1. Mmêyi kayi a buprofete avua Yeshaya mufunde bua Yezu? Bua tshinyi adi atukankamija?

MÊYI a buprofete avua Yeshaya mufunde bua Yezu adi atukankamija ne atupetesha ditekemena. Yeshaya wakamanyisha ne: Yezu kavua ne bua ‘kulumbuluisha anu bua malu adi amueneka ku mêsu kuende, anyi kubela anu bilondeshile malu adi matshi ende umvua to.’ Uvua ne bua ‘kulumbuluisha bapuekele biakane.’ (Yesh. 11:3, 4) Bua tshinyi mêyi aa adi atukankamija? Bualu tudi mu buloba budi buwule tente ne kansungansunga. Tuetu bonso tudi dijinga ne mulumbuluishi mupuangane, kakutulumbuluisha bilondeshile tshimuenekelu tshietu to!

2. Ntshinyi tshivua Yezu mututumine dîyi bua kuenza? Mu tshiena-bualu etshi netuakule bua tshinyi?

² Dituku dionso edi tutu tumona bantu mu mushindu kampanda anyi kansanga. Kadi bu mutudi bapange bupuangane, katuena mua kumona malu mu mushindu mupuangane anu bu Yezu to. Tutu ne tshibidilu tshia kuimanyina pa bidi mêsu etu amona. Nansha nanku, pavua Yezu pa buloba wakatuma dîyi ne: “Lekelayi kulumbuluishangana bilondeshile tshimuenekelu, kadi nulumbuluishe ne dilumbuluisha diakane.” (Yone 7:24) Nunku, Yezu mmusue tumufuane ne tulekele  kulumbuluisha bakuabu bilondeshile tshimuekelu tshiabu. Mu tshiena-bualu etshi netuakule bua bintu bisatu bitu bienza bua tulumbuluishe bakuabu bilondeshile tshimuenekelu tshiabu ebi: dikoba anyi tshisa, bubanji anyi bupele, ne bidimu bia muntu; ne netumone mishindu itudi mua kutumikila dîyi dia Yezu edi.

3, 4. a) Ntshinyi tshivua tshifikishe Petelo ku dishintulula meji ende bua bantu ba bisamba bia bende? (Tangila tshimfuanyi tshia ntuadijilu tshia tshiena-bualu.) b) Yehowa uvua mufikishe Petelo ku dijingulula bualu kayi bupiabupia?

³ Elabi meji muvua mupostolo Petelo mudiumvue pavuabu bamuambile bua aye mu Kaisalia bua kumonangana ne Kônelio, muntu wa bisamba bia bende, mu nzubu muende. (Bien. 10:17-29) Anu bu bena Yuda bakuabu, Petelo uvua pende mukole ne meji a ne: bantu ba bisamba bia bende kabavua bakezuke to. Kadi Petelo ukavua mudimuenene amue malu avua mamusake bua kushintulula meji ende. Tshilejilu, uvua ufuma ku dimona tshikena kumona. (Bien. 10:9-16) Uvua mumonamu tshinyi? Uvua mumone tshintu bu tshilamba tshiuwule tente ne nyama ya bukoya, batshipuekesha kumpala kuende, dîyi difuma mu diulu diamba ne: “Petelo, juka! Shipa, udie!” Misangu isatu mijima, yeye kubenga osha ne munu muîku. Musangu wonso uvuaye ubenga kudia, dîyi adi divua dimuambila ne: “Wewe lekela kubikila bintu bidi Nzambi mukezule ne: mbibipe.” Pakajika tshikena kumona, Petelo kavua mujingulule tshivua dîyi adi disua kumuambila to. Diakamue bantu bavua Kônelio mutume kufikabu. Pavua Petelo mupete buludiki bua nyuma muimpe, wakaya nabu kua Kônelio.

