1. Mmushindu kayi udi bana betu badienzeja bua kuenza bia bungi mu mudimu wa Yehowa?

 BU MUDI bulongolodi ebu buenda buya butangile ku tshibungubungu, tudi ne mudimu wa bungi wa kuenza. (Mat. 24:14; Luka 10:2; 1 Pet. 5:2) Tuetu bonso tudi basue kuenzela Yehowa mudimu ne muoyo mujima. Bana betu ba bungi mbalabaje mudimu wabu wa kuyisha. Bamue mbatekemene bua kulua bampanda-njila. Banga bua kuya kuenza mudimu ku Betele anyi kuya mu mudimu wa dibaka nzubu yetu ya malu a ntendelelu. Bana betu bakuabu ba bungi badi badienzeja bua kukumbaja malu malomba bua kulua basadidi anyi bakulu. (1 Tim. 3:1, 8) Yehowa udi usanka bikole padiye umona bantu bende badifila bua kuenza mudimu mushindu eu!​—Mis. 110:3; Yesh. 6:8.

2. Ntshinyi tshitudi mua kumvua tuetu katuyi bakumbaje bipatshila bia mu nyuma bituvua badifundile?

² Bidi mua kutuadija kututekesha mu maboko tuetu benze bidimu bia bungi kadi katuyi anu tufika ku dikumbaja bipatshila kampanda bia mu nyuma bituvua badifundile to. Anyi tudi mua kuteketa mu mikolo bualu katuena mua kuenza midimu kampanda ya mu bulongolodi bua bukole butukadi peshi bua malu kansanga a mu nsombelu. (Nsu. 13:12) Ke tshivua tshienzekele Melissa. * Uvua ne dijinga dia kuya kuenza mudimu ku Betele anyi kubuela mu Kalasa ka bamanyishi ba Bukalenge. Kadi udi wamba ne: “Nkadi mupitshishe bidimu bidibu bakose. Buanyi meme kuya ku Betele anyi kubuela mu kalasa aku bikadi bishale anu tshilota. Imue misangu ntu ndiumvua mutekete mu mikolo.”

3. Mbidia kayi bidi bamue bana betu ne bua kuela bua kupetabu midimu kampanda?

³ Bua bamue batshidi bansonga ne bikale ne makanda bidi mua kulomba bua banji bakumbane ne badienzeje bua kupeta ngikadilu  kansanga kumpala kua bobu kubapesha imue midimu. Badi mua kuikala ne meji, balamata ku mapangadika abu, ne banange kuenza mudimu; kadi bidi mua kulomba bua banji balonge mua kuikala ne lutulu, kabayi ne kalengu mu bidibu benza, ne banemeka bakuabu. Wewe mudienzeje bikole bua kuikala ne ngikadilu idi ikengedibua, badi mua kukupesha midimu dîba diudi kuyi mene muelele meji to. Mona tshivua tshifikile Nick. Pavuaye ne bidimu 20, bivua bimubungamije bikole bualu kabavua bamuteke musadidi. Udi wamba ne: “Mvua mmona ne: kuvua anu bualu bumvua ne bua kuakaja.” Kadi Nick kakashala muvunge maboko to. Wakadifila bikole mu dienza midimu ya mu tshisumbu ne mu mudimu wa buambi. Lelu eu ukadi mu Komite wa filiale.

