Ikala ne didikanda
“Dimuma dia nyuma didi: . . . didikanda.”—GAL. 5:22, 23.
1, 2. a) Mmalu kayi adi dipangila didikanda mua kukebesha? b) Bua tshinyi tshilumbu tshia didikanda ntshilumbu tshinene lelu?
DIDIKANDA nngikadilu udi Nzambi utuambuluisha bua kupeta. (Gal. 5:22, 23) Yehowa utu uleja didikanda mu mushindu mupuangane. Kadi bantu mbapange bupuangane, ne badi baluangana bua kuikala ne didikanda. Bushuwa, bilumbu bia bungi bidi bantu bapeta lelu bidi bitamba kufumina ku dipanga didikanda. Dipangila ngikadilu eu didi mua kufikisha muntu ku diladikija malu ne ku dibenga kupatula bipeta bimpe mu kalasa anyi ku mudimu. Didi kabidi mua kufikisha muntu ku buakulavi, dikuatshika dia maluvu, tshikisu, dishipa dia dibaka, dibuela mabanza tshianana tshianana, dilua mupika wa tshintu kampanda, diedibua mu buloko, tunyinganyinga tukole, masama a mu bilamba, mafu a panshi ne malu makuabu.—Mis. 34:11-14.
2 Bidi bimueneka ne: bantu badi kabayi ne didikanda batu badikebela bobu ne bantu bakuabu ntatu. Lutatu lua dipangila didikanda ludi luenda luvula. Bavua benze makebulula bua tshilumbu tshia didikanda mu bidimu bia 1940, kadi makebulula adibu benze matuku mashale aa mmaleje ne: bantu kabena batamba kudikanda to. Bualu ebu kabuena bukemesha balongi ba Dîyi dia Nzambi to, bualu Bible ukavua muleje ne: tshimue tshimanyinu tshidi tshileja ne: tudi mu “matuku a ku nshikidilu” tshidi ne: bantu bavua ne bua kuikala “kabayi badikanda.”—2 Tim. 3:1-3.
3. Bua tshinyi bena Kristo badi ne bua kuikala ne didikanda?
Gen. 3:6) Ela meji bua bipeta bibi bidi bantu bapete katshia anu ku tshikondo atshi bua dipanga kuleja ngikadilu wa mushinga eu.
3 Bua tshinyi udi ne bua kuditatshisha bua kuikala ne didikanda? Tukonkonone tubingila tubidi tua mushinga. Ka kumpala, badi baleja ne: pa tshibidilu bantu batu badikanda kabatu batamba kupeta ntatu minene to. Batu ne lungenyi lutukije, batu bakokesha bua kudia bulunda ne bantu, ne kabatu batamba kukuata tshiji ne kupeta tunyinganyinga ne dibungama bu bantu batu kabayi badikanda to. Kibidi, kukokesha bua kukandamena diteta kampanda ne kukanda majinga mabi mbualu bua mushinga budi buenza bua Nzambi atuanyishe. Dipangila didikanda dia Adama ne Eva didi dileja mudi bualu ebu bulelela. (4. Ntshinyi tshidi mua kukolesha muntu yonso udi udienzeja bua kuikala ne didikanda?
4 Kakuena muntu mupange bupuangane udi mua kudikanda mu mushindu mupuangane to. Yehowa mmumanye mudi batendeledi bende badienzeja bua bualu ebu, ne mmusue kubambuluisha bua kutshimuna majinga abu a dikeba kuenza mpekatu. (1 Bak. 8:46-50) Bu mudiye Mulunda wa dinanga, udi ukankamija bantu ba meji mimpe badi basue kumuenzela mudimu kadi bikale imue misangu ne lutatu lua kudikanda mu amue malu. Tukonkononayi tshilejilu tshipuangane tshia Yehowa. Pashishe netupete malongesha mu bilejilu bimpe ne bibi bidibu baleje mu Bible. Netukonkonone imue ngenyi ya tshitudi mua kuenza yatuambuluisha bua kutamba kuikala ne didikanda.
YEHOWA MMUSHIYE TSHILEJILU
5, 6. Ntshilejilu kayi tshidi Yehowa mushiye mu tshilumbu tshia didikanda?
