Ikala ne luse bua “bantu ba mishindu yonso”
PAVUA Yezu mulongeshe bayidi bende mua kuyisha lumu luimpe, wakabaleja kabidi ne: bantu bonso kabavua anu mua kuakidila mukenji wa Bukalenge bimpe to. (Luka 10:3, 5, 6) Patudi tuyisha, tudi mua kutuilangana ne bantu badi babenga mukenji wetu anyi mene batuenzela malu ne tshikisu. Kakuyi mpata, malu a buena aa adi mua kutupangisha bua kumvuila bantu batudi tuyisha luse.
Muntu udi umvuila bakuabu luse, udi ujingulula majinga ne ntatu yabu, uditeka pa muaba wabu, ne mmusue kubambuluisha. Kadi tuetu katutshiyi tumvuila bantu batudi tuyisha luse, tudi mua kutuadija kujimija tshisumi tshietu, ne katuakuyisha bimpe to. Ku lukuabu luseke, patudi tumvuila bakuabu luse, tshisumi tshietu mu mudimu wa buambi netshivule bikole, bienze anu bu ne: tudi tusakidila nkunyi mu kapia.—1 Tes. 5:19.
Mmunyi mutudi mua kumvuila bakuabu luse nansha padibi bitukolela bua kuenza nanku? Tukonkononayi bilejilu bia bantu basatu bia kuidikija: tshia Yehowa, tshia Yezu, ne tshia mupostolo Paulo.
IDIKIJA LUSE LUA YEHOWA
Munkatshi mua bidimu binunu ne binunu, bantu mbashiminyine Yehowa malu a bungi. Nansha nanku, yeye udi anu ‘muimpe kudi bantu badi kabayi ne dianyisha ne kudi bantu babi.’ (Luka 6:35) Bulenga buende budi bumuenekela ku lutulu ludiye nalu. Yehowa mmusue bua “bantu ba mishindu yonso” bapandishibue. (1 Tim. 2:3, 4) Nansha mudi Nzambi mukine malu mabi, udi wangata bantu ne mushinga wa bungi ne ki mmusue bua muntu nansha umue afue to.—2 Pet. 3:9.
Yehowa mmumanye bimpe mudi Satana mukokeshe bua kufofomija mêsu a badi kabayi bena kuitabuja. (2 Kol. 4:3, 4) Mbalongeshe ba bungi malu a mafi katshia ku buana buabu, nunku mbikole bua kuitababu lumu luimpe. Yehowa mmusue kuambuluisha bantu ba nunku. Bua tshinyi tudi tuamba nanku?
Tangila muvua Yehowa umona bena mu Niniwe. Nansha muvuabu ne tshikisu, Yehowa wakambila Yona ne: “Tshiena panyi ne bua kunyingalala bua Niniwe, tshimenga tshinene, mudi bantu bapite pa binunu 120 badi kabayi bamanye nansha mua kutapulula tshidi tshimpe ne tshidi tshibi . . . anyi?” (Yona 4:11) Yehowa wakamona ne: bena Niniwe abu kabavua bamumanye to, nunku luse luakamusaka bua kubatumina Yona bua abadimuije.
Anu bu Yehowa, tuetu petu tudi tuangata bantu netu ne mushinga wa bungi. Patudi tudienzeja ne muetu muonso bua kuambuluisha muntu yonso udi uteleja, nansha biobi kabiyi bimueneka ne: neitabe bulelela, tudi tuidikija Yehowa.
IDIKIJA LUSE LUA YEZU
Yezu uvua anu bu Tatu wende, bualu uvua pende umvuila bantu bavua bakengela malu a mu nyuma luse. Bible udi wamba ne: “Pakamonaye misumba ya bantu, wakabumvuila luse, bualu bavua batatshishibue, balekelela bu mikoko idi kayiyi ne mulami.” (Mat. 9:36) Yezu wakajingulula bua tshinyi bavua mu nsombelu au; uvua mumanye ne: bantu bavua balua kuteleja malu avuaye ulongesha bavua babalongeshe malu a dishima kudi bamfumu ba bitendelelu ne bavua babakengesha. Nansha muvua Yezu mumanye ne: ba bungi bavua mua kulekela malu mashilashilangane abapangisha bua kuitaba bulelela, uvua anu mutungunuke ne “kubalongesha malu a bungi.”—Mâko 4:1-9.
