BENA KRISTO ba mu bidimu lukama bia kumpala bakadifila bikole bua kuyisha bantu ba bungi ‘lumu luimpe lua Bukalenge.’ (Mat. 24:14) Bamue bakaya too ne mu matunga menyi. Tshilejilu, mupostolo Paulo wakaya mu tshitupa tshia buloba, muaba udi Turquie lelu, yeye kuyishamu bikole mu ngendu yende ya bumisionere. * Bidimu bitue ku 2 000 pashishe, mmumue ne: mu 2014, bakalongolola kabidi kampanye ka pa buaku ka mudimu wa kuyisha mu ditunga dia Turquie. Bua tshinyi bavua balongolole kampanye aku? Mbanganyi bavua bayishe mu kampanye aku?

Kudi bamanyishi bapite pa 2 800 mu Turquie, kadi ditunga edi didi ne bantu miliyo 79. Bidi bimueneka ne: mumanyishi umue udi ne bua kuyisha bantu batue ku 28 000 mu Turquie. Anu muudi mua kubimona, bamanyishi mbafike ku diyisha anu bantu bakese ba mu ditunga edi. Kipatshila ka kampanye ka pa buaku ka mudimu wa kuyisha aka kavua ka kuyisha bantu ba bungi menemene mu matuku makese. Bana betu ba balume ne ba bakaji batue ku 550 ba mu matunga makuabu bavua bakula tshiena Turquie bakaya mu ditunga edi ne kuyishabu pamue ne bamanyishi ba muntu amu mu kampanya aka. Mbipeta kayi biakamueneka?

Bakayisha bikole menemene. Bena mu tshisumbu kampanda tshia mu tshimenga tshia Istanbul bakafunda ne: “Pavua bantu batumona, bavua batuebeja ne: ‘Nudi ne mpungilu wa pa buende munu emu anyi? Tudi tumona Bantemu ba Yehowa miaba yonso!’” Bena mu tshisumbu kampanda tshia mu tshimenga tshia Izmir bakafunda ne: “Tatu kampanda uvua wenza mudimu muaba utubu bimanyikila mashinyi wakaya kudi muanetu kampanda uvua mukulu mu ditunga edi, kumuebejaye ne: ‘Tshidi tshienzeka ntshinyi? Nudi bavudije mudimu wenu wa kuyisha anyi?’” Eyowa, kampanye kavua kamueneke kudi bantu bonso.

Bana betu ba mu matunga makuabu bakanyisha bikole mudimu wa kuyisha. Steffen, uvua mufumine mu Danemark, wakamba ne: “Dituku dionso mvua nyisha bantu bavua kabayi banji kumvua bakula bua Yehowa musangu nansha umue. Ngakadiumvua ne: mvua bushuwa mmanyisha dîna dia Yehowa.” Jean-David, uvua mufumine mu France, wakafunda ne: “Tuakayisha mu njila umue patupu munkatshi mua mêba a bungi. Bivua bimpe be! Bantu ba bungi kabavua bamanye Bantemu ba Yehowa to. Ku tshiibi pabuipi ne tshionso, tuvua tutuadija kuyukila ne bantu, tubaleja umue wa ku filme yetu ne tushila bena ku nzubu mikanda.”

 Bana betu 550 aba bavua babanye mikanda mitue ku binunu 60 mu mbingu ibidi patupu! Bushuwa, kampanye kakambuluisha bua kufilabu bumanyishi bua bungi.

Tshisumi tshia mudimu wa buambi tshiakavula. Mudimu wa pa buawu eu wakasaka bana betu ba mu ditunga edi bua kuyisha bikole. Ba bungi bakatuadija kuela meji bua kuenza mudimu wa ku dîba ne ku dîba. Bushuwa, bungi bua bampanda-njila ba pa tshibidilu buakavula mu Turquie, bia pa lukama 24 mu ngondo 12 yakalonda.

