TSHIENA-BUALU TSHIA KULONGA 38
“Luayi kundi, . . . nennupeshilule bukole”
“Luayi kundi, nuenu bonso badi batata ne midimu mikole ne bambule majitu mabapite, nennupeshilule bukole.”—MAT. 11:28.
MUSAMBU WA 17 “Ndi musue”
KADIOSHA *
1. Bilondeshile Matayi 11:28-30, mbualu kayi buvua Yezu mulaye?
YEZU wakalaya musumba wa bantu uvua umuteleja bualu buimpe bua dikema. Wakamba ne: “Luayi kundi, . . . nennupeshilule bukole.” (Bala Matayi 11:28-30.) Kavua muambe mêyi au anu bua kuamba to. Tshilejilu, elabi meji bua tshivuaye muenzele muntu mukaji kampanda uvua ne disama dibi menemene.
2. Ntshinyi tshivua Yezu muenzele muntu mukaji uvua usama?
2 Muntu mukaji au uvua ukeba diambuluisha ne muoyo mujima. Uvua muye kudi baminganga ba bungi bua bamuondope. Wakenza bidimu 12 utata anu kutata ne disama. Bilondeshile mikenji ya Mose, uvua mukoya. (Lew. 15:25) Pashishe yeye kumvua ne: Yezu uvua wondopa babedi; yeye kuya kumukeba. Pakamupetaye, wakamulenga ku luzemba lua tshilamba tshiende tshia pamutu, diakamue yeye kumvua bimpe! Kadi Yezu kavua anu mumuondope patupu to, uvua muenze kabidi bua adimone ne: uvua ne mushinga. Tshilejilu, pavua Yezu uyukila nende, wakamubikila ne musangelu ne kanemu konso ne: “Muananyi wa bakaji.” Bushuwa, muntu mukaji au wakapetulula bukole, yeye kukankamana!—Luka 8:43-48.
3. Nnkonko kayi ituandamuna?
3 Udi mumone tshivua muntu mukaji au muenze’s? Uvua mudienzeje bua kuya kudi Yezu. Nansha tuetu lelu tudi ne bua kudienzeja bua kuya kudi Yezu. Tshikondo tshietu etshi, Yezu kakuenza tshishima bua kuondopa bantu badi baya kudiye badi ne masama a ku mubidi to. Kadi utshidi anu ubabikila wamba ne: “Luayi kundi, . . . nennupeshilule bukole.” Mu tshiena-bualu etshi netuandamune nkonko itanu eyi: Ntshinyi tshitudi ne bua kuenza bua kuya kudi Yezu? Ntshinyi tshivua Yezu musue kuamba
pakambaye ne: “Ambulayi mutshi wanyi wa tshikokedi”? Ntshinyi tshitudi mua kulonga kudi Yezu? Bua tshinyi mudimu udiye mutupeshe udi utupeshilule bukole? Mmushindu kayi utudi mua kutungunuka ne kuambula mutshi wa tshikokedi wa Yezu bua kupetulula bukole?“LUAYI KUNDI”
4-5. Leja mishindu itudi mua kuya kudi Yezu.
4 Mushindu wa kumpala wa kuya kudi Yezu nkulonga malu avuaye muambe ne muenze, kualonga bikole. (Luka 1:1-4) Muntu mukuabu kakualonga pa muaba wetu to, mbujitu buetu. Tudi kabidi tuya kudi Yezu patudi tuangata dipangadika dia kubatijibua ne kulua bayidi ba Kristo.
5 Mushindu mukuabu wa kuya kudi Yezu nkuya kudi bakulu ba tshisumbu patudi dijinga ne diambuluisha. Yezu mmuteke “mapa mikale bantu” aa bua kulama mikoko yende. (Ef. 4:7, 8, 11; Yone 21:16; 1 Pet. 5:1-3) Tuetu nkayetu tudi ne bua kuangata dipangadika dia kuya kubalomba diambuluisha. Katuedi meji ne: bakulu nebabale bidi mu meji etu bua kumanya tshitudi natshi dijinga to. Tuangate tshilejilu tshia muanetu kampanda diende Julian. Udi wamba ne: “Mvua ne bua kumbuka ku Betele bua masama, kadi mulunda wanyi mukuabu wakangambila bua kubikila bakulu. Ngakanji kumona ne: tshivua dijinga ne dikuatshisha diabu to. Kadi pangakalua kubabikila, ngakamona ne: dikumbula diabu divua bualu buimpe menemene buntu tshiyi muanji kupeta.” Bakulu ba lulamatu (ba buena bavua bakumbule Julian aba) badi mua kutuambuluisha bua kumanya “meji a Kristo,” mmumue ne: kujingulula ngelelu wende wa meji ne mmuenenu wende wa malu ne kukeba bua kuikala nabi. (1 Kol. 2:16; 1 Pet. 2:21) Diambuluisha diabu edi ntshimue tshia ku bintu bimpe menemene bidibu mua kutupesha.