4. Ntshinyi tshituakuila mu tshiena-bualu etshi?

⁴ Udiku mutekete mu maboko bualu kuena mukokeshe bua kukumbaja tshipatshila kampanda tshia mu nyuma tshiuvua mudifundile anyi? Pikalabi nanku, ambila Yehowa bualu buebe abu mu disambila. (Mis. 37:5-7) Udi kabidi mua kulomba mibelu kudi bana betu bashindame bua tshiudi mua kuenza bua kulengeja mudimu uudi wenzela Nzambi, pashishe wenze muebe muonso bua kutumikila mibelu ayi. Wewe muenze nanku, udi mua kufika ku dikumbaja tshipatshila tshiebe atshi. Kadi anu mudibi bua Melissa utukadi batele, udi mua kuikala ukadi mupitshishe bungi bua bidimu bidibu bakose bua kupeta mudimu uudi ujinga. Ntshinyi tshiudi mua kuenza bua kuikala anu ne disanka? Bua kuandamuna lukonko elu, mu tshiena-bualu etshi netuakule bua 1) tshidi mua kukupetesha disanka, 2) muudi mua kudivudija, ne 3) bipatshila bia wewe kudifundila bidi mua kukupetesha disanka.

5. Bua tuetu kupeta disanka mbimpe tutuishile mêsu pa tshinyi? (Muambi 6:9)

⁵ Mu Muambi 6:9 badi baleja tshidi mua kukupetesha disanka. (Bala.) Muntu udi wanyisha “bidi mêsu amona” utu usanka ne bidiye nabi, bu mudi nsombelu udiye nende. Kadi muntu udi wipatshila majinga ende utu yeye ujinga tshintu tshidiye kayi nansha mua kupeta to. Bidi bitulongesha tshinyi? Bua tuetu kupeta disanka, mbimpe tutuishile mêsu pa bitudi nabi ne pa bitudi mua kukokesha bua kupeta.

6. Ntshilejilu kayi tshituamona mpindieu? Netuakule nangananga bua tshinyi?

⁶ Kudiku bushuwa mushindu wa muntu kusanka ne bikadiye nabi anyi? Bantu ba bungi batu bela meji ne: kakuena mushindu to, bualu tutu basue kulonga mua kuenza bintu bipiabipia. Kadi kabiena nanku to. Tudi bushuwa mua kuanyisha bidi ‘mêsu etu amona’ kabiyi anu ku tshimfula muoyo to. Mmunyi mutudi mua kuenza nanku? Bua kupeta diandamuna, tumonayi tshilejilu tshia ntalanta tshivua Yezu mufile mu Matayi 25:14-30. Netuakule nangananga bua malu adi tshilejilu etshi tshitulongesha bua mutudi mua kupeta disanka ne kudivudija mu nsombelu utudi nende mpindieu.

7. Mu mêyi makese, umvuija tshilejilu tshia ntalanta tshivua Yezu mufile.

⁷ Mu tshilejilu tshia Yezu, muntu uvua usua kuya ku luendu. Kumpalu kua kuasaye luendu, udi ubikila bapika bende upesha muntu ne muntu ntalanta bua kuenda nayi mushinga. * Bu muvuaye mumanye bapika bende abu ne mumanye tshivua yonso wa kudibu mua kukokesha, wakapesha wa kumpala ntalanta itanu, kupeshaye mukuabu ibidi, ne muisatu kumupeshaye umue. Bapika babidi ba kumpala bakenza mudimu bimpe ne ntalanta ivuabu babapeshe, kupetabu makasa. Kadi muisatu yeye kavua muenze bualu nansha bumue ne ntalanta uvuabu bamupeshe to. Nunku bakamuipata ku mudimu.

8. Bua tshinyi mupika wa kumpala uvua mua kuikala ne disanka?

 ⁸ Mupika wa kumpala uvua ne bua kuikala mudimone ne mushinga bua muvuabu bamupeshe ntalanta itanu kudi mfumuende. Makuta avuabu bamupeshe avua a bungi menemene, bileja ne: mfumuende uvua umueyemena! Kadi netuambe tshinyi bua mupika muibidi? Uvua pamuapa mua kuteketa mu mikolo bua muvuabu kabayi bamupeshe ntalanta bungi bua muomumue ne mupika wa kumpala. Kadi ntshinyi tshiakenzaye?

