1. Mbualu kayi buvua mupostolo Paulo muambe patoke?

MUPOSTOLO Paulo wakamba patoke ne: kuvua misangu ivuaye udiumvua ne butekete, wakamba ne: Mubidi wende uvua ‘wenda unyanguka,’ kuambaye kabidi ne: uvua ne bua kuluangana bua kuenza tshidi tshimpe, wamba kabidi ne: Yehowa kavua wandamuna masambila ende misangu yonso mushindu uvuaye mutekemene to. (2 Kol. 4:16; 12:7-9; Lomo 7:21-23) Paulo wakamba kabidi ne: baluishi bende bavua bamumone bu muntu uvua ne butekete anyi kayi ne bua nsongo. * Kadi kavua ulekela mushindu mubi uvua bakuabu bamumone anyi butekete buende bimufukisha ku didimone muntu tshianana to.​—2 Kol. 10:10-12, 17, 18.

2. Ndilongesha kayi dia mushinga divua Paulo mupete bilondeshile 2 Kolinto 12:9, 10?

² Paulo wakapeta dilongesha dia mushinga mukole dia ne: Muntu udi mua kuikala ne bukole nansha yeye udiumvua ne butekete. (Bala 2 Kolinto 12:9, 10.) Yehowa wakambila Paulo ne: bukole buende ‘mbuvuijibue bupuangane mu butekete,’ mmumue ne: Yehowa uvua ne bua kupesha Paulo bukole buvuaye nabu dijinga. Tuanji tumonayi bua tshinyi katuena ne bua kupampakana padi baluishi betu batupende.

3. Bua tshinyi mbimpe tunsankile mu bipendu?

³ Kakutu muntu utu musue bua bamupende to. Kadi baluishi betu bobu batupenda batupendelamu ne tushala batume meji anu ku bidibu  bamba abi, bidi mua kututekesha. (Nsu. 24:10) Kadi mmushindu kayi utudi ne bua kumona bipendu bidi baluishi batupenda? Anu bu Paulo, mbimpe ‘tusankile mu bipendu.’ (2 Kol. 12:10) Bua tshinyi? Bualu bipendu ne buluishi mmalu adi aleja ne: tudi bayidi balelela ba Yezu. (1 Pet. 4:14) Yezu wakamba ne: bavua ne bua kukengesha bayidi bende. (Yone 15:18-20) Ke tshivua tshienzeke mu bidimu lukama bia kumpala. Tshikondo atshi, bantu bonso bavua ne mmuenenu wa malu wa bena Greke bavua bamona bena Kristo bu bantu bavua kabayi balonge anyi bashadile. Bena Yuda bavua bamona pabu bena Kristo bu bantu bavua ‘kabayi balonge ne bantu tshianana,’ anu muvuabu bamona mupostolo Petelo ne Yone. (Bien. 4:13) Bavua bamona bena Kristo bu bavua kabayi ne bualu bua nsongo. Bu muvuabu kabayi babuelakana mu malu a tshididi, kabavua ne tshivuabu mua kuenzela mbulamatadi to, ne bavua babamona bu bantu ba kuimansha ku diyala.

4. Tshinyi tshivua bena Kristo ba kumpala benze bu muvua bena lukuna babu babamona mu munshindu mubi?

⁴ Bena Kristo ba kumpala abu bakateketa mu mikolo bualu baluishi babu bavua babamona mu mushindu mubi anyi? Tòo. Tshilejilu, pavuabu bakengesha mupostolo Petelo ne Yone bua muvuabu balonda Yezu ne balongesha bakuabu malongesha ende, bakamona bualu abu bu diakalenga. (Bien. 4:18-21; 5:27-29, 40-42) Bayidi abu kabavua ne bualu bua kumvuila bundu to. Mu kupita kua bidimu, bena Kristo ba kumpala bavua ne budipuekeshi abu bakenzela bantu malu mimpe a bungi kupita avua baluishi babu benze. Tshilejilu, mikanda ya mu Bible ivuabu bafunde kudi bamue ba ku bena Kristo abu itshidi yambuluisha bantu bungi kabuyi kubala ne ibapesha ditekemena. Bukalenge buvuabu bambila bantu bukadiku, ne bukadi pa kukokesha bukua bantu buonso. (Mat. 24:14) Kadi bukalenge bua bukole bua bena Lomo buvua bukengeshe bena Kristo bukadi buye kuabu bantu babupue ne muoyo; kadi bayidi ba lulamatu abu bobu bakadi bakalenge mu diulu. Baluishi babu bobu bakadi bafue; ne biobi bienzeke bua bababishe ku lufu, nebabakokeshe kudi bukalenge buvuabu babambila kudi bena Kristo bavuabu bakine abu.​—Buak. 5:10.

