1. Bua tshinyi tudi batuishibue ne: Dîyi dia Nzambi didi ne bukole? (Tangila tshimfuanyi tshia ntuadijilu tshia tshiena-bualu.)

BU MUTUDI bantu ba Yehowa, tudi bashindike ne: dîyi dia Nzambi, mmumue ne: mukenji wende udiye mupeshe bantu, “didi ne muoyo ne bukole.” (Eb. 4:12) Ba bungi ba kutudi mbadimuenene mudi Bible ne bukole bua kushintulula bantu. Kumpala bamue bana betu ba balume ne ba bakaji bavua bivi, bapika ba bintu bia lulengu anyi bena tshiendenda. Bakuabu bavua mua kuikala baye kumpala mu ndongoluelu wa malu eu kadi badiumvua ne: bavua bapangile tshintu kampanda mu nsombelu wabu. (Muam. 2:3-11) Ku musangu ne ku mukuabu, bantu badi bamueneka bu bajimine badi bapeta njila wa muoyo ku diambuluisha dia bukole budi Bible nabu bua kushintulula bantu. Ukadi pamuapa mubale ne muanyishe miyuki ya nunku idibu balonde mu biena-bualu bia mu Tshibumba tshia Nsentedi bia ne: “Bible utu ushintulula bantu.” Udi kabidi mumone ne: bena Kristo badi batungunuka ne kuya kumpala mu nyuma ku diambuluisha dia Mifundu nansha pakadibu bitabe bulelela.

2. Mmunyi muvua Dîyi dia Nzambi ne bukole mu bidimu lukama bia kumpala?

² Bidiku mua kutukemesha bua mudi bantu ba bungi lelu benze mashintuluka a bungi padibu balonge Dîyi dia Nzambi anyi? Tòo.  Malu a nunku adi atuvuluija bana betu ba balume ne ba bakaji ba mu bidimu lukama bia kumpala bavua ne ditekemena dia kuya mu diulu. (Bala 1 Kolinto 6:9-11.) Mupostolo Paulo mumane kutela mishindu ya bantu bikala kabayi mua kupiana Bukalenge bua Nzambi, wakasakidila ne: “Ke muvua bamue ba munkatshi muenu nanku.” Kadi bakashintuluka ku diambuluisha dia Mifundu ne dia nyuma muimpe wa Nzambi. Nansha pakavua bamue ba kudibu bitabe bulelela, bavua benza bilema binene bivua binyanga malanda abu ne Yehowa. Bible udi wakula bua muena Kristo muela manyi umue wa mu bidimu lukama bia kumpala uvuabu bipate mu tshisumbu, kadi balue kumupingaja pashishe. (1 Kol. 5:1-5; 2 Kol. 2:5-8) Kabienaku bitukolesha bua kukonkonona ntatu ivua bena Kristo netu batuilangane nayi ne batantamene ku diambuluisha dia Dîyi dia Nzambi anyi?

3. Ntshinyi tshituakonkonona mu tshiena-bualu etshi?

³ Bu mudi Dîyi dia Nzambi ne bukole bua nunku ne tuetu bikale nadi, tudi bushuwa basue kuenza nadi mudimu bimpe menemene. (2 Tim. 2:15) Mu tshiena-bualu etshi, netumone mushindu utudi mua kulekela bukole bua Dîyi dia Nzambi buenza mudimu 1) mu nsombelu wetu, 2) patudi mu mudimu wa buambi, ne 3) patudi tulongesha kumpala kua bantu. Kuvuluka malu aa nekutuambuluishe bua kuleja Tatu wetu wa mu diulu udi ne dinanga, udi utulongesha bua diakalenga dietu mutudi bamunange ne bikale ne dianyisha kudiye.​—Yesh. 48:17.

4. a) Ntshinyi tshitudi ne bua kuenza bua Dîyi dia Nzambi dituambuluishe? b) Mmunyi muutu upeta dîba dia kubala Bible?