9. Ntshinyi tshivua Yezu kayi muambe bua mupika muibidi? (Matayi 25:22, 23)

⁹ Bala Matayi 25:22, 23. Yezu kavua muleje ne: mupika muibidi au uvua mubungame ne mufiike munda bua muvuabu bamupeshe anu ntalanta ibidi to. Yezu kavua nansha muleje ne: mupika au wakadilakana wamba ne: ‘Ke tukuta tuonso tudibu bampeshe etu? Si ndi panyi mua kuenza mudimu anu bu mupika udibu bapeshe ntalanta itanu au! Mukalenge yeye kayi unganyisha, ndi njiika ntalanta ibidi eyi ntungunuke ne kuenza anyi malu.’

10. Ntshinyi tshivua mupika muibidi muenze ne ntalanta yende?

¹⁰ Anu bu mupika wa kumpala au, muibidi pende wakangata mudimu uvuabu bamupeshe ne mushinga wa bungi. Nunku wakenzela mfumuende mudimu ne muende muonso, kumupetelaye ntalanta mikuabu ibidi ku ivuaye mumupeshe ayi. Mfumuende wakamufuta bua mudimu mukole uvuaye muenze au. Mupika au uvua musankishe mfumuende bikole, ke mfumuende kumonaye ne: uvua mukumbane bua kupeta midimu mikuabu ya bungi!

11. Ntshinyi tshitudi mua kuenza bua kuvudija disanka dietu?

¹¹ Bia muomumue, tuetu tudifila muetu muonso  bua kuenza mudimu kayi wonso udibu batupesha mu bulongolodi bua Yehowa netuvudije disanka dietu. ‘Difila bikole’ mu mudimu wa diyisha, ne ikala wenza midimu ya mu tshisumbu ne tshisumi. (Bien. 18:5; Eb. 10:24, 25) Ikala uya mu bisangilu mudilongolole bua kufila mandamuna adi akolesha a mu binuikala ne bua kulonga. Ikala wangata mudimu wonso wa mulongi udibu bakupesha mu tshisangilu tshia munkatshi mua lumingu ne mushinga wa bungi. Buobu bakulombe bua kuenza mudimu kampanda mu tshisumbu, ikala unemeka dîba ne ikala muntu wa kueyemena. Kuikadi umona mudimu udibu bakupeshe bu udi kawuyi ne dikuatshisha ne ukujimijila dîba diebe tshianana to. Dienzeje bua upiluke mu diwenza. (Nsu. 22:29) Wewe udifila bikole mu mudimu uudi wenzela Yehowa, neuye kumpala lukasa ne disanka diebe nedivule bikole. (Gal. 6:4) Nebikale kabidi bikusankisha padibu bapesha bana betu bakuabu midimu mu tshisumbu iuvua pamuapa wewe ujinga kupeta.​—Lomo 12:15; Gal. 5:26.

12. Ntshinyi tshivua tshiambuluishe Melissa ne Nick bua kuvudijabu disanka?

¹² Utshidi muvuluke muanetu wa bakaji Melissa uvua musue kuya kuenza mudimu ku Betele anyi kubuela mu Kalasa ka bamanyishi ba Bukalenge anyi? Nansha mudiye katshiyi mua kukumbaja malu aa, udi wamba ne: “Ndi ngenza muanyi muonso bua kuenza bumpanda-njila ne muoyo mujima, ndienzeja bua kuyisha mu mishindu yonso idiku. Kuenza nanku nkuvudije disanka dianyi bikole.” Kadi ntshinyi tshivua Nick yeye muenze bua kuluisha diteketa mu mikolo bua muvuabu kabayi bamuteke musadidi wa mudimu? Udi wamba ne: “Mvua ndifila nangananga bua kuenza midimu imvua nayi bu mudi kuyisha ne kufila mandamuna adi mua kukolesha bana betu mu bisangilu. Mvua kabidi muuje formilere bua kuya ku Betele, bakalua kungitabila bua kuyaku tshidimu tshiakalonda.”

