1. Tudi ne bua kumona disambila mushindu kayi?

 MBATUPESHE diakalenge dia mushinga mukole dia kuyukila ne Mufuki wa diulu ne buloba mu disambila. Anji elabi meji: tudi ne mushindu wa kuambila Yehowa yetu yonso itudi nayi mu muakulu kayi wonso ne dîba kayi dionso, kabiyi bikengela ne: tuanji tuangate nende tshipungidi to. Tudi mua kumusambila nansha tuetu mu lupitadi anyi mu buloko, batuishibue ne: Tatu wetu wa dinanga neatuteleje. Tudi ne dianyisha dia bungi bua dipa edi.

2. Mmunyi muvua Davidi uleja ne: uvua wangata diakalenga dia kusambila ne mushinga wa bungi?

² Mukalenge Davidi uvua wangata diakalenga dia kusambila ne mushinga wa bungi. Wakimbila Yehowa wamba ne: “Disambila dianyi dikale bu musenga wa manananshi.” (Mis. 141:1, 2) Tshikondo tshia Davidi, musenga wa manananshi uvuabu benza nawu mudimu mu ntendelelu mulelela kudi bakuidi, bavua bawulongolola bimpe bimpe. (Ekes. 30:34, 35) Pavua Davidi wakula bua musenga wa manananshi, uvua usua kuleja ne: uvua musue kuela meji bimpe bimpe bua malu avuaye ukeba kuambila Tatu wende wa mu diulu. Ke dijinga ditudi petu nadi. Tudi basue bua masambila etu asankishe Yehowa.

3. Nngikadilu kayi utudi ne bua kuikala nende patudi tusambila? Bua tshinyi?

³ Patudi tusambila, mbimpe tuikale ne kanemu ka bungi. Elabi meji bua bikena kumona bivua Yeshaya, Yehezekele, Danyele, ne Yone bapete. Bikena kumona ebi mbishilangane, kadi mbifuanangane ku bualu bumue. Buonso buabi bidi bileja mudi Yehowa muikale Mukalenge mutambe bunene. Yeshaya ‘wakamona Yehowa musombe mu nkuasa  wa bukalenge mutumbuke ne mubandishibue muulu.’ (Yesh. 6:1-3) Yeshaya wakamona Yehowa musombe mu ditempu diende dia mu diulu, bamunyunguluke kudi “nsese . . . bu ya muanza nkongolo.” (Yeh. 1:26-28) Danyele wakamona “Wa Kale wa Matuku a Bungi” muvuale bilamba bitoke, ndimi ya kapia ipatuka mu nkuasa wende wa bukalenge. (Dan. 7:9, 10) Yone wakamona Yehowa musombe mu nkuasa wa bukalenge, bamunyunguluke kudi tshintu bu muannza nkongolo mulenga bu dibue dia emerode. (Buak. 4:2-4) Patudi tuelangana meji bua butumbi bua Yehowa budi muntu kayi mua kuikala nabu, bidi bileja mutudi katuyi nansha tukumbanyina diakalenga dia kusemena kudiye mu disambila ne bituvuluija mushinga wa kumusambila ne kanemu. Kadi mmunyi mutudi mua kusambila?

4. Mêyi a ntuadijilu adi mu disambila dia tshilejilu didi mu Matayi 6:9, 10 adi atulongesha tshinyi?

⁴ Matayi 6:9, 10. Yezu mulongeshe bayidi bende mu Muyuki wende wa pa mukuna mua kusambila mu mushindu udi usankisha Nzambi. Yezu mumane kuamba ne: “Nunku nudi ne bua kusambila mushindu eu,” wakanji kutela malu a mushinga adi apetangana buludiludi ne tshipatshila tshia Yehowa; ngowu aa: divuija dîna diende dia tshijila; dilua dia Bukalenge buende buabutula baluishui ba Nzambi bonso; ne mabenesha adiye mulongoluele buloba ne bantu. Tuetu tulomba malu aa mu masambila etu, tudi tuleja ne: disua dia Nzambi didi ne mushinga kutudi.

