1. Bua tshinyi Yehowa wakatuadija kufuka?

KUVUA tshikondo tshivua Yehowa anu nkayende. Kadi kavua mu bunkaya to. Uvua mukumbanangane mu mishindu yonso. Nansha nanku, wakajinga bua bantu bakuabu bafukibue pabu. Bua dinanga, wakatuadija kufuka.​—Mis. 36:9; 1 Yone 4:19.

2. Mmunyi muvua banjelu ne Yezu bumvue pavua Yehowa ufuka tshintu ne tshintu?

² Yehowa wakanji kufuka muenzejanganyi nende wa mudimu. Pashishe, ku diambuluisha dia Muanende muanabute eu, “bintu bikuabu bionso biakafukibua,” kusangisha ne banjelu bonso. (Kolos. 1:16) Yezu uvua ne disanka dia bungi bua diakalenga divuaye nadi dia kuenza mudimu ne Tatuende. (Nsu. 8:30) Banjelu ba Nzambi bavua pabu ne malu avua abasankisha. Bavuaku dîba divua Yehowa ne Yezu muena mudimu mupiluke bafuka diulu ne buloba. Ntshinyi tshivua banjelu benze? ‘Bakatuadija kuela mbila ya disanka’ pavuabu bafuke buloba, ne kakuyi mpata bakatungunuka ne kuela mbila ya disanka musangu wonso uvua Yehowa ufuka tshintu kampanda, nangananga pakafukaye bantu bavuaye muoye nabu ngombo. (Yobo 38:7; Nsu. 8:31, dim.) Tshintu tshionso tshidi Yehowa mufuke tshidi tshileja mudiye ne dinanga ne meji.​—Mis. 104:24; Lomo 1:20.

3. Anu mudibu baleje mu 1 Kolinto 15:21, 22 mulambu wa Yezu mmuambuluishe bua kupeta tshinyi?

³ Yehowa uvua musue bua dîku dia bukua bantu dikale ne muoyo wa tshiendelele pa buloba buimpe buvuaye mufuke. Kadi  pavua Adama ne Eva batombokele Tatuabu wa dinanga, mpekatu ne lufu biakabuela mu ba pa buloba. (Lomo 5:12) Yehowa wakenza tshinyi? Wakaleja diakamue muvuaye mua kusungila bukua bantu. (Gen. 3:15) Yehowa wakalongolola bua kufila mulambu wa kupikulangana nawu uvua upesha bana ba Adama ne Eva mushindu wa kupikudibua ku mpekatu ne ku lufu. Padiye muenze nunku, mmupeshe muntu yonso mpunga wa kusungula bua kumuenzela mudimu ne kupeta muoyo wa tshiendelele.​—Yone 3:16; Lomo 6:23; bala 1 Kolinto 15:21, 22.

4. Nnkonko kayi ituandamuna mu tshiena-bualu etshi?

⁴ Mulayi wa Nzambi wa kubisha bantu ku lufu udi ujula nkonko ya bungi. Tshilejilu, mmunyi muikala dibishibua dia bantu ku lufu mua kuenzeka? Pabishabu balela betu ku lufu, netubamanye kabidi anyi? Mmushindu kayi wikala dibishibua edi mua kutupetesha disanka? Mmunyi mudi kuelangana meji a bualu ebu mua kutuambuluisha bua kuleja Yehowa dianyisha dia bungi bua dinanga ne meji ne lutulu bidiye nabi? Tuandamunayi nkonko eyi.