5. Bilondeshile Yone 15:19, bua tshinyi batu bapepeja bantu ba Yehowa?

⁵ Lelu, batu batupepeja ne batuseka imue misangu, bamba mutudi katuyi balonge ne katuyi ne bua nsongo. Bua tshinyi? Bualu wetu mmuenenu wa malu mmushilangane ne utu nende bantu bakuabu. Tutu tuditatshisha bua kuikala ne didipuekesha, ne bupuekele, ne kuikala kutumikila. Kadi bena panu bobu batu basue kuela bena lutambishi, bena diambu, ne bantomboji ku misona. Bualu bukuabu, katutu tubuelakana mu malu a tshididi anyi tubuela mu busalayi bua ditunga nansha dimue to. Bena panu badi mu buatu buwule bantu ne mbasue bua tubuelamu. Bu mutudi tubenga kubuelamu, badi batumone bantu tshianana.​—Bala Yone 15:19; Lomo 12:2.

6. Mmalu kayi adi Yehowa wenda wenza ne bantu bende?

⁶ Nansha mudi bena panu batupepeja, Yehowa yeye udi wenda wenza netu malu a dikema. Udi wenda wenzeja mudimu wa kuyisha wa katshia ne katshia utu kawuyi muanji kuenzeka. Lelu batendeledi bende batu bapatula mikanda itubu batamba kukudimuna pa buloba bujima ne bayabanya ne bambuluisha bantu bungi kabuyi kubala ne Bible bua kuakaja nsombelu wabu. Yehowa ke wa kututshila bikaji bua malu onso a dikema adi enda enzeka aa. Udi wenza mudimu ne bantu badi bamueneka bu batekete anyi kabayi ne bua nsongo bua kukumbaja malu a dikema aa. Kadi netuambe bishi bua yonso wa kutudi pa nkayende? Yehowa udiku mua kutupesha bukole anyi? Yeye utupeshabu, tshinyi tshitudi ne bua kuenza bua kubupeta? Tumonayi malu asatu adi tshilejilu tshia mupostolo Paulo tshitulongesha.

7. Mbumue bua ku malu kayi adi tshilejilu tshia Paulo tshitulongesha?

⁷ Bumue bua ku malu adi tshilejilu tshia Paulo tshitulongesha mbobu ebu: Paudi wenzela Yehowa mudimu, kueyemenyi bukole buebe anyi mamanya ebe to. Bua mmuenenu wa buntu, Paulo uvua mua kudiela ku misona ne kudieyemena. Uvua mukolele mu Tâso, tshimenga tshikulu tshia Kilikia, provense wa Lomo. Tâso uvua tshimenga tshivua ne bubanji bua bungi ne uvua ne tshilongelu tshinene. Paulo uvua mulonge bikole. Bavua bamulongeshe kudi Gamaliele, umue wa ku balombodi bena Yuda bavuabu banemeka bikole tshikondo tshiende atshi. (Bien. 5:34; 22:3) Tshikondo kampanda, Paulo wakalua muntu munene mu bena Yuda. Wakamba ne: “Mvua nya kumpala mu buena Yuda bikole kupita bantu ba bungi ba mulongo wanyi ba mu tshisamba tshietu.” (Gal. 1:13, 14; Bien. 26:4) Kadi Paulo kavua udieyemena to.

8. Bilondeshile Filipoyi 3:8 ne dimanyisha dia kuinshi kua dibeji, mmunyi muvua Paulo umona bintu bivuaye mulekele? Bua tshinyi uvua ‘usankila mu matekete’?

