1-3. a) Ndîba kayi divuabu mua kuikala bafunde Misambu 147? b) Mmalu kayi atudi tumanya patudi tulonga Misambu 147?

TUTU tutumbisha muntu padi bualu budiye muambe anyi muenze butukemeshe bikole. Kadi tuetu tudi tudiumvua basakibue bua kutumbisha Yehowa Nzambi bikole. Tudi tumutumbisha bua bukole buende butudi tumuenena mu bintu bia dikema bidiye mufuke, ne tudi tumutumbisha bua dinanga dikole didiye nadi bua bualu buetu ditudi tumuenena mu mulambu udi upikula wa Muanende.

² Patudi tubala Misambu 147, tudi tumona patoke ne: mufundi uvua ne dijinga dikole dia kutumbisha Yehowa. Wakalomba kabidi bantu bakuabu bua batumbishe Nzambi pamue nende.​—Bala Misambu 147:1, 7, 12.

³ Katuena bamanye uvua mufunde Misambu 147 to. Kadi mufundi eu uvua mua kuikala ne muoyo tshikondo tshivua bena Isalele bapingane mu Yelushalema pavua Yehowa mubapikule mu Babilona. (Mis. 147:2) Mufundi wa musambu eu wakatumbisha Yehowa bualu musangu eu kabidi bantu ba Nzambi bavua mua kumutendelela mu buloba buabu. Pashishe mufundi wa musambu eu wakaleja too ne malu a kutumbishila Yehowa. Mmalu kayi au? Mmalu kayi adi  akusaka bua kuela lubila ne: “Aleluya!” anyi ne: “Tumbishayi Yah!”?​—Mis 147:1, NWT, dimanyisha.

4. Mmunyi muvua bena Isalele bumvue pavua mukalenge Kolesha mubapatule mu Babilona? Bua tshinyi?

⁴ Ela meji muvua bena Isalele ne bua kuikala bumvue pavuabu babakuate baye nabu mu Babilona. Bantu bavua babakuate baye nabu bakabaseka bamba ne: “Nutuimbile musambu wa mu misambu ya Siona.” Kadi bena Yuda kabavua bumvue mua kuimba to, bualu bavua babutule Yelushalema, tshimenga tshivua tshibasankisha bikole. (Mis. 137:1-3, 6) Mioyo yabu ivua inyingalala, ne bavua dijinga ne busambi. Kadi Yehowa wakambuluisha bantu bende anu mukavua Dîyi dia Nzambi dimanyishe. Mushindu kayi? Kolesha, mukalenge wa Pelasa wakatshimuna Babilona, kuambaye bua Yehowa ne: ‘Wakungelela mukenji bua kumuashila nzubu mu Yelushalema.’ Kolesha wakambila kabidi bena Isalele ne: ‘Muntu yonso wa bantu bende bonso badi munkatshi muenu aye biende.’ (2 Kul. 36:23) Bualu ebu buvua ne bua kuikala bukankamije bena Isalele bavua mu Babilona.

5. Ntshinyi tshivua mufundi wa musambu muambe bua bukole budi nabu Yehowa bua kutuondopa?

⁵ Yehowa wakakolesha tshisamba tshijima tshia Isalele ku muoyo ne muena Isalele yonso pa nkayende. Yehowa udi utuenzela bia muomumue lelu. Mufundi wa musambu eu wakafunda ne: Nzambi udi wondopa anyi ‘ukolesha badi ne mitshima minyingalale, udi ujingila bilulu pa mputa yabu.’ (Mis. 147:3) Patudi tusama anyi babungame, tuikale bashindike ne: Yehowa udi ututabalela. Yehowa udi ne dijinga dikole dia kutusamba ne dia kutuondopa mputa ya tunyinganyinga tuetu. (Mis. 34:18; Yesh. 57:15) Udi utupesha meji ne bukole bua tumone mua kupita ne ntatu kayi yonso itudi mua kuikala nayi.​—Yak. 1:5.