⁴ Bu Petelo muimanyine anu pa tshimuenekelu patupu, kavua mua kuikala muye kua Kônelio to. Bena Yuda kabavua mua kudiata kua bantu ba bisamba bia bende to. Bua tshinyi Petelo uvua muyaku nansha muvuaye ne kansungansunga? Tshikena kumona tshivuaye mupete ne buludiki bua kudi nyuma muimpe bivua bishintulule meji ende. Kakuyi mpata, yeye mumane kuteleja malu avua Kônelio muambe, wakalua kuamba ne: “Mpindieu ndi mujingulule bulelela ne: Nzambi kena ne kansungansunga to, kadi udi witaba muntu wa mu tshisamba tshionso udi umutshina ne udi wenza malu makane.” (Bien. 10:34, 35) Etshi tshivua bushuwa ngumvuilu wa malu mupiamupia uvua Petelo mupete! Bualu ebu buvua ne bua kuenzela bena Kristo bonso tshinyi?

5. a) Yehowa mmusue bua bena Kristo bonso bajingulule tshinyi? b) Nansha mutudi bamanye bulelela, ntshiyi tshidi anu mua kushala munda muetu?

⁵ Ku diambuluisha dia Petelo, Yehowa wakenza bua bena Kristo bonso bajingulule ne: kena ne kansungansunga to. Ku mêsu kuende, dishilangana dia makoba, bisa, bisamba, anyi miakulu kadiena ne mushinga to. Udi wanyisha muntu mulume anyi muntu mukaji yonso udi umutshina ne udi wenza malu makane. (Gal. 3:26-28; Buak. 7:9, 10) Ukadi pamuapa mumanye ne: bidi nanku. Kadi netuambe tshinyi wewe mukolele mu ditunga anyi mu dîku mudi kansungansunga katule kapuwe? Nansha muudi mua kuela meji ne: kuena ne kansungansunga, kadi anu mua kushala munda muebe. Petelo wakalua kuleja muvuaye ne kansungansunga, nansha muvuaye muanji kupeta muabi wa kuleja bantu ne: Yehowa katu ne kansungansunga to. (Gal. 2:11-14) Mmunyi mutudi mua kutumikila Yezu ne kubenga kulumbuluisha bantu bilondeshile tshimuenekelu tshiabu?

6. a) Ntshinyi tshidi mua kutuambuluisha bua kumbusha kansungansunga mu muoyo wetu? b) Luapolo lua muanetu wa balume kampanda luvua luleje tshinyi?

⁶ Tudi ne bua kudikonkonona bimpe bimpe ku diambuluisha dia Dîyi dia Nzambi bua kumona ni tutshidi anu ne meji a kansungansunga. (Mis. 119:105) Tudi kabidi mua kukeba diambuluisha kudi bantu bakuabu badi mua kumona ni tudi ne  meji a kansungansunga, bualu katuena mua kumanya ni tudi nawu to. (Gal. 2:11, 14) Pamuapa meji aa mmamane kuela miji mu muoyo wetu katuyi bamanye. Tshilejilu, mona muvua mukulu kampanda uvua utangila midimu ya bungi mu bulongolodi mufundile Betele wabu bua bena dibaka babidi ba tshilejilu bavua mu mudimu wa ku dîba ne ku dîba. Mulume uvua wa mu tshisa tshivua bantu bakuabu bamona tshishadile. Bidi bidimueneka ne: mukulu au kavua mumanye ne: yeye pende uvua ne kansungansunga bua tshisa atshi to. Uvua muambe malu mimpe a bungi bua muanetu wa balume au, kadi wakajikija wamba ne: “Nansha mudi muanetu wa balume eu wa mu [tshisa etshi], ngenzelu wende wa malu ne nsombelu wende bidi bifikisha bakuabu ku dimona ne: kuikala muena mu [tshisa etshi] kakuena anu kumvuija ne: udi mushadile anyi mupange mankenda bu mudi bantu bakuabu ba mu tshisa [etshi] bikale to.” Tudi tupeta dilongesha kayi? Nansha tuetu ne midimu ya mushindu kayi mu bulongolodi, tudi ne bua kudikonkonona bimpe bimpe ne kuitaba diambuluisha dia bakuabu bua tujingulule katoba konso ka kansungansunga kadi mu muoyo wetu. Ntshinyi tshikuabu tshitudi mua kuenza?

