TUVUA ku ndekelu kua ngondo wa 11 mu 1932 mu tshimenga tshia Mexico. Lumingu lushale, bavua bele bua musangu wa kumpala midilu itu yambuluisha bua kutambakana bimpe mu njila. Ivua mishintulule tshimuenekelu tshia tshimenga etshi tshivua ne bantu bapite pa muliyo mujima. Kadi, bualu bua midilu eyi kabutshivua kabidi pa ndimi ya bantu to. Bakamona kamba ba mu tshimenga mbalue mu tshibilu tshidi tshienzeka lumingu elu. Badi ku ngala wa kawulu ne biamu biabu bia dikuata nabi bindidimbi, bindile difika dia muenyi wa tshisaka, muanetu Joseph Rutherford, uvua mulombodi wa Societé Watch Tower tshikondo atshi. Bantemu ba muaba eu mbalue pabu bua kuakidila muanetu Rutherford ne disanka dionso, udi mulue bua mpungilu wabu wa matuku asatu.

Tshibejibeji tshia L’Âge d’Or tshiakamba ne: “Kakuyi mpata, mpungilu eu neashale mu miyuki ya bantu bu tshibilu tshia mushinga mukole mu luendu lua bulelela mu ditunga dia Mexique.” Kadi ntshinyi tshivua tshienze bua mpungilu eu, uvuabu babuele anu kudi bantu 150, ikale wa pa buende?

Kumpala kua tshibilu atshi kuenzeka, kuvua anu bantu bakese bavua bamanye mukenji wa Bukalenge mu Mexique. Katshia ku 1919, bavua benza mpuilu mikese, kadi bungi bua bisumbu buvua buenda bukepela pavua bidimu bienda bipita. Malu akamueneka bu avua mua kuenda bimpe pavuabu bakangule Betele mu tshimenga tshia Mexico mu 1929. Kadi, kuvua bipumbishi. Pavuabu bambile bana betu bua kubenga kuenda mushinga pavuabu bayisha, kolportere kampanda wakafiika munda, kulendukaye ne kuenza kende kasumbu ka balongi ba Bible. Mu tshikondo atshi, mutangidi wa Betele wakaditua mu tshikadilu tshivua Bible mukandike ne bavua ne bua kumupingana kudi muntu mukuabu. Bantemu ba lulamatu ba mu Mexique bavua dijinga ne kubatua mpanda mu nyuma.

Mu dikumbula dia muanetu Rutherford, wakakankamija bana betu bena lulamatu abu bikole, kubenzelaye miyuki ibidi ivua ibasaka bua kuenza mudimu ne kubelelaye miyuki itanu mikuate ivuabu bela ku bisanji. Bua musangu wa kumpala, bisanji bia bena mu Mexique biakatangalaja lumu luimpe mu ditunga dijima. Pakajika mpungilu, mutangidi mupiamupia wa Betele uvuabu bateke wakalongolola mudimu wa buambi, ne Bantemu ba lulamatu bakapetulula bukole bua kuditua mu mudimu ne Yehowa wakababenesha.

Tshidimu tshiakalonda, kuakenzeka mpungilu miaba ibidi mu ditunga edi, umue mu tshimenga tshia Veracruz tshidi pabuipi ne ku mâyi ne mukuabu mu tshimenga tshia Mexico. Didifila bikole mu mudimu wa diyisha diakatuadija kupatula bipeta bimpe. Mu 1931, kuvua bamanyishi 82. Bidimu dikumi pashishe, bakavula misangu dikumi. Bamanyishi batue ku 1 000 bakalua mu tshimenga tshia Mexico bua kubuela mu mpuilu wa mu 1941.

Mu 1943, Bantemu bakavuala bikandakanda bua kumanyisha bua mpuilu uvua ne bua kuenzeka mu bimenga 12 bia mu Mexique uvua ne tshiena-bualu tshia ne: “Tshisamba tshidikadile.” * Bavua bavuala bikandakanda bibidi pa makaya, tshimue kumpala ne tshikuabu panyima, mushindu uvua Bantemu bayisha katshia ku 1936.

 Tshibejibeji tshia La Nación tshiakakula bua bipeta bimpe bia kuenda bavuale bikandakanda mu tshimenga tshia Mexico ne: “Dituku dia kumpala [dia mpuilu], bavua balombe [Bantemu] bua kubikila bantu ba bungi. Dituku diakalonda, muaba wa mpuilu wakakepela.” Bipeta bivua bapatuke kabivua bisankishe bena tshitendelelu tshia Katolike to, tshiakalongolola kampanye bua kuluisha Bantemu. Nansha muvuaku buluishi, bana betu ba balume ne ba bakaji bavua kabayi ne buôwa bakatungunuka ne kunyunguluka mu njila. Tshibejibeji tshia La Nación tshiakamba kabidi ne: “Tshimenga tshijima tshivua tshibamone . . . balume ne bakaji, badivuije bintu bia kuyisha nabi.” Mu tshiena-bualu etshi muvua foto wa bana betu mu njila ya mu tshimenga tshia Mexico. Kuinshi kua foto kuvua mêyi aa: “Njila yonso mmikuata.”

Mu bidimu abi, Bantemu ba bungi bavua ne bua kudipangisha malu a bungi bua kubuela mu mpungilu mikese ivua yenzeka mu Mexique. Bantu ba bungi bakalua bafumina mu misoko ya kule menemene, ivua kawulu kakayi mua kufika anyi ivua kayiyi mene ne njila ya mashinyi. Tshisumbu kampanda tshiakafunda ne: “Anu nshinga wa telegrafe ke uvua upitshila pabuipi ne muaba eu.” Nanku bana betu bavua balua mu mpungilu bavua babanda pa mpunda anyi benda ku makasa matuku a bungi bua kufika muaba uvua kawulu kavua mua kubafikisha mu tshimenga muvua mpungilu wenzekela.

Bantemu ba bungi bavua bapele, kabavua bakumbana bua kufuta njila bua diya nkayadi dia muaba wa mpungilu to. Pavuabu bafika, ba bungi bavua batudila ku nzubu ya Bantemu ba mu tshimenga bavua bakidila bana babu ne dinanga dionso. Bakuabu bavua balala mu Nzubu ya Bukalenge. Umue musangu, bana betu batue ku 90 bakatudila ku Betele, kuakalalabu “pa malalu a turton tua mikanda tulonga mu milongo, tuambakaja 20 ku muntu.” Muyuki kampanda wa mu Annuaire wakaleja ne: benyi bavua ne dianyisha bakamona ne: malalu aa avua “malalu manefuke a luya kupita panshi mu sima.”

Bua Bantemu bavua ne dianyisha abu, kubuela mu masangisha a disanka a bena Kristo kuvua ne mushinga wa bungi kupita malu onso avuabu mua kudipangisha. Lelu, nansha mudi bungi bua bamanyishi ba mu Mexique buenda anu buvula butangile ku muliyo mujima, lungenyi lua dianyisha elu lutshidi anuku lua bungi. * Luapolo lua Betele wa mu Mexique lua mu 1949 luakaleja bua bana betu ne: “Bikondo bia ntatu bivuabu batuilangane nabi kabivua bitekeshe tshisumi tshiabu bua bulelela to, bualu mpuilu yonso utudi tuenza mbualu bunene budibu bashala bakula mu miyuki yabu tshikondo tshile ne lukonko ludi bana betu batungunuka ne kudiela ludi ne: Ndîba kayi dituenza mpuilu mukuabu?” Malu adibu baleje mu luapolo elu atshidi enzeka too ne lelu.​—Mu bintu bietu bia kale mu Amerike wa pankatshi.