6. Mmunyi mudi mêyi adi mu Misambu 147:4 mua kutuambuluisha? (Tangila tshimfuanyi tshia ntuadijilu tshia tshiena-bualu.)

⁶ Pashishe mufundi wa musambu wakatangila muulu, kuambaye ne: Yehowa udi “ubala bungi bua mitoto” ne “udi uyibikila buonso buayi mu mêna ayi.” (Mis. 147:4, NWT) Mufundi wa musambu eu uvua umona mitoto, kadi kavua mumanye bungi buayi menemene to. Lelu, bena sianse mbamanye ne: kudi mitoto miliyare ya bungi mu tshikata tshia mitoto tshidi tshikenkesha buloba, ne kudi mua kuikala bikata bia mitoto miliyare ne miliyare mu tshibuashibuashi. Bantu kabena mua kubala mitoto yonso eyi to, kadi Mufuki udi uyibala. Eyowa, mmumanye mutoto wonso bimpe ne mmupeshe mutoto ne mutoto wonso dîna. (1 Kol. 15:41) Nzambi udi mumanye muaba udi mutoto wonso mmukumanye kabidi wewe. Utu anu mumanye bimpe menemene muaba uudi, muudi udiumvua ne tshiudi natshi dijinga.

7, 8. a) Ntshinyi tshidi Yehowa mumanye pa bidi bitutangila? b) Fila tshilejilu tshidi tshileja ne: Yehowa udi ne luse.

⁷ Yehowa mmumanye ntatu iudi nayi, ne udi ne bukole bua kukuambuluisha. (Bala Misambu 147:5.) Udi mua kuela meji ne: nsombelu webe mmupite bukole ne kuena mumanye mua kupita nende. Nzambi mmumanye mikalu yetu, ‘udi uvuluka ne: tudi dimfuenkenya.’ (Mis. 103:14) Tudi bapange bupuangane, ke bualu kayi tutu tuenza bilema bimue bimue misangu ne misangu, ne tudi mua kudiumvua batekete mu maboko. Tutu tunyingalala bua amue mêyi atuvua bambe, bua majinga mabi atuvua bumvue anyi bua mukawu utuvua bumvuile muntu kampanda. Yehowa katu ne butekete nansha bumue to, kadi mmumanye bimpe menemene mutudi tudiumvua.​—Yesh. 40:28.

⁸ Ukadiku mudimuenene mudi tshianza tshia  Yehowa tshia bukole tshikuambuluishe bua kupita ne ntatu anyi? (Yesh. 41:10, 13) Bualu ebu buvua bufikile muanetu wa bakaji kampanda mpanda-njila diende Kyoko. Yeye mumane kuya mu teritware mupiamupia, wakatekeshibua ku muoyo bikole. Kadi mmunyi muvua Kyoko mumanye ne: Yehowa uvua mumanye ntatu yende? Mu tshisumbu tshipiatshipia tshivuaye, muvua bantu ba bungi bavua bamanye ntatu ivuaye nayi. Wakumvua bu ne: Yehowa uvua umuambila ne: “Ndi mukunange, ki nganu bualu udi mpanda-njila to, kadi bualu udi muananyi wa bakaji udi mudilambule kundi. Ndi musue wikale Ntemu wanyi mu nsombelu webe mujima.” Mmunyi mudi Yehowa mukuleje ne: ‘dijingulula diende dia malu kadiena ne kumfudilu kuadi’?

9, 10. Mmushindu kayi munene watuambuluisha Yehowa? Fila tshilejilu.

⁹ Tuetu bonso tudi dijinga ne bintu bu mudi: biakudia, bilamba ne muaba wa kulala. Pamuapa udi mua kuikala usamisha mutu ne: kuakuikala ne biakudia bikumbane to. Kadi Yehowa uvua mufuke buloba bua buikale bupatula biakudia bikumbane bua bantu bonso, too ne bua ‘bana ba bikololo pabididilabu.’ (Bala Misambu 147:8, 9.) Bikala Yehowa udisha bikololo, tuikale bashindike ne: neatupeshe bintu bia ku mubidi bitudi nabi dijinga.​—Mis. 37:25.

