1. Ntshinyi tshivua Paulo muvuluije bena Kristo?

BENA Kristo badi mu lubilu bua kupeta muoyo. Nansha tuetu batuadije lubilu luetu mpindieu anyi kukadi bidimu bia bungi, mbimpe tutungunuke ne kunyema too ne patuafika ku mushonyi wa ndekelu. Mibelu ivua mupostolo Paulo mupeshe bena Kristo ba mu tshisumbu tshia Filipoyi idi mua kutukankamija bua tunyeme too ne ku ndekelu. Kuvua bena Kristo ba mu tshisumbu atshi bakavua benzele Yehowa mudimu bidimu bia bungi pavuabu bapete mukanda wa Paulo au. Bavua banyema bimpe, kadi Paulo wakabavuluija ne: bavua ne bua kunanukila mu lubilu luabu. Uvua musue batungunuke ne kuidikija muvuaye ‘udienzeja bua kufika ku tshipatshila.’​—Filip. 3:14.

2. Bua tshinyi mubelu uvua Paulo mupeshe bena Filipoyi uvua mufike pa dîba diawu?

² Mubelu uvua Paulo mupeshe bena Filipoyi uvua mufike pa dîba diawu. Bavua baluishe tshisumbu atshi katshia anu tshiatuadija. Paulo wakapeta dibikila dia kudi Nzambi dia ne: “Luaku mu Makedonia.” Nunku yeye ne Sila bakaya ku Filipoyi bua kuyisha; bivua bu mu 50 panyima pa Yezu. (Bien. 16:9) Bakapetanganaku ne muntu mukaji kampanda diende Ludia. “Uvua uteleja, ne Yehowa wakunzulula muoyo wende bikole” bua kuitaba lumu luimpe. (Bien. 16:14) Yeye ne ba mu nzubu muende kabakanengakana bua kubatijibua to. Kadi Diabolo kakavunga maboko to. Bantu ba mu Filipoyi bakapulumuna Paulo ne Sila kuyabu nabu kudi banene ba mbulamatadi, kubashiminyinabu ne: bavua bajudija tshimvundu. Ke kubatutabu, kubelabu mu buloko, pashishe kubalombabu bua kumbuka mu tshimenga. (Bien. 16:16-40) Bakalekela kuyisha anyi? Nansha kakese! Kadi bena mu tshisumbu tshipiatshipia atshi bakenza tshinyi? Bakanukila pabu, nunku mba kuela  kalumbandi! Kakuyi mpata, tshilejilu tshia Paulo ne Sila tshiakabakankamija bikole.

3. Ntshinyi tshivua Paulo mumanye? Nnkonko kayi ituandamuna?

³ Paulo uvua mudisuike bua kunanukila. (2 Kol. 4:16) Kadi uvua mumanye ne: bua kunyemaye too ne ku ndekelu, uvua ne bua kushala mutume meji ku tshipatshila. Tshilejilu tshiende tshidi mua kutulongesha tshinyi? Mbilejilu kayi bia bena Kristo ba lulamatu ba lelu bidi bileja ne: tudi mua kunanukila nansha mu ntatu ya mushindu kayi? Mmunyi mudi ditekemena dietu bua matuku atshilualua mua kukolesha dipangadika dietu dia kunanukila katuyi tulekela?

4. Mmunyi muvua Paulo udienzeja bua kuikala ne bia kuenza mu mudimu wa Yehowa nansha muvuabi bimukolele?

⁴ Ela meji bua muvua Paulo udienzeja pavuaye ufundila bena Filipoyi. Uvua muena buloko musombele mu nzubu kampanda mu Lomo. Kavua mua kupatuka bua kuyisha to. Nansha nanku, uvua anu uyisha bantu bavua balua kumutangila ne ufundila bisumbu bia kule mikanda. Bia muomumue lelu, masama anyi bukulakaje bidi bipangisha bena Kristo ba bungi bua kupatuka ku mabu bua kuyisha. Kadi badi benza muabu muonso bua kuyisha bantu badi balua kubatangila. Badi kabidi bafundila bantu batudi katuyi mua kupeta ku mabu mikanda bua kubayisha.