5 Yehowa utu udikanda mu mushindu mupuangane, bualu mmupuangane mu malu onso adiye wenza. (Dut. 32:4) Kadi tuetu tudi bapange bupuangane. Nansha nanku, bua tuetu kumvua ngikadilu wa didikanda eu bimpe, tudi ne bua kukonkonona tshilejilu tshia Yehowa bua tumone mua kumuidikija bimpe. Mmu imue nsombelu kayi muvua Yehowa muleje didikanda?
6 Elabi meji muvua Yehowa mudikande mu tshilumbu tshia buntomboji bubi bua Satana. Bivua bikengela kujikija buntomboji abu. Buntomboji bua Diabolo buvua pamuapa bukebeshe tshiji ne dipetu munkatshi mua bifukibua bia Nzambi bia lulamatu bia mu diulu. Pamuapa udi udiumvua pebe mushindu wa muomumue paudi utangila ntatu yonso idi Satana mukebeshe. Kadi Yehowa kavua muenze malu mu tshiputuku to. Mushindu uvuaye muenze malu uvua mukumbane menemene. Katu ukuata tshiji lubilu to, ne mushindu uvuaye muenze malu bua buntomboji bua Satana uvua muakane. (Ekes. 34:6; Yobo 2:2-6) Bua tshinyi? Yehowa mmulekele tshikondo tshipita bualu ki mmusue bua muntu nansha umue abutudibue to, kadi “mmusue bua bonso bafike ku dikudimuna mutshima.”—2 Pet. 3:9.
7. Tshilejilu tshia Yehowa tshidi mua kutulongesha tshinyi?
7 Didikanda dia Yehowa didi ditulongesha ne: tuetu petu tudi ne bua kukonkonona mêyi etu ne kuelangana meji bimpe bua malu atudi tuenza; katuena ne bua kuenza malu mu tshiputuku to. Paudi utuilangana ne tshilumbu kampanda tshinene, keba tshikondo tshia kuela meji bua kuenza malu ne meji. Lomba meji mu disambila bua wewe kuamba anyi kuenza bualu budi buakane. (Mis. 141:3) Patu nsombelu ukola, bitu bipepele bua muntu kuenza bualu kayi wela meji. Ba bungi ba kutudi bakadi banyingalale bua mêyi avuabu bapatule kabayi bele meji anyi bua dienza malu mu tshiputuku!—Nsu. 14:29; 15:28; 19:2.
BILEJILU BIMPE NE BIBI BIA BAMUE BATENDELEDI BA YEHOWA
8. a) Mmuaba kayi utudi mua kukebela bilejilu bia bantu bavua ne ngikadilu milenga? b) Ntshinyi tshivua tshiambuluishe Jozefe bua kukandamena mukaji wa Potifâ pavuaye umuambisha? (Tangila tshimfuanyi tshia ntuadijilu tshia tshiena-bualu.)
8 Mbilejilu kayi bia mu Bible bidi bileja mushinga wa kudikanda mu malu atudi tuenza? Udi pamuapa Gen. 39:6, 9; bala Nsumuinu 1:10.
mua kuvuluka bamue bantu badibu batele mu Bible bavua badikande mu mushindu muimpe pavuabu mu diteta. Umue wa kudibu n’Jozefe muana wa Yakoba. Wakaleja muvuaye ne didikanda pavuaye wenza mudimu mu nzubu mua Potifâ, mfumu wa balami ba Palô. Mukaji wa Potifâ wakatuishila Jozefe mêsu bualu uvua “muntu wa mubidi mupatakane, muikale muimpe kumona,” (NWT) ne wakateta bua kumuambisha. Ntshinyi tshivua tshiambuluishe Jozefe bua kubenga kukuluka ku mêyi avuaye umuambisha nawu misangu ne misangu? Kakuyi mpata, uvua mukebe dîba dia kuelangana meji a bipeta bibi bivuaye mua kupeta bu yeye mupuekeshe maboko. Pakakola malu, wakamunyema. Wakela meji ne: “Ndi mua kuenza bualu ebu bubi bunene ne mua kuenzela Nzambi bibi munyi?”—9. Mmunyi muudi mua kudilongolola bua kukandamena mateta?