7. Mmunyi mutudi mua kuleja ne: tudi tudialabaja?

⁷ Tuetu tudialabaja, dinanga nedipingane pa muaba wa kansungansunga mu muoyo wetu. (2 Kol. 6:11-13) Utu ne tshibidilu tshia kusomba anu ne bantu ba dikoba dimue nebe, ba tshisa tshienu, anyi ba muakulu webe anyi? Biobi nanku, dialabaja. Kuenaku mua kuyisha ne bantu ba bisa bikuabu anyi kubabikidisha kumbelu bua kudia nabu kantu peshi bua kusomba nabu anyi? (Bien. 16:14, 15) Wewe wenza nanku neuwuje muoyo webe ne dinanga dia bungi, kansungansunga kakakuikala ne muaba mu muoyo webe to. Tuakulayi mpindieu bua mishindu mikuabu itudi mua kulumbuluisha bakuabu “bilondeshile tshimuenekelu” tshiabu.

8. Lewitiki 19:15 udi utuambila tshinyi bua mudi bubanji anyi bupele bua muntu mua kunyanga mushindu utudi tumumona?

⁸ Bungi bua makuta adi nawu muntu budi mua kunyanga mushindu utudi tumumona. Lewitiki 19:15 udi wamba ne: “Kuena ne bua kutua ku tshia mupele anyi kuengeleka mubanji. Ukose tshilumbu tshia mukuebe bimpe.” Kadi mmunyi mudi bubanji bua muntu anyi bupele buende mua kutupangisha bua kumumona mu mushindu mukumbane?

9. Mbualu kayi bua dibungama buvua Solomo mufunde? Budi butulongesha tshinyi?

⁹ Nyuma muimpe wakasaka Solomo bua kufunda bualu bua dibungama butu bantu bapange bupuangane benza. Udi wamba mu Nsumuinu 14:20 ne: “Mupele mbamukine too ne kudi bena mutumba nende, kadi balunda ba mubanji mba bungi.” Mvese eu udi utulongesha tshinyi? Tuetu katuyi badimuke, tudi mua kukeba bua kudia bulunda anu ne bana betu badi ne kantu ku bianza, kadi tuepuka badi bapele. Bua tshinyi kuimanyina pa bungi bua makuta adi nawu muntu kudi ne njiwu ya bungi?

10. Mbualu kayi buvua Yakobo muleje?

¹⁰ Tuetu tuenzela bana betu malu bilondeshile bungi bua makuta adibu nawu, tudi mua kukebesha matapuluka mu tshisumbu. Ke tshivua tshienzeke mu bimue bisumbu bia mu bidimu lukama bia kumpala, nunku muyidi Yakobo wakadimuija bena Kristo bua bualu ebu. (Bala Yakobo 2:1-4.) Tudi ne bua kudimuka bua katulekedi meji a nunku anyanga bisumbu bietu lelu. Ntshinyi tshidi mua kutuambuluisha bua katumonyi bakuabu bilondeshile tshimuenekelu tshiabu?

11. Bintu bia ku mubidi ke bidi bienza bua muntu adie malanda ne Yehowa anyi? Umvuija.

¹¹ Tudi ne bua kumona bena Kristo netu mudi Yehowa ubamona. Muntu kena ne mushinga kudi Yehowa anu bualu mmubanji anyi mmupele to. Dikala ne bintu bia bungi anyi dibipangila  kadiena mua kuenza bua tudie malanda ne Yehowa to. Nansha muvua Yezu muambe ne: “Nebikale bikole bua muntu mubanji kubuela mu Bukalenge bua mu diulu,” kavua muambe ne: kakubuelamu to. (Mat. 19:23) Ku luseke lukuabu, Yezu uvua muambe kabidi ne: “Nudi ba diakalenga nuenu badi bapele, bualu Bukalenge bua Nzambi mbuenu.” (Luka 6:20) Kadi kabiena bisua kumvuija ne: bapele bonso bavua ne bua kuteleja Yezu ne kupeta mabenesha to. Bapele ba bungi kabakalua bayidi ba Yezu to. Dilongesha didi ne: katuena ne bua kuamba mudi muntu mu malanda ne Yehowa anu bua bintu bidiye nabi to.