5. Bilondeshile Filipoyi 3:12-14, ntshinyi tshivua tshiambuluishe Paulo bua kushala mutume meji ku tshipatshila?

⁵ Paulo kavua mulekele malu mimpe a kale avuaye muenze anyi bilema biende bia kale bimubueja mu ditanaji to. Kadi wakamba ne: bivua bikengela ‘kupua malu avua mashale panyima muoyo’ bua ‘kuipatshila malu avua kumpala,’ tuambe ne: kujikija lubilu luende bimpe. (Bala Filipoyi 3:12-14.) Ngamue malu kayi avua mua kumubueja mu ditanaji? Tshia kumpala, Paulo uvua muenze malu a dikema kumpala kua kuluaye muena Kristo. Kadi uvua uamona onso bu “bintu bia butshiafu.” (Filip. 3:3-8) Tshibidi, kavua mulekele didipisha bua muvuaye mukengeshe bena Kristo kumpala dimupangisha bua kuenzela Yehowa mudimu to. Tshisatu, kavua mudiambile ne: bikavuaye muenzele Yehowa bivua bikumbane, ne kabivua ne mushinga bua atungunuke to. Paulo wakenza malu a bungi mu mudimu wa Yehowa nansha muvuaye mupete ntatu ya bungi. Tshilejilu, bakamuela mu buloko, bakamututa, bakamuasa mabue, mazuwa akabatshibukila mu mâyi, wakapangila too ne biakudia ne bilamba. (2 Kol. 11:23-27) Kadi uvua mumanye ne: uvua ne bua kutungunuka ne lubilu nansha mukavuaye muenze bia bungi ne mukenge bikole. Ke tshitudi petu ne bua kuenza.

6. Ngamue ‘malu kayi adi mashale panyima’ atudi ne bua kupua muoyo?

⁶ Mmunyi mutudi mua kuidikija Paulo, ‘tupua malu adi mashale panyima muoyo’? Bamue ba kutudi badi mua kuikala badipisha bua mpekatu yabu ya kale. Bikalabi nanku buebe wewe, kuenaku mua kutuadija kudilongela malu adi atangila mulambu wa Kristo wa kupikulangana nawu anyi? Kulonga malu mimpe aa, kuelela meji, ne kusambila, kudi mua kukuambuluisha bua kukepesha didipisha dia tshianana. Kudi mua kukufikisha too ne ku dilekela didipisha bua malu akadi Yehowa mukufuile luse. Tumone bualu bukuabu budi tshilejilu tshia Paulo mua kutulongesha. Kudi bantu badi balekele midimu ivua mua kubapetesha makuta a bungi anu bua kuenza bia bungi mu mudimu wa Yehowa. Bikalabi nanku buebe wewe, kubenga kututshila muoyo ku bintu biuvua mua kuikala mupete kudi mua kukuambuluisha bua kupua malu adi mashale panyima muoyo. (Nom. 11:4-6; Muam. 7:10) Mu “malu adi mashale panyima” mudi mua kuikala kabidi malu atukadi benzele Yehowa anyi ntatu ituvua batantamene ku kale. Kuvuluka mushindu uvua Yehowa mutubeneshe ne  mutukuatshishe ku kale kudi mua kukolesha malanda etu nende. Kadi ki mbimpe tudiambile ne: bitukadi benzele Yehowa mbikumbane, kabiena ne mushinga bua kutungunuka to.​—1 Kol. 15:58.

7. Bilondeshile 1 Kolinto 9:24-27, ntshinyi tshidi tshikengela kuenza bua kujikija lubilu luetu bua kupeta muoyo? Fila tshilejilu.