5. Bua tshinyi tudi mua kuamba ne: bantu bonso kabakubishibua musangu umue?

⁵ Bidi bimueneka ne: padi Yehowa ubisha bantu bungi kabuyi kubala ku lufu ku diambuluisha dia Muanende, bonso kabakubishibua musangu umue to. Bua tshinyi tudi tuamba nanku? Bualu, bua bungi bua bantu, tshikutukutu tshidi mua kuenzeka pa buloba tshia dikema. Mmumanye ne: bua ditalala kunengadi, anu kuoku bulongame. (1 Kol. 14:33) Yehowa Nzambi uvua ne meji ne lutulu pavuaye wenza mudimu ne Yezu bua kulongolola buloba ku kakese ku kakese kumpala kua kufukaye bantu. Yezu neenze pende mudimu ne ngikadilu ayi mu Bukokeshi bua bidimu tshinunu penzaye mudimu ne  bantu bapanduka ku Armagedone pikalabu badilongolola bua kuakidila bantu babishibua ku lufu.

6. Bilondeshile Bienzedi 24:15, mbanganyi bikale munkatshi mua babisha Yehowa?

⁶ Bualu bua mushinga mbua ne: nebikengele bua bantu bapanduka ku Armagedone balongeshe bantu babishibua tshidi Bukalenge bua Nzambi ne tshidi mikenji ya Yehowa. Bua tshinyi? Bualu ba bungi babishibua nebikale bantu “badi kabayi bakane.” (Bala Bienzedi 24:15.) Nebibalombe bua bashintuluke bikole bua mulambu wa Kristo udi upikulangana ushishe ubambuluishe. Bantu abu ki mbamanye Yehowa to. Anji elabi meji bua bungi bua mudimu wikalaku bua kulongesha bantu abu bungi kabuyi kubala bulelela budi butangila Yehowa. Muntu yonso neikale ne wende mulongeshi bifuanangane ne mutudi tulombola malonga a Bible lelu anyi? Nebababanye mu bisumbu bua babalongeshe mua kulongeshabu pabu bantu baluabu kubisha panyima pabu anyi? Katuena bamanye to. Kadi tshitudi bamanye ntshia ne: ku ndekelu kua Bukokeshi bua Kristo bua bidimu tshinunu, “buloba nebuwule tente bushuwa ne dimanya dia Yehowa.” (Yesh. 11:9) Bidimu tshinunu nebikale biuwule ne malu a kuenza kadi mikale asankisha!

7. Bua tshinyi bantu ba Nzambi nebikale baditeka pa muaba wa bakuabu pikalabu balongesha bantu babishibua?

⁷ Mu Bukokeshi bua Yezu bua bidimu tshinunu, bana bonso ba Yehowa ba pa buloba nebikale ne bua kutungunuka ne kushintuluka bua kumusankisha. Nunku bonso buabu nebikale baditeka pa muaba wa bakuabu ne muoyo mujima pikalabu bambuluisha babishibua bua kuluangana ne meji a kuenza mpekatu ne kutumikila mikenji ya Yehowa. (1 Pet. 3:8) Kakuyi mpata, bonso babishibua nebamone mudi bantu ba Yehowa ne budipuekeshi ne nebakokibue kudibu. Bantu ba Yehowa aba nebikale pabu ‘badienzeja bua lupandu luabu.’​—Filip. 2:12.

8. Bua tshinyi tudi mua kuamba ne: bantu bakidile babishibua ku lufu nebamanye balela babu?

⁸ Kudi malu a bungi adi atusaka bua kuamba ne: bantu bakidile badi babishibua ku lufu nebamanye balela babu. Tshilejilu, tuetu bimanyine pa dibishibua dikadi dienzeke, bidi bimueneka ne: Yehowa neafukulule bantu mu mushindu wa ne: tshimuekelu tshiabu, ngakuilu wabu, ne ngelelu wabu wa meji bikale bia buena bivuabu nabi matuku makese kumpala kua kufuabu. Vuluka ne: Yezu wakafuanyikija lufu ne tulu, kufuanyikijaye kabidi dibishibua ku lufu ne dibishibua ku tulu. (Mat. 9:18, 24; Yone 11:11-13) Patu muntu ubika ku tulu, tshimuenekelu tshiende ne ngakuilu wende mbia buena bivuaye nabi dîba divuaye muye kulala ne mmumanye malu onso avuaye nawu mu mutu. Tuangate tshilejilu tshia Lazalo. Bu muvuaye mufue kukavua matuku anayi, mubidi wende ukavua mubange kubola. Nansha nanku, pavua Yezu mumubishe ku lufu, bana babu ba bakaji bakamumanya musangu umue, ne Lazalo wakabamanya pende.​—Yone 11:38-44; 12:1, 2.

