1. Disua dia Yehowa didi tshinyi lelu?

 DISUA dia Nzambi lelu didi ne: bayishe lumu luimpe lua Bukalenge pa buloba bujima. (Mâko 13:10; 1 Tim. 2:3, 4) Mudimu eu ngua Yehowa, ne mbimpe menemene bua mudiye muteke Muanende munanga bua kuwulombola. Tudi batuishibue ne: bu mudi muanende eu uwulombola bimpe, newenzeke anu mudi Yehowa musue kumpala kua nshikidilu kulua.​—Mat. 24:14.

2. Netumone tshinyi mu tshiena-bualu etshi?

² Netumone mu tshiena-bualu etshi ne: ku diambuluisha dia “mupika wa lulamatu udi mudimuke,” Yezu udi ufila biakudia bia mu nyuma ne ulongolola bayidi bende bua mudimu munene wa diyisha wa katshia ne katshia. (Mat. 24:45) Netumone kabidi tshidi yonso wa kutudi mua kuenza bua kutua Yezu ne mupika wa lulamatu mpanda.

3. Mbukokeshi kayi budibu bapeshe Yezu?

³ Yezu udi utangila mudimu wa diyisha. Bua tshinyi tudi tuamba nanku? Matuku makese kumpala kua Yezu kubanda mu diulu, wakatuilangana ne bayidi bende ba lulamatu ndambu pa mukuna wa Galela, kubambilaye ne: “Mbampeshe bukokeshi buonso mu diulu ne pa buloba.” Tangila tshidi katupa ka ndekelu aka kamba: “Nunku, ndayi nuvuije bantu ba mu bisamba bionso bayidi.” (Mat. 28:18, 19) Nunku bukokeshi budi nabu Yezu bua kulombola mudimu wa diyisha budi munkatshi mua malu avuabu bamupeshe.

4. Ntshinyi tshidi tshitujadikila ne: Yezu utshidi anu ulombola mudimu wa diyisha?

 ⁴ Yezu wakamba ne: mudimu wa kuyisha ne kuvuija bantu bayidi uvua ne bua kuenzeka mu “bisamba bionso” ne uvua ne bua kuikala ne bayidi bende “matuku onso too ne ku nshikidilu kua ndongoluelu wa malu eu.” (Mat. 28:20) Mêyi aa adi aleja bimpe ne: mudimu wa diyisha eu uvua ne bua kuenzeka ku bulombodi bua Yezu too ne matuku etu aa.

5. Ntshinyi tshitudi tuenza bua kukumbaja dîyi di mu Misambu 110:3?

⁵ Yezu kavua usamisha mutu bua muvuaku mua kuikala bena mudimu bakese ku ndekelu kua ndongoluelu wa malu eu to. Uvua mumanye ne: mêyi a buprofete avua muimbi wa misambu muambe avua ne bua kukumbana: “Bantu bebe nebadifile ku budisuile mu dituku dia tshiluilu tshia basalayi bebe.” (Mis. 110:3) Wewe uyisha, udi utua Yezu ne mupika wa lulamatu mpanda, ne udi wambuluisha bua dîyi dia buprofete edi dikumbane. Mudimu eu udi wenda uya kumpala, kadi udi ne ntatu.

6. Ndutatu kayi lutu bayishi ba Bukalenge batuilangana nalu lelu?

⁶ Buluishi ke lumue lutatu lutu bayishi ba Bukalenge batuilangana nalu. Batontolodi, bamfumu ba bitendelelu, ne bena tshididi mbambile bantu malu a dishima bua mudimu wetu. Balela betu, bamanyangana nabu, ne bena mudimu netu bobu bitabe mashimi aa, badi mua kutuenzeja bua tulekele kuenzela Yehowa mudimu ne tulekelu kuyisha. Mu amue matunga batu batuzakeja, batufunyina, batukuata ne batuela mu maloko. Bionso abi mbuluishi. Kabiena bitukemesha to. Yezu ukavua muambe ne: “Bisamba bionso nebinukine bua dîna dianyi.” (Mat. 24:9) Lukinu ludibu batukine elu ntshijadiki tshia ne: Yehowa udi utuanyisha. (Mat. 5:11, 12) Diabolo ke udi usaka bantu bua kutuluisha. Kadi udi kutupu kumpala kua Yezu! Lumu luimpe ludi luenda lufika kudi bisamba bionso ku diambuluisha dia Yezu. Tumonayi bijadiki.