Muntu yeye kayi mukuteleje bua musangu wa kumpala, kuteketshi mu mikolo to
Nsombelu wa bantu utu ushintuluka, nansha mmuenenu wabu bua bulelela kabidi
Padi bantu babenga mukenji utudi tuyisha, tudi ne bua kudienzeja bua kujingulula tshidibu bawubengela. Bamue badi mua kuikala bangata Bible anyi buena Kristo mu mushindu mubi bua malu mabi adi bena Kristo ba ku dîna benza. Pamuapa mbambile bakuabu malu a mafi bua malongesha etu. Kadi bakuabu badi mua kuikala ne buôwa bua ne: balela babu anyi bantu ba muaba udibu badi mua kubaseka bobu bayukile netu.
Bamue bantu batudi tupeta mu buambi badi mua kubenga kututeleja bua malu mabi avua mabafikile, mabashiye ne kanyinganyinga. Muanetu wa bakaji Kim udi misionere udi wamba ne: “Bamue bantu ba mu teritware wetu mbajimije bintu biabu bionso mu mvita. Kabena ne ditekemena to. Mbatekete mu mikolo ne kabena kabidi beyemena muntu to. Tutu tutamba kutuilangana ne bantu badi baluisha mukenji wetu mu teritware eu. Musangu kampanda, bakambunda bua kungenzela bibi pamvua nyisha.”
Ntshinyi tshivua tshiambuluishe Kim bua kutungunuka ne kumvuila bantu bavuaye uyisha luse nansha muvuabu bamuluishe? Udi wamba ne: “Patu bantu banduisha, ntu mvuluka mêyi adi mu Nsumuinu 19:11 a ne: ‘Bushuwa, busunguluji bua muntu budi butuyisha tshiji tshiende.’ Pantu mvuluka nsombelu wa bena mu teritware wetu, ntu mbumvuila luse. Ki mbantu bonso badi batuluisha to. Kudi kabidi bantu badi bitaba bua tuetu kubapinganyina anu mu teritware eu.”
Tudi mua kudiebeja ne: ‘Bu meme tshiyi mumanye bulelela, ntshinyi tshimvua mua kuenza pavua Bantemu ba Yehowa balua kunyisha?’ Tshilejilu, bu bobu batuambile malu a bungi a mafi bua Bantemu ba Yehowa, tshituvua mua kuenza ntshinyi? Pamuapa tuvua petu mua kubenga mukenji wa Bukalenge, ne bivua mua kukengela batumvuile luse. Patudi tuvuluka mukenji wa Yezu wa kuenzela bakuabu malu atudi basue bua batuenzele, bidi bitusaka bua kumvuila bakuabu luse nansha padibi bikole.—Mat. 7:12.
IDIKIJA LUSE LUA PAULO
Mupostolo Paulo wakumvuila too ne bantu bavua bamuluisha ne tshikisu luse. Bua tshinyi? Bualu kavua mupue tshivuaye kumpala muoyo to. Wakamba ne: ‘Mvua kumpala mupendi wa Nzambi, mukengeshanganyi ne mupange bukalanga. Nansha nanku, bakandeja luse bualu mvua muenze malu mu dipanga, tshiyi ne ditabuja.’ (1 Tim. 1:13) Uvua mumanye ne: Yehowa ne Yezu bavua bamumvuile luse lua bungi. Nanku uvua umona ne: bantu bavuaye uyisha bavua pabu tshivuaye kumpala.
