TSHIENA-BUALU TSHIA KULONGA 25
“Meme nkayanyi nenkebe mikoko yanyi”
“Meme nkayanyi nenkebe mikoko yanyi, ne nenyilame.”—YEH. 34:11.
MUSAMBU WA 105 “Nzambi udi dinanga”
KADIOSHA *
1. Bua tshinyi Yehowa mmudifuanyikije ne mamu udi wamusha?
MU TSHIKONDO tshia muprofete Yeshaya, Yehowa wakela lukonko elu: “Mamu udi mua kupua muanende utshidi wamua mabele muoyo” anyi? Nzambi wakambila tshisamba tshiende ne: “Nansha bamamu aba mua kupua muoyo, meme tshiakukupua muoyo nansha.” (Yesh. 49:15) Yehowa katu utamba kudifuanyikija ne mamu to. Kadi wakadifuanyikija nende musangu au. Yehowa uvua muakule bua malanda adi pankatshi pa mamu ne muanende wa pambidi bua kuleja mudiye munange batendeledi bende bikole. Bamamu ba bungi badi mua kuamba pabu tshidi muanetu Jasmin muambe etshi: “Paudi wamusha muana, udi upunga nende malanda makole a pa buawu adi ashala bua kashidi.”
2. Yehowa utu umvua bishi padi muanende wanji ulekela kumuenzela mudimu?
2 Padi muana wa Yehowa nansha umue ulekela bisangilu ne buambi, Yehowa udi umona. Kadi anji elabi meji mudibi ne bua kuikala bimusama ku muoyo padiye umona batendeledi bende binunu ne binunu balekela bisangilu ne buambi * tshidimu tshionso etshi!
3. Yehowa mmusue tshinyi?
3 Bana betu ba bungi badi banji kulekela dienzela Yehowa mudimu anyi badi balekele bisangilu ne mudimu wa buambi batu bapingana mu tshisumbu mutubu batamba kubakidila ne disanka dia bungi! Yehowa mmusue bua balukile, nansha tuetu petu. (1 Pet. 2:25) Mmunyi mutudi mua kubambuluisha? Kumpala kua kuandamuna lukonko elu, mbimpe tuanji kumanya tshitu bamue balekeela bisangilu ne mudimu wa buambi.
BUA TSHINYI BAMUE BATU BANJI BALEKELA KUENZELA YEHOWA MUDIMU?
4. Ntshinyi tshidi midimu ya bianza mua kuenzela bantu bakuabu?
4 Bamue mbadine mu midimu ya bianza ne kasuki. Muanetu kampanda wa mu Azi wa ku sud-est diende Hung * udi wamba ne: “Mvua mudibuinke mu mudimu wanyi wa bianza munekeshe. Mvua ndishima ndiambila ne: Meme mulue kantuntu ka bintu ku mapangu ndi mua kuenzela Yehowa mudimu bimpe be! Nunku ngakabanga kuenza mudimu mêba mapite ne pa mukenji. Ngakabanga kupumbisha bisangilu too ne mungakafika ku dibilekela bionso. Bidi bimueneka ne: bulongolodi ebu mbuenza bua kusemeja bantu kule ne Nzambi ku kakese ku kakese.”
5. Ntshinyi tshivua ntatu mifikishe muanetu kampanda wa bakaji ku dienza?
5 Bamue bana betu badi ne malu mabatonde. Muanetu Anne wa mu Grande-Bretagne udi mamu wa bana batanu udi wamba ne: “Muananyi mukuabu mmuledibue ne bulema bubi be! Pakapita matuku, muananyi mukuabu wa bakaji wakipatshibua mu tshisumbu ne wa balume kupetaye disama dia mutu. Biakantonda bikole, tshitshiyi nya mu bisangilu ne mu buambi to. Ndekelu wa bionso, meme kubilekela.” Muoyo udi utusama bua tshivua tshifikile Anne ne dîku diende, nansha bua bana betu bakuabu badi ne ntatu ya buena eyi!