9 Tshilejilu tshia Jozefe tshidi tshitulongesha tshinyi? Dimue dilongesha didi ne: tudi ne bua kunyema diteta dia kushipa mukenji wa Nzambi. Kumpala, bamue bantu badi Bantemu lelu bavua baluangana bua kutshimuna budiavi, bunuavi, dinua dia makanya, dinua dia bintu bia lulengu, malu a masandi, ne malu makuabu. Nansha mukadibu babatijibue, badi mua kuikala imue misangu batetshibua bua kupingana mu bikadilu biabu bia kale. Kadi wewe mudimone mu diteta dia kushipa mukenji kampanda wa Yehowa, bua kudikolesha, ela meji bua bipeta bibi bia mu nyuma biudi mua kupeta bua dipanga kukanda majinga mabi. Teta kumona mu lungenyi nsombelu iudi mua kutetshibua ne keba tshia kuenza bua kuyepuka. (Mis. 26:4, 5; Nsu. 22:3) Wewe mutuilangane ne diteta edi, lomba Yehowa bua akupeshe meji ne didikanda bua kudikandamena.
10, 11. a) Mbualu kayi butu bansonga ba bungi batuilangana nabu mu tulasa? b) Ntshinyi tshidi mua kuambuluisha bansonga bena Kristo bua kukandamana padibu babasaka bua kuenza malu mabi?
10 Bansonga ba bungi bena Kristo batu batuilangana ne lutatu lua buena lua Jozefe. Tuangate tshilejilu tshia muanetu wa bakaji kampanda diende Kim. Balongi babu ba bungi bavua benda bundumba, ne bavua baditumbisha bua muvuabu balale ne balume ku ndekelu kua lumingu. Kim kavua yeye ne muyuki wa nunku wa kulonda to. Udi witaba ne: kuikala mushilangane ne bakuabu kuvua imue misangu kumufikisha ku didiumvua “mulekelela ne nkaya,” ne umona ne: bansonga nende bavua bamumona mutatakane bualu kavua upatuka ne balume to. Kadi Kim uvua ne meji bualu uvua mumanye ne: bua bansonga ba bungi, dijinga dia kuenda masandi ditu dikole mu tshikondo tshia bunsonga. (2 Tim. 2:22) Balongi babu bavua batamba kumuebeja bua kumanya ni utshivua kamama. Nkonko eyi ivua imupetesha mpunga wa kubumvuija bua tshinyi kavua ne bua kuenda masandi. Tudi tudiumvua bua bansonga bena Kristo badi badisuike bua kukandamana padi bakuabu babasaka bua kuditua mu malu a masandi, ne Yehowa udi pende udiumvua bua bualu buabu!
11 Bible udi utupesha bilejilu bia bantu bavua bapangile didikanda mu tshilumbu tshia dienda masandi bua kutudimuija. Udi kabidi uleja bipeta bibi bidi muntu upeta padiye kayi udikanda mu tshilumbu etshi. Muntu yonso udi utuilangana ne nsombelu wa buena wa Kim udi ne bua kuelangana meji bua nsongalume mutshimbakane udibu bakuile mu Nsumuinu nshapita wa 7. Ela kabidi meji bua tshivua Amenona muenze ne bua bipeta bibi bia tshienzedi tshiende. (2 Sam. 13:1, 2, 10-15, 28-32) Baledi badi mua kuambuluisha bana babu bua bikale ne didikanda ne meji mu tshilumbu tshia malu a mananga padibu bayikila bua bualu ebu mu ntendelelu wa mu dîku, bababadila mvese itudi batele eyi.
12. a) Mmunyi muvua Jozefe mudikande pavuaye kumpala kua bana babu? b) Mmu nsombelu kayi mutudi petu mua kukanda mushindu utudi tudiumvua?