5. Mbikumbane bua tuetu kusambila bua malu etu anyi?

⁵ Mu tshitupa tshia disambila tshidi tshilonda Yezu uvua muleje ne: mbikumbane bua kusambila bua malu etu. Tudi mua kulomba Yehowa bua atupeshe tshiakudia tshia ku dituku, bua kutubuikidila mibi yetu, bua kutuepula ku mateyi, ne bua kutusungila kudi mubi. (Mat. 6:11-13) Patudi tulomba Yehowa malu aa, tudi tuleja mutudi tuitaba ne: tudi dijinga ne diambuluisha diende ne tukeba ne: atuanyishe.

6. Tudi ne bua kusambila anu bua malu adi mu disambila dia tshilejilu anyi? Umvuija.

⁶ Yezu kavua ukeba ne: bayidi bende bashale bakuate miaku ya mu disambila dia  tshilejilu edi ku muoyo to. Mu masambila makuabu avua Yezu muenze, uvua muambamu malu avua ne mushinga kudiye tshikondo atshi. (Mat. 26:39, 42; Yone 17:1-26) Bia muomumue, tudi mua kusambila bua bualu kayi buonso butudi tusamishila meji. Patudi tukeba kuangata dipangadika kampanda, tudi mua kusambila tulomba meji ne busunguluji. (Mis. 119:33, 34) Tuetu tukeba kutuadija mudimu mukole udibu batupeshe, tudi mua kusambila bua tupete meji a bungi ne dijingulula dia malu. (Nsu. 2:6) Baledi badi mua kusambila bua bana babu, bana pabu badi mua kusambila bua baledi babu, ne tuetu bonso tudi ne mushindu wa kusambila bua balongi betu ba Bible ne bua bantu batudi tuyisha; bidi bikengela tuenze nanku. Bushuwa, katuena anu tulomba Yehowa malu patupu to.

7. Bua tshinyi tudi ne bua kutumbisha Yehowa patudi tusambila?

⁷ Tuvulukayi bua kutumbisha Yehowa patudi tusambila. Kakuena muntu utudi mua kutumbisha kupita Nzambi wetu to. Udi “muimpe ne udi mudiakaje bua kubuikidilangana.” Udi kabidi “Nzambi wa luse udi uditeka pa muaba wa bakuabu, udi kayi ukuata tshiji lukasa, muwule tente ne dinanga dia lulamatu pamue ne lulamatu.” (Mis. 86:5, 15) Bushuwa, tudi ne malu adi atusaka bua kutumbisha Yehowa bua tshidiyi ne bua malu adiye wenza.

8. Ngamue malu kayi atudi mua kuelela Yehowa tuasakidila? (Misambu 104:12-15, 24)

⁸ Pakumbusha kutumbisha Yehowa, tudi tumvua mua kumuela tuasakidila bua bintu bimpe bidiye utupesha. Tshilejilu, tudi mua kumuela tuasakidila bua mekala mimpe a dikema adi nawu bilongo, bua biakudia bia butamu bishilashilangane bidi kabiyi bijika, ne bua dikala ne balunda bimpe badi batukolesha. Tatu wetu wa dinanga udi utupesha bintu ebi ne bikuabu bia bungi anu bua ne: tuikale ne disanka. (Bala Misambu 104:12-15, 24.) Bualu bua mushinga mukole budi ne: tudi tuela Yehowa tuasakidila bua biakudia bia mu nyuma bidiye utupesha ne bua ditekemena dilenga ditudi nadi bua matuku atshilualua.

9. Ntshinyi tshidi mua kutuambuluisha bua kuvuluka bua kuela Yehowa tuasakidila? (1 Tesalonike 5:17, 18)

⁹ Bidi mua kuikala bipepele menemene bua kupua diela Yehowa tuasakidila muoyo bua  bionso bidiye utuenzela. Ntshinyi tshidi mua kukuambuluisha bua kupu muoyo? Enza liste wa malu auvua mulombe mu disambila, ne ku musangu ne ku musangu, wikale umutangila bua kumona mudi Yehowa mukuandamune. Pashishe muela tuasakidila bua mudiye mukuambuluishe. (Bala 1 Tesalonike 5:17, 18.) Elabi meji bua bualu ebu: Tutu tumvua disanka ne basue padi bakuabu batuleja dianyisha. Bia muomumue, patudi tuvuluka bua kuela Yehowa tuasakidila bua mudiye wandamuna masambila etu, bidi bimusankisha bikole. (Kolos. 3:15) Mbualu kayi bukuabu bua mushinga butudi ne bua kuelela Nzambi tuasakidila?