12. Mmubelu kayi udi Bible upesha babanji ne bapele?

¹² Tudi ne disanka dia mutudi ne bana betu ba bungi babanji ne bapele, badi banange Yehowa ne bamuenzela mudimu ne muoyo mujima. Bible udi ulongesha badi babanji “bua kabateki ditekemena diabu ku bubanji budi mua kujimina, kadi baditeke kudi Nzambi.” (Bala 1 Timote 6:17-19.) Dîyi dia Nzambi didi didimuija kabidi bantu ba Nzambi bonso, babanji ne bapele, bua badimuke bua kabanangi makuta. (1 Tim. 6:9, 10) Bushuwa, patudi tukangula mêsu etu ne tumona bana betu mudi Yehowa ubamona, katuakubenzela malu bilondeshile bidibu nabi anyi bidibu kabayi nabi to. Kadi netuambe tshinyi bua bungi bua bidimu bia muntu? Ke bualu budi ne bua kutusaka bua kumona bakuabu mu mushindu kampanda anyi kansanga anyi?

13. Bible udi utulongesha tshinyi bua mushindu utudi ne bua kumona bakulumpe?

¹³ Bible udi utulongesha misangu ne misangu bua kunemeka bantu banunu. Lewitiki 19:32 udi wamba ne: “Kumpala kua nsuki mitoke udi ne bua kuimana kuulu, udi ne bua kunemeka muntu mununu, ne udi ne bua kutshina Nzambi webe.” Nsumuinu 16:31 udi wamba kabidi ne: “Nsuki mitoke idi tshifulu tshia butumbi tshia bulengele padiyi mipeta mu njila wa buakane.” Pashishe Paulo wakadimuija pende Timote bua kabedi muntu mukulumpe ne mêyi mashile menemene, kadi bua amumone bu tatu. (1 Tim. 5:1, 2) Nansha muvua Timote ne bukokeshi bua kupesha bena Kristo nende bakulumpe aba buludiki, uvua ne bua kubenzela malu ne luse ne kanemu.

14. Ndîba kayi didibi mua kukengela bua tuetu kubela muntu udi mukulumpe kutudi?

¹⁴ Kadi netuambe tshinyi muntu mukulumpe yeye wenza mpekatu ku bukole anyi wenza bualu kampanda budi bunyingalaja Yehowa? Yehowa kakulumbuluisha bilondeshile tshimuenekelu to, ne muntu yeye muenze mpekatu ku bukole, Yehowa kakumufuila luse anu bualu mmukulumpe to. Mona dîyi dinene didi mu Yeshaya 65:20: “Muenji wa mpekatu needibue mulawu, nansha yeye ne bidimu lukama.” Dîyi dia muomumue didi mu tshikena kumona tshia Yehezekele. (Yeh. 9:5-7) Nunku, tudi ne bua kuikala nangananga tuditatshisha bua kunemeka Yehowa Nzambi, Wa Kale wa Matuku a Bungi. (Dan. 7:9, 10, 13, 14) Tuetu tunemeka Yehowa, katuakutshina bua kupingaja muntu udi dijinga ne mibelu mu njila to, nansha yeye ne bidimu bungi kayi.​—Gal. 6:1.

15. Tshilejilu tshia Paulo tshidi tshitulongesha tshinyi bua mushindu utudi ne bua kunemeka bansonga betu balume?

¹⁵ Kadi netuambe tshinyi bua bansonga betu balume badi mu tshisumbu? Mmunyi muutu ubamona? Mupostolo Paulo wakafundila nsonga Timote ne: “Muntu nansha umue kapetudi bunsonga buebe nansha kakese. Kadi ikala tshilejilu kudi bena lulamatu mu ngakuilu, mu bienzedi, mu dinanga, mu ditabuja, ne mu bukezuke.” (1 Tim. 4:12) Pavua Paulo mufunde mêyi aa, Timote uvua mua kuikala ne bidimu 30 ne bia mu njila. Kadi Paulo uvua mumupeshe midimu ya bungi ya mushinga. Ndilongesha kayi ditudi tupeta? Katuena ne bua kuimanyina pa  bungi bua bidimu bia bansonga betu balume to. Tuvuluke ne: nansha Mukalenge Yezu wakenza mudimu wende wonso pavuaye ne bidimu 30 ne bia mu njila.

