1. Ntshinyi tshidi Yehowa mupeshe mutendeledi wende yonso wa lulamatu?

BUA dinanga, Yehowa mmupeshe mutendeledi wende yonso wa lulamatu wende muaba mu tshisumbu tshiende. Nansha mutudi ne midimu mishilangane, tuetu bonso tudi ne mushinga ne yonso wa kutudi udi dijinga ne mukuabu. Mupostolo Paulo mmutuambuluishe bua kujingulula bualu bua mushinga ebu. Mushindu kayi?

2. Bilondeshile Efeso 4:16, bua tshinyi bidi bikengela tutuangane mushinga ne tueleshangane diboko?

² Anu mudi mvese wa tshiena-bualu etshi uleja, Paulo uvua muleje bimpe ne: muntu nansha umue wa kutudi kena mua kutangila mutendeledi wa Yehowa mukuabu umuambila ne: “Tshiena nebe dijinga” to. (1 Kol. 12:21) Bua tshisumbu kuikalatshi mu ditalala, tudi ne bua kutuangana mushinga ne kueleshangana diboko. (Bala Efeso 4:16.) Patudi tueleshangana diboko mu buobumue, muntu yonso udi umvua ne: mbamunange ne tshisumbu tshidi tshikola.

3. Ntshinyi tshituamona mu tshiena-bualu etshi?

³ Ngimue mishindu kayi itudi mua kuleja ne: tudi tunemeka bena Kristo netu? Mu tshiena-bualu etshi, netumone mudi bakulu mua kunemeka bakulu nabu. Netumone kabidi mutudi tuetu bonso mua kuleja ne: tudi tuangata bana betu bajike ne mushinga. Bua kujikija, netumone mutudi mua kunemeka bantu  badi mua kuikala kabayi bakula muakulu wetu bimpe.

4. Mmubelu kayi udi Paulo mufile mu Lomo 12:10 udi bakulu ne bua kulonda?

⁴ Bakulu bonso ba bisumbu mbateka ku nyuma muimpe wa Yehowa. Nansha nanku, yonso wa kudibu udi ne biende bipedi ne diende dimanya. (1 Kol. 12:17, 18) Bakuabu badi mua kuikala balue bakulu anu matuku adi panshi aa ne kabayi ne dimonamona dia malu dia nsongo. Bakuabu bukulakaja ne masama bidi mua kuikala bibapangisha mua kuenza amue malu. Nansha nanku, mukulu nansha umue kena mua kutangila mukulu nende ne kumuambila ne: “Tshiena nebe dijinga” to. Kadi mukulu yonso udi ne bua kulonda mubelu wa Paulo udi mu Lomo 12:10.​—Bala.

5. Mmunyi mudi bakulu baleja ne: badi banemeka bakulu nabu? Bua tshinyi bidi ne mushinga bua kuenza nanku?

⁵ Bakulu badi baleja mudibu banemeka bakulu nabu padibu babateleja bimpe menemene. Bidi nangananga ne mushinga padibu batuilangana bua kuakula malu a mushinga. Bua tshinyi? Mona tshivua Tshibumba tshia Nsentedi tshia 1/10/1988 (mu Mfualansa) tshiamba: “Bakulu badi ne bua kumanya ne: Kristo udi mua kulombola lungenyi lua mukulu kayi yonso wa mu kasumbu ka bakulu ne nyuma muimpe bua kufila dîyi dinene dia mu Bible didi dikengela bua kumanya tshia kuenza anyi bua kuangata dipangadika dinene. (Bien. 15:6-15) Nyuma muimpe katu wenza mudimu anu ne mukulu umue to.”

6. Mmushindu kayi udi bakulu mua kuenza mudimu mu buobumue? Padibu benza nanku, bidi biambuluisha tshisumbu mushindu kayi?

⁶ Mukulu udi unemeka bakulu nende katu anu ujinga kuakula wa kumpala mu bisangilu bia bakulu misangu yonso to. Katu ushiya tshisangilu atshi tshishala tshiende to, anyi wela meji ne: tshidiye yeye wamba ke tshidibu ne bua kulonda to. Kadi utu ufila wende mmuenemu ne budipuekeshi, mumanye ne: ki mmumanye pende bionso to. Padi bakuabu bakula, udi ubateleja ne ntema yonso. Bualu bua  mushinga mbua ne: yeye mumanye mêyi kampanda manene a mu Bible, muoyo udi umusaka bua kualeja binende ne mmudiakaje bua kulonda bulombodi bua “mupika wa lulamatu udi mudimuke.” (Mat. 24:45-47) Bakulu bobu baleja mudibu banangangane ne banemekangana padibu benza bisangilu biabu abi, nyuma muimpe neikale nabu. Neabalombole kabidi bua kuangata mapangadika adi akolesha tshisumbu.​—Yak. 3:17, 18.

