BU MUDI nsombelu wenda ukola mu “matuku a ku nshikidilu” aa, bantu ba Yehowa badi ne bua kuikala ne lutulu mpindieu kupita ne kumpala. (2 Tim. 3:1-5) Tudi banyunguluka kudi bantu badi anu ne budinangi, kabayi ne lungenyi lua kumvuangana, nansha didikanda. Misangu ya bungi, bantu badi ne ngikadilu eyi kabatu ne lutulu nansha kakese. Nunku muena Kristo yonso udi ne bua kudiebeja ne: ‘Ndiku mulue muntu mupange lutulu anu bu bena panu anyi? Kuikala ne lutulu kudi kumvuija tshinyi menemene? Ntshinyi tshindi mua kuenza bua ngikadilu wa mushinga eu ikale bumuntu buanyi?’

Bilondeshile Bible, kuikala ne lutulu ki nkuitaba nsombelu mukole patupu to. Muntu udi ne ngikadilu wa Nzambi eu, udi unanukila ne tshipatshila. Kena wimanyina anu pa majinga ende yeye nkayende to, kadi udi uditatshisha too ne bua diakalenga dia muntu udi mumuenzele bibi. Bua bualu abu, padibu benzela muntu udi ne lutulu bibi, kena ujimija ditekemena diende dia ne: malanda abu adi manyanguke neakane to. Kabiena bitukemesha bua mudi Bible utela lutulu pa muaba wa kumpala mu ngikadilu ya bungi mimpe idi dinanga dipatula. * (1 Kol. 13:4) Dîyi dia Nzambi didi kabidi diamba mudi “lutulu” luikale ngikadilu wa “dimuma dia nyuma.” (Gal. 5:22, 23) Kadi tshitudi ne bua kuenza bua kuikala ne ngikadilu wa Nzambi eu ntshinyi?

Bua kupeta lutulu, tudi ne bua kulomba diambuluisha dia nyuma wa Yehowa mu disambila. Nzambi udi upesha bantu badi bamueyemena nyuma wende. (Luka 11:13) Kadi nansha mudi nyuma wa Nzambi ne bukole, tudi ne bua kuditatshisha bua kuenza malu mu diumvuangana ne masambila etu. (Mis. 86:10, 11) Abi bidi biumvuija ne: tudi ne bua kuenza muetu muonso bua kuikala ne lutulu dituku dionso bua luele miji mu muoyo wetu. Nansha nanku, bidi mua kutulomba bua kuenza malu makuabu bua ngikadilu eu wa lutulu ashale bumuntu buetu. Ntshinyi tshikuabu tshidi mua kutuambuluisha?

Tuetu tukonkonona tshilejilu tshipuangane tshia Yezu ne tumuidikija, tudi mua kupeta lutulu. Mu diumvuangana ne tshilejilu tshia Yezu atshi, mupostolo Paulo wakumvuija ku nyuma tshidi “bumuntu bupiabupia,” uleja mudi “lutulu” luikale mu bumuntu bupiabupia ebu, ne pashishe wakatusengelela wamba ne: “ditalala dia Kristo dilombole mioyo [yetu].” (Kolos. 3:10, 12, 15) Tudi mua kulekela ditalala ‘dilombola’ mioyo yetu patudi tuidikija ditabuja dikole divua nadi Yezu dia ne: Nzambi nealongolole malu etu mu tshikondo tshidiye mujadike. Patudi tuidikija tshilejilu tshia Yezu, katuakujimija lutulu luetu to, nansha nsombelu kayi mua kutufikila.​—Yone 14:27; 16:33.

Nansha mutudi ne dijinga dia kumona buloba bupiabupia budi Nzambi mutulaye, tudi mua kulonga mua kutamba kuikala ne lutulu patudi tuelangana meji a mudi Yehowa muikale netu lutulu. Bible udi utujadikila ne: “Yehowa  kena ne lujoko pa bidi bitangila mulayi wende, bu mudi bamue bantu bamona bobu lujoko to, kadi udi nenu lutulu, bualu ki mmusue bua muntu nansha umue abutudibue, kadi mmusue bua bonso bafike ku dinyingalala bua mpekatu yabu.” (2 Pet. 3:9) Bu mudi Yehowa netu lutulu, kabienaku bitusaka bua kutamba kuikala ne bakuabu lutulu anyi? (Lomo 2:4) Bu mudibi nanku, ngimue nsombelu kayi idi mua kutulomba bua kuikala ne lutulu?

