Ndi muledibue mu dia 19/5/1940 mu tshimenga tshia Amioûn mu Liban. Bidimu ndambu pashishe, tuakaya kusombela ku Tripoli dîku dijima. Mvua mukolele mu dîku dia bantu ba disanka badi banangangane, bavua bamanye Yehowa Nzambi ne bamunange. Mbatulela batanu kuetu, ba bakaji basatu ne ba balume babidi; meme ke wa mukala. Baledi banyi kabavua bateka dikeba dia makuta pa muaba wa kumpala to. Dilonga dia Bible, dibuela mu bisangilu ne diambuluisha bantu bakuabu bua kumanya Nzambi ke malu avua ne mushinga mu nsombelu wetu.

Mu tshisumbu tshietu muvua bela manyi ba bungi. Umue wa kudibu mmuanetu Michel Aboud uvua ulombola tshituvua tubikila ne: dilonga dia mukanda. Yeye ke uvua mufikishe bulelela mu Liban mu bidimu bia 1920. Uvua mubulongele ku New York. Ndi mvuluka nangananga muvuaye unemeka muanetu Anne ne muanetu Gwen ne ubambuluisha. Bana betu ba bakaji babidi aba bavua bapete mapolome mu kalasa ka Gilada. Bidimu bia bungi pashishe, ngakumvua disanka pamvua mutuilangane ne Anne mu États-Unis. Panyima pa matuku, ngakalua kumonangana ne Gwen; bakavua bamusele kudi muanetu Wilfred Gooch. Bavua benza mudimu ku Betele ku Londres mu Angleterre.

Pantshivua muana, mu Liban muvua Bantemu bakese. Kadi tuakalongesha bantu bakuabu malu a  mu Bible atuvua bamanye ne disanka dionso. Nansha muvua bamfumu ba bitendelelu bakuabu batuluisha, tuetu tuvua anu tuyisha. Ntshidi mvuluka amue malu avua matufikile.

Dimue dituku tuvua tuyisha ku nzubu kampanda meme ne yayanyi Sana. Mumpele mukuabu wakalua muaba utuvua bimane tuyukila ne bantu. Bimueneka ne: kuvua muntu uvua mumubikile. Mumpele kutuadijaye kupenda yayanyi. Kumusakilaye ne tshikisu tshionso mu tubumba tua kubandila, yayanyi kutapikaye. Muntu mukuabu kubikilaye bampulushi, bobu kutuma muntu bua kulua kuambuluisha yayanyi Sana. Bakakuata mumpele au kuyabu nende ku biro bia bampulushi, bobu kumusangana ne tshingoma. Munene wa bampulushi wakamuebeja ne: “Wewe mudimu webe mmudimu kayi? Udi mulombodi wa tshitendelelu anyi udi mujudiji wa bimvundu?”

Musangu mukuabu undi muvuluke bimpe menemene nguvua tshisumbu tshietu tshifile makuta bua kuangata mashinyi bua tuetu kuya kuyisha mu musoko kampanda uvua kule ne kuetu. Tuvua tuenda tuyisha ne disanka dionso. Katupa aka mumpele wa muaba au kupeta lumu ne: tuvua tuyisha; ke kusangishaye bantu bua kuluabu kutubunda. Bakalua kutuluisha, kutuasabu too ne mabue, papa kutapika. Ntshidi mvuluka mumvua mumumone mashi apueka kuîsu kuonso. Bakapingana ku mashinyi ne mama, tuetu bonso kulua kulonda tuenda tutshina. Kadi tshiena mua kupua muoyo nansha kakese tshivua mama muambe pavuaye ukupula papa mashi. Wakamba ne: “Yehowa wetu bafuilaku luse, ki mbamanye bidibu benza to.”

