1. Bua tshinyi Yezu wakalomba Yehowa bua alame bayidi bende?

 BUTUKU kumpala kua Yezu kufua, wakalomba Yehowa, Tatu wende wa mu diulu bualu bua pabuabu, bua ne: alame bayidi bende. (Yone 17:15, 20) Bushuwa, Yehowa uvua anu utabalela bantu bende ne ubakuba. Kadi Yezu uvua mumanye ne: Satana uvua ne bua kuluisha bayidi bende ne luonji lua bungi. Wakajingulula kabidi ne: bavua ne bua kukeba diambuluisha dia Yehowa bua bakandamene buluishi bubi bua Diabolo.

2. Bilondeshile Misambu 33:18-20, bua tshinyi katuena ne bua kutshina buluishi?

² Ndongoluelu wa Satana eu udi ukebela bena Kristo balelela ntatu ya bungi. Tudi tutuilangana ne buluishi budi mua kututekesha mu mikole, bufuane ne kutupangisha bua kushala ne lulamatu kudi Yehowa. Kadi anu mutuamona mu tshiena-bualu etshi, katuena ne tshitudi tutshina to. Yehowa udi utulama, udi umona ntatu itudi tupeta, ne mmudiakaje bua kutuambuluisha bua tuyitantamene. Tukonkononayi bilejilu bibidi bia mu Bible bidi bileja mudi ‘Yehowa utangila badi bamutshina.’​—Bala Misambu 33:18-20.

3. Ndîba kayi ditudi mua kudiumvua nkaya?

³ Nansha mutudi mu dîku dinene dia batendeledi ba Nzambi, kudi misangu itudi mua kudiumvua nkaya. Tshilejilu, bansonga badi mua kudiumvua nkaya padibu kumpala kua balongi babu mu kalasa, bumvuija malu adibu bitabuja anyi padibu baya mu tshisumbu tshikuabu tshia bena Kristo. Bamue ba kutudi badi mua kumvua dibungama anyi kutekeshibua mu mikolo, bela meji ne: badi ne bua kutantamena ntatu bobu nkayabu. Badi mua kuelakana bua kuambila bakuabu idibu nayi munda, bela meji ne: pamuapa kabakubumvua to. Kudi misangu itudi mene mua kudiebeja ni kudi muntu udi ututabalela bushuwa. Kuikala nkaya, nansha bua bualu kayi, kudi mua kuenza bua tudiumvue bashikile, tushala anu  bu bantu ne malu abatonda. Yehowa ki mmusue bua tudiumvue mushindu au to. Bua tshinyi tudi tuamba nanku?

4. Bua tshinyi muprofete Eliya wakamba ne: “Anu meme nkayanyi ke udi mushale”?

⁴ Tuakulayi bua muntu wa lulamatu, Eliya. Pavua Yezabele muditshipe bua kumushipa, wakanyema bua kusungila muoyo wende munkatshi mua matuku mapite pa 40. (1 Bak. 19:1-9) Ndekelu wa bionso, pavuaye nkayende mu nyongolo, wakambila Yehowa ne kanyinganyinga ne: “Anu meme nkayanyi ke [muprofete] udi mushale.” (1 Bak. 19:10) Kuvua baprofete bakuabu mu buloba abu; Obadaya wakasungila baprofete 100 mu bianza bia Yezabele mushipianganyi. (1 Bak. 18:7, 13) Kadi bua tshinyi Eliya uvua udiumvua nkaya? Uvua wela meji ne: baprofete bavua Obadaya mupandishe bakavua bafue bonso tshikondo atshi anyi? Uvua pamuapa udiumvua nkaya bualu bantu bakuabu kabavua badisange nende bua kuenzela Yehowa mudimu panyima pa diteta dia Baala dia pa Mukuna wa Kâmele anyi? Uvua mua kuikala wela meji ne: kakuvua muntu uvua mumanye ne: uvua mu njiwu minene anyi? Peshi uvua udiebeja bua kumanya ni kuvua muntu uvua umutabalela anyi? Muyuki wa Eliya eu kawena umvuija muvuaye udiumvua menemene to. Kadi tshitudi bamanye bimpe ntshia ne: Yehowa uvua mumanye tshivua tshisaka Eliya bua kudiumvua nkaya ne uvua mumanye tshia kuenza menemene bua kumuambuluisha.