Dituku dionso edi, kudi nsombelu ya bungi idi itupangisha bua kuikala ne lutulu. Tshilejilu, wewe ne bualu bua mushinga bua kuamba, bidi mua kukulomba bua kuikala ne lutulu bua kukoshi bakuabu ku mêyi. (Yak. 1:19) Bidi mua kukulomba bua kuikala kabidi ne lutulu paudi musombe ne bena Kristo nebe badi ne bikadilu bidi bikutonda. Pamutu pa kufiika munda, mbimpe kuela meji a tshitu Yehowa ne Yezu benza bua matekete etu. Kabatu batangila bilema bietu bikese ne dîsu dibi to. Kadi batu bimanyina pa ngikadilu yetu mimpe, ne batangila ne lutulu luonso mutudi tudienzeja bua kushintuluka.​—1 Tim. 1:16; 1 Pet. 3:12.

Nsombelu mukuabu udi mua kutupangisha bua kuikala ne lutulu, mpadi muntu wamba ne: tudi bambe anyi benze bualu bubi. Patubi bienzeka nanku, diakamue tutu tufiika munda anyi tukeba kudibingisha. Kadi Dîyi dia Nzambi didi dituleja tshitudi ne bua kuenza. Didi diamba ne: “Mbimpe kuikala ne lutulu pamutu pa kuikala ne lungenyi lua didibandisha. Kuikadi ufiika munda lukasa, bualu difiika dia munda ndisombe mu tshiadi tshia batshimbakane.” (Muam. 7:8, 9) Nunku, nansha bobu batushiminyine bualu, mbimpe tuangate dîba dia kuelangana meji kumpala kua kuakula. Yezu wakalonda dîyi dinene edi pavuabu bamushiminyine malu.​—Mat. 11:19.

Baledi badi nangananga ne bua kuikala ne lutulu padibi bikengela kuambuluisha bana babu bua balekele meji mabi anyi majinga mabi adibu mua kuikala nawu. Tuangate tshilejilu tshia Mattias, muena mu dîku dia Betele wa mu Scandinavie. Patshivuaye mupuekele, bavua anu bamuseka mu kalasa bua malu avuaye witabuja. Kumpala, baledi bende kabavua bamanye bualu abu to. Nansha nanku, bakatuadija kumona tshivua buluishi abu buenzela muanabu, ukavua welakana bua bulelela bukavuaye mupete. Gillis tatuende wa Mattias udi wamba ne: “Nsombelu eu wakatulomba lutulu lua bungi. Mattias ukavua utuebeja ne: ‘Nzambi nnganyi? Kadi Bible yeye kayi Dîyi dia Nzambi? Ntshinyi tshidi tshileja ne: Nzambi ke udi utulomba bua kuenza bualu kampanda anyi kansanga?’” Uvua kabidi webeja tatuende ne: “Bua tshinyi udi ukeba kundumbuluisha bua mundi tshiyi ngitabuja malu audi witabuja?”

