1. Ndiakalenga kayi ditudi nadi?

KUIKALA mu tshisumbu tshia Yehowa ndiakalenga dia dikema! Tudi mu Mparadizu wa mu nyuma udi muwule tente ne bantu ba ditalala ne ba disanka. Wewe udi ne muaba kayi mu tshisumbu?

2. Ntshilejilu kayi tshivua mupostolo Paulo mutele mu mikanda ya mu Bible ivuaye mufunde?

² Tshilejilu tshivua mupostolo Paulo mufile mu mikanda ya bungi ya mu Bible ivuaye mufunde tshidi mua kutulongesha malu a bungi mu bualu ebu. Mu mukanda wonso, Paulo uvua ufuanyikija tshisumbu ne mubidi wa muntu. Wakafuanyikija kabidi muntu ne muntu wa mu tshisumbu ne bitupa bishilashilangane bia mubidi.​—Lomo 12:4-8; 1 Kol. 12:12-27; Ef. 4:16.

3. Mmalongesha kayi asatu atuamona mu tshiena-bualu etshi?

³ Mu tshiena-bualu etshi, netumone malongesha manene asatu adi tshilejilu tshia Paulo mua kutulongesha. Dia kumpala, netumone ne: yonso wa kutudi udi ne wende muaba * mu tshisumbu tshia Yehowa. Dibidi, netumone tshitudi mua kuenza biobi bitukolela bua kumona muaba utudi nawu mu tshisumbu. Dia ndekelu, netumone bua tshinyi bidi bikengela tushale baditue  mu dikumbaja mudimu udi Yehowa mupeshe yonso wa kutudi mu tshisumbu.

4. Lomo 12:4, 5 udi utulongesha tshinyi?

⁴ Dilongesha dia kumpala ditudi tupeta mu tshilejilu tshia Paulo ndia ne: yonso wa kutudi udi ne muaba wa mushinga mu dîku dia Yehowa. Paulo udi ubanga tshilejilu tshiende wamba ne: “Anu bu mutudi ne bitupa bia mubidi bia bungi mu mubidi umue, kadi bitupa bionso kabiyi ne mudimu wa muomumue, nunku tuetu, nansha mutudi ba bungi, tudi mubidi umue mu buobumue ne Kristo, kadi muntu ku muntu tudi bitupa bia mubidi bidi bilamakanangane tshimue ne tshikuabu.” (Lomo 12:4, 5) Paulo uvua musue kuamba tshinyi? Yonso wa kutudi udi ne wende mudimu mu tshisumbu, kadi yonso wa kutudi udi ne mushinga.

5. “Mmapa” kayi adi Yehowa mupeshe tshisumbu?

⁵ Paudi wela meji bua bantu badi ne muaba mu tshisumbu, meji ebe adi mua kuya diakamue kudi badi balombola. (1 Tes. 5:12; Eb. 13:17) Mu bulelela, Yehowa mmupeshe tshisumbu tshiende “mapa mikale bantu” ku diambuluisha dia Kristo. (Ef. 4:8) Mu “mapa mikale bantu” aa mudi bena mu Kasumbu kaludiki, bambuluishi ba bena mu Kasumbu kaludiki, bena mu komite ya filiale, batangidi ba bijengu, balongeshi ba mu tulasa tua malu a mu Bible, bakulu, ne basadidi ba mudimu. Mbateke bana betu bonso aba ku nyuma bua kulama mikoko ya bende ya Yehowa ya mushinga ne kuenzela tshisumbu mudimu.​—1 Pet. 5:2, 3.

6. Bilondeshile 1 Tesalonike 2:6-8, bana betu badi batekibue ku nyuma batu baditatshisha bua kuenza tshinyi?

⁶ Mbateke bana betu ku nyuma bua kuenza midimu mishilashilangane. Anu bu mudi bitupa bishilashilangane bia mubidi (bu mudi bianza ne makasa) bienza mudimu bua kuambuluisha mubidi mujima, bana betu badibu bateke ku nyuma badi benza mudimu mukole bua kuambuluisha tshisumbu tshijima. Kabena bakeba bua bantu babatumbishe to. Kadi badi baditatshisha bikole bua kuambuluisha bena Kristo nabu ne kubakolesha. (Bala 1 Tesalonike 2:6-8.) Tudi tuela Yehowa tuasakidila bua balume ba mukaba badi bateka majinga a bakuabu kumpala kua abu aba!