6. Mmunyi mudi dibenga kutumikila dia Kolosayi 3:13 mua kufikisha muntu ku dilekela bantu ba Yehowa?
6 Bala Kolosayi 3:13. Kudi batendeledi ba Yehowa badibu banyingalaje kudi bena Kristo nabu. Mupostolo Paulo wakaleja ne: kudi misangu itudi mua kuikala “tshilumbu ne” muanetu. Badi mua kuikala nansha bakadi batuenzele malu mabi. Tuetu katuyi badimuke, tudi mua kushala tudiilangana dînu. Tshiji tshidi mua kufikisha muntu ku dilekela kudisangisha ne bantu ba Yehowa. Mona tshivua tshifikile muanetu Pablo wa mu Amerike wa kuinshi. Bakamushiminyina ne: uvua wenza malu mabi, bua bualu abu, kumutulabu midimu mu tshisumbu. Ntshinyi tshiakenzaye? Udi wamba ne: “Ngakafiika munda, meme kubanga kukosa makasa mu bisangilu ku kakese ku kakese, kulekela ne buambi.”
7. Kondo ka muoyo koku kalubakaja muntu, kadi mua kumuenzela tshinyi?
7 Anyi kondo ka muoyo kadi mua kushala kalumbuluisha muntu uvua muenze mpekatu kale, kamufikisha ku dimona ne: Nzambi ki mmumunange to. Nansha bikalaye uvua munyingalale ne bamufuile luse, udi mua kumona ne: kena kabidi ukumbana bua kuikala mutendeledi wa Nzambi to. Ke muvua muanetu Francisco mumone pende. Udi wamba ne: “Bakambela patoke bua masandi. Nansha mumvua muanji kutungunuka ne kubuela mu bisangilu, biakantonda bikole, meme kudimona tshitshiyi mukumbane bua kuikala mutendeledi wa Yehowa. Kondo ka muoyo katshivua kampisha, ne buanyi meme, Yehowa kavua mumfuile luse to. Pakapita matuku, ngakakosa makasa mu bisangilu, kulekela ne buambi.” Udi umvua bishi bua bana betu badi mu nsombelu itudi tufuma ku ditela eyi? Udiku ubumvuila luse anyi? Bualu bunene mbua ne: mmunyi mudi Yehowa yeye umvua bua bualu buabu?
YEHOWA MMUNANGE MIKOKO YENDE
Mulami wa mikoko muena Isalele uvua uditatshisha bikole bua mukoko uvua mujimine (Tangila tshikoso 8-9) *
8. Yehowa utu upua bantu bavua kumpala bamuenzela mudimu muoyo anyi? Umvuija.
8 Bantu bavua kumpala benzela Yehowa mudimu kadi banji kulekela dimuenzelawu, Yehowa katu ubapua muoyo to. Nansha mudimu uvuabu bamuenzele, katu uwupua muoyo to. (Eb. 6:10) Muprofete Yeshaya wakafila tshilejilu tshimpe tshia dikema bua kuleja mudi Yehowa utabalela bantu bende. Wakafunda ne: “Bu mulami wa mikoko, yeye nealame tshisumbu tshiende tshia mikoko. Neasangishe bana ba mikoko pamue ne diboko diende, neabambule mu tshiadi tshiende.” (Yesh. 40:11) Mmunyi mutu Mulami munene wa mikoko eu umvua padi mukoko nansha umue ujimina? Yezu wakaleja mudi Yehowa umvua pakakonkaye bayidi bende ne: “Nudi nuela meji kayi? Muntu yeye muikale ne mikoko lukama ne umue udi ujimina, kakushiya mikoko 99 pa mikuna ne kuya kukeba udi mujimine anyi? Yeye muwupete, bulelela ndi nnuambila ne: udi usanka bikole bua uvua mujimine au kupita bua 99 idi kayiyi mijimine.”—Mat. 18:12, 13.