Gillis udi wamba ne: “Kuvua misangu ivua muanetu utuela nkonko muikale ne tshiji, kayi natshi buanyi meme ne mamuende to, kadi bua bulelela. Buende yeye, bulelela buvua bumukoleshele malu.” Mmunyi muvua Gillis mupite ne nsombelu eu? Udi wamba ne: “Tuvua tuyukila nende munkatshi mua mêba a bungi. Mvua ntamba kumuteleja, ne kuoku mushindu, mmuela nkonko bua kumanya mmuenenu wende ne muvuaye udiumvua. Imue misangu, mvua mmuambila malu a kuelelaye  meji dituku dimue anyi abidi kumpala kua tuetu kulua kuyukila kabidi. Bikondo bikuabu, mvua mmulomba bua ampeshe matuku nansha makese bua kuela meji a lungenyi luvuaye muleje. Bu mutuvua tuyukila pa tshibidilu, Mattias wakatuadija kumvua ku kakese ku kakese dilongesha bu mudi dia tshia kupikulangana natshi, dia bukokeshi bua Nzambi, ne dia mudi Yehowa mutunange. Biakamuangata matuku ne kabivua bipepele to, kadi ku kakese ku kakese, dinanga divuaye nadi bua Yehowa diakavula mu muoyo wende. Meme ne mukajanyi tudi ne disanka dia bungi bua mutuvua bambuluishe muanetu ne lutulu luonso patshivuaye mupuekele ne bafike ku dilenga muoyo wende.”

Gillis ne mukajende bavua beyemene Yehowa pavuabu bambuluisha muanabu. Gillis udi wamba ne: “Misangu ya bungi mvua ngambila Mattias ne: dinanga dikole dituvua bamunange divua ditusake meme ne mamuende bua kusambila Yehowa bikole bua amuambuluishe bua umvue bulelela.” Baledi aba badi ne disanka dia bungi bua muvuabu ne ngikadilu wa mushinga mukole eu: lutulu!

Pa kumbusha diambuluishangana ne Dîyi dia Nzambi, bena Kristo balelela badi ne bua kuikala ne lutulu padibu batabalela bena mu dîku diabu anyi balunda babu badi ne disama dia munanunanu. Tuangate tshilejilu tshia Ellen * udi musombele pende mu Scandinavie.

Bidimu bu 8 bimane kupita, bayende wa Ellen wakapeta njiwu misangu ibidi ya ditayika dia tujilu tua mu buongo (AVC) yakanyanga buongo buende. Bu tshipeta, katshivua kabidi mua kumvua disanka, kanyinganyinga, anyi kumvuilangana luse to. Nsombelu eu mmukolele Ellen bikole. Udi wamba ne: “Mbindombe bua kuikala ne lutulu lua bungi ne kusambila bikole. Filipoyi 4:13 ke wanyi mvese munene utu unsamba, udi wamba ne: ‘Bua malu onso ndi ne bukole ku diambuluisha dia yeye udi umpesha bukole.’” Bukole ebu mbuambuluishe Ellen bua kunanukila ne lutulu, mueyemene Yehowa bua amuambuluishe.​—Mis. 62:5, 6.

Bushuwa, tuetu basue kuikala ne lutulu, Yehowa udi tshilejilu tshitambe buimpe tshia tuetu kuidikija. (2 Pet. 3:15) Mu Bible mudi miyuki ya bungi ya muvua Yehowa muleje lutulu lua bungi. (Neh. 9:30; Yesh. 30:18) Tshilejilu, ntshinyi tshivua Yehowa muenze pavua Abalahama muleje dielakana bua dipangadika diende dia kubutula Sodoma? Tshia kumpala, Yehowa kavua mukose Abalahama ku mêyi pavuaye wakula to. Kadi uvua ne lutulu pavuaye uteleja malu avua atonda Abalahama ne nkonko ivuaye wela. Pashishe, Yehowa wakaleja muvuaye muteleje pakambululaye malu avua atonda Abalahama, umujadikila ne: nansha mu tshimenga tshia Sodoma muikale bantu bakane dikumi, kavua ne bua kutshibutula to. (Gen. 18:22-33) Yehowa udi bushuwa tshilejilu tshimpe bua muvuaye ne lutulu kayi ufiika munda!

Lutulu nngikadilu wa mushinga wa bumuntu bupiabupia budi bena Kristo bonso ne bua kuvuala. Tuetu tuditatshisha bua kuikala ne ngikadilu wa mushinga eu, tudi tutumbisha Tatu wetu wa mu diulu udi ututabalela, muikale ne lutulu, ne netubadibue munkatshi mua “bantu badi bapiana milayi ku diambuluisha dia ditabuja ne lutulu.”​—Eb. 6:10-12.