimpe. Kadi pamvua mujingulule ne: kudifila bikole mu dilonga tulasa tua iniversite kuvua kunyanga malanda anyi ne Yehowa, ngakamona ne: bivua bikengela ngimanyike. Meme kuimanyika.”

¹⁶ Mmunyi muvua dilonga tulasa tua iniversite dinyange ngelelu wa meji wa muanetu eu? Udi wamba ne: “Ndi ne bundu bua kuamba ne: tulasa tumvua mulonge tuakandongesha bua kuimanyina pa bilema bia bantu bakuabu, nangananga bia bena Kristo nanyi, bua kukeba bua bikale benza malu avuabu kabayi mua kukumbana bua kuenza, ne bua kuditola pa nkayanyi. Biakangangata bidimu bia bungi bua kushintulula ngelelu wa meji eu. Bualu buvua bumfikile ebu buakandongesha ne: kulengulula mibelu idi Tatu wetu wa mu diulu utupesha ku butuangaji bua bulongolodi buende bua kutudimuija kudi ne njiwu. Yehowa uvua mummanye bimpe menemene kupita mumvua mudimanye. Bu meme nansha muteleje!”

17. (a) Tuikale badisuike bua kuenza tshinyi? (b) Ntshinyi tshitualonga mu tshiena-bualu tshialonda?

¹⁷ Ikala mudisuike bua ndongoluelu wa Satana kakukuatshi “ku diambuluisha dia nkindi ne mashimi a patupu” nansha kakese. Tungunuka ne kudilama ku mayele a Satana. (1 Kol. 3:18; 2 Kol. 2:11) Kuitabi bua anyange mushindu uudi umona Yehowa to. Tumikila mikenji mimpe ya Yehowa ya bikadilu. Kulekedi kabidi Satana ukushimakaja bua kubenga mibelu ya Yehowa to. Kadi wewe mumone ne: meji a bena panu akadi mamane kukunyanga, newenze tshinyi? Tshiena-bualu tshialonda netshileje mudi Dîyi dia Nzambi mua kutuambuluisha bua kutonkola nansha meji ne bibidilu “bidi biele miji bikole menemene.”​—2 Kol. 10:4, 5.