Yezu uvua umanyisha mukenji wa ditalala. Kadi musangu mukuabu wakambila bapostolo bende ne: “Kanuedi meji ne: mvua mulue bua kufila ditalala pa buloba; tshivua mulue bua kufila ditalala, kadi muele wa mvita. Bualu mvua mulue kukebesha ditapuluka: muntu uluisha tatuende, muana wa bakaji uluisha mamuende, mukaji wa muana uluisha mamuende muenu.” (Mat. 10:34, 35) Ntshinyi tshivuaye usua kuamba?

Yezu kavua musue kutapulula bena mu dîku to, kadi uvua mumanye ne: malongesha ende avua mua kufikisha bena mu amue mêku ku ditapuluka. Nunku, bantu badi basue kulua bayidi ba Kristo ne kubatijibua badi ne bua kumanya ne: dipangadika diabu adi didi mua kubakebela ntatu. Bobu baluisha muanetu kudi muena dibaka nende anyi kudi bena mu dîku bakuabu, bidi mua kumukolela bua kushala mulamate malongesha a Kristo.

Bible udi ukankamija bena Kristo bua “kuikala mu ditalala ne bantu bonso.” (Lomo 12:18) Kadi malongesha a Yezu adi bu “muele wa mvita” mu amue mêku. Bitu bienzeka nanku padi muena mu dîku umue witaba malongesha a Yezu kadi bakuabu baaluisha. Dîba adi balela anyi bena mu dîku bakuabu badi balua “bena lukuna” ba eu udi wenda ulonga bulelela.​—Mat. 10:36.

Bayidi ba Kristo badi mu mêku adi benamu bikale mu bitendelelu bikuabu batu imue misangu batuilangana ne sombelu idi mifuane kubapangisha bua kushala banange Yehowa ne Yezu. Tshilejilu, mulela udi kayi muena Kristo udi mua kubenzeja bua benze difesto kampanda dia malu a ntendelelu. Bobu bakuluke mu diteta edi, nnganyi udibu basankisha? Yezu wakamba ne: “Muntu yonso udi munange tatuende anyi mamuende kupita mudiye munnange, ki mmunkumbanyine to.” (Mat. 10:37) Bushuwa, Yezu kavua usua kuamba ne: bayidi bavua ne bua kuikala ne dinanga dikese kudi baledi babu bua kushishabu kumukumbanyina to. Kadi uvua ubalongesha mua kusungula malu adi ne mushinga wa bungi menemene mu nsombelu wabu. Bena mu dîku dietu bobu batupangisha bua kutendelela Yehowa, mbimpe tutungunuke ne kubananga, tshibi bamanye ne: dinanga ditudi banange Nzambi ke didi pa muaba wa kumpala.

Kakuyi mpata, buluishi bua bena mu dîku budi mua kututatshisha bibi menemene. Kadi bayidi ba Yezu badi bavuluka mêyi ende aa: “Muntu yonso udi kayi witaba mutshi wende wa makenga ne undonda, ki mmunkumbanyine to.” (Mat. 10:38) Mu mêyi makuabu, bena Kristo badi bamona dibaluisha didi bena mu meku abu babaluisha bu makenga makuabu adi bayidi ba Kristo bitaba bua kunanukila, eku batekemene ne: bienzedi biabu bimpe nebisake bena mu mêku abu badi kabayi bena Kristo bua kushintulula lungenyi luabu ne kuitaba bua kulonga mukenji wa mu Bible.​—1 Pet. 3:1, 2.