MU BIBLE mudi mêyi avua batendeledi ba Nzambi ba lulamatu bavua ‘badiumvua anu bu mututu tudiumvua petu’ bambe ne muoyo mujima. (Yak. 5:17) Tshilejilu, mbipepele bua kumvua tshivua Paulo musue kuamba mu mêyi ende adi mu Lomo 7:21-24 a ne: “Pandi njinga kuenza bualu buimpe, bualu bubi budi nanyi. . . . Meme muena dikenga!” Patudi tuluangana ne matekete etu, bidi bitukolesha ku muoyo bualu tudi bamanye ne: nansha muntu wa lulamatu bu Paulo uvua uluangana pende ne ende.

Paulo wakaleja kabidi miaba mikuabu muvuaye udiumvua. Mu Galatiya 2:20 wakaleja muvuaye mushindike ne: Yezu uvua ‘mumunange ne mudifile bua bualu buende’! Ke muutu umona pebe anyi? Pamuapa kutu umona nanku misangu yonso to.

Wewe udibipisha bua mpekatu iuvua muenze kale, bidi mua kukukolela imue misangu bua kuitaba ne: Yehowa mmukunange ne mmukubuikidile. Bidi kabidi mua kukukolela bua kumona ne: Yezu uvua mufue bua bualu buebe. Yezu mmusue menemene bua umone ne: uvua mukufuile wewe anyi? Biobi nanku, ntshinyi tshidi mua kukuambuluisha bua kumona nanku? Tuandamune nkonko ibidi eyi.

Eyowa, Yezu mmusue bua umone ne: uvua mukufuile wewe. Bua tshinyi tudi tuamba nanku? Difuanyikijila bualu budi mu Luka 23:39-43. Muntu mmukudika ku mutshi wa makenga ku luseke lua Yezu. Udi witaba ne: uvua muenze bualu bubi. Buvua ne bua kuikala bualu bubi menemene, bualu anu bantu bavua benza malu mabi menemene ke bavuabu banyoka mu mushindu mubi eu. Bidi bitonda muntu eu bibi menemene, ne udi ulomba Yezu ne: “Umvuluke pawabuela mu Bukalenge buebe.”

Yezu wakenza tshinyi? Difuanyikijila wenda utata bua kukudimuna mutu bua kutangila muenzavi au. Nansha mudiye utata ne bidi bimusama, udi udikankamika, utua mimuemue, ne umukankamija, umuambila ne: “Bulelela, ndi nkuambila lelu ne: newikale nanyi mu Mparadizu.” Yezu uvua mua kuvuluija muntu au patupu ne: ‘Muana wa muntu wakalua bua kufila muoyo wende bu tshia kupikulangana natshi pa muaba wa bantu ba bungi.’ (Mat. 20:28) Kadi pamutu pa kumuambila nanku, wakaleja muvua mulambu wende mua kumuambuluisha pende. Pavuaye muambe ne: “newikale nanyi,” uvua wakula ne musangelu. Yezu wakaleja bualu buimpe buvua mulambu wende mua kupetesha muntu au, mmumue ne: muoyo mu Mparadizu pa buloba.

Kakuyi mpata, Yezu Kristo uvua musue bua muntu au amone ne: mulambu wende uvua ne bua kumuambuluisha pende. Bikala Yezu mumvue nanku bua muenzavi uvua kayi nansha mupete mpunga wa kuenzela Nzambi mudimu, kakuyi mpata neumvue mushindu wa muomumue bua muena Kristo mubatijibue udi wenzela Nzambi mudimu. Nunku ntshinyi tshidi mua kukushindikila ne: mulambu wa Kristo newukuambuluishe nansha muuvua muenze mpekatu kale?

Mudimu wa diyisha wa Paulo wakamuambuluisha bua kumona ne: Yezu uvua mumufuile. Mushindu kayi? Wakamba ne: “Ndi ne dianyisha kudi Kristo Yezu Mukalenge wetu uvua mumpeshe bukole, bualu uvua mumbale muena lulamatu pa kunsungula bua mudimu, nansha mumvua kumpala mupendi wa Nzambi, mukengeshanganyi ne mupange bukalanga.” (1 Tim. 1:12-14) Mudimu uvua Yezu mupeshe Paulo wakamujadikila ne: Yezu uvua mumumvuile luse, mumunange, ne mumueyemene. Bia momumue, Yezu mmupeshe yonso wa kutudi mudimu wa kuyisha. (Mat. 28:19, 20) Mudimu eu udi mua kukujadikila pebe ne: Yezu uvua mukufuile anyi?

Tuangate tshilejilu tshia Albert. Bavua bamuipate mu tshisumbu, muenze bidimu 34. Mbamupingaje matuku adi panshi aa, ne udi wamba ne: “Mpekatu yanyi idi misangu yonso kumpala kuanyi. Kadi pantu mu buambi, ntu ngumvua anu bu mupostolo Paulo ne: Yezu mmumpeshe mudimu wa kuenza. Bitu bimpetesha disanka dia bungi, tshiyi ndibipisha kabidi, mutuishibue ne: Yehowa mmufuile luse, ne nempete muoyo wa tshiendelele kumpala eku.”​—Mis. 51:3.

Allan uvua muenzavi ne muena tshikisu kumpala kua kumanyaye bulelela udi wamba ne: “Malu mabi onso amvua muenzele bantu atshitu anduila mu mutu. Kutu misangu itubi bintonda bikole. Kadi ndi ngela Yehowa tuasakidila bua mudiye munganyishile meme muena mpekatu bua kumanyisha bantu bakuabu lumu luimpe. Pandi mmona bantu bitaba lumu luimpe, bidi binjadikila ne: Yehowa udi Nzambi muimpe wa dinanga. Ndi mmona ne: udi ukuata nanyi mudimu bua kuambuluisha bantu bakuabu bavua benze pabu malu mabi.”

Misangu yonso itudi tuyisha, tudi tuenza bualu buimpe ne tutuma meji etu ku malu mimpe. Bidi bitujadikila mudi Yezu utumvuila luse, mutunange, ne mutueyemene.

Muoyo wetu udi mua kutungunuka ne kutupisha bua bilema bietu bia kale too ne pabutulabu ndongoluelu mubi wa Satana. Kadi ntshinyi tshidi mua kutuambuluisha bua kubenga kudipisha?

Jean utu utamba kudipisha bua nsombelu wa mpala ibidi uvuaye nende patshivuaye nsongakaji. Udi wamba ne: “Ntu nsanka bikole bua mudi ‘Nzambi munene kupita mioyo yetu.’” (1 Yone 3:19, 20) Kumanya ne: Yehowa ne Yezu mbamanye bimpe muudi muena mpekatu, kudi mua kukuambuluisha bua kudiumvua pebe bimpe. Vuluka ne: Yehowa uvua mutume Yezu bua kupikula bena mpekatu badi banyingalala. Kavua mumutume bua bantu bapuangane to.​—1 Tim. 1:15.

Tudi tupeta dishindika dia ne: Yezu uvua mulue kutupikula patudi tuelangana meji bikole bua mushindu uvuaye wenzela bantu bapange bupuangane malu, ne patudi tuenza muetu muonso bua kukumbaja mudimu wa kuyisha udiye mutupeshe. Wewe muenze nunku, newambe anu bu Paulo ne: Yezu “uvua munnange ne mudifile bua bualu buanyi.”