9. Mmunyi muvua balami bimpe ba mikoko ba kale benzela mikoko malu? (Tangila tshimfuanyi tshia pa tshizubu.)
9 Bua tshinyi mbikumbane bua kufuanyikija Yehowa ne mulami wa mikoko? Bualu kale, mulami muimpe wa mikoko uvua utabalela mikoko yende bikole menemene. Tshilejilu, Davidi wakaluangana ne ntambue ne urse bua kukuba mikoko yende. (1 Sam. 17:34, 35) Padi mukoko nansha umue kawuyi mu tshisumbu tshiayi, mulami muimpe wa mikoko udi umanya. (Yone 10:3, 14) Mulami muimpe wa nunku uvua mua kushiya mikoko yende 99 mu tshikumbi anyi kuyishila balami nende ba mikoko bua kuya kukeba uvua mujimine au. Yezu wakakula bua tshilejilu etshi bua kutulongesha bualu bua mushinga ebu: “Tatu wanyi udi mu diulu ki mmusue bua umue wa ku bana bakese aba ajimine to.”—Mat. 18:14.
Mulami wa mikoko muena Isalele wa kale muambule mukoko uvua mujimine wenda umusuika tshilamba (Tangila tshikoso 9)
YEHOWA UDI UKEBA MIKOKO YENDE
10. Bilondeshile Yehezekele 34:11-16, ntshinyi tshivua Yehowa mulaye bua kuenzela mikoko yende ivua mijimine?
10 Yehowa mmunange yonso wa kutudi, munange too ne “bana bakese” badi kabayi mu tshisumbu tshiende tshia mikoko. Nzambi wakalaya ku diambuluisha dia muprofete Yehezekele ne: uvua ne bua kukeba mikoko yende ivua mijimine ne kuyambuluisha bua ipetulule makanda a mu nyuma. Wakaleja kabidi malu masunguluke avuaye ne bua kuenza bua kuyisungila, ne malu au ngavua balami bena Isalele ne bua kuenza pavua mukoko ujimina. (Bala Yehezekele 34:11-16.) Tshia kumpala, mulami wa mikoko uvua ne bua kukeba mukoko, ne bualu ebu buvua mua kumulomba dîba dia bungi ne makanda a bungi. Pavuaye uwupeta, uvua ulua nawu mu tshisumbu tshia mikoko. Pashishe, mukoko wowu mutapike anyi wamba kufua ne nzala, uvua uwambuluisha, tuambe ne: ujingila mputa tshilamba, uwambula, ne uwudiisha. Bu mudi bakulu balami ba “tshisumbu tshia mikoko ya Nzambi,” badi ne bua kuenza malu a muomumue aa bua kuambuluisha mukoko wonso udi mupambuke mu tshisumbu. (1 Pet. 5:2, 3) Bakulu badi bawukeba, bawambuluisha bua upingane mu tshisumbu tshia mikoko, ne bawambuluisha mu nyuma mudibi bikengela bua kuleja mudibu bawunange. *
11. Mulami muimpe wa mikoko uvua mumanye tshinyi?
11 Mulami muimpe wa mikoko uvua mumanye ne: mukoko uvua mua kujimina. Nunku pavuawu ujimina, kavua uwututa pavuaye uwupeta to. Tumone tshilejilu tshidi Nzambi mutushile pavuaye wambuluisha basadidi bende bavua banji kupambuka kudiye bua tshikondo kampanda.