⁸ Paulo uvua ne disanka dia kulekela bintu bionso bivua bimuvuija ne bukole bilondeshile mmuenenu wa bena panu. Yeye muine wakalua kumona bintu bivua bimueneka ne mushinga bivuaye nabi kumpala abi bu “bintu bia kuimansha.” (Bala Filipoyi 3:8 ne dimanyisha dia kuinshi kua dibeji.) Paulo wakapeta ntatu ya bungi bua muvuaye mulue muena Kristo. Bena mu tshisamba tshiabu bavua bamukine. (Bien. 23:12-14) Bakamuela kabidi mututu ne kumuelabu mu buloko kudi bena Lomo nende. (Bien. 16:19-24, 37) Bualu bukuabu, Paulo wakajingulula kabidi ne: uvua mupange bupuangane ne bivua bimukolela bikole bua kuenza tshidi tshimpe. (Lomo 7:21-25) Kadi pamutu pa kulekela baluishi bende anyi bilema biende bimutekesha, yeye uvua ‘usankila mu matekete.’ Bua tshinyi? Bualu pavuaye ne butekete, ke pavuaye umona tshianza tshia Nzambi mu nsombelu wende.​—2 Kol. 4:7; 12:10.

9. Tudi ne bua kuikala ne mmuenenu kayi tuetu tumone bu ne: katuena ne bintu bidi bimueneka ne mushinga?

⁹ Tuetu basue bua Yehowa atupeshe bukole, katuena ne bua kuela meji ne: bukole butudi nabu, tulasa tutudi balonge, mushindu mutudi bakole, anyi bintu bitudi nabi ke bidi bileja mushinga utudi nawu to. Bintu ebi ki mbidi bituvuija ne mushinga ku mêsu kua Yehowa to. Mu bulelela, “kakuena bena meji ba bungi mu mubidi, kakuena bantu  ba bungi badi ne bukole, kakuena bantu ba bungi badi baledibue mu mêku a bantu banene” munkatshi mua batendeledi ba Nzambi to. Kadi Yehowa yeye mmuenze mudimu ne “bintu bipote bia panu.” (1 Kol. 1:26, 27) Nunku kuedi meji ne: bu muudi kuyi ne bintu bidi bimueneka ne mushinga, kuena mua kuenzela Yehowa mudimu to. Wewe mona nsombelu webe mu mushindu muimpe. Mumona bu mushindu uudi mua kumona mudi bukole bua Yehowa bukuambuluisha. Tshilejilu, wewe umvua buôwa padi bantu bela malu audi muitabuje mpata, lomba Yehowa dikima bua wakuila ditabuja diebe. (Ef. 6:19, 20) Wewe ne disama dia munanunanu, lomba Yehowa bukole buudi nabu dijinga bua udifile mu mudimu wende bilondeshile muudi mukokeshile. Musangu wonso uudi umona mudi Yehowa ukuambuluisha, ditabuja diebe didi dikola ne udi upeta bukole bua bungi.

10. Bua tshinyi tudi ne bua kulonga bilejIlu bia batendeledi ba Yehowa ba lulamatu ba buena badibu batele mu Ebelu 11:32-34?

¹⁰ Paulo uvua ulonga Mifundu ne muoyo mujima. Uvua ne tshibidilu tshia kulonga Dîyi dia Nzambi, ne pavuaye ubala malu a batendeledi ba Yehowa ba lulamatu, bivua bimulongesha malu a bungi. Pavuaye ufundila bena Kristo bena Ebelu, wakabalomba bua belangane meji a bilejilu bia batendeledi ba Yehowa aba. (Bala Ebelu 11:32-34.) Tuangate tshilejilu tshia Davidi, umue wa ku batendeledi ba Yehowa aba. Bakamuluisha kudi bena lukuna bende, kumuluishabu kabidi kudi bantu bavua balunda bende. Patudi tuenda tukonkonona tshilejilu tshia Davidi, netumone bukole buvua Paulo mupete pavuaye welangana meji a nsombelu wa Davidi, ne mutudi petu mua kuidikija Paulo.