Musangu mukuabu kabidi tuakaya kuendakana kua balela betu mu musoko wetu. Tuetu kusangana pastere mukuabu uvua mumanyike bikole kua kaku. Pastere au uvua mumanye ne: baledi banyi mBantemu ba Yehowa. Ntshivua ne bidimu bisambombo dîba adi, pastere au kunkokelaye ku luseke ungebeja ne: “We, too ne bukole buudi ebu bua tshinyi kuena muanji kuangata batismo?” Meme kumuandamuna ne: ntshivua muana. Bua kubatijibua bivua bikengela mmanye malu a bungi a mu Bible ne ngikale ne ditabuja dikole. Bu muvuaye kayi muanyishe diandamuna dimvua mumupeshe, wakambila kaku ne: mvua mumupotele.

Nansha nanku, ntatu yonso ivua mitufikile eyi ivua mikese patupu. Pa tshibidilu bena mu Liban batu bantu bimpe ne bakididi ba benyi. Nanku tuvua tulongesha bantu Bible ne disanka ne tulombola malonga a Bible a bungi.

Pantshivua ndonga kalasa, muanetu mukuabu wa balume utshivua nsonga wa mu Vénézuéla wakalua mu Liban. Uvua ubuela bisangilu mu tshisumbu tshietu, yeye kutuadija kutantshila yayanyi Wafa. Panyima pa matuku, wakamusela, bobu kuya kusombela mu Vénézuéla. Yayanyi eu uvua ufundila papa mikanda umusengelela bua dîku dietu dijima tuya kusombela mu Vénézuéla. Uvua wamba nanku bualu tuvua bamusamine muoyo bikole. Ndekelu wa bionso, tuakamumvuila tuetu kuitaba bua kumuangala!

Tuakafika mu Vénézuéla mu 1953, tuetu kutudila ku Caracas pabuipi ne kua mfumu wa ditunga. Bu muntshivua muana, bivua binsankisha pamvua mmona mfumu wa ditunga upita mu dibumba  diende dia mashinyi. Kadi bua baledi banyi bivua bikole bua kuibidilangana ne nsombelu wa bantu ba mu ditunga adi, bilele biabu, ndilu wabu, mivu ya muomu, ne bua kulonga muakulu mukuabu. Anu batuadija kuibidilangana ne nsombelu au bualu bubi butambe pabu buenzeka.

Papa wakabanga kusama. Bivua bitupitshile bualu pa tshibidilu yeye uvua muntu wa makanda ne bukole bua mubidi. Musangu nansha umue katuvua banji kumumona usama to. Bakamukuata disama dia kansere, yeye kutuadija kulonda buanga. Bia dibungama, wakafua anu panyima pa lumingu lumue.

Mbikole bua meme kunumvuija muvuabi bitusame ku muoyo. Mvua ne bidimu 13 patupu. Tuvua ne kanyinganyinga kakole ne tumona anu bu ne: kuetu kuajiki. Biakangata matuku a bungi bua mama kushisha kuitaba ne: papa uvua mufue bulelela. Kadi tuakalua anu kumona ne: bivua bikengela tukankamane tuye batangile kumpala, ne Yehowa wakatuambuluisha bua kupita ne lutatu alu. Pangakakumbaja bidimu 16, ngakakuata dipolome dia tulasa tua bikadilu tua ku Caracas. Mvua njinga bua kukuatshisha bena mu dîku dietu ne muoyo mujima.

Mu tshikondo tshimue tshimue atshi, bakasela yayanyi Sana kudi muanetu Rubén Araujo uvua mupete dipolome mu kalasa ka Gilada ne mupingane mu Vénézuéla. Bakaya kusombela ku New York. Dîku dietu diakangata dipangadika bua meme kulonga tulasa tua iniversite; nanku ngakaya bua kulongela ku New York musombele kua yayanyi au. Yayanyi au ne bayende bavua bangambuluishe bikole bua kuya kumpala mu nyuma pamvua musombele kuabu apu. Bualu bukuabu, mu tshisumbu tshia tshiena Espagne tshivua ku Brooklyn tshituvua, muvua bana betu ba balume bashindame mu nyuma ba bungi. Mu bana betu abu muvua babidi bavua benza mudimu ku Betele ku Brooklyn, ke muanetu Milton Henschel ne Frederick Franz. Ngakalua kumanyangana nabu meme kubananga bikole.