⁴ Bua Dîyi dia Nzambi kutuambuluishadi, tudi ne bua kuikala ne tshibidilu tshia kudibala, kudibala dituku dionso kuoku mushindu. (Yosh. 1:8) Bushuwa, ba bungi ba kutudi badi ne bia bungi bia kuenza. Nansha nanku, katuena ne bua kulekela tshintu nansha tshimue, nansha majitu etu manene, tshitupangisha bua kuikala ne tshibidilu tshia kubala Bible to. (Bala Efeso 5:15, 16.) Bantu ba Yehowa ba bungi mbakebe mishindu ya kupeta dîba dia kubala Bible dituku dionso, pamuapa mu dinda menemene, ku dilolo anyi munda munya. Badi badiumvua anu bu mufundi wa misambu wakafunda ne: ‘Mona mundi munange mikenji yebe! Ndi ngelangana meji bualu buayi dinda too ne ku dilolo.’​—Mis. 119:97.

5, 6. a) Bua tshinyi kuelangana meji kudi ne mushinga? b) Mmunyi mutudi mua kuelangana meji bimpe? c) Mmunyi mudi kubala Dîyi dia Nzambi ne kuelangana meji kukuambuluishe wewe?

⁵ Pa kumbusha kubala Bible, mbimpe kuelangana meji a malu atudi tubala. (Mis. 1:1-3) Tuetu benze nunku, nebituambuluishe bua kutumikila bimpe meji adi mu Bible mu nsombelu wetu. Nansha tuetu tubadila Dîyi dia Nzambi pa mabeji anyi mu tshiamu, tshipatshila tshietu tshidi ne bua kuikala tshia kudibueja mu mioyo yetu.

 ⁶ Mmunyi mutudi mua kuelangana meji bimpe? Ba bungi mbamone ne: mbimpe kuimana ndambu panyima dibala dia tshitupa kampanda tshia Mifundu ne kudiela nkonko bu mudi: ‘Bualu ebu budi bundongesha tshinyi bua Yehowa? Mmu mishindu kayi inkadi ntumikila dîyi dinene didi mu tshitupa tshia Dîyi dia Nzambi etshi? Mmalu kayi andi mua kuakaja?’ Tuetu belangane meji bimpe bua Dîyi dia Nzambi, netudiumvue basakibue bua kutumikila mibelu idimu bimpe menemene. Bushuwa, netulekele bukole buadi butamba kuenza mudimu mu nsombelu wetu.​—2 Kol. 10:4, 5.

7. Mmunyi mutudi mua kuenza mudimu bimpe ne Dîyi dia Nzambi patudi mu buambi?

⁷ Ntshinyi tshidi mua kutuambuluisha bua kuenza mudimu bimpe ne Dîyi dia Nzambi patudi mu mudimu wa buambi? Bualu bua kumpala butudi ne bua kuenza nkudibala dîba dionso ditudi tuyisha ne tulongesha. Muanetu wa balume kampanda wakaleja ne: “Bu wewe uyisha ne Yehowa ku nzubu ne ku nzubu, uvuaku mua kuakula nkayebe anyi uvua mua kumulekela wakula pende?” Muanetu eu uvua usua kuamba ne: patudi tubala Dîyi dia Nzambi mu buambi, tudi tulekela Yehowa wakula ne muntu utudi tuyukila nende. Mvese musungula bimpe neikale ne bukole bua bungi kupita bualu kayi buonso butudi mua kuamba. (1 Tes. 2:13) Diebeja ne: ‘Ntuku mbadila bantu bantu nyisha lumu luimpe Dîyi dia Nzambi dîba dionso didi mpunga umueneka anyi?’