10. Bilondeshile 1 Petelo 2:21, bua tshinyi tudi ne tshitudi tuelela Yehowa tuasakidila bua muvuaye mutume Yezu pa buloba?

¹⁰ Bala 1 Petelo 2:21. Tudi ne bua kuela Yehowa tuasakidila bua muvuaye mutume Muanene munanga bua kutulongesha. Tuetu bakonkonone nsombelu wa Yezu, tudi tumanya malu a Yehowa a bungi menemene ne a mutudi mua kumusankisha. Tuetu tuleja ditabuja mu mulambu wa Kristo, tudi mua kudia malanda mimpe a nsungansunga ne Yehowa Nzambi ne kuikala nende mu ditalala.​—Lomo 5:1.

11. Bua tshinyi tudi tusambila mu dîna dia Yezu?

¹¹ Tudi tuela Yehowa tuasakidila bua mutudi ne mushindu wa kumusambila kupitshila kudi Yezu. Yehowa udi wandamuna masambila etu ku diambuluisha dia Yezu. Tuetu tusambila mu dîna dia Yezu, Yehowa udi uteleja ne wandamuna. Yezu wakumvuija ne: “Tshintu tshionso tshinudi nulomba mu dîna dianyi, nennuenzelatshi, bua Tatu atumbishibue bua bualu bua Muana.”​—Yone 14:13, 14.

12. Mbualu kayi bukuabu butudi ne bua kuelela Yehowa tuasakidila bua Muanende?

¹² Yehowa udi utubuikidila mibi ku diambuluisha dia mulambu wa Yezu wa tshia kupikula natshi. Bible udi wamba mudi Yezu muikale “muakuidi munene . . . musombe mu diulu ku tshianza tshia balume tshia nkuasa wa bukalenge wa Mutambe Bunene.” (Eb. 8:1) Yezu ke wetu “muambuluishi kudi Tatu.” (1 Yone 2:1) Tudi tuela Yehowa tuasakidila bua mudiye mutupeshe Muakuidi Munene udi netu luse bua matekete etu ne udi “utuakuila”! (Lomo 8:34; Eb. 4:15) Tudi bapange bupuangane, nunku bu mulambu wa Yezu kawuyiku, katuvua mua kuyukila ne Yehowa mu disambila to. Kakuyi mpata, tuambilangane bulelela, katuena mua kupeta mêyi makumbane bua kuleja Yehowa dianyisha bua mudiye mutupeshe Muanende munanga, dipa dia mushinga mukole didiye mutupeshe to!

13. Butuku kumpala kua Yezu kufua, mmunyi muvuaye muleje ne: uvua munange bayidi bende?

¹³ Butuku kumpala kua Yezu kufua, wakasambila mutantshi mule bua bayidi bende, ulomba Tatu wende bua ‘abalame bua bualu bua mubi.’ (Yone 17:15) Yezu uvua munange bayidi bende bushuwa! Ukavua pa kukenga bikole pa muaba wabu. Uvua uditatshisha bikole bua bualu buabu.

14. Mmunyi mutudi mua kuleja ne: tudi banange bena Kristo netu?

¹⁴ Bua kuidikija Yezu, katutangidi anu majinga etu nkayetu to, tuikalayi ne tshibidilu tshia kusambila bua bena Kristo netu. Tuetu tuenza nanku, tudi tutumikila mukenji wa Yezu wa kunangangana ne tuleja Yehowa mutudi banange bena Kristo netu bikole. (Yone 13:34) Kusambila bua bena Kristo netu, ki nkupitshisha dîba to. Dîyi dia Nzambi didi  dituambila ne: “Disengelela dia muntu muakane didi diambuluisha bikole.”​—Yak. 5:16.

15. Bua tshinyi bena Kristo netu badi dijinga ne masambila etu?

¹⁵ Bena Kristo netu badi dijinga ne masambila etu bualu badi batuilangana ne ntatu ya bungi. Tudi mua kulomba Yehowa bua abambuluishe bua bananukile padibu basama, padiku bipupu ne mvita; padibu babakengesha, anyi padiku ntatu mikuabu. Tudi kabidi mua kusambila bua bana betu badi badipangisha amue malu bua kuambuluisha bana betu badi mu dikenga. Pamuapa udi mumanye bamue badi batuilangana ne ntatu ya buena eyi. Kuenaku mua kubatela mu masambila ebe muntu yonso mu dîna diende anyi? Patudi tulomba Yehowa bua abambuluishe bua bananukile, tudi tuleja mutudi ne dinanga dia buwetu.