Pakavua tshidimu tshianyi tshia kumpala ku iniversite tshienda tshitua ku ndekelu, ngakatuadija kuela meji a bipatshila bimvua nabi. Mvua muelangane meji bikole bua biena-bualu bimvua mubale mu Tshibumba tshia Nsentedi bivua biakula bua bena Kristo bavua badifundile tshipatshila tshia kuenzela Yehowa mudimu. Mvua mumone muvua bampanda-njila ne bena ku Betele bavua mu tshisumbu tshietu bikale ne disanka. Mvua musue kubafuana. Kadi tshivua nansha muanji kubatijibua to. Mvua mumanye bimpe ne: bivua bikengela ndilambule kudi Yehowa. Ke tshingakenza, pashishe meme kubatijibua mu dia 30/3/1957.

Bu munkavua muele tshidia tshinene atshi, ngakatuadija kuela meji a kupita ku tshikuabu tshimvua njinga, mmumue ne: kubuela mu mudimu wa ku dîba ne ku dîba. Mvua munange mudimu au bikole, kadi mvua ngela meji ne: bivua mua kunkolela bua kuwenza. Mvua mmona ne: tshivua mua kukumbana bua kuenza bumpanda-njila eku ndonga ku iniversite to. Mikanda ituvua tufundilangana ne mama ne bana betu bavua mu Vénézuéla bua dipangadika dimvua muangate dia kuimanyika tulasa bua kushala mpanda-njila ivua itua ipingana.

 Ngakapingana ku Caracas mu ngondo 6/1957. Kadi ngakasangana bena mu dîku dietu mu nsombelu wa lutatu. Bavua dijinga ne muntu uvua mua kukeba makuta adi mua kubakuatshisha. Ntshinyi tshimvua mua kuenza bua kubambuluisha? Bakankebela mudimu ku banke, kadi mvua anu musue kuenza bumpanda-njila. Ke tshimvua mene mupinganyine. Ngakadisuika bua kuenza bionso bibidi. Munkatshi mua bidimu bia bungi ngakenza mudimu ku banke eku muikale kabidi mpanda-njila. Katshia bandela, tshikondo atshi ke tshimvua ne bia kuenza bimpite, kadi muikale kabidi ne disanka dia bungi!

Disanka dianyi diakavula kabidi pangakasela Sylvia mukaji muimpe kumona wa mu Allemagne udi munange Yehowa bikole menemene. Bavua balue kusombela mu Vénézuéla ne baledi bende. Tuakalua kulela bana babidi, wa balume diende Michel Mike ne wa bakaji diende Samira. Mvua kabidi ne mudimu wa kutabalela mama. Uvua mulue kusombela kuanyi. Nansha mumvua ne bua kuimanyika bumpanda-njila bua mmone mua kuambula bujitu bua dîku dianyi, mvua anu ne tshisumi mu mudimu wa buambi. Meme ne Sylvia tuvua tuenza bumpanda-njila buambuluishi bikondo bionso bia dikisha patuvua ne mushindu.

Bualu bundi muleje ku ntuadijilu abu buvua bungenzekele bana banyi batshidi balonga. Bua kuamba bulelela, tuvua ne nsombelu wa bena kantu ku bianza ne bena mudimu nanyi ba ku banke bavua bannemeka. Kadi meme mvua musue bua bantu bikale batamba kummona bu muena mudimu wa Yehowa. Ngakashala nsamisha mutu bua tshimvua mua kuenza bua bualu abu. Nunku meme ne mukajanyi tuakasomba bua kuyukila bua mushindu wa kutula makuta. Meme muimanyike mudimu wa ku banke, bavua bamfuta makuta a bungi a ndekelu wa mudimu. Bu mutuvua katuyi ne mabanza tuakadiambila ne: tuetu bakepeshe amue malu netuikale ne makuta makumbane a kusumba nawu bituikala nabi dijinga bua tshikondo tshile.