Kuvua misangu ivua Paulo utuilangana ne bantu bavua ne malongesha a dishima mase miji mu mioyo yabu. Uvua wenza tshinyi? Bienzedi 17:16 udi wamba ne: pavua Paulo mu Atena, “biakamutonda pavuaye umona muvua tshimenga tshiuwule tente ne mpingu.” Nansha nanku, Paulo wakabuelela anu pa bualu buvua bumutonde abu bua kufila bumanyishi. (Bien. 17:22, 23) Uvua wakaja nyishilu wende bilondeshile nsombelu wa bantu bua yeye “kupandisha bakuabu mu mishindu yonso.”—1 Kol. 9:20-23.
Patudi tutuilangana ne bantu badi babenga kuteleja mukenji wetu anyi badi ne malongesha a dishima, tudi mua kuenza tshivua Paulo muenze. Tudi mua kuakaja nyishilu wetu bilondeshile nsombelu wabu ne kubayisha “lumu luimpe lua bualu buimpe.” (Yesh. 52:7) Muanetu wa bakaji mukuabu diende Dorothy udi wamba ne: “Mbalongeshe bantu ba bungi ba mu teritware wetu ne: Nzambi udi ne malu makole ne mmusue anu kutulangana bilema. Ntu nganji mbela kalumbandi bua mudibu bitabuja Nzambi ne pashishe mbaleja tshidi Bible wamba bua ngikadilu mimpe ya Yehowa ne malu adiye mulaye bua matuku atshilualua.”
“TUNGUNUKA NE KUTSHIMUNA MALU MABI KU MALU MIMPE”
Bu mudi “matuku a ku nshikidilu” aya matangile ku tshibungubungu, ngenzelu wa malu wa bantu batudi tuyisha ‘neatungunuke ne kunyanguka bibi menemene.’ (2 Tim. 3:1, 13) Kadi katuena ne bua kulekela ngenzelu wabu wa malu eu utupangisha bua kuikala ne luse anyi disanka to. Yehowa udi mua kutupesha bukole bua ‘kutungunuka ne kutshimuna malu mabi ku malu mimpe.’ (Lomo 12:21) Muanetu wa bakaji Jessica udi mpanda-njila udi wamba ne: “Ntu ntamba kutuilangana ne bantu badi ne diambu ne badi batupetula ne bapetula mukenji utudi tuyisha. Bualu ebu butu buntonda. Pantu ngasa muyuki ne muntu, ntu nsambila Yehowa munda munda, mmulomba bua angambuluishe bua kumona muntu au mudiye umumona. Kuenza nunku kutu kungambuluisha bua kuela meji a mua kuambuluisha muntu au, pamutu pa kuimanyina pa mushindu undi ndiumvua.”
Tudi tutungunuka ne kukeba bantu badi bakaje muoyo wabu bimpe bua kupeta muoyo wa tshiendelele
Patudi tudienzeja bua kuyisha bantu ne lutulu, bamue ba kudibu badi bitaba bulelela
Tudi kabidi ne bua kukankamija bena Kristo netu patudi tuyisha nabu. Jessica udi wamba ne: “Patudi mu buambi, bobu kabayi bakidile umue wa kutudi bimpe, tshitu musue kuakula anu bua bualu abu to. Kadi ntu ngela bualu buimpe mu tshialu, bu mudi bualu bua bipeta bimpe bia mudimu wetu wa kuyisha nansha mudi bakuabu batubenga.”
Yehowa mmumanye bimpe ntatu yonso itudi tutuilangana nayi mu mudimu wetu wa kuyisha. Udi usanka bikole patudi tuidikija luse luende. (Luka 6:36) Kadi Yehowa kakutungunuka anu ne kumvuila bantu luse to. Tudi bashindike ne: mmumanye bimpe menemene tshikondo tshiakane tshiabutulaye ndongoluelu wa malu eu. Mudimu wetu wa kuyisha ngua kuenza ne lukasa too ne pakumbana tshikondo atshi. (2 Tim. 4:2) Tutungunukayi ne kuyisha ne tshisumi ne tumvuilayi “bantu ba mishindu yonso” luse lua bungi.