9. Bua tshinyi bantu babishibua ku lufu kabakubishibua ne mubidi ne lungenyi bipuangane?

⁹ Yehowa mmulaye ne: mu Bukokeshi bua Kristo, muntu nansha umue kakuamba ne: “Ndi nsama.” (Yesh. 33:24; Lomo 6:7) Nunku bonso babishibua ku lufu nebikale ne mibidi mimpe kabayi basama. Kadi kabakulua bapuangane diakamue to, tshianana balela babu badi mua kupanga bua kubamanya. Bidi bimueneka ne: mu Bukokeshi bua Kristo bua bidimu tshinunu, bantu bonso nebalue bapuangane ku kakese ku kakese. Yezu neapingajile Tatuende Bukalenge anu padi bidimu tshinunu bijika. Dîba  adi, Bukalenge nebuikale bukadi bujikije mudimu wabu wonso, too ne wa divuija bantu bapuangane.​—1 Kol. 15:24-28; Buak. 20:1-3.

10. Neumvue bishi pabishabu bantu ku lufu?

¹⁰ Anji elabi meji muumvua dîba diwakidila balela bebe. Disanka diwumvua nedikusekeshe anyi nedikudidishe? Newimbile Yehowa misambu ya kumutumbisha nayi bua bungi bua disanka diwikale nadi anyi? Kakuyi mpata, neunange Tatuebe wa mu diulu bikole ne neunange Muanende bua mudibu banange bantu ne benze bua dibishibua ku lufu dikalaku.

11. Bilondeshile mêyi a Yezu adi mu Yone 5:28, 29, ntshinyi tshienzekela bantu batumikila mikenji ya Nzambi?

¹¹ Elabi meji bua disanka dikale nadi bantu babishibua ku lufu pikalabu benda bavula bumuntu bua kale ne batumikila mikenji miakane ya Nzambi. Bua bantu benza nunku, dibishibua diabu nedikale dibishibua dia muoyo, mmumue ne: nebabanyishile bua kusomba mu Mparadizu tshiendelele. Kadi bantu batombokela Nzambi kabakubanyishila bua kunyanga ditalala dia mu Mparadizu to.​—Yesh. 65:20; bala Yone 5:28, 29.

12. Yehowa neabeneshe bantu bonso bikale pa buloba mu mushindu kayi?

¹² Pikala Bukalenge bua Nzambi bukokesha, bantu bende bonso nebamone mudi mêyi adi Nsumuinu 10:22 malelela. Adi amba ne: “Dibenesha dia Yehowa ke didi divuija muntu mubanji, ne Yeye kena utentekapu dikenga.” Bu muikala nyuma wa Yehowa wambuluisha bantu ba Nzambi, nebalue babanji mu nyuma, mmumue ne: nebende bafuana Yezu ne nebende balua bapuangane. (Yone 13:15-17; Ef. 4:23, 24) Dikutu dionso bukole buabu bua mubidi nebuende buvula ne nebikale benda balua bantu bimpe. Dîba adi, nsombelu neikale wa disanka dia dikema! (Yobo 33:25) Kadi mmunyi mudi kuelangana meji a dibishibua dia bantu ku lufu mua kukuambuluisha mpindieu?

