Paulo uvua mufunde ne: “Ku diambuluisha dia mikenji, mvua mufue pa bidi bitangila mikenji, bua ndue ne muoyo kudi Nzambi.”​—Gal. 2:19.

Tshivua Paulo mufunde etshi tshidi tshipetangana ne bualu bunene buvuaye umvuija bisumbu bivua mu Galatiya, provense wa bena Lomo. Bena Kristo bakuabu ba mu bisumbu abi bakavua balonda malongesha a balongeshi ba dishima. Balongeshi abu bavua balongesha ne: bua muntu kupeta lupandu bivua bikengela atumikile Mikenji ya Mose, nangananga wa ditengudibua. Kadi Paulo uvua mumanye ne: Nzambi kavua kabidi ulomba batendeledi bende bua batumikile mukenji wa ditengudibua to. Paulo wakeleshisha bena Kristo abu meji bimpe bua kuleja ne: malongesha au avua a dishima, ne kukoleshaye ditabuja diabu mu mulambu wa tshia kupikulangana natshi wa Yezu Kristo.​—Gal. 2:4; 5:2.

Bible udi wamba patoke ne: pakadi muntu mufue ki mmumanye kabidi bualu nansha bumue ne kakuena tshidi mua kumuenzela bualu to. (Muam. 9:5) Pavua Paulo muambe ne: “Mvua mufue pa bidi bitangila mikenji,” uvua usue kuleja ne: Mikenji ya Mose kayivua kabidi ne bukokeshi kudiye to. Kadi uvua mutuishibue ne: bu muvuaye ne ditabuja mu mulambu wa tshia kupikulangana natshi, uvua ‘ulua ne muoyo kudi Nzambi.’

Paulo wakashintulula nsombelu wende ku “diambuluisha dia mikenji.” Mushindu kayi? Uvua mumvuije ne: “Muntu kena ubadibua muakane bualu udi wenza malu adi mikenji ilomba, kadi anu bua ditabuja mu Yezu Kristo.” (Gal. 2:16) Bushuwa Mikenji ivua mikumbaje bualu bua mushinga. Paulo wakambila bena Galatiya ne: “Bakayisakidila bua kuela dishipa dia mikenji patoke too ne pavua muana uvuabu balaye mulayi au ne bua kufika.” (Gal. 3:19) Mikenji yakaleja patoke ne: bantu bapange bupuangane benji ba mpekatu kabavua mua kukumbana bua kutumikila Mikenji yonso ne mu katoba to; bivua bikengela mulambu mupuangane ufidibue bua kumana bualu. Nunku Mikenji ayi yakalombola bantu kudi “muana,” udi Kristo. Pavua muntu uleja ditabuja kudi Yezu Kristo uvua mua kubadibua muakane kudi Nzambi. (Gal. 3:24) Paulo wakamba nanku bualu wakafika ku ditaba Yezu ne ku dimuleja ditabuja ku diambuluisha dia Mikenji. Nunku Paulo uvua “mufue pa bidi bitangila mikenji” ne mulue ne “muoyo kudi Nzambi.” Mikenji kayivua kabidi ne bukokeshi kudiye to, anu Nzambi.

Paulo uvua muleje kabidi lungenyi lua buena elu mu mukanda uvuaye mufundile bena Lomo. Uvua muambamu ne: “Bana betu, nuenu penu nuvua balue bafue pa bidi bitangila Mikenji ku butuangaji bua mubidi wa Kristo . . . Tudi basuludibue ku Mikenji, bualu tudi bafue ku tshivua tshitukuate.” (Lomo 7:4, 6) Mu mvese eu ne mu Galatiya 2:19, badi baleja ne: Paulo kavua wakula bua kufua lufu lua muenji wa mpekatu uvua muinshi mua Mikenji to. Kadi uvua wakula bua dipikudibua. Mikenji kayivua kabidi ne bukokeshi nansha bukese kudiye yeye ne kudi bantu bakuabu to. Ditabuja mu mulambu wa tshia kupikulangana natshi wa Kristo divua dibapikule.