7. Ntshinyi tshidi tshikujadikila ne: Buakabuluibua 14:6, 7 udi wenda ukumbana?

⁷ Bu mutudi bayishi ba Bukalenge, tudi kabidi tutuilangana ne lutatu lua tupeta bantu kabayi bamanye muakulu utudi tuakula. Mu malu avua Yezu mubuluile mupostolo Yone, wakadianjila kuamba ne: matuku etu aa lumu luimpe luvua ne bua kutshimuna tshipumbishi atshi. (Bala Buakabuluibua 14:6, 7.) Mushindu kayi? Tudi tupetesha bantu ba bungi mushindu wa kuitaba mukenji wa Bukalenge. Lelu, bantu ba pa buloba bujima badi mua kubala malu a mu Bible mu site wetu wa jw.org bualu malu au adi mu miakulu mipite pa 1 000! Kasumbu kaludiki kakanyisha bua bakudimune mukanda wa Shala ne muoyo kashidi!, mukanda wetu munene wa kuvuija nawu bantu bayidi. Udi mu miakulu mipite pa 700! Batu bafila kabidi biakudia bia mu nyuma ku diambuluisha dia filme mikuatshila tumama ne mikanda ya mu muakulu wa Braille bua bampofu. Tudi tumona mudi mêyi a buprofete enda akumbana. Bantu “ba miakulu yonso ya bisamba” badi benda balonga mua kuakula “muakulu mukezuke” wa bulelela bua mu Bible. (Zek. 8:23; Zek. 3:9) Bionso abi bidi bienda bikumbana ku bulombodi buimpe bua Yezu Kristo.

8. Mudimu wa diyisha mmupatule bipeta kayi?

⁸ Lelu, mu bulongolodi bua Yehowa mudi bantu bapite pa miliyo 8 000 000 ba mu matunga 240, ne bantu binunu bia bungi badi babatijibua tshidimu tshionso etshi! Kadi tshintu tshidi ne mushinga kupita bungi bua bantu ebu nngikadilu yabu ya mu nyuma, tuambe ne: “bumuntu bupiabupia” budi  bayidi bapiabapia aba bapete. (Kolos. 3:8-10) Ba bungi mbalekele tshiendenda, tshikisu, kansungansunga, ne buena ditunga. Dîyi dia buprofete didi mu Yeshaya 2:4 didi dienda dikumbana; kabena ‘balonga kabidi mvita nansha.’ Patudi tudienzeja bua kuvuala bumuntu bupiabupia, bidi bituambuluisha bua kukoka bantu mu bulongolodi bua Nzambi, ne tudi tuleja ne: tudi tulonda dikasa dia mutangidi wetu Yezu Kristo. (Yone 13:35; 1 Pet. 2:12) Bionso ebi kabiena bienzeka ku mpukapuka to, Yezu udi utuambuluisha mudibi bikengela.

9. Bilondeshile Matayi 24:45-47, ntshinyi tshikavuabu bambe bua tshikondo tshia ku nshikidilu?

⁹ Bala Matayi 24:45-47. Yezu uvua mudianjile kuamba ne: mu tshikondo tshia ku ndekelu, uvua ne bua kuteka “mupika wa lulamatu udi mudimuke” bua kufila biakudia bia mu nyuma. Nunku mupika eu uvua ne bua kuenza mudimu mukole matuku etu aa. Udi uwenza bushuwa. Mutangidi wetu udi wenza mudimu ne kasumbu kakese ka balume bela manyi bua kupesha bantu ba Nzambi ne aba badi basue “biakudia mu tshikondo tshiakanyine,” bia mu nyuma. Bela manyi aba kabena badiangata bu bamfumu badi ne bukokeshi pa ditabuja dia bakuabu to. (2 Kol. 1:24) Kadi buabu bobu, Yezu Kristo ke “Mulombodi ne mukokeshi” wa bantu.​—Yesh. 55:4.