⁷ Paulo uvua mumvue bimpe mêyi a Yezu a ne: “Dienzejayi ne bukole buonso.” (Luka 13:23, 24) Uvua mumanye anu bu Kristo ne: uvua ne bua kudienzeja matuku ende onso a muoyo. Ke bualu kayi wakafuanyikija nsombelu wa buena Kristo ne dinyema dia lubilu. (Bala 1 Kolinto 9:24-27.) Munyemi wa lubilu utu ushala mutume meji ku mushonyi wa ndekelu ne utu wepuka ditanaji. Tshilejilu, banyemi ba lubilu badi mua kunyemena mu njila idi ne nzubu ya dipanyishila bintu, mikale kabidi ne bintu bikuabu bidi mua kubabueja mu ditanaji. Udi wela meji ne: munyemi wa lubilu udi mua kuimana ku dididishi dia nzubu wa dipanyishila bintu bua kubandila bintu bidimu anyi? Yeye musue kupatuka wa kumpala, kena mua kuenza atshi to! Bu mutudi petu mu lubilu bua kupeta muoyo, tudi ne bua kuepuka malu adi mua kutubueja mu ditanaji. Tuetu bashale batume meji etu ku tshipatshila tshietu, tudienzeja ne bukole buetu buonso anu bu Paulo, netupete difutu!

8. Mmalu kayi asatu atuakonkonona?

⁸ Tumonayi mpindieu malu asatu adi mafuane kutekesha lubilu luetu. 1) Malu matekemena adi anengakana, 2) makanda a mubidi akepela, ne 3) ntatu ya munenganenga. Kukonkonona mushindu uvua bantu bakuabu bapite ne malu aa kudi mua kutuambuluisha petu.​—Filip. 3:17.

9. Malu matekemena adi anengakana adi mua kutukebela tshinyi?

⁹ Malu matekemena adi anengakana. Tutu ne dijinga dikole dia kumona malu mimpe adi Yehowa mutulaye akumbana anu bu muprofete Habakuka. Pavuaye mulombe Yehowa bua kujikija malu mabi avua enzeka mu Yuda, Yehowa wakamuambila bua ‘kutungunuka ne kutekemena.’ (Hab. 2:3) Kadi padi malu atudi batekemene amueneka bu ne: adi anengakana, bidi mua kukepesha disanka dietu, kututekesha too ne mu mikolo. (Nsu. 13:12) Ke tshivua tshienzekele bana betu bakuabu mu 1914. Bena Kristo bela manyi ba bungi bavua batekemene ne: nebaye  mu diulu tshidimu atshi. Kadi ntshinyi tshiakenza bena Kristo ba lulamatu pavua bualu buvuabu batekemene abu kabuyi bukumbane?

10. Ntshinyi tshivua muanetu kampanda ne mukajende benze pavua bualu buvuabu bindile kabuyi bukumbane?

¹⁰ Tuangate tshilejilu tshia bena Kristo babidi ba lulamatu bavua batantamene diteketshibua mu mikolo adi. Muanetu Royal Spatz uvua mubatijibue mu 1908 muikale ne bidimu 20. Uvua mushindike ne: ukavua pa kuya mu diulu. Nunku mu 1911 pakelaye Pearl dîyi bua kumusela, wakamuambila ne: “Si udi mumanye tshienzeka mu 1914. Nanku tuenze lukasa tuselangane!” Pakabengabi kuenzeka muvuabu batekemene, bakalekela kunyema lubilu luabu bua kupeta muoyo anyi? Tòo, bualu tshipatshila tshiabu katshivua nangananga tshia kuya mu diulu to, kadi tshivua tshia kuenzela Nzambi mudimu ne lulamatu. Bavua badisuike bua kunanukila mu lubilu luabu. Ke bualu kayi bakashala ne tshisumi ne lulamatu bidimu bia bungi too ne pakafuabu. Bushuwa, udi muindile ne muoyo kuulu kuulu tshikondo tshikala Yehowa mua kujimija malu adibu banyanga nawu lumu luende, mua kuleja ne: mushindu wende wa kukokesha mmuimpe, ne tshikalaye mua kukumbaja milayi yende yonso. Ikala mushindike ne: malu aa neakumbane tshikondo tshidi Yehowa musungule. Pakuamba tshikondo atshi tshifike, tutungunukayi ne kudifila mu mudimu wa Nzambi. Padi malu atudi batekemene amueneka bu adi anengakana, katuteketshi mu mikolo nansha.

