PANKATSHI pa bidimu bia 1930, tatuanyi James Sinclair ne mamuanyi Jessie bakaya kusombela mu Bronx, tshitupa tshia mu tshimenga tshia New York. Umue wa ku bantu ba kumpala bakamanyanganabu nabu uvua Willie Sneddon uvua mufumine mu ditunga dia Écosse muvuabu bafumina pabu. Mu minite ya ntuadijilu ya dituilangana diabu, bakayukila malu avua atangila mêku abu. Biakenzeka bidimu ndambu kumpala kua kundelabu.

Mamuanyi wakambila Willie ne: matuku makese kumpala kua Mvita minene kuenzekayi, tutuende ne tatuende bakafua mu mâyi pavua buatu buvuabu baloba nabu buditute ku bombe mu Mbuu wa ku Nord. Willie wakamuandamuna ne: “Tatuebe udi mu iferno!” Willie uvua Ntemu wa Yehowa, ne bualu ebu buvua butonde mamuanyi ne buvua mushindu uvuaye mutuadije kumanya bulelela bua mu Bible.

Tshivua Willie muambe atshi tshivua tshitonde mamuanyi bualu uvua mumanye ne: tatuende uvua muntu muimpe. Kadi Willie wakasakidila ne: “Neumvuaku bimpe meme mukuambile ne: Yezu uvua muye mu iferno anyi?” Mamuanyi wakavuluka dilongesha dia mu tshitanda tshiabu divua kumpala ne mêyi avua amba ne: Yezu wakapueka mu iferno ne mu dituku disatu wakabika. Nunku mamuanyi wakadiebeja ne: ‘Bikala iferno muikale muaba wa mudilu uvuabu bakengeshila bantu babi, bua tshinyi Yezu uvua muyamu?’ Eu ke mushindu uvua mamuanyi mutuadije kupeta dijinga dia kumanya bulelela. Wakatuadija kubuela mu bisangilu mu tshisumbu tshia mu Bronx ne kutambulaye mu 1940.

Tshikondo atshi, kabavua bakankamija baledi bena Kristo bikole bua kulonga Bible ne bana babu balela to. Pantshivua muana ndonga mua kuenda, mvua nshala ku nzubu ne tatuanyi pavua mamuanyi uya mu bisangilu ne mu buambi ku ndekelu kua lumingu. Panyima pa bidimu bikese, meme ne tatuanyi tuakatuadija petu kuya mu bisangilu ne mamuanyi. Uvua uyisha lumu luimpe bikole ne ulonga Bible ne bantu ba bungi bavua banyisha bulelela. Kuvua imue misangu ivuaye ulonga Bible ne bamue balongi bende mu kasumbu bualu bavua pabuipi. Mvua nya kumufila mu buambi patuvua mu dikisha. Mu mushindu eu, ngakalonga malu a bungi a mu Bible ne mua kulongesha bantu bakuabu tshidiye wamba.

Bidi bintonda bua kuamba ne: pantshivua muana, tshivua nganyisha bulelela menemene to. Tshivua mbumona ne mushinga to. Kadi pangakakumbaja bidimu bitue ku 12, ngakalua  mumanyishi wa Bukalenge, ne kutuadijila ku tshikondo atshi, ntu nyisha pa tshibidilu. Pangakakumbaja bidimu 16, ngakadilambula kudi Yehowa, meme kutambula mu dia 24/7/1954 mu mpungilu wa mu Toronto mu Canada.

Kuvua bamue bana betu ba balume batuvua nabu mu tshisumbu bavua kumpala benza mudimu ku Betele ne bakuabu batshivua benzaku mudimu. Bavua bangambuluishe bikole. Mushindu uvuabu balongesha ne bumvuija Bible uvua unkemesha bikole. Nansha muvua balongeshi betu basue bua nye ku iniversite, tshipatshila tshianyi tshivua tshia kuya ku Betele. Nunku, ngakuwuja dilomba bua kuya ku Betele mu mpungilu wa mu Toronto au. Ngakuwuja dilomba dikuabu mu 1955 mu mpungilu wa mu Yankee Stadium mu New York. Matuku makese pashishe, pamvua ne bidimu 17, bakambikila bua kuya kuenza mudimu ku Betele wa ku Brooklyn mu dia 19/9/1955. Mu dituku dianyi dibidi ku Betele, ngakatuadija kuenza mudimu wa dilamakaja mikanda mu 117 Adams Street. Mu matuku makese, ngakatuadija kuenza mudimu ne tshiamu tshia disangisha natshi mabeji a mikanda tshivua tshisangisha mabeji 32 a bitupa bia mikanda bua kubituma ku tshiamu tshivua tshitela mikanda.