13. Bilondeshile Misambu 139:1-4, mmunyi mudi dibishibua ku lufu dileja ne: Yehowa mmutumanye bimpe menemene?

¹³ Anu mutukadi baleje, padi Yehowa ubisha bantu ku lufu, udi ubabisha ne bumuntu buvuabu nabu ne wenza bua bavuluke malu avua mu mutu muabu. Elabi meji bua tshidi bualu ebu bumvuija. Yehowa mmukunange bikole ufika too ne ku dilama malu onso audi welela meji, audi wakula, audi wenza, ne muudi udiumvua. Nanku dîba diasuaye kukubisha ku lufu, nebikale bipepele bua yeye kukubisha wewe muikale ne bumuntu ne ngenzelu wa malu anu muuvua kumpala amu ne neuvuluke malu onso avua mu mutu muebe. Mukalenge Davidi uvua mumanye ne: Yehowa mmumanye yonso wa kutudi bimpe menemene. (Bala Misambu 139:1-4.) Tudi tumvua bishi patudi tumanya ne: Yehowa mmutumanye bimpe menemene?

14. Tudi ne bua kumvua bishi patudi tuelangana meji a mudi Yehowa mutumanye bimpe menemene?

¹⁴ Patudi tuelangana meji bua mudi Yehowa mutumanye bimpe menemene, kabitutondi to. Bua tshinyi? Vuluka ne: utu ututabalela bikole. Utu munange bumuntu bua yonso wa kutudi bikole menemene. Udi umona malu onso adi atufikila adi enza bua tuikale tshitudi etshi. Ebu bualu budi butukankamija bikole be! Katuedi meji nansha musangu umue ne: tudi nkayetu to. Yehowa udi ku luseke luetu ku munite ne ku munite, ukeba mishindu ya kutuambuluisha.​—2 Kul. 16:9.

15. Mmunyi mudi dibisha bantu ku lufu dileja mudi Yehowa ne meji a bungi?

¹⁵ Patu bantu ne buôwa bua lufu, baluishi babu badi mua kubazakeja bua kubenzeja malu ku bukole, babambila ne: bobu babenga badi  babashipa. Ke mutu bantu badi ku bukokeshi bua Satana benza bua bakuabu batungile balunda babu anyi bua benze malu adibu bamanye ne: mmabi. Kadi abi kabitu bituenzela tuetu bualu to. Tudi bamanye ne: baluishi betu bobu batushipe, Yehowa neatubishe ku lufu. (Buak. 2:10) Tudi batuishibue ne: kakuena tshienzabu tshidi mua kututulakaja ne Yehowa to. (Lomo 8:35-39) Padi Yehowa mutulaye ne: neatubishe ku lufu, mmuleje mudiye ne meji a dikema! Padiye mutulaye nunku, mmunyenge Satana tshimue tshia ku bia mvita bituye uluisha nabi bantu ne mmutupeshe tuetu dikima dia katshia ne katshia.

16. Nnkonko kayi idi ikengela bua udiele? Mmunyi mudi mandamuna ayi mua kukuambuluisha bua kumanya mushindu uudi mueyemene Yehowa?

¹⁶ Baluishi ba Yehowa bobu bafuna bua kukushipa, newikale ne dishindika dia ne: yeye neakubishe ku lufu anyi? Ntshinyi tshidi mua kukuleja ne: newikale nadi? Udi mua kudiela nkonko bu mudi: ‘Mapangadika a makese onso andi ngangata dituku dionso adiku aleja ne: ndi mueyemene Yehowa anyi?’ (Luk 16:10) Nsombelu wanyi udi uleja ne: ndi mueyemene mulayi wa Yehowa wa ne: neampeshe bintu bindi nadi dijinga meme muteke Bukalenge buende pa muaba wa kumpala anyi?’ (Mat 6:31-33) Wewe muandamune ne: Eyowa, dîba adi udi mueyemene Yehowa ne newikale mudilongolole bua diteta kayi dionso diakufikila.​—Nsu 3:5, 6.

17. a) Mmunyi mudi dibishibua dia bantu ku lufu dileja ne: Yehowa udi ne lutulu? b) Mmunyi mutudi mua kuleja dianyisha bua lutulu lua Yehowa?

