ELABI meji ne: udi mu njila butuku. Diakamue udi umona muntu wenda ukulonda. Paudi wimana, udi pende wimana. Paudi ukolesha luendu, udi pende ukolesha. Udi unyema mutangile kua mulunda webe udi pabuipi apu. Padi mulunda webe ukunzuluila tshiibi ne ubuela mu nzubu, udi upeta disulakana bualu udi mpindieu mu bukubi.

Pamuapa bualu bua nunku kabutu buanji kukufikila to. Kadi pamuapa udi ne tunyinganyinga tukuabu tudi tukupetesha buôwa. Tshilejilu, udiku uluangana bua kumbusha butekete kampanda kadi utungunuka amu ne kuenza tshilema tshimue tshimue atshi anyi? Udiku mupangile mudimu wa kuenza munkatshi mua tshikondo tshile ne kuyi upeta mukuabu nansha muudi udienzeja bua kuwupeta anyi? Udiku ne buôwa bua muudi wenda ukulakaja ne bua ntatu yiwapeta mu matuku atshilualua anyi? Kudiku bualu bukuabu budi bukutatshisha anyi?

Nansha wewe ne lutatu kayi, mbimpe kuikala ne mulunda uudi mua kuambila ntatu yebe udi musue kukuambuluisha. Udiku ne mulunda wa nunku anyi? Eyowa. Yehowa mmulunda wa mushindu eu kuudi, anu bu muvuaye bua muena lulamatu Abalahama bu mudibi bileja mu Yeshaya 41:8-13, NWT. Mu mvese wa 10 ne wa 13, Yehowa udi ulaya yonso wa kutudi ne: ‘Kutshinyi, bualu ndi nebe. Kupampakanyi, bualu ndi Nzambi webe. Nenkukoleshe, eyowa, nenkuambuluishe, bushuwa nenkukuate ne tshianza tshianyi tshia balume tshia buakane. Bualu meme, Yehowa Nzambi webe, ndi nkukuata ku tshianza tshiebe tshia balume, Meme udi ukuambila ne: “Kutshinyi to. Nenkuambuluishe.”’

Mêyi a Yehowa aa adi akolesha. Teta kuela meji bua tshidi Yehowa utulaya etshi. Mvese kena wamba ne: udi wendela ku luseke lua Yehowa mukukuate ku tshianza to. Wewe muikale ku luseke lua Yehowa, tshianza tshiende tshia balume netshikuate tshianza tshiebe tshia bakaji. Kadi, Yehowa udi ukuoluela ‘tshianza tshiende tshia balume tshia buakane’ ne ukuata ‘tshianza tshiebe tshia balume,’ bienze bu udi ukukoka mu nsombelu mukole. Padi Yehowa ukuata tshianza tshiebe tshia balume, udi ukukolesha, ukuambila ne: ‘Kutshinyi to. Nenkuambuluishe.’

Udiku umona Yehowa bu Tatu webe wa dinanga ne Mulunda webe anyi? Udiku witaba ne: neakuambuluishe paudi upeta ntatu anyi? Yehowa udi bushuwa ukutabalela ne mmusue kukuambuluisha. Paudi mu ntatu ne mu nsombelu mikole, Yehowa mmusue bua udiumvue mu bukubi. Bua tshinyi? Bualu mmukunange bikole. Udi bushuwa ‘diambuluisha didi dipeteka lukasa bikondo bia ntatu.’​—Musambu 46:1, NWT.

Bamue bantu batu batungunuka ne kuvuluka bilema biabu bia kale ne badiebeja bua kumanya ni Nzambi mmubafuile luse. Wewe udiumvua mushindu  eu, ela meji bua muena lulamatu Yobo. Wakitaba ne: uvua muenze mpekatu patshivuaye nsonga. (Yobo 13:26) Mufundi wa Misambu Davidi wakadiumvua pende mushindu eu ne kulombaye Yehowa ne: “Kuvuluki malu mabi anakenza mu bunsongalume buanyi anyi matomboka anyi.” (Musambu 25:7) Bu mutudi bapange bupuangane, tuetu bonso ‘tuakenza bubi ne katuena tufika ku butumbi bua Nzambi to.’​—Lomo 3:23.

