KATSHIA anu ku kale, bena Isalele bavua ne tshibidilu tshia kufila makuta bua kutungunuja ntendelelu mulelela. Kadi mu tshikondo tshia Yezu bitadi biakalua bipite bungi bikolela ne bena Yuda bua kubifuta.

Bua kukuatshisha ntendelelu muaba munsantu wa Nzambi, bena Yuda bonso bakavua bakulumpe bavua ne bua kufila tshitupa tshia nshekele (anyi drakma ibidi). Mu bidimu lukama bia kumpala, bavua bangata tshitadi tshia nshekele atshi bua kulongoluesha ntempelo uvua Helode muibake ne kusumba milambu ivuabu bafilamu. Bena Yuda bakuabu bakebeja Petelo bua kumanya tshivua Yezu yeye wamba bua tshitadi atshi, ne Yezu kavua muleje ne: mbibi bua kutshifuta to. Yeye muine wakatuma Petelo muaba uvuaye mua kupeta dikuta dia tshinjanja bua kuluaye kufuta tshitadi atshi.​—Mat. 17:24-27.

Bantu ba Nzambi ba tshikondo atshi bavua kabidi bafila tshia dikumi tshia bia pa madimi bionso ne tshia bintu bionso bivuabu bapeta. (Lew. 27:30-32; Nom. 18:26-28) Bamfumu ba bitendelelu bavua basunsuma bamba bua bantu bafile tshia dikumi tshia bisekiseki bionso, too ne tshia “tshisonsa tshia mante ne tshisonsa tshia anete ne tshia kimen.” Yezu kavua muambe ne: difila tshia dikumi ndibi to, kadi wakela Bafalese ne bafundi patoke bua lubombo luabu.​—Mat. 23:23.

Kadi tshikondo atshi bena Lomo ke bavua bakokesha, nanku bavua bafutshisha bantu bitadi bia bungi. Tshimue tshia ku bitadi abi bavua batshifutshisha bantu bavua ne bitupa bia maloba. Bavua bafila makuta anyi bintu bua kutshifuta. Badi batshinka ne: bua kufuta tshitadi etshi muntu uvua ne bua kufila bia pa lukama 20 too ne ku 25 bia bintu biende bia pa madimi. Kuvua kabidi tshitadi tshia pa muntu tshivua muena Yuda yonso ne bua kufuta. Lukonko luvua Bafalese bele Yezu luvua mbua tshitadi etshi. Wakaleja tshidi tshimpe kuenza, kuambaye ne: “Nufute Kaisa bintu bia Kaisa, kadi nufute Nzambi bintu bia Nzambi.”​—Mat. 22:15-22.

Kuvua kabidi tshitadi tshivuabu bafutshisha bua bintu bionso bia kupana bivua bibuelela anyi bipatukila miaba ivuabu bafutshishila bitadi. Tshitadi atshi bavua batshifutshisha ku malobo, ku bilamba, pa masangu a njila, ku bibuelelu bia bimenga anyi mu bisalu.

Bitadi bionso ebi bivua bipite bantu bavua ku bukokeshi bua bena Lomo makanda. Mumanyi wa malu a kale muena Lomo diende Tacite uvua muleje ne: mu tshikondo tshivua mukalenge Tibelio ukokesha pavua Yezu pa buloba, “bena Sulia ne bena Yudaya bakalomba bua babakepeshile bitadi bualu bivua bibapite makanda.”

Tshivua tshienze bua bitadi abi bibapite makanda mmushindu uvuabu babifutshisha. Bukenji bua kufutshisha bitadi bavua babupesha bantu bavua babufidila makuta a bungi bua kupeta mudimu au. Bantu abu bavua bapeta makasa ku bitadi bivuabu balua kufutshisha. Bavua bumvuangana ne bantu bakuabu bua baye benda babasangishila bitadi abi. Bavuabu batuma abu bavua bapeta pabu pa kudiila. Bidi bimueneka ne: Zakayi uvua pende ne bende bantu bavua baya benda bamufutshishila bitadi. (Luka 19:1, 2) Tudi tumvua bua tshinyi bantu bavua bakine difuta bitadi ne bine bavua balua kubafutshishabi.