5. Mmunyi muvua Yehowa mujadikile Eliya ne: kavua nkaya to?

⁵ Yehowa wakambuluisha Eliya mu mishindu ya bungi. Wakamukankamija bua kuakula. Wakebeja Eliya misangu ibidi ne: “Udi wenza tshinyi muaba eu?” (1 Bak. 19:9, 13) Dîba dionso divua Eliya uleja yonso ivuaye nayi munda, Yehowa uvua umuteleja. Bua kumuandamuna, Yehowa wakamuleja ne: uvua nende ne uvua ne bukole bua bungi. Wakamujadikila kabidi ne: kavua nkayende to, kuvua batendeledi nende bakuabu. (1 Bak. 19:11, 12, 18) Kakuyi mpata, Eliya wakadiumvua musulakane pakambilaye Yehowa yonso ivuaye nayi mu muoyo ne pakumvuaye diandamuna diende. Yehowa wakapesha Eliya midimu ya kuenza. Wakamuambila bua kuela Hazayele manyi bua alue mukalenge wa  Suliya, bua kuela Yehu manyi bua alue mukalenge wa Isalele, ne bua kuteka Elisha muprofete. (1 Bak. 19:15, 16) Pavua Yehowa mupeshe Eliya midimu eyi, uvua mumuambuluishe bua imanyine pa malu mimpe. Nzambi wakamupesha kabidi mulunda muimpe, Elisha. Ntshinyi tshiudi mua kuenza bua Yehowa akuambuluishe paudi udiumvua nkaya?

6. Udi mua kusambila bua malu kayi paudi udiumvua nkaya? (Misambu 62:8)

⁶ Yehowa udi ukulomba bua umusambile. Mmumone malu audi uluangana nawu, ne udi ukujadikila ne: neateleje masambila ebe dîba kayi dionso. (1 Tes. 5:17) Utu musue kuteleja masambila a batendeledi bende. (Nsu. 15:8) Udi mua kusambila bua malu kayi paudi udiumvua nkaya? Anu bu Eliya, ambila Yehowa yonso iudi nayi munda. (Bala Misambu 62:8.) Muambila malu adi akutonda ne muudi udiumvua. Mulomba bua akuambuluishe bua umanye tshia kuenza bua kuatantamena. Tshilejilu, wewe udiumvua nkaya ne umvua buôwa paudi ufila bumanyishi mu kalasa, lomba Yehowa bua akupeshe dikima didi dikengela bua wakule mudilekelele. Udi mene mua kumulomba meji bua wakule ne dîyi dimpe paudi umvuija malu audi witabuja. (Luka 21:14, 15) Wewe udiumvua mutekete mu mikolo, lomba Yehowa akuambuluishe bua ukuatshile muena Kristo mushindame mu nyuma bualu buudi nabu. Udi mua kumulomba bua ambuluishe uudi ukuatshila bualu au bua akuteleje ne ajingulule muudi udiumvua. Ambila Yehowa yebe yonso iudi nayi, wikale ne ntema bua kumona mudiye wandamuna masambila ebe, ne witabe diambuluisha dia bakuabu; dîba adi kuakudiumvua nkayebe nansha.