16, 17. a) Mmunyi mudi bakulu bamanya bikala muanetu wa balume mukumbane bua kulua mukulu anyi musadidi wa mudimu? b) Mmunyi mudi mmuenenu wetu wa malu ne bilele bia muaba utudi basombele kabiyi bipetangana ne Bible?

¹⁶ Mu imue miaba, bantu batu bapepeja bansongalume. Ke bualu kayi, bakulu badi pamuapa mua kubenga kulombela bansonga badi bakumbane bua balue basadidi ba mudimu anyi bakulu. Mbimpe bakulu bavuluke ne: Bible kena uleja bungi bua bidimu bidi muntu ne bua kuikala nabi bua kuluaye musadidi wa mudimu anyi mukulu to. (1 Tim. 3:1-10, 12, 13; Tito 1:5-9) Mukulu yeye wela mikenji bilondeshile bilele bia muaba udiye musombele, kena wenza malu mu diumvuangana ne Bible to. Bakulu kabena ne bua kuimanyina pa mmuenenu yabu ya malu anyi pa bilele bia miaba idibu basombele padibu bakonkonona ngikadilu ya bansonga betu balume to, kadi badi ne bua kulamata ku Dîyi dia Nzambi.​—2 Tim. 3:16, 17.

¹⁷ Bakulu bobu kabayi balonda mêyi a mu Bible, badi mua kupangisha bana betu ba balume badi bakumbane bua kuluabu basadidi ba mudimu anyi bakulu. Mu ditunga kampanda, bakulu bavua bapeshe musadidi wa mudimu uvua mukumbane midimu ya bungi. Nansha mudi bakulu aba bitaba ne: muanetu wa balume eu udi ukumbaja ngikadilu milomba mu mushindu mukumbanyine bua kulua mukulu, kabavua anu bamulombele mudimu wa bukulu to. Bamue bakulu bavua bakulumpe bavua basumishe ne: muanetu au utshivua umueneka muana bikole. Bia dibungama, kabakamuteka mukulu to, anu bua tshimuenekelu tshiende. Luapolo idi ileja ne: ngelelu wa meji eu mmutangalake bikole. Bidi ne mushinga wa bungi bua tuetu kueyemena Bible pamutu pa kueyemena bilele bia muaba utudi basombele anyi mmuenenu wetu wa malu. Eu ke mushindu umuepele utudi tutumikila Yezu ne tubenga kulumbuluisha bantu bilondeshile tshimuenekelu tshiabu.

18, 19. Tshitudi ne bua kuenza ntshinyi bua tuetu kumona bana betu mudi Yehowa ubamona?

¹⁸ Nansha mutudi bapange bupuangane, tudi mua kumona bakuabu mudi Yehowa ubamona, katuyi ne kansungansunga. (Bien. 10:34, 35) Kadi bidi bikengela kutungunuka ne kudienzeja ne kuvuluka mavuluija adi mu Dîyi dia Nzambi. Patudi tutumikila mavuluija aa, netutungunuke ne kutumikila dîyi dia Yezu dia kubenga kulumbuluishangana bilondeshile tshimuenekelu.​—Yone 7:24.

¹⁹ Mu matuku makese emu, Mukalenge wetu Yezu Kristo nealumbuluishe bukua bantu, kakulumbuluisha bua malu adi amueneka ku mêsu kuende anyi bua malu adi matshi ende umvua to, kadi nealumbuluishe ne dilumbuluisha diakane. (Yesh. 11:3, 4) Nebikale bilenga bia katshia!