Kabivua bipepele bua kuangata dipangadika adi to, kadi mukajanyi munanga ne mama wanyi bakantua nyama ku mikolo. Dîba adi mvua ne mushindu wa kuangata kabidi mudimu wa bumpanda-njila. Biakangenza disanka dia dikema! Nkavua mudiakaje bua kutuadija bumpanda-njila, kadi bualu bukuabu butuvua katuyi bindile buakatufikila.

Dituku kampanda doktere wakatumanyisha ne: Sylvia uvua ne difu. Biakatupitshila! Buvua bualu bua disanka; kadi ngakatuadija kuela meji a dipangadika dinkavua muangate. Bivua mua kumpangisha bua kulua mpanda-njila anyi? Tukavua balongolole lungenyi bua kuakidila muana mukuabu mu  dîku dietu. Kadi ntshivua anu ngela meji bua bumpanda-njila.

Tuetu bamane kuyukila bua bipatshila bituvua nabi, tuakapangadija bua kulamata anu ku tshitukavua bumvuangane kumpala. Gabriel wanyi wakaledibua mu ngondo 4/1985. Nansha nanku ngakalekela mudimu wa ku banke meme kulua kabidi mpanda-njila wa pa tshibidilu mu ngondo 6/1985. Mu kupita kua matuku, ngakapeta diakalenga dia kulua muena mu Komite wa filiale. Kadi Betele kavua ku Caracas to. Nanku bua kukufika bivua bindomba bua kuenza luendu lua kilometre 80 misangu ibidi anyi isatu ku lumingu.

Bu muvua Betele mu tshimenga tshia La Victoria, tuakapangadija bua kuya kusombelaku bua tuikale pabuipi nende. Biakenza bua malu etu ashintuluke bikole. Ndi nganyisha bena mu dîku dietu bikole ne mbela tuasakidila ne muoyo mujima. Mbangambuluishe bikole menemene. Yayanyi Baha uvua muitabe bua kutabalela mama. Mike ukavua musele, kadi Samira ne Gabriel batshivua kumbelu. Nanku bu mutuvua tuya kusombela ku La Victoria, balunda babu bavua bashala ku Caracas. Bivua bilomba kabidi bua Sylvia wanyi ibidilangane ne kamusoko kakese kashilangane ne tshimenga tshinene tshia bantu bibanda bipueka. Bivua bikengela tuetu bonso tuibidile disombela mu nzubu mukese. Bushuwa bivua bitulombe bua kushintulula malu a bungi bua kumbuka ku Caracas kuya ku La Victoria.

Kadi malu akalua kushintuluka kabidi. Gabriel wakasela, Samira pende ukavua mukumbane bua kuya kusombela wende muaba. Pashishe mu 2007, bakatubikila meme ne Sylvia ku Betele kututshidi too ne lelu. Mike muananyi muanabute mmukulu, yeye ne mukajende mbampanda-njila. Gabriel pende mmukulu ne mbasombele mu Italie ne mukajende Ambra. Samira mpanda-njila ne utu wambuluisha ku Betele muikadile ku bule.

Bushuwa, biakandomba bua kuangata mapangadika manene mu nsombelu wanyi. Tshiena nnyingalala bua bualu nansha bumue to. Ndi mua kuangata kabidi mapangadika amue amue aa. Ndi ne disanka dia bungi bua midimu yonso ne diakalenga dindi mupete mu dienzela Yehowa mudimu. Mu bidimu bionso ebi, ndi mufike ku dimona mudibi ne mushinga wa bungi bua kudia bulunda bukole ne Yehowa. Mapangadika atudi tuangata nansha owu makese anyi manene, yeye udi mua kutupesha ditalala didi “dipite dijingulula dionso dia malu.” (Filip. 4:6, 7) Meme ne Sylvia tudi ne disanka mu mudimu wa tshijila utudi tuenza ku Betele ne tudi bamone ne: Yehowa mmubeneshe mapangadika onso atuvua bangate, bualu tuvua bamuteke pa muaba wa kumpala mu nsombelu wetu.