7. Mmunyi muvua Yezu umona bujike?

⁷ Lelu mu bisumbu mudi mêku ne amue a kudiwu ki mmalele bana to. Mudi kabidi bana betu ba bungi bajike. Mmunyi mutudi mua kumona bajike aba? Tumonayi muvua Yezu umona bujike. Pavuaye pa buloba, kavua musele to. Wakashala mujike ne kudifilaye ne muoyo mujima mu mudimu uvua Nzambi mumupeshe. Yezu kavua mulongeshe ne: bidi bikengela kubuela mu dibaka anyi kubenga kubuelamu to. Kadi wakamba ne: bena Kristo bakuabu badi mua kusungula bua kushala bajike. (Mat. 19:11, 12) Yezu uvua unemeka bajike. Kavua ubamona bu bantu bashadile anyi bu ne: mbapangile tshintu kampanda to.

8. Bilondeshile 1 Kolinto 7:7-9, Paulo uvua mukankamije bena Kristo bua kumona ni badi mua kuenza tshinyi?

⁸ Anu bu Yezu, mupostolo Paulo wakashala pende mujike pavuaye wenza mudimu wende wa kuyisha. Paulo kavua mulongeshe ne: mbibi bua muena Kristo kubuela mu dibaka to. Uvua mumanye ne: tshivua dipangadika dia muntu nkayende. Nansha nanku, uvua ukankamija bena Kristo bua kumona ni badi mua kuenzela Yehowa mudimu bu bajike. (Bala 1 Kolinto 7:7-9.) Paulo kavua upepeja bena Kristo bavua bajike to. Si wakasungula Timote utshivua nsonga ne uvua mujike bua kuenza midimu ya mushinga mu mudimu wa Yehowa. * (Filip. 2:19-22) Ke bualu kayi ki mbimpe kuela meji ne: muanetu kampanda mmukumbane anyi ki mmukumbane bua kuenza mudimu kampanda anu bualu udi mu dibaka anyi bualu mmujike to.​—1 Kol. 7:32-35, 38.

9. Nshinyi tshitudi mua kuamba bua dibaka ne bujike?

⁹ Yezu nansha Paulo kabavua balongeshe ne: bena Kristo badi ne bua kusela anyi kushala bajike to. Kadi ntshinyi tshitudi mua kuamba bua dibuela mu dibaka anyi dishala mujike? Tshibumba tshia Nsentedi tshia 1/10/2012 mu Mfualansa ntshiandamune lukonko elu bimpe,  tshiamba ne: “Mu bulelela, [dibaka ne bujike] mmapa a kudi Nzambi. . . . Yehowa katu umona [bujike] bu bualu bua kumvuila bundu anyi kubungamena to.” Ke bualu kayi tudi ne bua kunemeka muaba udi nawu bana betu bajike mu tshisumbu.

10. Mmunyi mutudi mua kuleja ne: tudi tunemeka bana betu bajike?

¹⁰ Mmunyi mutudi mua kunemeka bana betu badi bajike bua mushindu udibu badiumvua ne bua nsombelu udibu nende? Mbimpe tumanye ne: kudi bana betu bakuabu badi bajike badi bangate dipangadika dia kushala anu nanku. Bakuabu bobu mbasue kubuela mu dibaka, kadi ki mbanji kupeta kambela ka pa yabu minu to. Bakuabu bine badi mua kuikala bafuishe bena dibaka nabu. Nansha bobu mu nsombelu kayi, mbimpe bena mu tshisumbu kubebeja bua kumanya bua tshinyi ki mbanji kubuela mu dibaka peshi kujinga bua kubakebela wa kuselangana nende anyi? Mu kuamba kuimpe, bamue bena Kristo badi mua kutulomba bua kubakebela muntu. Kadi bobu kabayi bakuambile bualu, badi mua kumvua bishi wewe mubambile bua kubakebela muntu? (1 Tes. 4:11; 1 Tim. 5:13) Tumonayi malu adi bamue bana betu ba lulamatu bajike bambe.

11-12. Mmunyi mutudi mua kutekesha bajike mu mikolo?