Meme mumane kuenza bu ngondo umue mu dilamakaja dia mikanda, bakantuma mu Tshibambalu tshia mikanda bualu mvua mumanye mua kufunda ku tshiamu. Tshikondo atshi, bana betu ba balume ne ba bakaji bavua benza tulatalata tuvua ne dîna ne adresse bia bantu bapiabapia bavua badifundisha bua kupeta Tshibumba tshia Nsentedi ne Réveillez-vous ! Ngondo mikese pashishe, ngakatuadija kuenza mudimu mu Tshibambalu tshia diabanya mikanda. Mutangidi wa tshibambalu etshi, Klaus Jensen, wakangebeja ni mvua musue kuya ne muendeshi wa mashinyi manene uvua uya kushiya turton tua mikanda ku bisabu bua kuyitumabu pa buloba bujima. Kuvua kabidi mifuku ya bibejibeji bia kushiya ku biro bia poste bua kubitumina bisumbu bia mu États-Unis mujima. Muanetu Jensen wakamba ne: buende yeye  mudimu wa kuambula majitu eu uvua muimpe buanyi meme. Mvua anu ne kilo 57 ne mvua mukese menemene. Ngendu ya kuya ku bisabu ne ku biro bia poste eyi yakangambuluisha bua kukolakana. Bidi bimueneka ne: muanetu Jensen uvua mumanye tshivua tshimpe buanyi meme.

Tshibambalu tshia mikanda tshivua kabidi tshiuwuja dilomba divua bisumbu bienza bua bibejibeji. Nunku, ngakamanya miakulu ivuabu bapatula bibejibeji bietu mu Brooklyn ne bivuabu batuma mu bitupa bikuabu bia buloba. Tshivua muanji kumvua bakula ya bungi ya kudiyi to, kadi mvua ne disanka dia kumanya ne: bavua batuma bibejibeji binunu bia bungi miaba ya kule menemene. Nansha mumvua tshiyi muyimanye tshikondo atshi, mvua ne bua kupeta diakalenga dia kuya kukumbula ya bungi ya ku miaba eyi bidimu bivua bilua.

Mu 1961, bakantuma bua kuenza mudimu mu biro bia mulami wa tshibutshilu, bivua muanetu Grant Suiter utangila. Bidimu bikese pashishe, bakambikila mu biro bia muanetu Nathan Knorr, uvua ulombola mudimu wetu wa pa buloba bujima tshikondo atshi. Wakangumvuija ne: umue wa ku bana betu uvua wenza mudimu mu biro biende uvua ne bua kuya kubuela mu Kalasa ka Mudimu wa Bukalenge bua ngondo mujima, pashishe bavua ne bua kumutuma mu Tshibambalu tshia mudimu. Bakampingaja pa muaba wende ne tuvua tuenza mudimu ne Don Adams. Don eu ke muanetu wa balume uvua muitabe dilomba dianyi dia kuenza mudimu ku Betele mu mpungilu wa mu 1955. Bana betu bakuabu ba balume babidi bakavua benza mudimu mu biro ebi ke Robert Wallen ne Charles Molohan. Bunayi buetu tuakenza mudimu pamue munkatshi mua bidimu bipite pa 50. Ndisanka kayipu dia kuenza mudimu ne bana betu ba balume bashindame mu nyuma aba!​—Mis. 133:1.

Kutuadijila mu 1970, bakampesha mudimu wa kuenza ngendu munkatshi mua mbingu mikese tshidimu tshionso anyi panyima pa bidimu bibidi,  bua kukumbula Betele ya Societé Watch Tower ndambu, ngenza tshivuabu babikila tshikondo atshi ne: dikumbula dia zone. Mvua nkumbula mêku a Betele ne bamisionere pa buloba bujima, mbakankamija mu nyuma, ne nkonkonona luapolo lua Betele. Mvua ne disanka dia bungi dia kutuilangana ne bamue bana betu bavua babuele mu tulasa tua kumpala tua Gilada batshivua benza mudimu ne lulamatu mu matunga menyi. Mvua ne diakalenga ne disanka dia kuya mu matunga mapite pa 90 bua kuenza mudimu eu.

Bavua batume bena mu dîku dia Betele wa ku Brooklyn mu bisumbu bia mu New York. Bavua bantume meme mu tshisumbu tshia mu tshitupa tshia Bronx. Tshisumbu tshia kumpala tshia mu tshitupa etshi tshivua tshidiunde ne batshikosolole. Bavua babikila tshisumbu tshia ntuadijilu ne: Upper Bronx, ne ke muvuabu bantume.