Mêyi adi akolesha adi mu Yeshaya nshapita wa 41 avua mafundila bena Isalele. Mibi yabu ivua mipite bunene, kufikishayi Yehowa ku diamba ne: uvua ne bua kubanyoka pa kubatuma mu bupika mu Babilona. (Yeshaya 39:6, 7) Nzambi uvua mulaye kabidi ne: uvua ne bua kupatula mu bupika bantu bavua banyingalala ne bapingana kudiye. (Yeshaya 41:8, 9; 49:8) Lelu, Yehowa udi uleja bantu badi banyingalala ne muoyo mujima ne badi basue kumusankisha dinanga ne luse bia muomumue.​—Musambu 51:1.

Tuangate tshilejilu tshia Takuya, * uvua udienzeja bua kulekela tshikadilu tshibi tshia kutangila bimfuanyi bia bantu kabayi bilamba ne tshia kudijikijila dijinga dia kusangila ne mukaji. Misangu ya bungi, uvua ukuluka mu tshilele etshi. Mmunyi muvuaye udiumvua? Udi wamba ne: “Mvua ndiumvua tshiyi ne mushinga nansha mukese, kadi pamvua ndomba Yehowa bua amfuile luse, uvua unjula mu butekete buanyi.” Mmunyi muvua Yehowa wenza nanku? Bakulu ba mu tshisumbu tshivua Takuya bakamuambila bua ikale ubabikila ku telefone dîba dionso divuaye ukuluka mu tshilele etshi. Udi wamba ne: “Kabivua bipepele bua kubabikila to, kadi misangu yonso imvua mbabikila, bavua bankolesha.” Pashishe bakulu bakalongolola bua mutangidi wa tshijengu aye kutangila Takuya. Mutangidi wakamuambila ne: “Tshiena mufike muaba eu ku mpukampuka to. Ndi mulue kukutangila bualu bakulu bavua basue bua ndua muaba eu. Mbakusungule bua upete dikumbula edi.” Takuya udi wamba ne: “Meme ke uvua wenza mpekatu, kadi Yehowa uvua utungunuka anu ne kungambuluisha ku diambuluisha dia bakulu.” Ndekelu wa bionso, Takuya wakalekela bibidilu biende bibi ebi, kuluaye mpanda-njila wa pa tshibidilu ne mpindieu udi wenza mudimu ku Betele. Anu muvua Nzambi muambuluishe muanetu wa balume eu, neakuambuluishe pebe paudi wenza bilema.

Bamue bantu batu badiumvua bibi bualu mbajimije mudimu wabu ne kabena ne mushindu wa kupeta mukuabu. Elabi meji mudibi bitonda padibu benda bakuipata ku mudimu. Padi bamue bantu batuilangana ne nsombelu mukole eu, badi badiumvua kabayi ne mushinga. Mmunyi mudi Yehowa mua kukuambuluisha? Kena anu mua kukupesha diakamue mudimu muimpe to, kadi udi mua kukuambuluisha bua uvuluke mêyi a Davidi aa: ‘Ngakadi nsongalume, katataka ngakulua muntu mukole; kadi tshiena muanji kutangila muntu muakane mushale patupu, anyi bana bende baledibue balomba biakudia.’ (Musambu 37:25) Yehowa udi ukuangata ne mushinga wa bungi, udi ukuoluela ‘tshianza tshiende tshia balume tshia buakane’ bua upete biudi nabi dijinga bua kutungunuka ne kumuenzela mudimu.