¹⁰ Bualu bua mushinga mukole budi ne: Yehowa udi utupesha bitudi nabi dijinga bua kulama ditabuja dietu dikole, ne udi utupesha “ditalala dia Nzambi didi dipite dijingulula dionso dia malu.” (Filip. 4:6, 7) Muanetu wa balume kampanda diende Mutsuo ne mukajende bakamona muvua Yehowa mubambuluishe. Mu 2011, pavua mâyi mapasalale mu Japon, bakapanduka pavuabu babande pa musaka wa nzubu wabu. Dituku adi, bakajimija bintu biabu pabuipi ne bionso. Bakalala mu mîdima, mu kazubu kavua ne mashika kavua mu tshisasa tshia pa mutu pa nzubu wabu. Pakatshiabu, bakakeba tshintu tshivua mua kubakolesha ku muoyo. Tshintu tshimue tshivuabu bapete mmukanda wa Annuaire des Témoins de Jéhovah wa mu 2006. Pavua Mutsuo wenda ubulula mabeji, wakamona tshiena-bualu etshi: “Le tsunami le plus meurtrier jamais recensé.” Tshitupa atshi tshivua tshiakula bua tshikumina tshivua tshienzeke mu Sumatra mu 2004 tshivua tshikebeshe dipasalala dia mâyi ditu kadiyi dianji kuenzeka. Mutsuo ne mukajende bakadila pavuabu babala malu avua mafikile bana babu bena Kristo. Bakamona anu bu ne: Yehowa uvua ubakankamija ne dikankamija divuabu nadi dijinga menemene. Yehowa wakabatabalela kabidi mu mishindu mikuabu. Bena Kristo nabu ba miaba mikuabu ya mu Japon amu bakabapesha biakudia ne bilamba. Kadi tshivua tshitambe kubakolesha ndikumbula divuabu bakumbule tshisumbu tshiabu kudi bana betu bavuabu batume kudi bulongolodi bua Nzambi. Mutsuo udi wamba ne: “Mvua mumone anu bu ne: Yehowa uvua ku luseke lua yonso wa kutudi ne uvua ututabalela. Etshi tshivua busambi bua dikema!” Nzambi wakanji kutupesha bituvua nabi dijinga bua kulama ditabuja dietu dikole, pashishe wakatupesha bintu bia ku mubidi bituvua nabi dijinga.

11. Ntshinyi tshitudi ne bua kuenza bua diambuluisha dia Nzambi ditupeteshe masanka?

¹¹ Yehowa udi ‘wimanyika bapuekele.’ Mmutunange ne utu anu pabuipi bua kutuambuluisha. (Mis. 147:6a) Mmunyi mudi diambuluisha diende mua kutupetesha masanka? Tudi ne bua kuikala nende mu malanda makole. Bua kuenzekabi nanku, tudi ne bua kuikala bapuekele. (Sef. 2:3) Bantu bapuekele batu beyemena Yehowa bua alongolole malu mabi onso ne bua abajikijile makenga. Yehowa udi ubanyisha.

12, 13. a) Bua diambuluisha dia Nzambi kutupeteshadi masanka, mmalu kayi atudi ne bua kuepuka? b) Mbantu kayi badi basankisha Yehowa?

 ¹² Ku lukuabu luseke, Nzambi ‘udi wela bantu babi panshi pa buloba.’ (Mis. 147:6b) Katuena basue bualu ebu butufikile to. Tudi basue bua Nzambi atuleje dinanga diende dia lulamatu. Nanku tudi ne bua kukina malu adiye mukine. (Mis. 97:10) Tshilejilu, tudi ne bua kukina masandi. Ebi bidi biumvuija ne: tudi ne bua kuepuka bualu buonso budi mua kutufikishaku, too ne ditangila bindidimbi bia malu a busenji. (Mis. 119:37; Mat. 5:28) Ki mbipepele bua kuenza nunku to, kadi bidi bilomba kudienzeja bualu netupete mabenesha a kudi Yehowa.

¹³ Katuena mua kudiluangena mvita eyi nkayetu to. Tudi ne bua kueyemena Yehowa. Neasankaku tuetu beyemene bintu bidi bantu banyemena bua kupeta dikuatshisha anyi? Tòo, Yehowa “kena ne disanka bua bukole bua kabalu.” Tudiku mua kueyemena bukole buetu anyi bantu bakuabu anyi? Yehowa “kena ne disanka bua mikolo ya muntu.” (Mis. 147:10) Kadi, tudi ne bua kutungunuka ne kulomba Yehowa diambuluisha mu disambila ne kumusengelela bua atukube ku matekete etu. Yehowa kakutshioka bua kuteleja masambila a nunku to. Bible udi wamba ne: ‘Yehowa udi usanka bua badi bamutshina, bua badi ne ditekemena diabu mu luse luende lujalame.’ (Mis. 147:11) Bu mudiye muena lulamatu ne mutunange, tudi bamanye ne: neatungunuke ne kutuambuluisha bua kutshimuna majinga etu mabi.