7. Tshilejilu tshia Mauricio tshidi tshikulongesha tshinyi?

⁷ Yehowa mmutupeshe tuetu bonso mudimu wa mushinga mukole wa kuenza. Ikala mutuishibue ne: bionso biudi wenza mu tshisumbu ne mu mudimu wa diyisha mmubimone ne udi ubianyisha. (Mis. 110:3) Mmunyi mudi kudifila mu mudimu eu kukuambuluisha paudi udiumvua nkaya? Tuakulayi bua tshilejilu tshia muanetu wa balume utshidi nsonga, diende Mauricio. * Matuku makese panyima pa batismo wende, umue wa ku balunda bende banene wakabanga kulekela bulelela ku kakese ku kakese. Mauricio udi wamba ne: “Pangakamumona ulekela Yehowa, ngakadiumvua bu muntu mupatula lungenyi menemene. Mvua ndiebeja ni mvua mua kukumbaja mutshipu wanyi ne kushala anu muena mu dîku dia Yehowa. Ngakadiumvua nkaya, meme kuela meji ne: kakuvua muntu uvua mua kujingulula mumvua ndiumvua to.” Tshiakamuambuluisha tshinyi? Udi wamba ne: “Ngakavudija mudimu wanyi wa diyisha, biobi kungambuluisha bua kubenga kuela meji anu bua bualu buanyi ne kubenga kuimanyina pa mushindu umvua ndiumvua. Pamvua nyisha ne bakuabu mvua ngumvua disanka ne tshivua ntamba kudiumvua nkaya to.” Bushuwa, nansha tuetu  katuyi ne mushindu wa kuyisha pamue ne bena Kristo netu, diyisha nabu mu mikanda itudi tufundila bantu ne ku telefone didi ditukolesha. Ntshinyi tshikuabu tshivua tshiambuluishe Mauricio? Udi wamba kabidi ne: “Ntu ndifila kabidi mu tshisumbu bikole. Ntu ngenza muanyi muonso bua kulongolola bisangilu ne kuenzamu midimu ya balongi. Dienza midimu eyi ndienze bua ndiumvue ne: Yehowa ne bantu bakuabu mbannange.”

8. Ntatu mikole idi mua kutufikisha ku didiumvua bishi?

⁸ Tudi bamanye ne: netupete ntatu mu matuku a ku nshikidilu aa. (2 Tim. 3:1) Kadi katuena mua kumanya ne: lutatu lua mushindu kampanda nelutukuate anyi kumanya dîba didilu mua kutukuata to. Lutatu lua makuta ludi mua kutukuata mu tshimpitshimpi, badi mua kutukuata ne disama dibi menemene, anyi tudi mua kufuisha mulela wetu. Bikondo bia nunku, tudi mua kumvua kanyinganyinga kakole kamba kuya netu, nangananga biobi bimueneka ne: ntatu yetu idi yenda ilondangana anyi ne: mmitukuate ya bungi musangu umue. Kadi vuluka ne: dîsu dia Yehowa didi kutudi, neatuambuluishe bua kutantamena lutatu kayi luonso, batuishibue ne: netulupite bukole.

9. Tela imue ntatu ivua Yobo mupete.

⁹ Tuakulayi bua muvua Yehowa muambuluishe Yobo, muntu wa lulamtu. Wakapeta ntatu ya tunyinganyinga tukole mu tshipolu tshîpi. Dimue dituku, bakamanyisha Yobo ne: mbibe bimuna biende bionso anyi ne: mbabishipe, bashipe ne bena mudimu bende, too ne bana bende kabidi. (Yobo 1:13-19) Katupa kakese pashishe, kanyinganyinga kakole kavuaye naku kakanji kukepa, disama dibi menemene kumukuata. (Yobo 2:7) Ntatu mibi menemene ivuaye mupete ayi yakamufikisha ku diamba ne: “Ndi nkina muoyo wanyi; tshiena musue kushala ne muoyo to.”​—Yobo 7:16.