Sara udi musombele mu Colombie wakamona muvua Yehowa mumuambuluishe. Uvua upeta makuta a bungi ku mudimu wa mêba a bungi uvuaye wenza mu tshiapu kampanda tshivua tshimanyike ne tshivuabu banemeka. Kadi uvua musue kuenzela Yehowa mudimu bikole, nunku wakalekela mudimu  wende eu ne kutuadija bumpanda-njila. Kadi bivua bikole bua yeye kupeta mudimu wa mêba makese uvuaye ukeba. Wakatuadija kupana kreme, kadi makuta ende akatuadija kujika ku kakese ku kakese ne yeye kulekela mudimu eu. Udi wamba ne: “Ngakatata bikole munkatshi mua bidimu bisatu, kadi Yehowa wakangambuluisha bua kutantamena lutatu elu.” Wakalonga mua kumanya malu avuaye nawu dijinga menemene ne mua kubenga kuditatshisha bua dituku didi dilonda. (Matayi 6:33, 34) Ndekelu wa bionso, mfumuende wa mudimu wa kumpala wakamubikila ne kumupesha kabidi mudimu uvuaye wenza au. Wakamuleja ne: uvua ne bua kuitaba bua kuenza mudimu eu anu wowu wa mêba makese ne anu bobu bamupeshe kupeta dîba dia kuya mu bisangilu, mu mpuilu ne mu mpungilu. Lelu, Sara kena upeta makuta a bungi bu kumpala to, kadi udi utungunuka ne kuikala mpanda-njila. Udi wamba ne: mu tshikondo tshia lutatu atshi, uvua mumone muvua Yehowa mumuleje dinanga.

Bitu bitonda bantu ba bungi padibu badimona benda bakulakaja ne mukadibu pa kuangata pansio. Batu badiebeja ni badi mua kupeta makuta makumbane bua kuikalabu bimpe. Badi kabidi baditatshisha bua ntatu ya ku mubidi idi mua kubafikila mu matuku atshilualua. Mukalenge Davidi ke uvua mua kuikala mulombe Yehowa wamba ne: ‘Kungumbushi kuudi mu tshikondo tshia bununu buanyi; kunshiyi patupu papanga bukole buanyi.’​—Musambu 71:9, 18.

Mmunyi mudi bakulakaje mua kubenga kusamisha mutu bua matuku atshilualua? Badi ne bua kutungunuka ne kukolesha ditabuja diabu kudi Nzambi batuishibue ne: neabapeshe tshionso tshidibu natshi dijinga. Kadi, bamue bavua basue bintu bia mushinga mukole pavuabu ne makuta a bungi, nunku mbimpe balonge mua kupepeja nsombelu wabu ne mua kusanka ne bikese bidibu nabi. Badi mene mua kujingulula ne: bua makanda abu a mubidi kudia ‘matamba nkayawu’ nkuimpe kupita kudia ‘munyinyi wa ngombe wa manyi.’ (Nsumuinu 15:17) Wewe mudifile mu dienzela Yehowa mudimu, neenze bua upete tshionso tshiudi natshi dijinga pawakulakaja.

Ela meji bua José ne mukajende Rose badi benzele Yehowa mudimu wa ku dîba ne ku dîba bidimu bipite pa 65. Munkatshi mua bidimu ebi, bavua bapete ntatu ya bungi. Bavua balama tatuende wa Rose uvua dijinga ne diambuluisha butuku ne munya. Bavua kabidi ne bua kupanda José bua disama diende dia kansere ne kuangata manga makole a disama edi. Mmunyi muvua Yehowa muoluele bena dibaka ba lulamatu aba tshianza tshiende tshia balume? Wakasaka Tony ne mukajende Wendy bua kubambuluisha. Bavua ne nzubu wabu uvuabu bajinga kupesha bampanda-njila ba pa tshibidilu tshianana. Tony wakavuluka ne: pavuaye mu iniversite, uvua utangila pa dididishi ne umona muvua José ne Rose bayisha pa tshibidilu. Tony uvua wanyisha tshisumi tshiabu ne bualu ebu buvua bumulenga ku muoyo bikole. Bu muvua José ne Rose bapitshishe matuku abu onso a muoyo mu dienzela Yehowa mudimu, Tony ne Wendy bakabapesha nzubu au. Munkatshi mua bidimu 15, mbambuluishe José ne Rose badi mpindieu ne bidimu bitue ku 85. José ne Rose badi bamona ne: Tony ne Wendy badi dibenesha dia kudi Yehowa.

Yehowa udi ukulaya ne: ‘Kutshinyi to. Nenkuambuluishe.’ Udi kabidi ukuoluela ‘tshianza tshiende tshia balume tshia buakane.’ Neukuataku ku tshianza tshiende etshi anyi?