12. Ntshinyi tshivua Yehowa muenze ne Yona?
12 Muprofete Yona wakanyema mudimu wende. Nansha nanku, Yehowa kakamulekela diakamue to. Bu mudi Yehowa mulami muimpe, wakamupandisha ne kumuambuluisha bua apetulule bukole buvuaye nabu dijinga bua kukumbaja mudimu wende. (Yona 2:7; 3:1, 2) Pashishe, Nzambi wakenza mudimu ne muonji wa tshilowalowa bua kuambuluisha Yona bua umvue ne: muoyo wa muntu yonso udi ne mushinga. (Yona 4:10, 11) Bualu ebu budi butulongesha ne: bakulu kabena ne bua kuikala ne lukasa ku dilekela muntu ukadi mulekele bisangilu ne buambi to. Kadi badi baditatshisha bua kumvua tshidi tshipambuishe mukoko au. Padi mukoko au upingana kudi Yehowa, bakulu badi bawutabalela ne dinanga dionso.
13. Tshivua Yehowa muenzele mufundi wa Misambu 73 tshidi mua kutulongesha tshinyi?
13 Mufundi wa Misambu 73 wakateketa mu mikolo pavuaye umona muvua bantu babi bamueneka bu bavua batanta. Ukavua udiebeja bikala kuenza disua dia Nzambi ni kutshivua ne mushinga. (Mis. 73:12, 13, 16) Yehowa wakenza tshinyi? Kavua mumupishe to. Wakafundisha too ne mêyi ende au mu Bible. Ndekelu wa bionso wakafika ku dijingulula ne: kuikala mulunda wa Yehowa nkuimpe kupita tshintu kayi tshionso, ne kudi kuenza bua muntu kamonyi muoyo bu tshintu tshia patupu to. (Mis. 73:23, 24, 26, 28) Bualu ebu budi butulongesha ne: bakulu kabena ne bua kuikala ne lukasa lua kubipisha bantu badi batuadija kudiebeja bikala kuenzela Yehowa mudimu kuikale ne bualu bua nsongo. Pamutu pa kubapisha, badi ne bua kuditatshisha bua kumvua bua tshinyi badi bakula mudibu bakula amu ne benza malu mudibu baenza amu. Dîba adi ke didibu mua kushisha kukeba mvese misunguluke idi ikengedibua bua kubambuluisha.
14. Bua tshinyi Eliya uvua dijinga ne diambuluisha? Mmunyi muvua Yehowa mumuambuluishe?
14 Muprofete Eliya wakanyema mukalenge mukaji Yezabele. (1 Bak. 19:1-3) Uvua wela meji ne: kakuvua muntu mukuabu uvua wenzela Yehowa mudimu wa buprofete to, ne wakamona ne: mudimu wende kawuvua ne bua nsongo to. Malu akatonda Eliya bikole, kujingaye too ne bua kufua. (1 Bak. 19:4, 10) Pamutu pa Yehowa kupisha Eliya, wakamujadikila ne: kavua nkayende to. Wakamujadikila kabidi ne: uvua mua kueyemena bukole bua Nzambi, kabidi ne: kutshivua mudimu wa bungi uvua mumuindile. Yehowa wakamuteleja bimpe pavuaye wamba malu avua mamutonde ne wakamupesha midimu mikuabu. (1 Bak. 19:11-16, 18) Bualu ebu budi butulongesha ne: tuetu bonso, kadi nangananga bakulu, tudi ne bua kuenzela mikoko ya Yehowa malu ne bulenga. Nansha muntu yeye wakula ne tshiji anyi umvua bu ne: Yehowa kena mua kumufuila luse, bakulu badi ne bua kumuteleja padiye uleja mudiye udiumvua. Dîba adi nebaditatshishe bua kujadikila mukoko udi mujimine au ne: Yehowa udi uwangata ne mushinga.
MMUNYI MUTUDI MUA KUMONA MIKOKO YA NZAMBI IDI MIJIMINE?