Bana betu bavua bafumine mu matunga makuabu bakaleja muvua kampanye aka kabambuluishe mu mudimu wabu wa diyisha nansha pakapinganabu mu matunga abu. Şirin, muanetu wa bakaji uvua mufumine mu Allemagne, wakafunda ne: “Bana betu ba mu Turquie batu bayisha bipepele padi mpunga umueneka. Ntu ne bundu bua bungi bua kuyisha padi mpunga umueneka. Kampanye ka pa buaku aku, tshilejilu tshia bana betu ba mu Turquie ne masambila a bungi amvua ngenza mbingambuluishe bua kuyisha mumvua tshiyi mua kuenza kumpala to. Ngakayisha ne kufila trakte too ne mu njila wa kawulu wa muinshi mua buloba. Mpindieu tshiena kabidi ne bundu bu kumpala to.”

Johannes, uvua mufumine mu Allemagne, wakamba ne: “Ngakalonga amue malu bua mudimu wanyi wa diyisha. Bana betu ba mu Turquie mbasue bushuwa kuyisha bantu ba bungi bulelela. Badi bayisha mu mpunga yonso udi umueneka. Ngakangata dipangadika dia kuenza panyi bia muomumue pangakapingana mu Allemagne. Lelu ndi bushuwa nyisha bantu ba bungi kupita kumpala.”

Zeynep, uvua mufumine mu France, wakamba ne: “Kampanye aku kakangambuluisha bikole bua kuakaja mushindu wanyi wa kuyisha. Kakangambuluisha bua kuikala ne dikima dia bungi ne kueyemena Yehowa bikole.”

Bamanyishi bakakolesha bulunda buabu. Bana betu bavua bafumine mu matunga makuabu bakashala bavuluka dinanga ne buobumue bivua munkatshi muabu. Jean-David utukadi batele, wakamba ne: “‘Tuakalabula’ muakidilu wa bana betu.” Wakamba kabidi ne: “Bakatuitaba bu balunda babu ne bena mu mêku abu. Bakatukanguila nzubu yabu. Mvua mumanye ne: tudi mu dîku dia bana betu dia pa buloba bujima; mvua mbala bualu ebu mu mikanda yetu. Kadi mpindieu ndi mudimuenenabu. Ngakadiumvua bikole menemene bua mundi munkatshi mua bantu ba Yehowa, ne ndi mmuela tuasakidila bua diakalenga dinene edi.”

 Claire, uvua mufumine mu France, wakamba ne: “Nansha mutuvua aba bafumine mu Danemark, banga mu France, ne bakuabu mu Allemagne anyi mu Turquie, buonso buetu tuvua dîku dimue. Bivua anu bu ne: Nzambi uvua mukupule mikalu yonso ya matunga ne kome munene.”

Stéphanie, uvua mufumine mu France, wakamba pende ne: “Kampanye ka pa buaku aku nkatulongeshe ne: tshidi tshitusanga mu buobumue ndinanga ditudi nadi bua Yehowa, kadi ki mbibidilu anyi muakulu to.”

Bana betu ba bungi ba mu matunga makuabu bakatuadija kuela meji a kuya mu Turquie bua kuambuluisha mu mudimu eu munene utshidibu benzamu. Bakese menemene ke bakadi bayamu. Badi banyisha bikole bana betu badi baye kuambuluisha muaba udi dijinga dinene aba.

Tuangate tshilejilu tshia kasumbu kampanda ka kule kadi ne bamanyishi 25. Munkatshi mua bidimu bia bungi, bavua anu ne mukulu umue. Elabi meji disanka divua nadi bamanyishi abu pavua bana betu basambombo bavua bafumine mu Allemagne ne mu Pays-Bas bayamu mu 2015 bua kubambuluisha!