¹¹ Mutangidi kampanda wa tshijengu utshidi mujike ne udi wenza mudimu wende bimpe mmumone ne: kuikala mujike kudi ne malu mimpe a bungi. Kadi udi uleja ne: bidi mua kutonda muntu padi bana betu badi bamueneka bu badi bamumvuila luse bamuebeja ne: “Bua tshinyi kuena muanji kusela?” Muanetu wa balume mukuabu mujike udi ku Betele udi wamba ne: “Kutu misangu itu bana betu benza malu adi amfikisha ku diumvua ne: bajike mba kumvuila luse. Bidi mua kuleja ne: bujike ndutatu, ki ndipa to.”

¹² Muanetu wa bakaji mukuabu udi ku Betele yeye udi wamba ne: “Bamue bamanyishi batu bela meji ne: mujike yonso eu utu ukeba wa kubuela nende mu dibaka, peshi ne: patu bajike mu tshisumbu tshia bantu, batu bamona ne: ke mpunga wa bobu kukeba ba kubuela nabu mu dibaka. Musangu mukuabu Betele wakantuma bua kuenza mudimu muaba kampanda. Pangakafika, kuvua bisangilu dilolo dia dituku adi. Muanetu wa bakaji muena kuende kumvua mutudile wakangambila ne: kuvua bana betu ba balume babidi ba bukole buanyi mu tshisumbu atshi. Kadi kulejaye ne: kavua usua kunkebela mulume to. Mpindieu tudi benze anu tubuela mu Nzubu wa Bukalenge, yeye kunkoka too ne kudi bana betu ba balume abu. Bualu abu buakatuenza bonso basatu mubidi mashika.”

13. Mbilejilu kayi bivua bikankamije muanetu wa bakaji kampanda mujike?

¹³ Muanetu wa bakaji mukuabu mujike udi pende ku Betele udi wamba ne: “Ndi mumanye bampanda-njila bakulumpe batshidi bajike badi ne nkatshinkatshi, bikale ne bipatshila bisunguluke, basue kuambuluisha bakuabu, ne bikale ne disanka. Badi bambuluisha tshisumbu bikole. Bujike buabu kabutu bubatonda to. Kabatu badimona bapite bakuabu bua mudibu bashale bajike anyi badimona bapangile tshintu bua mudibu kabayi mu dibaka anyi kabayi ne bana to.” Bitu bienza disanka bua kuikala mu tshisumbu mudibu bakunemeka ne bakutue mushinga. Kuena umona ne: badi bakumvuila luse anyi mukawu, bakulengulula anyi bakuela muulu to. Tshiudi wewe mumanye ntshia ne: mbakunange.

14. Leja mutudi mua kuleja ne: tudi tunemeka bajike.

¹⁴ Bana betu bajike nebikale ne disanka tuetu tubatue mushinga bua ngikadilu yabu mimpe kabiyi bua mutudi tubumvuila luse bua bujike buabu to. Pamutu pa kubumvuila luse, mbimpe tubatue mushinga bua lulamatu luabu. Patudi tuenza nanku, kabakumvua bu ne: tudi  tubambila ne: “Tshiena nenu dijinga to.” (1 Kol. 12:21) Kadi nebamone ne: tudi tubanemeka ne tuangata muaba udibu nawu mu tshisumbu ne mushinga.

15. Mmalu kayi adi bamue bana betu bashintulule bua kualabaja mudimu wabu?

¹⁵ Bidimu bidi panshi ebi, bamanyishi ba bungi mbalonge muakulu mukuabu bua kualabaja mudimu wabu. Bua kuenza nanku, bivua bibalombe bua kushintulula amue malu. Bana betu aba mbumbuke mu bisumbu bia muakulu wabu wa ku dibela bua kuya mu bia muakulu mukuabu mudibu dijinga ne bamanyishi ba bungi. (Bien. 16:9) Muntu nkayende ke udi mua kuangata dipangadika edi bua kuyisha mudimu wa Bukalenge kumpala. Nansha mudibi mua kubalomba bidimu ndambu bua kumanyabu muakulu mukuabu au bimpe, batu bambuluisha tshisumbu bikole. Ngikadilu yabu mimpe ne dimanya didibu nadi bitu bikolesha tshisumbu ne bitshishindamija. Tudi banange bana betu batu badipangisha amue malu aba bikole!

16. Padi bakulu bajinga kulombela muntu bukulu anyi busadidi, badi bimanyina pa tshinyi?

¹⁶ Kasumbu ka bakulu kakena mua kubenga bua kulombela muanetu kampanda mudimu wa bukulu anyi busadidi anu bualu ki mmuanji kushikuluja muakulu wa tshisumbu tshiabu atshi to. Bakulu nebimanyine pa malu malomba a mu Mifundu bua kushisha kuteka muntu mukulu anyi musadidi, kabayi bimanyina pa mushindu udiye wakula muakulu wa tshisumbu tshiabu to.​—1 Tim. 3:1-10, 12, 13; Tito 1:5-9.