10. Mmushindu kayi uvua Yehowa muambuluishe Yobo bua ananukile mu ntatu yende? (Tangila tshimfuanyi tshia pa tshizubu.)

¹⁰ Yehowa uvua mumanye nsombelu wa Yobo au. Bu muvua Yehowa mumunange, wakenza bua apete tshivuaye natshi dijinga bua ananukile ntatu yende. Yehowa wakayukila ne Yobo, umuvuluija meji ende adi kaayi ne ndekelu ne mudiye utabalela bifukibua biende ne dinanga dionso. Uvua wakula bua nyama ya bungi itu yenza buôwa. (Yobo 38:1, 2; 39:9, 13, 19, 27; 40:15; 41:1, 2) Yehowa wakasaka kabidi Elihu, nsongalume wa lulamatu bua kukolesha Yobo ne kumusamba. Elihu wakavuluija Yobo ne: Yehowa utu anu ufuta batendeledi bende bua dinanukila diabu. Kadi Yehowa wakasaka kabidi Elihu bua kupesha Yobo imue mibelu mimpe. Elihu wakambuluisha Yobo bua katambi kuimanyina pa tshivuaye to, kumuvuluijaye ne: patudi tudifuanyikija ne Yehowa, Mufuki wa diulu ne buloba, tudi kutupu. (Yobo 37:14) Yehowa wakambila kabidi Yobo bualu bua kuenza; wakamuambila bua kusambila bua balunda bende basatu bavua benze mpekatu abu. (Yobo 42:8-10) Mmunyi mudi Yehowa utukuatshisha lelu patudi tupeta ntatu mikole?

11. Mmushindu kayi udi Bible utusamba patudi mu ntatu?

¹¹ Yehowa kena wakula netu buludiludi bu muvuaye muakule ne Yobo to, kadi udi wakula netu ku diambuluisha dia Dîyi diende. (Lomo 15:4) Udi utusamba ku diambuluisha dia ditekemena didiye mutupeshe bua matuku atshilualua. Tuakulayi bua ngenyi mikese tshianana ya mu Bible idi mua kutusamba patudi tupeta ntatu. Yehowa udi utujadikila mu Bible ne: kakuena tshintu, nansha ntatu mikole, ‘tshiatupandulula ku dinanga diende’ to. (Lomo 8:38, 39) Udi utujadikila kabidi ne: “Yehowa udi pabuipi ne bonso badi bamubila” mu disambila (Mis. 145:18) Yehowa udi utuambila ne: tuetu bamueyemene, tudi mua kutantamena lutatu kayi luonso, ne tudi mene mua kupeta disanka  dîba ditudi ne lutatu. (1 Kol. 10:13; Yak. 1:2, 12) Dîyi dia Nzambi didi dituvuluija ne: ntatu yetu nya tshitupa tshîpi, kadi difutu didiye utupesha didi dishala kashidi. (2 Kol. 4:16-18) Yehowa mmutulaye ne dishindika dionso ne: neabutule eu udi mukebeshe ntatu yonso itudi nayi, ke Satana Diabolo, pamue ne bantu badi bidikija ngenzelu yende mibi ya malu. (Mis. 37:10) Udi mukuate imue mvese idi ikolesha yakuambuluisha bua kutantamena ntatu idi mikuindile kumpala eku anyi?

12. Ntshinyi tshidi Yehowa musue bua tuenze tuetu basue ne: Dîyi diende dituambuluishe bikole?

¹² Yehowa mmusue ne: tuditekele dîba dia kulonga Bible pa tshibidilu ne kuelangana meji bikole bua bitudi tubala. Patudi tutumikila bitudi tulonga, ditabuja dietu didi dikola menemene ne tudi tutamba kusemena pabuipi ne Tatu wetu wa mu diulu. Abi nebitupeshe bukole bua kunanukila mu ntatu. Yehowa udi kabidi upesha bantu badi beyemena Dîyi diende nyuma wende muimpe. Nyuma eu udi mua kutupesha “bukole budi bupite bua pa tshibidilu bua tutantamene lutatu kayi luonso.​—2 Kol. 4:7-10.