11. Bua tshinyi Davidi uvua umueneka bu kamuntu ka kalendalenda? (Tangila kabidi tshimfuanyi tshia pa tshizubu.)

¹¹ Bavua bamona Davidi bu kamuntu ka kalendalenda kudi Goleyata tshilobo tshia mvita tshia bukole. Pakamona Goleyata Davidi, “wakamubedia ne kapeja.” Mu bulelela, Goleyata uvua mule wa mfiondo, muvuale bia mvita ne ku mênu, mumanye kuluangana mvita kayi ne mukenende. Kadi Davidi yeye, uvua muana uvua kayi mumanye bia mvita, umueneka bu uvua kayi ne tshia nsongo tshia kuluangana natshi. Davidi wakenza bua tshivua tshimueneka ne butekete tshilue ne bukole. Wakeyemena Yehowa bua amupeshe bukole, yeye kutshimuna muabilayi au.​—1 Sam. 17:41-45, 50.

12. Ndutatu kayi lukuabu luvua Davidi mutuilangane nalu?

¹² Kuvua lutatu lukuabu luvua Davidi mutuilangane nalu luvua mua kuikala lumutekeshe. Yehowa uvua musungule Shaula bua ikale mukalenge wa Isalele, ne Davidi wakamuenzela mudimu ne lulamatu luonso. Kumpala, mukalenge Shaula uvua unemeka Davidi. Kadi pashishe, lutambishi luakasaka Shaula bua kubanga kumvuila Davidi mukawu. Shaula wakenzela Davidi malu mabi, kutetaye too ne bua kumushipa.​—1 Sam. 18:6-9, 29; 19:9-11.

13. Davidi wakenza tshinyi pavua mukalenge Shaula umuenzela malu mabi?

¹³ Nansha muvua mukalenge Shaula wenzela Davidi malu mabi, Davidi yeye wakatungunuka ne kunemeka mukalenge uvua Yehowa muteke au. (1 Sam. 24:6) Davidi kakela Yehowa tshilumbu pambidi bua malu mabi avua Shaula umuenzela au to. Kadi Davidi wakeyemena Yehowa bua amupeshe bukole buvuaye nabu dijinga bua kunanukila mu lutatu lukole alu.​—Mis. 18:1, mutu wa mukanda.

14. Nnsombelu kayi wa buena uvua nende Davidi uvua Paulo mutuilangane nende?

¹⁴ Mupostolo Paulo wakatuilangana ne lutatu lua buena lua Davidi alu. Baluishi ba Paulo bavua ne bukole bua bungi menemene kumupita. Balombodi banene ba bungi ba mu tshikondo tshiende bavua bamukine. Bavua  batamba kumututshisha ne bamuelesha mu buloko. Anu bu Davidi, bakakengesha Paulo kudi bantu bavua ne bua kuikala bangatshibue bu balunda bende. Too ne bamue bena Kristo ba mu tshisumbu bakamuluisha. (2 Kol. 12:11; Filip. 3:18) Kadi Paulo wakatshimuna bantu bonso bavua bamuluisha abu. Munshindu kayi? Wakatungunuka ne kuyisha nansha muvuabu bamuluisha amu. Wakashala mulamate bena Kristo nende nansha muvuabu bamuela mâyi ku makasa. Tshivua tshipite bionso ntshia ne: wakashala mulamate Nzambi too ne ku lufu. (2 Tim. 4:8) Kakatantamena ntatu mikole yonso ayi ku bukole buende to, kadi wakayitantamena bualu uvua weyemena Yehowa.