7. Mmabenesha kayi adi nawu bantu ba bungi badi mu mudimu wa ku dîba ne ku dîba?

⁷ Badi mua kuteka bamue bana betu mu tshisumbu bua bikale bamisionere, bampanda-njila ba pa buabu, anyi ba pa tshibidilu. Mu bulelela, pa buloba bujima, bana betu mbaditue mu mudimu wa ku dîba ne ku dîba wa kuyisha ne kuvuija bantu bayidi. Bu mudibu benze nanku, mbambuluishe bantu ba bungi bua kuluabu bayidi ba Yezu Kristo. Nansha mudi bana betu aba kabayi nangananga ne bintu bia ku mubidi bia nsongo, Yehowa mmubabeneshe bikole menemene. (Mâko 10:29, 30) Tudi banange bana betu abu, ne tudi ne disanka dia bungi bua mutudi nabu mu tshisumbu!

8. Bua tshinyi muambi wa lumu luimpe yonso udi ne mushinga kudi Yehowa?

⁸ Anu bana betu batudi batele aba ke badi ne muaba mu tshisumbu anyi? Tòo. Muambi wa lumu luimpe yonso udi ne mushinga kudi Nzambi ne mu tshisumbu. (Lomo 10:15; 1 Kol. 3:6-9) Bidi nanku bualu tshimue tshia ku bipatshila binene bia tshisumbu ntshia kuvuija bantu bayidi ba Mukalenge wetu Yezu Kristo. (Mat. 28:19, 20; 1 Tim. 2:4) Bantu bonso badi bayisha ne tshisumbu (bakadi babatijibue ne badi kabayi banji kubatijibua) batu baditatshisha bua kuteka mudimu eu pa muaba wa kumpala mu nsombelu wabu.​—Mat. 24:14.

9. Bua tshinyi tudi banange bana betu ba bakaji?

⁹ Yehowa mmupeshe bana betu ba bakaji muaba wa lumu mu tshisumbu. Udi wangata  bakaji, bamamu, bakaji bakamba, ne bana betu ba bakaji bajike badi bamuenzela mudimu ne lulamatu ne mushinga wa bungi. Mu Bible mudi bilejilu bia bakaji ba bungi ba tshitembu bavua basankisha Nzambi. Badi babatumbisha bua meji, ditabuja, tshisumi, dikima, muoyo wa tshipapayi bivuabu nabi ne bua muvuabu benza midimi mimpe. (Luka 8:2, 3; Bien. 16:14, 15; Lomo 16:3, 6; Filip. 4:3; Eb. 11:11, 31, 35) Tudi tuela Yehowa tuasakidila wa bungi bua mutudi ne bakaji bena Kristo badi ne ngikadilu mimpe ya muomumue eyi mu bisumbu bietu!

10. Bua tshinyi tudi banange bakulakaje?

¹⁰ Tudi kabidi ne disanka dia kuikala ne bakulakaje ba bungi. Mu bimue bisumbu mudi bana betu bakulakaje bakadi benzele Yehowa mudimu ne lulamatu mu nsombelu wabu mujima. Bakulakaje bakuabu badi mua kuikala babuela mu bulongolodi anu matuku adi panshi aa. Nansha bobu bapiabapia anyi ba kale, badi mua kuikala batata ne tusamasama tua bukulakaja. Tusamasama atu tudi mua kubapangisha mua kuenza malu mu tshisumbu ne kuyisha mudibu basue. Nansha nanku, badi bayisha mudibu bakokeshile, ne badi bakankamija bakuabu ne babalongesha ne makanda abu onso! Malu akadibu bamonemone atu atuambuluisha bikole. Mbalengele anyi bimpe kumona ku mêsu kua Yehowa ne kuetu.​—Nsu. 16:31.

11-12. Leja mukadi bansonga ba mu tshisumbu tshienu bakukankamije.

¹¹ Kadi bua bansonga? Batu batuilangana ne ntatu ya bungi padibu benda bakola mu bulongolodi bua Satana budi buwule ne malongesha ende mabi ebu. (1 Yone 5:19) Nansha nanku, bitu bitukankamija tuetu bonso patutu tumona bansonga aba bandamuna mu bisangilu, bayisha, ne bakuila ditabuja diabu ne dikima dionso. Bushuwa, nuenu bansonga nudi ne muaba wa mushinga mu tshisumbu tshia Yehowa!​—Mis. 8:2.

¹² Bitshidi bikolele bana betu bakuabu bua kuitaba ne: badi pabu ne muaba wa mushinga mu tshisumbu. Ntshinyi tshidi mua kutuambuluisha  bua kumona ne: yonso wa kutudi udi ne muaba mu tshisumbu? Tutshimonayi.

13-14. Bua tshinyi bamue badi mua kumona ne: kabena ne mushinga mu tshisumbu?