¹⁷ Yehowa ukadi mumane kuteka dîba diabutulaye bulongolodi bubi ebu. (Mat. 24:36) Kakuzuka bua kububutula dîba kadiyi dianji kukumbana to. Udi ne dijinga dikole dia kubisha bafue, kadi udi ne lutulu. (Yobo 14:14, 15) Muindile too ne padi tshikondo tshikumbana bua yeye kushisha kubabisha ku lufu. (Yone 5:28) Kudi malu adi atusaka bua tuetu kuleja Yehowa dianyisha bua lutulu luende. Anji elabi meji: Bua lutulu lua Yehowa, bantu ba bungi, too ne tuetu kabidi, mbapete mushindu wa ‘kunyingalala bua mpekatu yabu.’ (2 Pet. 3:9) Yehowa mmusue bua bantu ba bungi bapete mushindu wa kupeta muoyo wa tshiendelele. Tulejayiku mutudi ne dianyisha bua lutulu luende elu. Mushindu kayi? Tuenzayi muetu muonso bua kukeba bantu badi “bakaje muoyo wabu bimpe bua kupeta muoyo wa tshiendelele” ne tubambuluishe bua banange Yehowa ne bamuenzele mudimu. (Bien. 13:48) Dîba adi nebatute  diakalenge bua lutulu lua Yehowa, anu mutudi baditute petu.

18. Bua tshinyi tudi ne bua kuikala lutulu ne bakuabu?

¹⁸ Yehowa mmusue bua tulue bapuangane, kadi neanji kushala ne lutulu too ne padi bidimu tshinunu bijika. Mmusue kutubuikidila mpekatu too ne padi tshikondo atshi tshikumbana. Bualu ebu budi butusaka petu bua kuikala kuimanyina pa ngikadilu mimpe ya bakuabu ne kuikala nabu lutulu. Tuangate tshilejilu tshia muanetu kampanda. Bayende uvua ne tunyinganyinga tumupite, kubangaye kupumbisha ne bisangilu. Udi wamba ne: “Bivua bintonda bibi bitambe. Nsombelu wetu wakashintuluka diakamue ne katuvua kabidi mua kuenza malu onso atuvua balongolole to.” Nansha nanku, bua dinanga divuaye nadi, uvua anu lutulu ne bayende mu lutatu luonso alu. Wakeyemena Yehowa, kakatshioka to. Anu bu Yehowa, wakimanyina pa malu mimpe a bayende. Udi wamba ne: “Bayanyi udi ne ngikadilu mimpe ya katshia, ne udi uditatshisha ku kakese ku kakese bua kubenga kusamisha mutu.” Bidi ne mushinga wa bungi bua tuetu kuikala lutulu ne bena mu dîku dietu anyi bena mu tshisumbu tshietu badi baditatshisha bua kutantamena ntatu mikole!

19. Tudi ne bua kudisuika bua kuenza tshinyi?

¹⁹ Yezu ne banjelu bavua ne disanka dia bungi pavuabu bafuke baloba. Kadi elabi meji disanka dikalabu nadi pamonabu buloba buwule ne bantu bapuangane badi banange Yehowa ne bamuenzela mudimu. Elabi meji bua disanka diumvua bantu bavua basumbibue pa buloba bua kuya kukokesha ne Kristo mu diulu pamonabu bukua bantu buenda bupeta masanka bua mudimu wakuatabu. (Buak. 4:4, 9-11; 5:9, 10) Elabi kabidi meji dîba dikala bantu badila bua disanka pamutu pa kudila bua tunyinganyinga; pikala masama, tunyinganyinga, ne lufu kabitshiyiku. (Buak. 21:4) Mu dindila tshikondo atshi, ikale mudisuike bua kuidikija Tatu wetu wa dinanga, wa meji, ne wa lutulu. Wewe muenze nanku, newikale anu ne lutulu nansha wewe mupete ntatu ya mushindu kayi. (Yak. 1:2-4) Tudi ne disanka dia bungi bua mulayi wa Yehowa wa ne: “Nekuikale dibishibua dia bantu ku lufu.”​—Bien. 24:15.