Bushuwa Yehowa mmusue bua bantu babidi badi baselangana bikale ne disanka ne bashale mu malanda makole bua kashidi. (Mat. 19:4-6) Biwikala ujinga kubuela mu dibaka, mmunyi muudi mua kupeta muntu muimpe wa kuselangana nende? Bu mudi Yehowa Mufuki wetu, mmumanye tshitudi ne bua kuenza bua kuikala ne disanka mu dibaka. Nunku wewe mutumikile mêyi manene adiye mutupeshe newikale bushuwa ne disanka. Mona amue a ku mêyi manene au.

Mbimpe tuetu bine tuanji tumanye ne: “Muoyo udi udinga kupita tshintu tshikuabu kayi tshionso ne mmubi mutambe.” (Yel. 17:9) Padi bantu babidi badi bajinga kuselangana batuadija kutantshilangana, batu bumvua anu bua kuikala kumonangana ne kuyukila misangu yonso. Patubi bienzeka nanku, bitu bibakolela bua kuangata mapangadika mimpe. Padi bantu bangata dipangadika dia kuselangana bimanyine anu pa mushindu udibu badiumvua, batu misangu ya bungi balua kuedibua mâyi ku makasa. (Nsu. 28:26) Ke bualu kayi ki mbia meji bua bantu babidi kusaka mananga padibu batuadija kutantshilangana anyi kulayangana bua kuselengana padibu kabayi banji kulongangana bimpe menemene to.

Nsumuinu 22:3 udi wamba ne: “Muntu mudimuke udi umona njiwu, udi usokoma, kadi badi kabayi ne dimanya badi batungunuka ne kuyaku ne badi bakenga bua malu adi abakuata.” Kutantshilangana ku Enternete kudi mua kuikala ne njiwu kayi? Bamue mbatuilangane ne bantu badibu kabayi bamanye ku Enternete, kutuadijabu kutantshilangana. Bia dibungama kuluabu kujingulula pashishe ne: bavuabu batantshilangana nabu abu bavua babashime. Kudi kabidi bantu badi ne konte ya Enternete ya dishima idibu badinga nayi ba tshitaba mvinyingu bua kubiba makuta. Misangu mikuabu, bantu babi bavua badingangana abu bavua bamba ne: mBantemu.

Mona njiwu mikuabu. Mu imue site ya ditantshilangana ku Enternete, batu benza mudimu ne programe kampanda ya ordinatere idibu bamba mudiyi mua kutuangaja bantu badi bakumbane bua kuselengana. Kadi kakuena tshidi tshileja ne: kuenza nanku kutu kuendesha malu mu mushindu muimpe to. Ki mbimpe kueyemena programe wa ordinatere muenza kudi bantu bua akuangatshile dipangadika dia mushinga dia kusungula muntu muimpe wa kuselangana nende to. Tueyemene tuetu mêyi manene a mu Bible pamutu pa programe ya ordinatere ayi.​—Nsu. 1:7; 3:5-7.

Mu Nsumuinu 14:15 mudi dîyi dinene dia ne: “Tshitaba mvinyingu udi witaba dîyi dionso, kadi  muntu mudimuke udi welangana meji a tshidia tshionso tshidiye wela.” Mbimpe wanji umanye muntu bimpe menemene kumpala kua wewe kutuadija kumumona bu muntu muimpe wa kuselengana nende. Kadi kutantshilangana ne muntu au ku Enternete kudi mua kukukolela bua kumumanya bimpe. Nansha wewe ubala malu adiye ufunda ku Enternete ne uyukila nende bikole, udi mua kuamba ne: udi mumumanye bimpe anyi? Bamue bavua bela meji ne: mbapete kambele ka pa yabu minu bakanyingalala bikole bua tshivuabu balue kumanya ndekelu wa bionso pavuabu batuilangane ne muntu au mpala ne mpala.

Mufundi wa misambu wakamba ne: “Tshiena ndamatangana ne bena mashimi, ndi ngepuka badi basokoka tshidibu.” (Mis. 26:4) Ba bungi batu bela meji ne: padibu bafunda malu abu mu site ya ditantshilangana ku Enternete mbimpe kushima bua bantu babanyishe. Badi mua kusokoka bikadilu biabu bibi anyi kakuakuikala mushindu wa kubimona patoke padibu bafundila bantu bakuabu mesaje nansha. Nansha mudi bamue mua kudimanyisha bu Bantemu ba Yehowa, mBantemu betu ba bushuwa bakadi babatijibue anyi? Mbashindame mu nyuma anyi? Badi mu malanda a nsungansunga ne Yehowa anyi? Badi babanemeka mu bisumbu biabu anyi? Peshi badi mua kuikala bilejilu bibi anyi mene “malunda mabi”? (1 Kol. 15:33; 2 Tim. 2:20, 21) Mikenji ya mu Bible idi ibanyishila bua kusela peshi kusedibua anyi? Mbimpe upeta mandamuna a nkonko yonso eyi. Wewe kuyi muyukile ne Bantemu bakuabu badi bamanye muntu au bimpe, nebikale bikole bua kuapeta. (Nsu. 15:22) Bushuwa, mutendeledi wa Yehowa wa lulamatu kena mua “kudibueja mu tshikokedi tshimue” ne muntu udi kayi muena kuitabuja nansha.​—2 Kol. 6:14; 1 Kol. 7:39.

Kukebela wa kuselangana nende mu site ya Enternete kudi ne njiwu, kadi kudi mishindu mimpe mitambe ya kukeba wa kuselangana nende ne kudia nende bulunda budi mua kufikisha ku dibaka didi ditumbisha Nzambi. Ntshinyi tshiudi mua kuenza bua kupeta muntu muimpe wa kuselangana nende? Patubu kabayi bakandike bua kudisangisha muaba umue, Bantemu ba Yehowa batu bamanyangana ne bena Kristo nabu patubu babuela mu bisangilu, mu mpuilu, mu mpungilu, ne mu masangisha makuabu.

Patuku kakuyi mushindu wa kudisangisha pamue bu mudi mu tshikondo tshia korona, tutu tuenzela bisangilu bietu ku biamu kututu ne mpunga ya kumanyangana ne Bantemu bakuabu batshidi bajike. Udi mua kubateleja padibu benza muyuki ne padibu bandamuna mu bisangilu bua kujikula ditabuja diabu. (1 Tim. 6:11, 12) Nudi kabidi mua kuyukidila nabu ku biamu aku mu kasumbu kampanda panyima pa bisangilu. Mu bikondo bikuabu bitu Bantemu batuilangana ku biamu bua kupitshisha dîba pamue, udi mua kumona mudi uudi ujinga kuselangana nende au wenzela bakuabu malu, nunku udi mua kumanya bikadilu biende. (1 Pet. 3:4) Mu kupita kua matuku, panudi nuenda numanyangana bimpe, udi mua kumona ni nudi ne bipatshila bia muomumue ne kumona kabidi ni nudi mua kusomba bimpe mu dibaka.

Padi bajike balonda mêyi manene a mu Bible bua kukeba wa kuselangana nende, nebadimuene pamuapa ne abu abidi bulelela budi mu lusumuinu lua ne: “Muntu udi upeta mukaji [anyi mulume] muimpe mmupete tshintu tshimpe, ne udi upeta dianyishibua dia Yehowa.”​—Nsu. 18:22.