Mu bidimu bia pankatshi pa 1960, bena mu dîku kampanda ba mu Lettonie bavua bitabe bulelela balue Bantemu ba Yehowa mu tshisumbu tshia south Bronx bakaya kusombela mu teritware wa tshisumbu atshi. Livija, muana wa bakaji wa kumpala wa mu dîku edi, wakalua mpanda-njila diakamue pakajikijaye tulasa tua bikadilu. Ngondo mikese pashishe, wakaya mu Massachusetts bua kuambuluisha muaba uvuabu dijinga ne bamanyishi ba Bukalenge ba bungi. Ngakatuadija kumufundila bua kumuambila malu a mu tshisumbu, ne uvua umfundila pende bua kungambila masanka avuaye upeta pavuaye uyisha mu Boston.

Bidimu bikese pashishe, Livija wakalua mpanda-njila wa pa buende. Uvua musue kuenza bia bungi mu mudimu wa Yehowa, nunku wakuwuja dilomba bua kuya ku Betele, ne bakamubikilaku mu 1971. Bivua bimueneka bu ne: Yehowa uvua mumuntumine! Mu dia 27/10/1973, tuakaselangana ne tuakapeta diakalenga dia kutuenzelabu muyuki wa dibaka kudi muanetu Knorr. Nsumuinu 18:22 udi wamba ne: ‘Udi upeta mukaji udi upeta disanka, ndiakalengele didiye upeta kudi Yehowa.’ Meme ne Livija tudi ne disanka bua mutudi benze bidimu bipite pa 40 pamue mu mudimu wa ku Betele. Tudi tutungunuka ne kuambuluisha mu tshisumbu kampanda tshia mu tshitupa tshia Bronx.

Kuenza mudimu ne muanetu Knorr kuvua kuenza disanka dia bungi. Uvua wenza mudimu bua bulelela kayi utshioka ne uvua wanyisha bikole bamisionere ba pa buloba bujima. Ba bungi ba kudibu bavua Bantemu ba kumpala mu matunga avuabu babatume. Biakambungamija bikole pangakamona muanetu Knorr usama disama dia kansere mu 1976. Umue musangu pavuaye mu bulalu bua disama, wakandomba bua kumubadila amue malu avuabu balongolola bua kupatula mu mikanda yetu. Wakangambila bua kubikila muanetu Frederick Franz bua yeye pende kuteleja bimvua mbala. Ngakalua kumanya ne: bu muvua muanetu Franz kayi umona bimpe, muanetu Knorr uvua upitshisha dîba dia bungi mu dimubadila malu aa.

Muanetu Knorr wakafua mu 1977, kadi bantu bavua bamumanye ne bamunange bavua bakoleshibue bualu uvua mujikije lubilu luende lua pa buloba ne lulamatu. (Buak. 2:10) Pashishe, muanetu Franz wakatuadija kulombola mudimu wetu.

 Tshikondo atshi, mvua sekretere wa muanetu Milton Henschel uvua muenze mudimu pamue ne muanetu Knorr munkatshi mua bidimu bia bungi. Muanetu Henschel wakammanyisha ne: mudimu munene umvua ne bua kuenza ku Betele uvua mpindieu wa kuambuluisha muanetu Franz mu mushindu wonso uvua ukengedibua. Mvua mmubadila malu a kupatulabu mu mikanda yetu. Muanetu Franz uvua ukuata malu bikole ne uvua ukokesha bua kutuma lungenyi luende luonso mu mushindu wa dikema ku malu amvua mmubadila. Mvua ne disanka dia kumuambuluisha mu mushindu au too ne pakajikijaye lubilu luende lua pa buloba mu ngondo wa 12 mu 1992.

Bidimu 61 bindi muenze ku Betele mbipite ne lukasa. Baledi banyi mbafue ne lulamatu kudi Yehowa ne ndi muindile ne muoyo kuulu kuulu bua kubakidila mu buloba bulenga. (Yone 5:28, 29) Kakuena tshintu nansha tshimue tshia mu ndongoluelu wa malu eu tshitudi mua kufuanyikija ne diakalenga ditambe buimpe dia kuenza mudimu pamue ne balume ne bakaji ba lulamatu bua kuambuluisha bantu ba Nzambi ba pa buloba bujima to. Meme ne Livija tudi bushuwa mua kuamba ne: mu bidimu bionso bitudi benze mu mudimu wa ku dîba ne ku dîba, ‘disanka dia Yehowa mbukole buetu.’​—Neh. 8:10.

Mudimu wa kuyisha malu malelela a Bukalenge utshidi utungunuka, ne muntu yonso mu bulongolodi bua Yehowa udi ne bua kuwenza. Mvua ne disanka ne diakalenga dia kuenza mudimu munkatshi mua bidimu bia bungi ne bana betu ba balume ne ba bakaji bashindame bavua ne lulamatu. Bela manyi ba bungi bamvua muenze nabu mudimu kabatshiena pa buloba apa to. Kadi ndi ne disanka bua mundi muenze mudimu pamue ne bantu ba mu nyuma aba bavua ne lulamatu mu mudimu wa Yehowa.