Ntshinyi tshivua bana betu bavua baye kuambuluisha mu Turquie bua tshikondo kampanda bambe bua nsombelu uvuabu nende muntu amu? Mu bulelela, kuvua bikondo bia ntatu, kadi kuambuluisha muaba udibu dijinga ne bamanyishi kudi kufuta bikole. Mona tshidi bamue bambe:

Federico, muanetu wa balume musele udi ne bidimu 40 ne pa mutu uvua mufumine mu Espanye, udi wamba ne: “Kubenga kuikala ne bintu bia bungi bia ku mubidi kudi kungambuluisha bua kudiumvua mupepele, kungambuluisha kabidi bua kutuma lungenyi ku malu adi ne mushinga wa bungi.” Muanetu eu udiku ulomba bantu bakuabu bua kuenza pabu mudimu eu anyi? Udi wandamuna ne: “Eyowa. Paudi uya ku babende ne tshipatshila tshia kuambuluisha bantu bua kumanya Yehowa, udi mu bulelela uditeka mu bianza biende. Udi bushuwa umvua mudi Yehowa ukutabalela bikole menemene.”

Rudy, muanetu wa balume musele udi ne bidimu bipatshila ku 60 uvua mufumine mu Pays-Bas udi wamba ne: Mu bulelela, “kuikala ntunga mulongo muaba kampanda bua kuyisha bantu ba bungi bulelela batu kabayi banji kubumvua kudi kutupetesha  disanka dia bungi. Patudi tumona disanka didi bantu nadi padibu bitaba bulelela, bidi bitusankisha petu bikole.”

Sascha, muanetu wa balume udi ne bidimu 40 ne pa mutu, uvua mufumine mu Allemagne, udi wamba ne: “Dîba dionso dintu mu buambi, ntu ntuilangana ne bantu badi bumvua bulelela bua musangu wabu wa kumpala. Kupetesha bantu ba nunku mpunga wa kumanyabu Yehowa kudi kumpetesha disanka dia bungi.”

Atsuko, muanetu wa bakaji musela udi ne bidimu bu 35, uvua mufumine mu Japon, udi wamba ne: “Kumpala mvua musue bua Armagedone alue diakamue. Kadi meme mumane kuya mu Turquie, ngakela Yehowa tuasakidila bua mutshidiye uleja bantu lutulu. Mundi mmona Yehowa ulombola malu, ndi ngumvua dijinga dia kusemena bikole pabuipi nende.”

Alisa, muanetu wa bakaji udi ne bidimu 30 ne pa mutu, uvua mufumine mu Russie, udi wamba ne: “Kuenzela Yehowa mudimu mushindu eu nkungambuluishe bua kulabula buimpe buende buonso.” (Mis. 34:8) Udi usakidila ne: “Yehowa kena anu Tatu wanyi to, udi kabidi Mulunda wanyi wa pa muoyo, undi ngenda mmanya bimpe menemene mu nsombelu mishilashilangane. Nsombelu wanyi mmuwule tente ne bikondo bia disanka, malu mimpe, ne mabenesha kaayi kuamba!”

Ku diambuluisha dia kampanye ka kuyisha kavua kenzeke mu Turquie, lumu luimpe ndufike kudi bantu bapite bungi. Kadi kutshidi teritware munene udibu kabayi banji kuyisha. Dituku dionso edi, bana betu bavua baye kuambuluisha mu Turquie batu batuilangana ne bantu batu kabayi banji kumvua bakula bua Yehowa. Udiku pebe musue kuyisha mu teritware wa nunku anyi? Biobi nanku, tudi tukukankamija ne: ‘Bandisha mêsu ebe ne mona madimi, mmatoke bua kunowa.’ (Yone 4:35, NWT) Udiku mua kuambuluisha mu ditunga kampanda mudi madimi ‘matoke bua kunowa’ anyi? Biobi nanku, banga kuenza malu adi mua kukuambuluisha mpindieu bua kukumbaja tshipatshila etshi. Bualu bua kumanya budi ne: Kudifila bikole mu dimuangalaja lumu luimpe “too ne ku ntengu ya buloba” nekukupeteshe mabenesha bungi tshianana!​—Bien. 1:8.