8. Bua tshinyi katuena ne bua kubadila bantu mvese patupu patudi mu buambi?

⁸ Bushuwa, kubadila bantu batudi tuyukila nabu mvese ya mu Bible patupu ki nkukumbane to. Bua tshinyi? Bualu bantu ba bungi badi ne dimanya dikese dia malu a mu Bible anyi kabena nadi. Ke muvuabi mu bidimu lukama bia kumpala, ne ke mudibi kabidi lelu. (Lomo 10:2) Nunku katuena ne bua kuela meji ne: muntu neumvue tshidi mvese wamba anu bualu  tudi bamubadilaye to. Tudi ne bua kukeba dîba dia kupatula bitupa kampanda bia mu mvese, pamuapa kubalulula miaku minene ne kuyumvuija. Kuenza nunku kudi mua kuambuluisha bua mukenji wa mu Dîyi dia Nzambi ubuele mu lungenyi ne mu muoyo wa muteleji.​—Bala Luka 24:32.

9. Tuetu tukeba kubadila muntu mvese, mmunyi mutudi mua kumufikisha ku dinemeka Bible? Fila tshilejilu.

⁹ Kumpala kua kubadila muntu mvese, mbimpe kumuambila mêyi adi mua kumufikisha ku dinemeka Bible. Tshilejilu, tudi mua kuambila muntu ne: “Tumone tshidi Mufuki wetu wamba bua bualu ebu.” Tuetu tuyukila ne muntu udi kayi muena Kristo, tudi mua kumuambila ne: “Mona tshidi Mifundu ya tshijila ituambila.” Anyi tuetu tuyisha muntu udi kayi munange malu a Nzambi, tudi mua kumuebeja ne: “Ukadiku mumvue lusumuinu lua kale elu anyi?” Eyowa, tudi ne bua kumanya tshidi muntu ne kuyukila nende bilondeshile tshidiye.​—1 Kol. 9:22, 23.

10. a) Londa bualu buvua bufikile muanetu kampanda. b) Mmunyi muudi mudimuenene bukole bua Dîyi dia Nzambi mu mudimu webe wa buambi?

¹⁰ Bantu ba bungi mbamone ne: kubala Dîyi dia Nzambi patudi mu buambi kudi kuambuluisha bikole bantu batudi tuyisha. Tuangate tshilejilu. Muanetu wa balume kampanda wakapinganyina mukulakaje kansanga uvua ubala bibejibeji bietu kukavua bidimu bia bungi. Pamutu pa muanetu wa balume eu kumupesha diakamue nimero mupiamupia wa Tshibumba tshia Nsentedi, wakamubadila mvese kampanda uvua mu tshibejibeji atshi. Wakabala 2 Kolinto 1:3, 4, udi wamba ne: “Tatu wa luse lua bungi ne Nzambi wa busambi buonso . . . udi utusamba mu makenga etu onso.” Mêyi aa akasaka mukulakaje eu bua kulomba muanetu wa balume eu bua kumubadila mvese eu tshiakabidi. Mukulakaje eu wakaleja muvuaye yeye ne mukajende dijinga ne busambi, ne kulejaye dijinga dia kumanya malu makuabu a mu Bible. Kuenaku witaba ne: Dîyi dia Nzambi didi ne bukole patudi mu buambi anyi?​—Bien. 19:20.

11. Mbujitu kayi budi nabu bana betu ba balume badi balongesha kumpala kua bantu?

¹¹ Tuetu bonso tutu basue kubuela mu bisangilu bietu bia bena Kristo ne mu mpuilu ne mu mpungilu. Tshia kumpala, tutu tubuelamu bua kutendelela Yehowa. Malu atudi tulongamu adi kabidi atuambuluisha bikole. Bana betu badi balongesha kumpala mu bisangilu ebi badi ne diakalenga dinene. Badi kabidi ne bua kumanya ne: badi ne bujitu bunene. (Yak. 3:1) Badi ne bua kuikala benza bua malu adibu balongesha imanyine mu Dîyi dia Nzambi. Bobu bakupeshe mudimu wa kulongesha kumpala kua bantu, mmunyi muudi mua kulekela bukole budi nabu Bible buenza mudimu paudi ulongesha?