12 Musangu mukuabu, Jozefe wakashiya kabidi tshilejilu tshimpe tshia didikanda. Bua Jozefe kumanya tshivua mu mioyo ya bana babu, wakabenga kudimanyisha pavuabu balue kudiye mu Gen. 43:30, 31; 45:1) Muena Kristo nebe anyi muntu mukuabu uudi munange yeye mukuele mâyi ku makasa, kudikanda kua buena kua Jozefe kudi mua kukuambuluisha bua kubenga kuenza malu ne tshiji. (Nsu. 16:32; 17:27) Wewe ne balela bebe badibu bipate mu tshisumbu, bidi bikulomba kukanda muudi udiumvua bua kubenga kuyukila nabu malu adi kaayi ne mushinga. Kudikanda mu nsombelu ya nunku kakutu kudiluila to, kadi bidi bitamba kupepela patudi tujingulula ne: malu atudi tuenza adi apetangana ne tshilejilu tshia Nzambi ne adi mu diumvuangana ne mibelu yende.
Ejipitu bua kusumba biakudia. Kadi pakamusama muoyo bikole, wakaya pa nkayende bua kabamonyi muvuaye upuekesha binsonji. (13. Mmalongesha kayi atudi mua kupeta mu miyuki idi itangila mukalenge Davidi?
13 Mu Bible mudi tshilejilu tshitambe buimpe tshia mukalenge Davidi. Uvua ne bukole bua bungi kadi wakadikanda bua kuenza nabu mudimu mu tshiji pavuabu bamuyobole kudi Shaula ne Shimei. (1 Sam. 26:9-11; 2 Sam. 16:5-10) Kabiena bisua kuamba ne: Davidi uvua misangu yonso udikanda to, anu mutudi tumuenena bualu ebu mu mpekatu uvuaye muenze ne Beta-sheba ne tshivuaye muambe diakamue bua lukuka lua Nabala. (1 Sam. 25:10-13; 2 Sam. 11:2-4) Nansha nanku, tshilejilu tshia Davidi tshidi mua kutulongesha malu a mushinga. Bua kumpala, bakulu badibu bateka munkatshi mua bantu ba Nzambi badi ne bua kudienzeja nangananga bua kuikala ne didikanda bua kabenji mudimu bibi ne bukokeshi buabu. Buibidi, muntu nansha umue kena ne bua kupepeja malu, wela meji ne: yeye kena mua kutetshibua to.—1 Kol. 10:12.
MALU A MUSHINGA AUDI MUA KUENZA
14. Mbualu kayi buvua bufikile muanetu wa balume kampanda? Bua tshinyi malu atudi mua kuenza mu nsombelu ya nunku adi ne mushinga?
14 Ntshinyi tshiudi mua kuenza bua kutamba kuikala ne didikanda? Tuangate tshilejilu tshia bualu buvua buenzeke ebu. Muntu kampanda wakakuma mashinyi ende munyima mua mashinyi a Luigi. Nansha muvua kanyemesha mukuabu eu mu tshilema, wakapenda Luigi ne kukeba bua baluangane. Luigi wakasambila, kulombaye Yehowa bua amuambuluishe bua kulama tshilunji tshiende, ne kukebaye bua kutuja kanyemesha mukuabu au, kadi kakakokesha to. Luigi wakangata nimero ya mashinyi a muntu eu bua kuyitumina kumpanyi wa kueyeka makuta bua malu a njiwu, kuyaye, kadi kanyemesha au anu utanda. Panyima pa lumingu lujima, Luigi wakapinganyina mamu kampanda uvuabu balonga nende Bible, kusanganaye ne: kanyemesha au ke uvua bayende wa mamu eu! Kanyemesha au wakumvua bundu ne kulombaye luse bua muvuaye mukokangane nende. Wakalomba bua kubikila kumpanyi wa kueyeka makuta bua malu a njiwu uvua Luigi mudifundishe bua kumulongolueshila mashinyi pa lukasa. Muntu eu wakateleja pende malu a mu Bible avuabu bayukila ne wakaanyisha. Luigi wakamona muvuabi ne mushinga bua muvuaye mudituje pavua njiwu ayi mienzeke ne muvua malu mua kuikala manyanguke bu yeye mukuate tshiji lukasa.—Bala 2 Kolinto 6:3, 4.