“AMBULAYI MUTSHI WANYI WA TSHIKOKEDI”
6. Pavua Yezu muambe ne: “Ambulayi mutshi wanyi wa tshikokedi,” uvua usua kuamba tshinyi?
6 Pavua Yezu muambe ne: “Ambulayi mutshi wanyi wa tshikokedi,” uvua mua kuikala usua kuamba ne: “Itabayi bukokeshi buanyi.” Uvua kabidi mua kuikala usua kuamba ne: “Buelayi nanyi muinshi mua mutshi wa tshikokedi bua tuenzele Yehowa mudimu pamue.” Nansha bu yeye musue kuamba bishi, mutshi wa tshikokedi wowu udi ulomba anu mudimu.
7. Bilondeshile Matayi 28:18-20, mmudimu kayi udibu batupeshe? Tuikale batuishibue bua bualu kayi?
7 Tudi tuitaba dibikila dia Yezu patudi tudilambula kudi Yehowa ne tubatijibua. Yezu udi ubikila muntu yonso bua alue kudiye, ne muntu yeye musue kuenzela Nzambi mudimu ne muoyo umue, Yezu kakumubenga to. (Yone 6:37, 38) Bayidi bonso ba Yezu badi ne diakalenga dia kuenza pabu mudimu uvua Yehowa muambile Yezu bua kuenza. Tudi anu batuishibue ne: Yezu neikale netu bua kutuambuluisha bua tuenze mudimu au.—Bala Matayi 28:18-20.
“NULONGE MALU KUNDI”
Peshilula bakuabu bukole anu bu Yezu (Tangila tshikoso 8-11) *
8-9. Bua tshinyi bantu bavua ne budipuekeshi bavua baya kudi Yezu? Nnkonko kayi itudi ne bua kudiela?
8 Bantu bavua ne budipuekeshi bavua baya kudi Yezu. (Mat. 19:13, 14; Luka 7:37, 38) Bua tshinyi? Anji elabi meji bua muvua Yezu mushilangane ne Bafalese. Bamfumu ba bitendelelu abu kabavua ne dinanga to, bavua ne lutambishi. (Mat. 12:9-14) Kadi Yezu yeye uvua ne musangelu ne budipuekeshi. Bafalese bavua basue malu manene ne bavua baditambisha bua mianzu minene ivuabu nayi. Yezu yeye uvua wambila bayidi bende bua kabakebi malu manene, ubalongesha bua kudipuekesha ne kuenzela bakuabu mudimu. (Mat. 23:2, 6-11) Bafalese bavua bazakeja bantu bua kubenzeja malu ku bukole. (Yone 9:13, 22) Yezu yeye uvua wenzela bantu malu mimpe ne ubambila mêyi mimpe bua kubapeshilula bukole.
9 Malu avua Yezu wenza mmakulongeshaku bualu anyi? Diebeja ne: ‘Bantu bakuabu batu bammona bu muena malu mapole ne muena budipuekeshi anyi? Ntu mudiakaje bua kuenzela bantu bakuabu tumidimu nansha tua mukodikodi anyi? Batu bangangata bu muena malu mimpe anyi?’
10. Yezu uvua wenza tshinyi bua benzejanganyi nende ba mudimu?
10 Yezu uvua wenza bua ikale mu ditalala ne benzejanganyi nende ba mudimu, ne mushindu uvuaye ubenzela malu uvua ubasemeja kudiye; uvua musue kabidi kubalongesha. (Luka 10:1, 19-21) Uvua ukankamija bayidi bende bua kuikala kumuela nkonko ne uvua musue kubateleja. (Mat. 16:13-16) Anu mutubi bua bikunyibua bitubu bakuba bua tshintu katshibinyangi, bayidi ba Yezu bakatanta. Bakateleja malu avuaye mubalongeshe, kukuamabu mamuma, tuambe ne: bienzedi bimpe.