11-12. Bua tshinyi tudi tuamba ne: tudi anu mua kutungunuka ne kuenzela Yehowa mudimu ne lulamatu nansha makanda etu a mubidi makepe? Fila tshilejilu.

¹¹ Makanda a mubidi akepela. Munyemi wa lubilu utu dijinga ne makanda a bungi bua kunyema. Kadi kabiena nanku tuetu basue kuikala ne ditabuja dikole kudi Yehowa ne kumuenzela mudimu ne tshisumi to. Kudi bana betu ba bungi bakadi makanda abu a mubidi makepele batshidi basue kudifila bikole mu mudimu wa Yehowa. (2 Kol. 4:16) Tuangate tshilejilu tshia muanetu wa balume Arthur Secord. * Uvua ne bidimu 88 ne ukavua mutshioke muikale ne tusamasama; ukavua muenze bidimu 55 ku Betele. Dimue dituku, munganga mukuabu wakasemena ku bulalu buende bua kumuambuluisha. Wakamutangila, kumuambila ne dinanga dionso ne: “Muanetu Secord, udi muenzele Yehowa mudimu wa bungi be!” Kadi Arthur kavua yeye umona malu onso avuaye muenze kale to. Wakajula mêsu kumutangila, kutuaye mimuemue umuambila ne: “Udi muambilamu. Kadi ki mmalu atukadi benze adi ne mushinga to; adi ne mushinga ngatudi tuenza kubangila ku mpindieu.”

¹² Udi mua kuikala muenzele Yehowa mudimu bidimu bia bungi, kadi lelu bikadi bikukolela bua makanda ebe a mubidi. Biobi nanku, kuteketshi mu mikolo to. Ikala mutuishibue ne: Yehowa ki mmuwupue mudimu uuvua mumuenzele muoyo to; udi uwanyisha bikole. (Eb. 6:10) Manya  kabidi ne: ki mbungi bua malu audi wenza mu mudimu wa Yehowa lelu budi buleja ne: udi mumunange ne muoyo mujima to. Kadi kuikala anu ne disanka ne kulama ditekemena diebe, kuenza tshionso tshiudi mua kuenza ke malu adi aleja ne: udi munange Yehowa ne mumulamate. (Kolos. 3:23) Yehowa mmumanye malu atudi mua kuenza ne atudi katuyi mua kuenza. Kena utulomba bua kuenza malu adi matupite bukole to.​—Mâko 12:43, 44.

13. Nntatu kayi ivua mifikile Anatoly ne Lidiya? Mmunyi mudi tshilejilu tshiabu tshitusaka bua kutungunuka ne lubilu luetu nansha tuetu ne ntatu ya bungi?

¹³ Ntatu ya munenganenga. Bamue batendeledi ba Yehowa mbapete ntatu ne mbabakengeshe munkatshi mua bidimu bia bungi. Tuangate tshilejilu tshia Anatoly Melnik. * Uvua ne bidimu 12 tshianana pavuabu bakuate tatuende bamuele mu buloko, pashishe baye nende mu Sibérie, mu kilometre 7 000, kule ne dîku diende divua mu Moldavie. Panyima pa tshidimu tshijima, bakakuata Anatoly ne mamuende ne bakakuende kuyabu nabu pabu mu Sibérie. Matuku a bungi pashishe, bakapeta mpunga wa kutuadija kubuela mu bisangilu mu musoko mukuabu, kadi benda kilometre 30 mu neje, bazakala mu mashika makole menemene. Muanetu Anatoly wakalua kuenza bidimu bisatu mu buloko, mushiye mukajende Lidiya ne muanende wa bakaji wa tshidimu tshimue. Nansha muvua Anatoly ne dîku diende batate bikole munkatshi mua bidimu bia bungi, bavua anu banyema lubilu luabu kabayi bateketa. Lelu Anatoly ukadi ne bidimu 82. Udi mu Komite wa Filiale mu Azi wa pankatshi. Anu bu Anatoly ne Lidiya, tuenzayi tshionso tshitudi mua kuenza mu mudimu wa Yehowa, ne tutungunuke ne kunanukila anu bu mutuvua benze kale.​—Gal. 6:9.