¹³ Dilongesha dibidi didi mu tshilejilu tshia Paulo didi dituvuluija lutatu lutu nalu bantu ba bungi lelu. Bitu bibakolela bua kuitaba ne: badi ne mushinga mu tshisumbu. Paulo wakafunda ne: “Dikasa diodi diambe ne: ‘Bu mundi tshiyi tshianza, tshiena tshitupa tshia mubidi,’ bualu ebu kabuena budipangisha bua kuikala tshitupa tshia mubidi to. Ditshi diodi diambe ne: ‘Bu mundi tshiyi dîsu, tshiena tshitupa tshia mubidi,’ bualu ebu kabuena budipangisha bua kuikala tshitupa tshia mubidi to.” (1 Kol. 12:15, 16) Paulo uvua usua kutulongesha tshinyi?

¹⁴ Wewe udifuanyikija ne bakuabu mu tshisumbu, udi mua kupanga mua kumona mushinga uudi nawu. Bana betu bakuabu ba mu tshisumbu badi mua kuikala ne tshipedi tshia kulongesha, bamanye kulongolola malu, anyi bamanye kulama mikoko bimpe. Udi mua kuikala umona ne: kuena ne bipedi bia buena biabu abi to. Wewe umona nanku udi ne budipuekeshi ne udi mumanye mikalu yebe. (Filip. 2:3) Kadi wadimuka! Wewe mushale anu udifuanyikija ne bantu badi ne bipedi bia pa buabi, udi mua kudiela mâyi ku makasa wewe nkayebe. Anu muvua Paulo muleje, udi mua kufika too ne ku dimona ne: kuena ne muaba wa nsongo mu tshisumbu to. Ntshinyi tshidi mua kukuambuluisha bua kumbusha meji aa?

15. Bilondeshile 1 Kolinto 12:4-11, bidi bikengela tumanye tshinyi bua bipedi bitudi mua kuikala nabi?

¹⁵ Elabi meji bua bualu ebu: Yehowa uvua mupeshe bamue bena Kristo ba kumpala bipedi bia nyuma muimpe, kadi bonso kabavua nabi bia muomumue to. (1 Kolinto 12:4-11.) Yehowa wakabapesha bipedi ne mamanya bishilashilangane, kadi muena Kristo yonso uvua ne mushinga. Lelu nyuma muimpe katu utupesha bipedi mu tshishima to. Kadi malu adi anu mu mushindu wa muomumue. Tudi mua kuikala katuyi ne bipedi bia  muomumue, kadi tuetu bonso tudi ne mushinga kudi Yehowa.

16. Mmubelu kayi uvua Paulo mufile udi ukengela tuwutumikile?

¹⁶ Pamutu pa tuetu kudifuanyikija ne bakuabu, mbimpe tutumikile mubelu uvua Paulo mufile eu: “Muntu yonso akonkonone bienzedi biende, dîba adi neapete tshidiye mua kusankila bua bualu buende nkayende, kayi udifuanyikija ne muntu mukuabu to.”​—Gal. 6:4.

17. Tuetu balonde mubelu wa Paulo, udi mua kutuambuluisha mushindu kayi?

¹⁷ Tuetu batumikile mubelu wa Paulo ne bakonkonone bienzedi bietu, tudi mua kubanga kumona ne: tudi ne bipedi ne mamanya bidi bakuabu kabayi nabi to. Tshilejilu, mukulu udi mua kuikala kayi ne tshipedi tshia kulongesha padiye wenza miyuki ku tshiakuidi; kadi udi mua kuikala mupiluke mu divuija bantu bayidi. Anyi udi mua kuikala kayi mumanye kulongolola malu ende bimpe bu bakulu bakuabu, kadi udi mua kuikala mumanyike bikole bua mudiye mulami wa dinanga ne bana betu batu basue kuya kudiye bua kumulomba mibelu ya mu Bible. Peshi udi mua kuikala ne lumu luimpe lua mudiye muakididi wa benyi. (Eb. 13:2, 16) Patudi tumona bimpe ne: tudi ne bietu bipedi ne etu mamanya, netuikale ne disanka bua malu atudi mua kuenza mu tshisumbu; ne katuakutamba kualakana bana betu badi ne bipedi bitudi katuyi nabi to.

18. Leja mutudi mua kulua balongeshi bimpe menemene.

¹⁸ Nansha tuetu ne muaba kayi mu tshisumbu mbimpe tuetu bonso tuikale ne dijinga dia kulengeja mudimu wetu, kuvudija ne dimanya ditudi nadi. Yehowa mmutuambuluishe. Ku diambuluisha dia bulongolodi buende, mmulongolole bua tuikale tulonga malu mimpe a dikema. Tshilejilu, mu tshisangilu tshietu tshia munkatshi mua lumingu, batu batulongesha mua kuyisha bimpe menemene. Utu uditatshisha bua kuyisha mutubu bakulongesha amu anyi?