Ikala muntu wa kusomba nende
Ikala uyisha ne tshisumi
Ikala udipuekesha ne muenji wa mudimu *
11. Nnkonko kayi itudi ne bua kudiela?
11 Udiku pebe ne bukokeshi anyi? Wewe nabu, diebeja ne: ‘Pantu ku mudimu anyi kumbelu, ntu ngenzela bantu malu mushindu kayi? Ntu nkeba ditalala anyi? Ntu nkankamija bantu bua kungela nkonko anyi? Ntu kabidi mudiakaje bua kubateleja anyi?’ Pavua bantu babenga bivua Bafalese bamba, bavua babadiila dînu, ne pavua bantu bamba malu mashilangane ne abu, bavua babakengesha. Katuena basue kufuana Bafalese abu nansha kakese.—Mâko 3:1-6; Yone 9:29-34.
“NENUPETULULE BUKOLE”
12-14. Bua tshinyi mudimu udi Yezu mutupeshe udi utupeshilule bukole?
12 Bua tshinyi kuenza mudimu udi Yezu mutupeshe kudi kutupeshilula bukole? Kudi malu a bungi adi enza bua tupetulule bukole, kadi tuangate anu makese tshianana.
13 Tudi ne batangidi bimpe menemene. Yehowa mMutangidi wetu Mutambe Bunene. Ki mmfumu wa malu makole utu kayi uleja dianyisha kudi bena mudimu bende to. Utu wangata mudimu utudi tumuenzela ne mushinga. (Eb. 6:10) Udi utupesha kabidi bukole butudi nabu dijinga bua kukumbaja mudimu udiye mutupeshe. (2 Kol. 4:7; Gal. 6:5, dim.) Mukalenge wetu Yezu mmutushile tshilejilu tshimpe tshia mua kuenzela bakuabu malu. (Yone 13:15) Bualu bukuabu, bakulu badi batulama batu baditatshisha bua kuidikija Yezu “mulami munene wa mikoko.” (Eb. 13:20; 1 Pet. 5:2) Badi benza muabu muonso bua kuikala bena malu mimpe, bakankamija bakuabu, ne bikale ne dikima padibu batulongesha ne batulama.
14 Tudi ne balunda bimpe menemene. Kakuena bantu badi ne balunda bimpe ne badi ne mudimu wa nsongo bu tuetu to. Anji elabi meji: Tudi ne diakalenga dia kuenza mudimu ne bantu badi ne mikenji ya bikadilu mibandile kadi kabayi badiamba ne: bobu mbakane bapite bakuabu to. Mbamanye kuenza malu a bungi kadi kabayi badileja, ne batu bamona bakuabu bu babapite bobu. Nansha mutubu batumona bu benzejanganyi nabu ba mudimu, batu batumona kabidi bu balunda babu. Mbatunange bikole ne mbadiakaje bua kutufuila!
15. Tudi ne bua kumona mudimu utudi tuenza mushindu kayi?
15 Tudi ne mudimu muimpe menemene. Tudi tulongesha bantu malu malelela a Yehowa ne tutandula mashimi a Diabolo. (Yone 8:44) Satana mmushimakaje bantu bikole, bashale kabayi bualu bua kutekemena. Tshilejilu, mmusue kutufikisha ku diela meji ne: Yehowa kakutubuikidila mpekatu ne ki mmutunange to. Aa mmashimi mabi matambe adi atekesha bantu mu mikolo kakuyi mushindu! Patudi tuya kudi Kristo, Nzambi udi utubuikidila mpekatu yetu. Bulelela budi ne: Yehowa mmutunange bonso bikole menemene. (Lomo 8:32, 38, 39) Patudi tuambuluisha bantu bua balonge mua kueyemena Yehowa ne tubamona balengeja nsombelu wabu tudi tumvua disanka dia bungi be!