10. Mu foto udi muaba eu, mmukanda kayi uvua mukujadikile ne: udi mu njila mutangile ku muoyo wa tshiendelele?

¹⁰ Katshia ku 1919, mupika wa lulamatu mmupatule mikanda mishilashilangane idi mipeteshe bantu mpunga wa kulonga bulelela bua mu Dîyi dia Nzambi. Mu 1921, mupika wakapatula mukanda wa La harpe de Dieu, bua kuambuluisha bantu bavua basue kulonga malongesha a nshindamenu a mu Bible. Bu muvua bikondo bishintuluka, bakapatula  mikanda mikuabu. Ku mikanda idi muaba eu, mmukanda kayi uvua mukuambuluishe bua kufika ku dimanya Tatu wetu wa mu diulu ne kumunanga? Nyoyi eyi: “Que Dieu soit reconnu pour vrai!,” Bulelela budi bufikisha ku muoyo wa kashidi, Udi mua kuikala ne muoyo wa kashidi pa buloba bukudimuna mparadizu, Dimanya didi difikisha ku muoyo wa kashidi, Bible utu ulongesha tshinyi menemene?, Mmalu kayi adi Bible utulongesha?, anyi mukanda wetu mupiamupia eu wa Shala ne muoyo kashidi! Mikanda yonso eyi ivua mienza bua kuvuija bantu bayidi, ne tuvua bayindile ne muoyo kuulu kuulu pavuabu bamanyishe dipatuka diayi.

11. Bua tshinyi bidi ne mushinga bua tuetu bonso tupete biakudia bia mu nyuma?

¹¹ Tuetu bonso tudia dijinga ne biakudi bikole, ki nganu bapiabapia to. Mupostolo Paulo wakafunda ne: “Biakudia bikole mbia bantu bakole.” Kuambaye kabidi ne: kutumikila malu malelela a mu Bible atudi tulonga kudi kutuambuluisha bua “kutapulula tshidi tshimpe ne tshidi tshibi.” (Eb. 5:14) Mu bikondo bikole ebi bidi malu a bikadilu bilenga matambe kunyanguka, bidi mua kukolela bantu bua kutumikila mikenji ya Yehowa. Kadi Yezu udi wenza bua tupete bukole budi bukengela ku diambuluisha dia malongesha mimpe atudi tupeta. Malongesha aa adi afumina mu Bible, Dîyi difundisha ku nyuma wa Nzambi. Mupika wa lulamatu udi utulogoluela biakudia ebi ne utuabanyinabi ku bulombodi bua Yezu.

12. Anu bu Yezu, mmunyi mutudi bapeshe dîna dia Nzambi lumu?

¹² Anu bu Yezu, tudi bapeshe dîna dia Nzambi lumu ludi ludiakanyine. (Yone 17:6, 26) Tshilejilu, mu 1931 tuakangata dîna didi mu Bible dia Bantemu ba Yehowa, nunku tuetu kulamata Tatu wetu wa mu diulu muntu ne muntu pa nkayende. (Yesh. 43:10-12) Katshia anu ku ngondo wa 10 wa tshidimu atshi, dîna  dia Nzambi diakashala dipatuka pa tshizubu tshia tshibejibeji etshi. Bualu bukuabu, Bible​—Nkudimuinu wa bulongolodi bupiabupia mmupingaje dîna dia Nzambi muaba wadi menemene mu Dîyi diende. Tudi bashilangane ne bitendelelu bia bukua buena Kristo bidi biumbushe dîna dia Yehowa mu nkudimuinu ya bungi ya Bible!