16. Bua tshinyi mbimpe tusambile bua bana betu badi batulombola?

¹⁶ Bana betu badi balombola malu mu tshisumbu batu ne dianyisha dia bungi bua mututu tubatela mu masambila etu, ne masambila au atu abambuluisha. Ke tshivua tshienzekele mupostolo Paulo. Wakafunda ne: “Nusambile kabidi bua bualu buanyi, bua bampeshe mêyi pandi mbulula mukana muanyi, bua mmone mua kuakula ne dikima mu dimanyisha bualu busokoka bua tshijila bua lumu luimpe.” (Ef. 6:19) Lelu, tudi petu ne bana betu badi benza mudimu mukole wa kutulombola. Bua kuleja mutudi babanange, tulombayi Yehowa bua abeneshe mudimu wabu.

17-18. Ndîba kayi didibu mua kutulomba bua kusambila bua bakuabu? Ntshinyi tshitudi ne bua kuikala bavuluke?

¹⁷ Kutu misangu idibu mua kutulomba bua kusambila pa muaba wa bakuabu. Tshilejilu, muanetu wa bakaji udi ulombola dilonga dia Bible udi mua kulomba muanetu wa bakaji mukuabu udibu nende bua kuenza disambila. Bu mudi muanetu wa bakaji eu kayi pamuapa mumanye mulongi bimpe, udi mua kujinga ne: enze nansha disambila dia ndekelu. Dîba adi udi mua kudienza bipepele bilondeshile majinga a mulongi.

¹⁸ Badi mua kulomba muanetu wa balume bua kusambila mu tshisangilu tshia mudimu wa buambi anyi mu tshisangilu tshia tshisumbu. Bana betu badibu bapesha diakalenga  edi, mbimpe bikale bavuluke tshipatshila tshia bisangilu. Katuena tusambila bua kubela bena mu tshisumbu anyi kufila mamanyisha to. Bua bisangilu bietu bia bungi, musambu ne disambila bitu biangata minite itanu, nunku ki mbimpe muanetu udi wenza disambila, nangananga dia ntuadijilu, ikale ne “mêyi a bungi” to.​—Mat. 6:7.

19. Ntshinyi tshiatuambuluisha bua kuikala badiakaje bua dituku dia dilumbuluisha dia Yehowa?

¹⁹ Bu mudi dituku dia dilumbuluisha dia Yehowa disemene bikole, mbimpe tuenze bua disambila dikale ne mushinga wa bungi mu nsombelu wetu. Yezu wakamba bua disambila ne: “Nunku, nushale batabale nusengelela Nzambi dîba dionso bua numanye mua kuepuka malu onso adi ne bua kulua aa.” (Luka 21:36) Bushuwa, kutungunuka ne kusambila nekutuambuluishe bua kushala batabale mu nyuma bua ne: dituku dia Nzambi kaditusanganyi katuyi badilongolole.

20. Ntshinyi tshitudi mua kuenza bua masambila etu ikale bu musenga wa manananshi a dipembu dimpe?

²⁰ Mmalu kayi atudi balonge? Tudi balonge ne: tudi tuangata disambila ne mushinga wa bungi menemene. Masambila etu adi ne bua kutamba kuimanyina pa malu adi apetanganana ne tshidi Yehowa mulongolole. Tudi kabidi tuleja dianyisha bua Muana wa Nzambi ne bua bukokeshi bua Bukalenge buende ne tusambila bua bena Kristo netu. Bushuwa, tudi kabidi mua kusambila bua majinga etu a ku mubidi ne a mu nyuma. Patudi tuela meji bimpe bimpe bua bitudi mua kuamba mu masambila etu, tudi tuleja ne: tudi tuangata diakalenga dinene edi ne mushinga wa bungi. Mêyi etu neikale bu musenga wa manananshi a dipembu dimpe kudi Yehowa, mmumue ne: ‘amusankisha.’​—Nsu. 15:8.