TUNGUNUKA NE KUAMBULA MUTSHI WA TSHIKOKEDI WA YEZU BUA KUPETULULA BUKOLE
16. Leja mudi bujitu budi Yezu utulomba bua kuambula bushilangane ne majitu makuabu atudi ne bua kuambula.
16 Bujitu budi Yezu utulomba bua kuambula mbushilangane ne majitu etu makuabu atudi ne bua kuambula. Tshilejilu, ba bungi ba kutudi batu badiumvua bazengele ne kabayi disanka patubu bafuma ku mudimu dilolo. Kadi patutu tufuma ku mudimu wa Yehowa ne Yezu, tutu tudiumvua ne disanka dia bungi. Tudi mua kuikala bazengele patudi tufuma ku mudimu dilolo kadi tudimona benzejibue bua kuya mu bisangilu dilolo adi. Kadi misangu ya bungi itutu tufuma mu bisangilu, tutu tudiumvua bapetulule bukole ne makanda. Ke mudibi kabidi patudi tudienzeja bua kuyisha ne kudilongela Bible. Patudi tuditatshisha bua kuenza malu aa, tudi tupetulula bukole ne makanda bia dikema!
17. Ntshinyi tshitudi ne bua kumanya ne kudimukila?
17 Tudi ne bua kumona malu mudiwu. Yonso wa kutudi udi ne ende makanda matshintshikila. Nunku tudimuke bua malu atudi tujinga kuenza. Tshilejilu, tudi mua kunyanga makanda etu mu dikeba bintu bia ku mubidi. Mona tshivua Yezu muambile nsonga kampanda mubanji uvua mumuebeje ne: “Ndi ne bua kuenza tshinyi bua kupiana muoyo wa tshiendelele?” Muntu au ukavua utumikila Mikenji. Uvua ne bua kuikala muntu muimpe bualu Evanjeliyo wa Mâko udi wamba bua muntu au ne: Yezu ‘wakumvua dinanga bua bualu buende.’ Yezu wakabikila muntu au umuambila ne: “Ndaku, upane bintu biudi nabi, . . . pashishe luaku, undonde.” Muntu au uvua musue kulonda Yezu, kadi biakamukolela bua kulekela “bintu bia bungi” bivuaye nabi. (Mâko 10:17-22) Ke bualu kayi wakabenga kuambula mutshi wa tshikokedi uvua Yezu musue kumupesha, yeye kutungunuka ne kuenzela “Biuma” mudimu. (Mat. 6:24) Wewe uvua mua kuikala muenze tshinyi?
18. Ntshinyi tshitudi mua kuenza misangu ne misangu? Bua tshinyi?
18 Ku musangu ne kumusangu, mbimpe tuikale tutangilula malu atudi bateke pa muaba wa kumpala. Bua tshinyi? Bua tumanye mua kuenza malu ne makanda etu bimpe. Mona tshidi nsongalume mukuabu diende Mark wamba: “Kukadi bidimu bia bungi bimvua ngela meji ne: tshivua ne nsombelu wa bintu bipitepite bungi to. Mvua mpanda-njila, kadi misangu yonso mvua anu ne meji a makuta ne a kupeta nsombelu wa muntu muikishe. Mvua ndiebeja bua tshinyi mvua ntata meme. Pashishe meme kujingulula ne: mvua mfila dîba dia bungi ne makanda anyi onso ku malu anyi, kadi Yehowa kayi ne muaba wa nsongo.” Mark wakashintulula ngelelu wende wa meji ne nsombelu wende bua kudifila bikole ku mudimu wa Yehowa. Udi wamba ne: “Kudi misangu intu mpangila makuta, binsamisha mutu, kadi Yehowa ne Yezu mbangambuluishe bua kutantamena ntatu yanyi.”