15. Bilondeshile Yone 6:39, mmunyi muvua Yezu umona mikoko ya Tatuende?
15 Yehowa mmusue bua tumone mikoko yende idi mijimine bishi? Yezu mmutushile tshilejilu tshia kulonda. Uvua mumanye ne: mikoko ya Yehowa yonso idi ne mushinga ku mêsu kua Nzambi, ke bualu kayi wakenza tshionso tshivuaye mua kuenza bua kuambuluisha “mikoko mijimine ya nzubu wa Isalele” bua ipingane kudi Yehowa. (Mat. 15:24; Luka 19:9, 10) Bu muvua Yezu mulami muimpe wa mikoko, wakaditatshisha kabidi bikole bua kajimiji mukoko wa Yehowa nansha umue.—Bala Yone 6:39.
16-17. Bakulu badi ne bua kumvua bishi padibu bambuluisha bantu badi bapambuke? (Tangila kazubu ka “ Mudi mukoko mujimine mua kumvua.”)
16 Mupostolo Paulo wakalomba bakulu ba mu tshisumbu tshia Efeso bua kuidikija tshilejilu tshia Yezu. Wakabambila ne: “[Nudi] ne bua kuambuluisha badi batekete ne [nudi] ne bua kuvuluka mêyi a Mukalenge Yezu pavuaye yeye nkayende muambe ne: ‘Disanka dia kufila ndipite dia kuangata.’” (Bien. 20:17, 35) Mbimueneke patoke ne: lelu bakulu badi ne mudimu wa pa buawu mu tshilumbu etshi. Mukulu kampanda wa mu ditunga dia Espagne diende Salvador udi wamba ne: “Pandi mmona mushindu udi Yehowa utabalela mikoko yende idi mijimine, bidi binsaka bua kuenza tshionso tshindi mua kuenza bua kuyambuluisha. Bu mundi mulami wa mikoko ya Nzambi, ndi mutuishibue ne: Yehowa mmusue bua nyitabalele.”
17 Bantu bonso bavua banji kulekela Yehowa batudi batele mu tshiena-bualu etshi, bakabambuluisha bua kupinganabu kudiye. Patudi tuambangana apa, kudi bantu bakuabu ba bungi badi bapambuke badi basue kupingana pabu kudiye. Tshiena-bualu tshidi tshilonda netshileje malu makuabu atudi mua kuenza bua kubambuluisha bua bapingane kudi Yehowa.
MUSAMBU WA 139 Fuanyikijabi palua bintu bionso bipiabipia!
^ tshik. 5 Bua tshinyi bamue bantu bakadi benzele Yehowa mudimu ne lulamatu bidimu bia bungi batu balekela tshisumbu? Yehowa utu umvua bishi bua bualu buabu? Tshiena-bualu etshi netshiandamune nkonko eyi. Netshituleje kabidi tshitudi mua kulongela ku mushindu uvua Yehowa muambuluishe bamue bantu ba kale bavua banji kumulekela tshikondo kampanda.
^ tshik. 2 DIUMVUIJA: Tudi tuamba ne: mumanyishi mmulekele buambi padiye muenze ngondo isambombo anyi ya bungi kayi mufile luapolo lua mudimu wa buambi to. Nansha nanku, bantu ba nunku batshidi anu bana betu, ne tudi babanange.
^ tshik. 4 Tudi bashintulule amue mêna.
^ tshik. 10 Tshiena-bualu tshidi tshilonda netshiakule bua mishindu misunguluke idi bakulu mua kuenza malu aa.
^ tshik. 60 DIUMVUIJA DIA TSHIMFUANYI: Mu Isalele pavua mukoko ujimina, bivua bitonda mulami wa mikoko. Uvua uwukeba ne uwambuluisha bua upingane mu tshisumbu tshia mikoko. Lelu, balami ba mikoko ya Nzambi badi benza pabu nanku.
^ tshik. 64 DIUMVUIJA DIA TSHIMFUANYI: Padi muanetu kampanda wa bakaji ukadi katshiyi ubuela mu bisangilu ne uyisha muindile bua mashinyi adiye mubuele ase luendu, udi umona Bantemu babidi ne disanka bayisha muaba udi bantu ba bungi.