17. Padi dîku dimuangala diye mu ditunga dikuabu, nnkonko kayi idi mua kujuka?

¹⁷ Kudi mêku a bena Kristo adi maye mu matunga makuabu bua kudikuba anyi kupeta mudimu. Dîba adi, bana babu badi mua kubanga kulonga mu tulasa tudibu balongesha mu muakulu munene wa mu ditunga dikadibu adi. Bidi mua kulomba kabidi baledi bua kulonga muakulu au bua kupeta mudimu. Kadi muaba udibu au wowu tshisumbu anyi kasumbu kakese ka muakulu wabu wa ku dibela, nebabuele mu tshisumbu kayi? Tshia muakulu munene wa mu ditunga adi anyi? Peshi tshia muakulu wabu wa ku dibela?

18. Bilondeshile Galatiya 6:5, mmunyi mutudi mua kuleja ne: tudi tunemeka dipangadika didi mfumu wa dîku wangata?

¹⁸ Mfumu wa dîku udi ne bua kusungula tshisumbu tshidi dîku diende ne bua kubuela. Bu mudi bualu ebu bubatangila anu bobu, udi ne bua kukonkonona tshidi tshitambe buimpe bua dîku diende. (Bala Galatiya 6:5.) Tudi ne bua kunemeka dipangadika dia mfumu wa dîku. Nansha yeye muangate dipangadika kayi, mbimpe tuditabe ne tumone ne: dîku adi didi ne muaba wa mushinga mu tshisumbu tshietu.​—Lomo 15:7.

19. Bamfumu ba mêku badi ne bua kusambila ne kuela meji bua bualu kayi?

 ¹⁹ Amue mêku adi mua kuikala mu tshisumbu tshia muakulu wa ku dibela wa baledi, kadi bana kabayi pamuapa bawakula bimpe to. Tshisumbu atshi tshiotshi muaba udibu bakula muakulu munene wa mu ditunga, bidi mua kupangisha bana bua kumvuabu bisangilu bimpe ne kuyabu kumpala mu nyuma. Bua tshinyi? Bualu badi mua kuikala balongesha bana mu tulasa mu muakulu munene wa mu ditunga, kawuyi wa baledi babu wa ku dibela to. Dîba adi, bamfumu ba mêku badi ne bua kusambila ne kuela meji bua tshidibu mua kuenza bua kuambuluisha bana babu bua basemene pabuibi ne Yehowa ne bantu bende. Bidi mua kubalomba bua kuambuluisha bana babu bua kuakulabu muakulu wabu wa ku dibela bimpe anyi kuya mu tshisumbu tshia muakulu udi bana babu bumvua bimpe. Nansha mfumu wa dîku muangate dipangadika kayi, bena mu tshisumbu tshiayabu badi ne bua kubanemeka ne kubatua mushinga.

20. Mmunyi mutudi mua kunemeka bana betu badi balonga muakulu mupiamupia?

²⁰ Bilondeshile malu onso atudi bambe aa, mu bisumbu bia bungi nemuikale bana betu badi bapatata bua kuakula muakulu mupiamupia. Bidi mua kubakolela bua kumvuija bidi munda muabu. Tuetu katuyi tuimanyina pa dimanya diabu dia muakulu, netumone mudibu banange Yehowa ne basue kumuenzela mudimu. Tuetu bamone ngikadilu yabu milenga eyi, netunemeke bana betu aba bikole ne netubatue mushinga. Muntu nansha umue wa kutudi kakubambila ne: “Tshiena nenu dijinga” anu bualu kabena bakula muakulu wetu bimpe to.

21-22. Mbualu kayi budi butusaka bua kuela Yehowa tuasakidila?

²¹ Tudi tuela Yehowa tuasakidila wa bungi bua mudiye mupeshe yonso wa kutudi muaba mu tshisumbu tshiende. Nansha tuetu balume anyi bakaji, bajike anyi basele, bana anyi bakulumpe, tuakula muakulu kampanda bimpe anyi tupatata nawu, tudi ne mushinga wa bungi kudi Yehowa ne kudi umue ne mukuabu.​—Lomo 12:4, 5; Kolos. 3:10, 11.

²² Tutungunukayi koku ne kutumikila malu a mushinga atudi balonge mu tshilejilu tshia Paulo tshia mubidi wa muntu. Tuetu benze nanku, netukebe kabidi mishindu ya bungi ya kuleja mutudi banange muaba utudi nawu ne udi nawu bakuabu mu tshisumbu tshia Yehowa.