14. Paulo wakajingulula ne: uvua ne bua kuenza tshinyi bua kufika ku tshipatshila tshiende?

¹⁴ Paulo uvua mutuishibue ne: uvua ne bua kujikija lubilu luende bua kufika ku tshipatshila tshiende. Bu muvuaye muena Kristo muela manyi, uvua mutekemene bua kupeta “difutu dia dibikila dia muulu dia Nzambi.” Kadi bua kudipeta, wakajingulula ne: uvua ne bua kutungunuka ne ‘kudienzeja.’ (Filip. 3:14) Paulo wakapesha bena Filipoyi tshilejilu kampanda tshimpe bua kubambuluisha bua kutungunuka ne kutuma meji abu ku tshipatshila tshiabu.

15. Ku diambuluisha dia tshilejilu tshia buena muabu, mmunyi muvua Paulo mukankamije bena Filipoyi bua kutunguna ne ‘kudienzeja’?

¹⁵ Paulo wakavuluija bena Filipoyi ne: kuabu bobu mmu diulu. (Filip. 3:20) Bua tshinyi bavua ne bua kuvuluka bualu abu? Tshikondo atshi,  kuikala muena Lomo kuvua diakalenga dinene. * Kadi bena Kristo bela manyi bavua bobu ne kuabu kuvua mua kubapetesha diakalenga dinene kupita dia kuikala muena Lomo kule ne kule. Diakalenga dia kuikala muena Lomo divua kutupu kumpala kua diakalenga dia kuya mu diulu! Ke bualu kayi Paulo wakakankamija bena Filipoyi bua ‘benze malu bu bena muabu mu mushindu udi muakanangane ne lumu luimpe lua Kristo.’ (Filip. 1:27, dim.) Lelu bena Kristo bela manyi badi bafila tshilejilu tshimpe padibu badienzeja bua kufika ku tshipatshila tshiabu tshia muoyo wa tshiendelele mu diulu.

16. Bilondeshile Filipoyi 4:6, 7, ntshinyi tshitudi ne bua kutungunuka ne kuenza nansha tuetu ne ditekemena dia kupeta muoyo mu diulu anyi pa buloba?

¹⁶ Nansha tuetu ne ditekemena dia kupeta muoyo wa tshiendelele mu diulu anyi mu Mparadizu pa buloba, tudi ne bua kudienzeja bua kufika ku tshipatshila atshi. Nansha tuetu ne nsombelu wa mushindu kayi, katutangidi malu adi mashale panyima anyi katulekedi tshintu nansha tshimue tshitupangisha bua kutungunuka ne lubilu luetu nansha. (Filip. 3:16) Tudi mua kuikala batekemene malu kampanda kadi tumona anu bu ne: adi anengakana; makanda etu a mubidi adi mua kuikala makepele; tudi mua kuikala batate ne bakengeshibue munkatshi mua bidimu bia bungi. Nansha wewe mu nsombelu kayi, ‘kusamishi mutu bua tshintu nansha tshimue’ to. Kadi umanyishe Nzambi milombu yebe, ne yeye neakupeshe ditalala kupita muuvua muele meji.​—Bala Filipoyi 4:6, 7.

17. Ntshinyi tshituamona mu tshiena-bualu tshialonda?

¹⁷ Anu bu munyemi wa lubilu udi udienzeja ne muende muonso padi mushonyi wa ndekelu usemena, tutumayi meji etu onso anu ku tshipatshila tshia kujikija lubilu luetu bua kupeta muoyo. Tudienzejayi ne muoyo mujima, bilondeshile makanda etu ne nsombelu wetu, tuya batangile ku malu mimpe adi matuindile kumpala eku. Ntshinyi tshitudi ne bua kuenza bua kutungunuka ne lubilu luetu, tulonda njila muimpe, ne tunyema mu mushindu wa katuyi tutshioka? Tshiena-bualu tshialonda netshituambuluishe bua kumanya malu a kuteka pa muaba wa kumpala ne “mua kumanya malu adi ne mushinga wa bungi.”​—Filip. 1:9, 10.