Kutuja anyi kufiika munda kudi mua kuikala ne buenzeji buimpe anyi bubi pa mudimu wetu wa buambi, buludiludi anyi mu mushindu kampanda (Tangila tshikoso tshia 14)
15, 16. Mmunyi mudi kulonga Bible mua kukuambuluisha wewe ne bena mu dîku diebe bua kuikala ne didikanda?
15 Kulonga Bible ne muoyo mujima ne tshisumi kudi mua kuambuluisha bena Kristo bua kuikala ne didikanda. Vuluka muvua Nzambi muambile Yoshua ne: ‘Mukanda eu wa mikenji yanyi kawumbuki mukana muebe; kadi welangane meji a mukanda eu munya ne butuku, udimuke mua kuenza malu onso adi mafundamu; pashishe neutute dikasa dimpe, newikale ne diakalengele.’ (Yosh. 1:8) Mmunyi mudi kulonga Bible mua kukuambuluisha bua kuikala ne didikanda?
16 Anu mutudi tufuma ku dimona, mu Bible mudi miyuki idi ileja patoke bipeta bimpe ne bibi bitudi tupeta bua bienzedi bietu. Yehowa uvua ne tshivuaye mufundishile miyuki eyi. (Lomo 15:4) Tudi tuleja mutudi ne meji patudi tuyibala, tuyelela meji ne tuyilonga! Keba mua kujingulula mudi malu adimu akutangila wewe ne bena mu dîku diebe. Lomba Yehowa bua akuambuluishe bua kutumikila Dîyi diende. Wewe mujingulule ne: kutu udikanda mu amue malu, itaba. Pashishe sambila bua bualu abu, ne dienzeja bua kumona muudi mua kuakaja malu. (Yak. 1:5) Kakuyi mpata, kuenza makebulula mu mikanda yetu ya bena Kristo kudi mua kukupetesha malu makumbane akuambuluisha kabidi.
17. Mmu mishindu kayi mudi baledi mua kuambuluisha bana babu bua kuikala ne didikanda?
17 Mmunyi muudi mua kuambuluisha bana bebe bua bikale ne didikanda? Baledi mbamanye ne: bana kabena mua kudipetela nkayabu ngikadilu eu to. Anu bu mudibi bua ngikadilu mikuabu yonso idi bana ne bua kulonga, baledi badi ne bua kuikala tshilejilu. (Ef. 6:4) Nunku wewe mumone ne: bana bebe badi ne lutatu lua kudikanda, diebeja biwikala wewe muine tshilejilu tshimpe. Kupepeji buenzeji buimpe buudi nabu paudi ne tshibidilu tshia kuyisha, kubuela mu bisangilu, ne kulombola ntendelelu wa mu dîku to. Kutshinyi bua kubenga kuenzela bana bebe malu kampanda adibu bakulomba biobi bikengela kubenga to! Yehowa uvua muelele Adama ne Eva mikalu ivua mua kubafikisha ku dimona bumfumu bua Yehowa mu mushindu muimpe. Bia muomumue, manyoka adi baledi bafila ne tshilejilu tshiabu bidi ne tshipatshila tshia kulongesha bana bua kuikala ne didikanda. Kunanga bumfumu bua Nzambi ne kunemeka mikenji yende ngamue malu a mushinga mukole audi mua kuambuluisha bana bebe bua kuenza.—Bala Nsumuinu 1:5, 7, 8.
18. Bua tshinyi tudi ne bua kuikala batuishibue ne: balunda bimpe nebikale dibenesha kutudi?
18 Bushuwa, nansha wewe muikale muledi anyi kuyi muledi, kuena ne bua kupepeja mushinga wa kusungula balunda ne meji to. Diaku bulunda ne bantu bakukankamija bua kuipatshila malu a mushinga ne kuepuka bilumbu. (Nsu. 13:20) Balunda badi banange malu a mu nyuma nebakufikishe ku dienza malu mimpe, nebakusake bua kuikala ne didikanda mu nsombelu webe anu bu bobu. Kakuyi mpata, bikadilu biebe bimpe nebikankamije balunda bebe. Didikanda diudi upeta didi dikuambuluisha bua kuikala ne nsombelu muimpe dituku dionso, kuanyishibua kudi Nzambi ne kuikala ne buenzeji buimpe kudi bantu baudi munange.