19. Mmunyi muudi mua kukumbaja tshipatshila tshia kubuela mu Kalasa ka bamanyishi ba Bukalenge?

¹⁹ Malu makuabu a dikema si nKalasa ka bamanyishi ba Bukalenge. Bana betu ba balume ne ba bakaji badi mu mudimu wa ku dîba ne ku dîba badi ne bidimu 23 too ne 65 ke badi mua kubuelamu. Bidi mua kumueneka bu ne: wewe kuena mua kubuelamu to. Kadi pamutu pa kufunda malu audi umona ne: ke adi akupangisha bua kubuelamu, funda wewe adi akupesha dijinga dia kubuelamu. Pashishe, wenze malu akuambuluisha bua kukumbaja malu malomba bua kubuelamu. Yehowa yeye mukuambuluishe ne wewe muenze tshiudi mua kuenza, tshiudi umona ne: katshiena mua kuenzeka atshi tshidi mua kuenzeka.

20. Ntshinyi tshidi Lomo 12:6-8 utulongesha?

²⁰ Dilongesha disatu ditudi tupeta mu tshilejilu tshia Paulo didi mu Lomo 12:6-8. (Bala.) Paulo udi uleja kabidi mu mvese eu ne: bonso badi mu tshisumbu badi ne bipedi bishilangane. Kadi apa udi wimanyina pa bualu ebu: tudi ne bua kukolesha tshisumbu ne kutshiambuluisha ne bipedi bitudi nabi.

21-22. Tshilejilu tshia Robert ne tshia Felice tshidi mua kutulongesha tshinyi?

²¹ Tuangate tshilejilu tshia muanetu Robert. * Yeye mumane kuenza mudimu mu ditunga divuabu bamutume, bakamutume bua kuenza mudimu ku Betele wa mu ditunga diabu. Nansha muvuabu bamujadikile ne: kabavua bamushintulule bua tshilema kampanda tshivuaye muenze, wakamba ne: “Biakantonda ngondo ne ngondo bualu mvua ngela meji ne: mvua mupangile bua kuenza  mudimu wanyi bimpe. Kuvua misangu inkavua ngumvua bua kulekela bia Betele.” Mmunyi muakapetululaye disanka? Mukulu nende kampanda wakamuvuluija ne: Yehowa mmutulongeshe mu mudimu wonso utuvua benze kumpala bua tuenza utudi nawu mpindieu bimpe menemene. Robert wakamona ne: bivua bikengela alekele kutuma meji ku bikadi bipite kadi atuadija kuimanyina pa tshidiye mua kuenza mpindieu.

²² Muanetu Felice Episcopo uvua pende ne lutatu alu. Yeye ne muena kuende bavua baye mu Kalasa ka Gilada mu 1956 ne bakamutuma mutangidi wa tshijengu mu Bolivie. Mu 1964 mukajende wakimita. Felice wakamba ne: “Biakatukolela bua kumbuka mu mudimu utuvua banange bikole. Ndi nnuambila ne: bualu abu buakantonda tshidimu tshijima. Kadi Yehowa wakangambuluisha, meme kushintulula lungenyi luanyi ne kushala muimanyine pa mudimu mupiamupia unkavua nawu wa kuikala muledi.” Utu umvua pebe bu Robert anyi bu Felice anyi? Bitu bikutonda bua muudi kutshiyi ne diakalenga dia kuenza midimu iuvua wenza kumpala anyi? Biobi nanku, newikale ne disanka wewe mushintulule lungenyi ne mushale muimanyine pa tshiudi mua kuenza mpindieu bua kuenzela Yehowa ne bena Kristo nebe mudimu. Kushadi muvunge maboko to, ambuluisha bakuabu ne bipedi ne mamanya ebe. Wewe muenze nanku neupete disanka paudi ukolesha tshisumbu.

23. Tudi ne bua kuangata dîba dia kuenza tshinyi? Ntshinyi tshituamona mu tshiena-bualu tshidi tshilonda?

²³ Yonso wa kutudi udi ne mushinga kudi Yehowa. Mmusue bua tuikale mu dîku diende. Tuetu bangate dîba dia kuelangana meji a tshitudi mua kuenza bua kukolesha bena Kristo netu ne pashishe baditatshishe bua kubakolesha, pamuapa katuakutamba kuela meji ne: katuena ne muaba mu tshisumbu to! Kadi netuambe tshinyi bua mushindu utudi tumone bakuabu mu tshisumbu? Mmunyi mutudi mua kuleja ne: tudi tubanyisha? Tshiena-bualu tshidi tshilonda netshiakule bua bualu bua mushinga ebu.