14. Ndishindika kayi divua nadi mufundi wa musambu?

¹⁴ Yehowa udi utujadikila ne: neatuambuluishe patudi ne ntatu. Pavua bena Isalele bapingane mu Yelushalema, mufundi wa musambu wakelangana meji a muvua Yehowa ubambuluisha. Mufundi wa musambu wakafunda ne: ‘Wakukolesha nkanu idi ikuata biibi biebe, wakuvudijila bana bebe badi munda mua ngumbu yebe disanka. Udi uvuija ditalala mu matshika ebe.’ (Mis. 147:13, 14) Mufundi wa musambu eu wakadiumvua mu bukubi bua muvua Yehowa ne bua kukanga biibi bia tshimenga. Bualu ebu buakamujadikila ne: Yehowa uvua mua kukuba bantu bende.

15-17. a) Mmunyi mutudi mua kudiumvua imue misangu bua ntatu yetu? Kadi mmunyi mudi Yehowa wenza mudimu ne Dîyi diende bua kutuambuluisha? b) Fila tshilejilu tshidi tshileja mudi dîyi dia Nzambi “diya lubilu” bua kutuambuluisha.

¹⁵ Udi mua kumvua kanyinganyinga bua ntatu yebe, kadi Yehowa udi mua kukupesha meji a mua kupita nayi. Mufundi wa musambu eu wakamba ne: Nzambi udi ‘utuma mukenji wende pa buloba; dîyi diende didi diya lubilu.’ Pashishe mufundi wa musambu eu wakakula bua neje, mabue a mashika ne mabue a mvula, webeja ne: ‘Wamanya mua kuimana talalaa kumpala kua mashika ende nnganyi?’ Ndekelu wa bionso udi wamba ne: Yehowa ‘udi utuma dîyi diende, udi ubiengulula.’ (Mis. 147:15-18) Nzambi wetu udi mumanye malu onso, udi mua kuenza bualu kayi buonso ne udi ulombola mabue a mvula ne neje, udi mua kukuambuluisha bua kutshimuna lutatu kayi luonso.

¹⁶ Lelu Yehowa udi utulombola ne Bible, Dîyi diende. Mufundi wa musambu eu wakamba ne: dîyi dia Yehowa “didi diya lubilu” bua kutuambuluisha. Nzambi udi utulombola mu mushindu muakane ne mu tshikondo tshiakane. Ela meji a muudi mua kupetela malu mimpe mu Bible, mu mikanda ya “mupika wa lulamatu udi mudimuke,” mu JW Télédiffusion, mu jw.org, kudi bakulu, ne kudi bena Kristo nebe balume ne bakaji. (Mat. 24:45) Ukadiku mudimuenene mu nsombelu webe ne: Yehowa udi ukulombola pa lukasa anyi?

¹⁷ Muanetu wa bakaji mukuabu diende Simone wakadimuenena muvua Dîyi dia Nzambi dimuambuluishe. Uvua udimona kayi ne mushinga,  ne uvua wela meji ne: kavua usankisha Yehowa to. Kadi, pavuaye mutekete mu maboko, wakatungunuka ne kusambila Yehowa umulomba diambuluisha. Wakatungunuka kabidi ne kudilongela Bible. Simone udi wamba ne: “Tshitu muanji kudisangana mu nsombelu kampanda untu tshiyi muanji kumona bukole bua Yehowa ne bulombodi buende to.” Bualu ebu mbumuambuluishe bua kuikala ne mmuenenu muimpe.

18. Bua tshinyi udi umvua ne: Yehowa udi pabuipi nebe? Mmalu kayi adi akusaka bua ‘Kutumbisha Yah!’?

¹⁸ Mufundi wa musambu eu uvua mumanye ne: mu bisamba bionso bia pa buloba, Yehowa uvua musungule tshisamba tshia Isalele wa kale bua bikale bantu bende. Bobu ke tshisamba tshimuepele tshitu tshipete “dîyi” dia Nzambi ne “mikenji yende.” (Bala Misambu 147:19, 20.) Lelu, tudi ne diakalenga dinene dia kubikidibua ku dîna dia Nzambi. Tudi ne dianyisha bua mutudi bamumanye, bua mutudi ne dîyi diende bua kutulomboladi, ne bua mutudi mua kudia nende bulunda bukole. Anu bu mufundi wa Misambu 147, udi ne malu a bungi adi akusaka bua ‘Kutumbisha Yah!’ ne kulomba bantu bakuabu bua kuenza bia muomumue.