13. Ntshinyi tshiwapeta wewe udifila bikole mu mudimu uudi nawu mpindieu? (Muambi 2:24)

¹³ Wewe udifila bikole mu mudimu uudi nawu mpindieu, nebienze bua bakupeshe mikuabu ya bungi mu matuku atshilualua anyi? Bidi mua kuenzeka, anu muvuabi bienzekele Nick. Kadi biobi kabiyi bienzeke nanku, anu bu muvuabi bua Melissa, disanka diebe nedivule anu kuvula. Neumvue kabidi disanka dia bungi bua bionso biudi wenzela Yehowa. (Bala Muambi 2:24.) Bualu bukuabu, nebikusankishe bikole menemene pawamanya ne: bidi bisankisha Mukalenge wetu Yezu Kristo padiye ukumona udifila muebe muonso.

14. Ntshinyi tshitudi ne bua kuikala tuvuluka bua bipatshila bitudi tudifundila mu mudimu wa Yehowa?

¹⁴ Tuetu tudifila muetu muonso mu mudimu utudi tuenzela Yehowa mpindieu, mmumue ne: katuenaku mua kukeba mishindu mikuabu ya kuwalabaja anyi? Kabiena nanku to! Tudi mua kudifundila bipatshila biatuambuluisha bua kulua bamanyishi ne balongeshi bimpe ne bua kuambuluisha bena Kristo netu. Netukumbaje bipatshila ebi tuetu tudifila bua kuambuluisha bakuabu ne meji mimpe ne budipuekeshi, pamutu pa kuimanyina anu pa malu etu.​—Nsu. 11:2; Bien. 20:35.

15. Mbipatshila kayi bidi mua kukuvudijila disanka?

¹⁵ Mbipatshila kayi biudi mua kudifundila? Lomba Yehowa akuambuluishe bua umanye bipatshila biudi mua kukumbaja. (Nsu. 16:3; Yak. 1:5) Kuenaku mua kudifundila tshimue tshia ku bipatshila bitudi batele mu  tshikoso tshia kumpala mu tshiena-bualu etshi anyi? Bu mudi kulua mpanda-njila muambuluishi anyi wa pa tshibidilu, kuya kuenza mudimu ku Betele, peshi kuya kuambuluisha mu mudimi wa luibaku. Pamuapa wewe ne mushindu, udi mua kulonga muakulu mukuabu bua umone mua kualabaja mudimu webe anyi kuya kuambuluisha mu teritware wa muakulu mukuabu. Udi mua kumanya  malu a bungi adi atangila bipatshila ebi wewe mubale mukanda wa Balongolola bua kuenza disua dia Yehowa mu nshapita wa 10 ne muyukile kabidi ne bakulu mu tshisumbu tshienu. * Pawikala udienzeja bua kukumbaja bipatshila ebi, nebimueneke patoke muudi uya kumpala ne disanka diebe nedivule.

16. Newenze tshinyi wewe kuyi mua kukumbaja tshimue tshia ku bipatshila bitudi batele kuulu eku mpindieu?

¹⁶ Kadi newenze tshinyi wewe kuyi ne mushindu wa kukumbaja tshimue tshia ku bipatshila bitudi batele kuulu eku mpindieu? Mbimpe udifundile tshipatshila tshikuabu tshiudi mua kukumbaja bipepele. Mona tshiudi mua kuenza.