13. Mmunyi mudi biakudia bia mu nyuma bidi “mupika wa lulamatu udi mudimuke” bituambuluisha bua kutantamena ntatu?

¹³ Yehowa udi ukuatshisha “mupika wa lulamatu udi mudimuke” bua kupatula biena-bualu, filme, ne misambu bia bungi bidi mua kutuambuluisha bua kukolesha ditabuja dietu ne kushala batabale mu nyuma. (Mat. 24:45) Katulenguludi bintu bidibu batupesha pa dîba ebi to. Muanetu wa bakaji wa mu États-Unis mmuleje dianyisha matuku adi panshi bua biakudia bia mu nyuma ebi, wamba ne: “Mu bidimu 40 bindi muenzele Yehowa mudimu, lulamatu luanyi ndutetshibue njila ne njila.” Uvua mupete ntatu mikole, tuambe ne: kakuende wa balume wakafua mututa ku mashinyi kudi muendeshi uvua mukuatshike, baledi bende bakafua disama dibi menemene, ne yeye kupeta kansere misangu ibidi. Tshiakamuambuluisha bua kutantamena ntshinyi? Wakumvuija ne: “Yehowa utu anu untabalela. Biakudia bia mu nyuma bivuaye mumpeshe ku butuangaji bua mupika wa lulamatu udi mudimuke mbingambuluishe bua kunanukila. Bua bualu abu ndi ndiumvua anu bu Yobo wakamba ne: ‘Too ne pangafua, tshiakulekela muoyo wanyi mutoke!’”​—Yobo 27:5.

14. Mmunyi mutu Yehowa utukuatshisha patudi mu ntatu ku diambuluisha dia batendeledi netu? (1 Tesalonike 4:9)

¹⁴ Yehowa mmulongeshe bantu bende bua kunangangana ne kusambangana mu bikondo bia ntatu. (2 Kol. 1:3, 4; bala 1 Tesalonike 4:9.) Anu bu Elihu, bena Kristo netu badi ne dijinga dikole dia kutuambuluisha bua kushala ne lulamatu  padi malu makole atufikila. (Bien. 14:22) Tshilejilu, bena mu tshisumbu bakambuluisha Diane bua kushala mulamate Yehowa pavua bayende usama bikole menemene. Udi wamba ne: “Lutatu luvua lukole. Kadi tuvua tumvua muvua Yehowa mutuele mu tshitupa ne maboko ende a bukole ne dinanga dionso mu ngondo ya lutatu alu. Bena mu tshisumbu tshietu bakatuambuluisha bikole. Bavua balua kututangila, batubikila ku telefone, ne bana betu ba balume ne ba bakaji bavua batuela mu tshitupa. Bionso abi biakatuambuluisha bua kunanukila. Bu muntu tshiyi mumanye kuendesha mashinyi, bana betu bavua benza muabu muonso bua kumfikisha mu bisangilu ne mu buambi pamvua ne mushindu.” Kuikala mu dîku dimpe dia mu nyuma dia mushindu eu ndibenesha dinene be!

15. Bua tshinyi tudi batuishibue ne: tudi mua kutantamena buluishi?

¹⁵ Tuetu bonso tudi tutuilangana ne ntatu kampanda. Kadi anu bu mutudi balonge, katuakudimona nkaya kumpala kua ntatu to. Bu mudi Yehowa muikale bu tatu wa dinanga, dîsu diende didi kutudi. Udi netu, mmudiakaje bua kututeleja patudi tumulomba diambuluisha, ne udi ne dijinga dikole dia kutukuatshisha. (Yesh. 43:2) Tudi batuishibue ne: tudi mua kutantamena buluishi bualu mmutupeshe tshionso tshidi tshikengela bua kubutantamena: disambila, Bible, biakudia bia bungi bia mu nyuma, ne dîku dimpe dia bana betu badi batuambuluisha mu tshikondo tshia dikenga.

16. Ntshinyi tshitudi mua kuenza bua Yehowa atungunuke anu ne kututabalela ne dinanga dionso?

¹⁶ Tudi ne disanka dia bungi bua mutudi ne Tatu wetu wa mu diulu udi ututabalela! “Mioyo yetu idi isankila mu yeye.” (Mis. 33:21) Tudi mua kuleja Yehowa ne: tudi ne dianyisha bua mudiye ututabalela ne dinanga patudi katuyi tulengulula bionso bidiye utupesha bua kutuambuluisha. Tudi kabidi ne tshitudi mua kuenza bua atungunuke anu ne kututabalela. Mu mêyi makuabu, tuetu tutungunuka ne kuenza muetu muonso bua kutumikila Yehowa ne tuenza tshidi tshiakane ku mêsu kuende, neatutabalele bua kashidi!​—1 Pet. 3:12.