12. Mmunyi mudi ngamba-malu mua kuenza bua Mifundu ikale nshindamenu wa muyuki wende?

¹² Enza bua muyuki webe wimanyine mu Mifundu. (Yone 7:16) Abi bidi bikulomba kuenza tshinyi? Tshia kumpala, ikala mudimuke bua tshintu nansha tshimue, bu mudi: malu mamonamona, bilejilu, anyi mene ngakuilu webe kabijibakaji anyi kumbusha ntema ya bantu ku mvese iudi ubala. Tshibidi, vuluka ne: kulongesha ne Bible kakuena kumvuija kubala patupu mvese ya bungi to. Bulelela, kubala mvese mipite bungi kudi mua kufikisha bateleji ku dipanga kukuata mvese nansha umue. Nunku, sungula mvese minene bimpe, ne keba dîba dia kuyibala, kuyumvuija, kufila bilejilu, ne kuleja mushindu muimpe wa kuyitumikila. (Neh. 8:8) Wewe wenzela muyuki webe mu plan mupatula kudi bulongolodi, umulonge bimpe ne mvese idimu. Keba mua kujingulula diumvuangana didi pankatshi pa biambilu bidi mu plan ne mvese idibu bafilamu. Pashishe angata mvese iudi musungule bua kulongesha ngenyi minene idi mu plan. (Udi mua kupeta mibelu mimpe  mu dilonga dia 21 too ne dia 23 mu mukanda wa Kalasa ka Mudimu wa Nzambi kadi kakuambuluisha.) Bualu bua mushinga budi ne: lomba Yehowa mu disambila bua akuambuluishe bua kumvuija ngenyi ya mushinga idi mu Dîyi diende.​—Bala Ezela 7:10; Nsumuinu 3:13, 14.

13. a) Mmunyi muvua dibala ne diumvuija dia mvese mu bisangilu diambuluishe muanetu wa bakaji kampanda? b) Mmunyi mudi ndongeshilu udi mushindamene mu Mifundu utudi tupeta mu bisangilu bietu mukuambuluishe?

¹³ Dibala dia mvese mu bisangilu bia bena Kristo divua diambuluishe bikole muanetu kampanda wa bakaji wa mu Australie. Nansha muvuaye mukole mu lutatu, wakitaba mukenji wa mu Bible ne kudilambulaye kudi Yehowa. Nansha nanku, bivua bimukolele bua kuitaba ne: Yehowa uvua mumunange. Mu kupita kua matuku, wakalua kutuishibua ne: Nzambi uvua mumunange. Ntshinyi tshivua tshimuambuluishe bua kuitaba bualu ebu? Wakashintulula mmuenenu wende pakelaye meji bua mvese kampanda uvuabu babale mu bisangilu bietu, ne kumonaye muvua mvese au upetangana ne mvese mikuabu ya mu Bible. * Dibala ne diumvuija Dîyi dia Nzambi mu bisangilu ne mu mpuilu ne mu mpungilu dikadiku dikuambuluishe pebe nanku anyi?​—Neh. 8:12.

14. Mmunyi mutudi mua kuleja dianyisha bua Dîyi dia Yehowa?

¹⁴ Katuenaku ne dianyisha kudi Yehowa bua mudiye mutupeshe Bible, Dîyi diende anyi? Mmudipeshe bukua bantu ne dinanga dionso ne mmukumbaje mulayi wende wa ne: divua ne bua kushala kashidi. (1 Pet. 1:24, 25) Bushuwa, mbimpe tuikale ne tshibidilu tshia kubala Dîyi dia Nzambi, kuditumikila mu nsombelu wetu, ne kuenza nadi mudimu patudi tuambuluisha bantu bakuabu. Patudi tuenza nanku tudi tuleja mutudi banange ne tuanyisha tshiuma tshidi Nzambi mutupeshe etshi, kadi nangananga Muenatshi, Yehowa Nzambi.