17. Bilondeshile 1 Timote 4:13, 15, ntshinyi tshidi muanetu wa balume mua kuenza bua kuluaye mulongeshi wa dipoko?

¹⁷ Bala 1 Timote 4:13, 15. Biwikala muanetu wa balume ukadi mubatijibue, udi mua kudienzeja bua kulengeja mushindu wa kuyukila ne bantu ne wa kubalongesha. Bua tshinyi? Bualu wewe ‘udifila ne muoyo mujima’ ku dibala, ku diakula, ne ku dilongesha nebiambuluishe badi bakuteleja. Difundila tshipatshila tshia kulonga ngikadilu yonso ya bungamba-malu idi mu broshire wa Difila ku dibala ne ku dilongesha ne kuyitumikila. Ikala ulonga ngikadilu ayi ku umue ku umue, uyambulula kumbelu, ne wenza muebe muonso bua kuyitumikila paudi wenza miyuki. Lomba mibelu kudi mufidi wa mibelu muambuluishi anyi mukulu mukuabu utu ‘wenza mudimu bikole mu kuakula ne mu kulongesha.’ * (1 Tim. 5:17) Kudifidi anu mu ditumikila malu a mu broshire au patupu to, difila kabidi mu diambuluisha bateleji bua bakoleshe ditabuja  diabu anyi ubakankamije bua batumikile bidibu balonga. Wewe wenza nanku, neuvudije disanka diebe ne diabu kabidi.

18. Ntshinyi tshidi mua kutuambuluisha bua kukumbaja bipatshila bitudi tudifundila mu mudimu wa buambi?

¹⁸ Tuetu bonso mbatupeshe mudimu wa kuyisha ne kuvuija bantu bayidi. (Mat. 28:19, 20; Lomo 10:14) Udiku musue kupiluka mu mudimu wa mushinga mukole eu anyi? Longa malu a mu broshire wa Dilongesha ne udifundile bipatshila bisunguluke bienza bua utumikile malu audi ulonga au. Udi kabidi mua kupeta ngenyi mikuabu mimpe mu Mabeji a tshisangilu tshia nsombelu ne mudimu wetu wa buena Kristo ne mu filme ya mua kuyukila ne bantu itubu bela mu bisangilu bia munkatshi mua lumingu. Teta kutumikila ngenyi eyi bua umone idi yenda bimpe. Wewe mulonde mibelu eyi, neulue bushuwa muambi wa lumu luimpe mupiluke ne nebikupeteshe disanka dia bungi.​—2 Tim. 4:5.

19. Ntshinyi tshiudi mua kuenza bua kuikala ne ngikadilu ya buena Kristo?

¹⁹ Wewe musue kudifundila bipatshila, kupu tshimue tshia ku bipatshila bia mushinga etshi muoyo: kudienzeja bua kuikala ne ngikadilu ya buena Kristo. (Gal. 5:22, 23; Kolos. 3:12; 2 Pet. 1:5-8) Ntshinyi tshiudi mua kuenza bua kutshikumbaja? Tshilejilu wewe musue kukolesha ditabuja diebe, udi mua kubala biena-bualu bidi mu mikanda yetu bidi bifila ngenyi mimpe ya mua kukolesha ditabuja. Nebikuambuluishe kabidi bikole wewe utangila filme ya mu TV wa jw.org idi ileja muvua bamue bena Kristo netu baleje ditabuja dia pa buadi pavuabu mu ntatu. Pashishe keba muudi pebe mua kuidikija ditabuja diabu.

20. Ntshinyi tshitudi mua kuenza bua kuvudija disanka dietu ne katuyi tutamba kudiumvua batekete mu mikolo?

²⁰ Kakuyi mpata, tuetu bonso tutu basue kuenza bia bungi mu mudimu wa Yehowa kupita mutudi tuenza mpindieu. Mu bulongolodi bupiabupia bua Nzambi netuikale ne mushindu wa kumuenzela mudimu bimpe menemene kakuyi tshipumbishi. Kadi bua mpindieu, tuetu tuenza muetu muonso mu bionso bitudi tuenzela Yehowa, nebivudije disanka dietu ne katuakutamba kudiumvua batekete mu mikolo to. Bualu bua mushinga menemene, netutumbishe Yehowa “Nzambi [wetu] wa disanka” ne netumupeshe bunême. (1 Tim. 1:11) Nanku tuikalayi ne disanka bua bitudi tuenza mu mudimu wa Yehowa!