19. Bua tshinyi kuikala ne mmuenenu muimpe wa malu kudi ne mushinga wa bungi?
19 Netutungunuke ne kupetulula bukole patudi tuambula mutshi wa tshikokedi wa Yezu tuetu benze malu asatu aa. Bua kumpala, tuikale ne mmuenenu muimpe wa malu. Bu mutudi tuenza mudimu wa Yehowa, mbimpe tuwenze mudiye musue. Tuetu tudi bena mudimu, Yehowa ke Mfumu. (Luka 17:10) Tuetu tujinga kuenza mudimu wende mutudi basue, netudimone tukadi tukandamena mutshi wa tshikokedi. Nansha ngombe wa bukole udi mua kuditapisha ne kuditshiokesha yeye anu ujinga kuya kudiye musue ne ukandamana padi mfumuende wenda umulombola ne mutshi wa tshikokedi. Kadi tuetu tuenza mudimu wa Yehowa mudiye musue, netuenze malu a dikema ne netutshimune ntatu ituvua tumone ne: ivua mitupite makanda. Tumanye ne: kakuena muntu udi mua kupangisha disua diende bua kuenzekadi to!—Lomo 8:31; 1 Yone 4:4.
20. Tudi ne bua kuambula mutshi wa tshikokedi wa Yezu ne meji kayi?
20 Buibidi, enza mudimu ne meji mimpe. Tshipatshila tshietu ntshia kutumbishisha Yehowa Tatu wetu wa dinanga. Bu muvua bamue bantu ba tshikondo tshia Yezu bakavua bamulonda bikale ne lukuka ne basue kukeba anu masanka abu, mu matuku makese bakajimija disanka ne kulekelabu mutshi wa wende tshikokedi. (Yone 6:25-27, 51, 60, 66; Filip. 3:18, 19) Kadi bantu bavua banange Nzambi ne bantu nabu ne muoyo mujima bakambula mutshi au ne disanka too ne pakafuabu, bikale ne ditekemena dia kuenza mudimu ne Kristo mu diulu. Anu bu bobu, tuetu tuambula mutshi wa tshikokedi wa Yezu ne meji mimpe, netushale ne disanka.
21. Bilondeshile Matayi 6:31-33, ntshinyi tshitudi mua kutekemena bua Yehowa atuenzele?
21 Buisatu, ikala mutekemene ne: Yehowa neakuambuluishe. Tudi basungule nsombelu wa didipangisha malu ne basungule mudimu mukole. Yezu uvua mutudimuije ne: nebatukengeshe. Kadi tuikale batekemene ne: Yehowa neatupeshe bukole bua kunanukila mu lutatu nansha lua mushindu kayi. Tuetu tutungunuka ne kunanukila, netulue ne bukole bua bungi. (Yak. 1:2-4) Tuikale batekemene kabidi ne: Yehowa neatupeshe bintu bitudi nabi dijinga, Yezu neatulame, ne bena Kristo netu nebatukankamije. (Bala Matayi 6:31-33; Yone 10:14; 1 Tes. 5:11) Kudi bualu bukuabu butudi nabu dijinga kabidi anyi?
22. Mbualu kayi butudi ne bua kusankila?
22 Muntu mukaji uvua Yezu muondope au wakapetulula bukole anu dituku divuabu bamuondope adi. Kadi uvua mua kupetulula bukole kashidi ne tshiendelele anu yeye mulue muyidi wa Kristo wa lulamatu. Buebe wewe, mukaji au uvua muenze tshinyi? Bikalabi ne: uvua bushuwa muitabe bua kuambula mutshi wa tshikokedi wa Yezu, dîba edi badi ne Yezu mu diulu! Malu onso avuaye mua kudipangisha bua kulonda Kristo kaavua mua kuikala nansha tshibuipi ne diakalenga edi to! Nansha tuetu ne ditekemena dia kuikala ne muoyo wa kashidi mu diulu anyi pa buloba, tudi ne disanka dia bungi bua mutudi bitabe dibikila dia Yezu dia ne: “Luayi kundi!”
MUSAMBU WA 13 Kristo udi tshilejilu kutudi
^ tshik. 5 Yezu udi utubikila kudiye. Ntshinyi tshitudi ne bua kuenza bua kuitaba dibikila diende? Tshiena-bualu etshi netshiandamune lukonko elu. Netshituvuluije kabidi tshitudi mua kuenza bua kupetulula bukole patudi tuenza mudimu pamue ne Kristo.
^ tshik. 60 DIUMVUIJA DIA TSHIMFUANYI: Yezu wakapeshilula bantu bukole mu mishindu ya bungi.
^ tshik. 66 DIUMVUIJA DIA TSHIMFUANYI: Anu bu Yezu, muanetu wa balume wenza malu mashilashilangane adi apeshilula bakuabu bukole.