15. Ntshipatshila kayi tshitudi natshi? Mmunyi mutudi mua kutshikumbaja?

¹⁵ Batu bakuseka anyi bakukengesha kudi balongi nenu, bena mudimu nenu, anyi kudi balela bebe badi kabayi Bantemu anyi? Bakadiku bakuenzele malu mabi kudi muntu mu tshisumbu anyi? Bikalabi nanku, vuluka tshilejilu tshia Davidi ne tshia Paulo. Tungunuka ne “kutshimuna malu mabi ku malu mimpe.” (Lomo 12:21) Tshipatshila tshiebe ki tshia kubueja muntu dibue mu mpala bu Davidi to, kadi tshia kubueja Dîyi dia Nzambi mu mioyo ne mu meji a bantu badi basue kumanya Yehowa ne kumanya tshidi Bible wamba. Bua wewe kukumbaja tshipatshila etshi, ikala wandamuna nkonko ya bantu ne Bible. Padi bantu bakuenzela malu mabi, ikala ubanemeka ne ikala nabu bimpe, ne ikala wenzela bantu bonso malu mimpe too ne baluishi bebe.​—Mat. 5:44; 1 Pet. 3:15-17.

16-17. Mbualu kayi buvua Paulo kayi mupue muoyo?

¹⁶ Kumpala kua mupostolo Paulo kuluaye muyidi wa Kristo, uvua muntu mupange malu uvua ukengesha bayidi ba Yezu. (Bien. 7:58; 1 Tim. 1:13) Yezu nkayende wakimanyika Paulo uvuabu babikila tshikondo atshi ne: Shaula, bua kakengeshi kabidi tshisumbu tshia bena Kristo to. Yezu ukavua mu diulu wakakula nende, ne kumufofomijaye mêsu. Bua Paulo kubangaye kumona kabidi, bivua bikengela bua bantu ba buena bavuaye ukengesha abu bamuambuluishe. Paulo wakadipuekesha, kuitabaye bua muyidi kampanda diende Anania amutabeje mêsu.​—Bien. 9:3-9, 17, 18.

¹⁷ Pashishe Paulo wakamanyika bikole mu tshisumbu tshia bena Kristo. Kadi bualu buvua  Yezu mumulongeshe mu njila wa ku Damaseke kakabupua muoyo musangu nansha umue to. Paulo wakashala udipuekesha ne uvua witaba diambuluisha dia kudi bena Kristo nende ne disanka dionso. Wakitaba ne: bavua ‘diambuluisha divua dimukolesha.’​—Kolos. 4:10, 11, dim.

18. Bua tshinyi bidi mua kutukolela bua kuitaba diambuluisha dia kudi bakuabu?

¹⁸ Tshilejilu tshia Paulo tshidi tshitulongesha tshinyi? Patuakabanga kudisangisha ne Bantemu ba Yehowa bua musangu wa kumpala, tuvua mua kuikala tuzuka bua kuitaba diambuluisha divua bakuabu batupesha, bamanye ne: tuvua bana mu malu a mu nyuma ne tuvua ne malu a bungi a kulonga. (1 Kol. 3:1, 2). Kadi lelu, bituikale tukadi benzele Yehowa mudimu bidimu bia bungi ne bapete dimanya dia bungi, bidi mua kubanga kutukolela bua kuitaba diambuluisha dia kudi bakuabu, nangananga bobu batupesha nadi kudi muntu udi ne bidimu bishadile ku bietu mu bulongolodi. Kadi tumanye ne: Yehowa utu utamba kutukolesha ku diambuluisha dia bena Kristo netu. (Lomo 1:11, 12) Tuetu basue bua Yehowa atupeshe bukole, tudi ne bua kuitaba bua bena Kristo netu batuambuluishe.

19. Ntshinyi tshivua tshienze bua Paulo enze malu a dikema?

¹⁹ Pakavua Paulo mulue muena Kristo, wakenza malu a dikema. Bua tshinyi ? Bualu wakalonga ne: muntu kena uya kumpala mu nyuma bua bukole budiye nabu, bua tulasa tudiye mulonge, bua makuta adiye nawu, anyi bua muaba udiye mukolele to. Kadi udi uya kumpala padiye ne budipuekeshi ne weyemena Yehowa. Tuetu bonso tuenzayiku malu asatu aa bua kuidikija Paulo: 1) Tuikale tueyemena Yehowa, 2) tuikale tulongela malu ku bilejilu bia mu Bible, ne 3) tuikale tuitaba diambuluisha dia kudi bena kuitabuja netu. Dîba adi, nansha tuetu ne butekete bua mushindu kayi, Yehowa neatupeshe bukole bua bungi.