13. Ntshinyi tshidi tshikujadikila ne: Yezu udi wenza mudimu ne “mupika wa lulamatu udi mudimuke” lelu? (Yone 6:68)

¹³ Ku diambuluisha dia “mupika wa lulamatu udi mudimuke,” Yezu mmuenze bulongolodi bua dikema pa buloba apa bua kutungunuja ntendelelu mukezuke. Udi umvua bishi bua bulongolodi ebu? Pamuapa diandamuna diebe ndifuanangane ne dia mupostolo Petelo wakambila Yezu ne: “Netuye kudi nganyi? Wewe udi ne mêyi a muoyo wa tshiendelele.” (Yone 6:68) Bu tuetu katuyi batuilangane ne bulongolodi bua Yehowa, mmuaba kayi uvua yonso wa kutudi mua kuikala lelu? Ku diambuluisha dia bulongolodi ebu, Yezu udi wenza bua tudie tukute mu nyuma. Udi utuambuluisha kabidi bua tukumbaje mudimu wetu wa kuyisha bimpe menemene. Udi utuambuluisha bua kuvuala “bumuntu bupiabupia” bua tusankishe Yehowa.​—Ef. 4:24.

14. Dikala mu bulongolodi bua Yehowa mu tshikondo tshidi tshipupu tshia disama dia COVID-19 dibudike ndikuambuluishe mushindu kayi?

¹⁴ Mu bikondo bia bipupu, Yezu udi utupesha buludiki bua meji. Buludiki ebu buvua buambuluishe bantu bikole mu tshikondo tshia disama dia COVID-19. Bantu ba bungi pa buloba bujima bakapanga tshia kuenza, kadi Yezu wakenza bua batuambile malu a tuetu kulonda avua umvuika bimpe bua tudikube. Bakatukankamija bua kuvuala kalamba ka ku diulu patudi munkatshi mua bantu ne  bua tuikale ntanta ne bantu. Bakavuluija bakulu bua bikale anu ne tshibidilu tshia kumanya mudi bena mu tshisumbu tshijima ne kumanya majinga abu a ku mubidi ne a mu nyuma. (Yesh. 32:1, 2) Tuvua tupeta kabidi buludiki ne malu avua atukankamija ku diambuluisha dia filme ya Mapiamapia a kudi Kasumbu Kaludiki.

15. Mbuludiki kayi buvuabu batupeshe bua dienza bisangilu ne diyisha mu tshikondo tshia tshipupu tshia Korona?

¹⁵ Mu tshikondo tshia disama edi, tuvua bapete kabidi buludiki butoke bua mua kuenza bisangilu ne kuyisha. Bantu pa kuamba bonso kabakajanguluka to, tuakatuadija kuenzela bisangilu, mpuilu, ne mpungilu ku biamu bia bantu bamonangana. Tuakatuadija kabidi kuyisha nangananga ku diambuluisha dia difundilangana mikanda ne ku telefone. Yehowa wakabenesha bionso bituvua tuenza abi. Luapolu ludi Betele ya bungi mitume nduleje ne: bamanyishi mbavule bikole. Bushuwa, bantu ba bungi bavua bapete malu mamonamona tshikondo tshia disama atshi adi atukankamija.​—Tangila kazubu ka ne: “ Yehowa udi ubenesha mudimu wetu wa diyisha.”

16. Ntshinyi tshitudi bajadike?

¹⁶ Bamue bavua pamuapa bela meji ne: bulongolodi buetu buvua bukolesha malu bua tshipupu tshia Korona atshi. Kadi biakalua kumueneka ne: buludiki buvuabu batupesha buvua buobu menemene. (Mat. 11:19) Patudi tuelangana meji a mudi Yezu ulombola bantu bende ne dinanga, bidi bitujadikila ne: nansha bualu kayi mua kutukuata, Yehowa ne Muanende munanga nebikale netu.​—Bala Ebelu 13:5, 6.

17. Mmunyi muudi umvua bua mudi Yezu ukulombola?

¹⁷ Tudi ne disanka dia bungi bua mudi Yezu muikale Mulombodi wetu! Tudi mu bulongolodi mudi bantu kabayi batapuluke bua miaba idibu bakolele, bua matunga abu, ne bua miakulu yabu. Tudi tudishibua bimpe mu nyuma ne mbatupeshe bionso bidi bikengela bua kuenza mudimu wa diyisha. Ku luetu luseke, bulongolodi budi buenda butuambuluisha bua kuvuala bumuntu bupiabupia, ne tudi tuenda tulonga mua kunangangana. Tudi ne tshia kuditumbishila natshi menemene mu mutangidi wetu Yezu!