TSHIENA-BUALU TSHIA KULONGA 37
Tukokelayi Yehowa ne muoyo mujima
“Katuenaku ne bua kutamba kukokela ne muoyo mujima Tatu wa muoyo wetu . . . anyi?”—EB. 12:9.
MUSAMBU WA 9 Yehowa mMukalenge wetu!
KADIOSHA *
1. Bua tshinyi tudi ne bua kukokela Yehowa?
TUDI ne bua kukokela * Yehowa bualu mMufuki wetu. Bu mudiye Mufuki wetu, udi ne bukenji bua kuelela bifukibua biende mikenji. (Buak. 4:11) Kadi bualu bukuabu budi butusaka bua kumutumikila mbuobu ebu: mushindu wende wa kukokesha mmuimpe be! Kukadi bidimu ne bidimu bidi bantu bakokeshe bakuabu. Patudi tubafuanyikija ne Yehowa, tudi tumona ne: yeye mMukalenge udi mubapite bonso ku meji, ku dinanga, ku luse, ne ku diditeka pa muaba wa bakuabu.—Ekes. 34:6; Lomo 16:27; 1 Yone 4:8.
2. Bilondeshile Ebelu 12:9-11, mmalu kayi adi atusaka bua kukokela Yehowa?
2 Yehowa mmusue bua tumutumikile, ki mbualu tudi tumutshina to, kadi mbualu tudi bamunange ne tumumona bu Tatu wetu wa dinanga. Mu mukanda uvua Paulo mufundile bena Ebelu, udi uleja ne: tudi ne bua “kukokela ne muoyo mujima Tatu” wetu bualu udi utulongesha “bua diakalenga dietu.”—Bala Ebelu 12:9-11.
3. a) Mmunyi mutudi mua kuleja ne: tudi tukokela Yehowa? b) Nnkonko kayi ituandamuna?
3 Tudi tukokela Yehowa patudi tuditatshisha bua kumutumikila mu malu onso ne tukandamena lungenyi lua kueyemena dijingulula dietu dia malu. (Nsu. 3:5) Tuetu bafike ku dimanya ngikadilu mimpe ya Yehowa, nebipepele bua kumukokela. Bua tshinyi tudi tuamba nanku? Bualu ngikadilu eyi idi imuenekela mu bionso bidiye wenza. (Mis. 145:9) Tuetu balonge malu a Yehowa a bungi, netumunange kabidi bikole. Bualu bukuabu, tuetu banange Yehowa, katuakuikala dijinga ne mulongolongo wa mikenji idi ituambila tshia kuenza ne tshia kubenga kuenza to. Netuditatshishe bua kunanga tshidi tshimpe ne kukina tshidi tshibi anu bu Yehowa. (Mis. 97:10) Kadi imue misangu bidi mua kutukolela bua kutumikila Yehowa. Bua tshinyi? Ntshinyi tshidi tshilejilu tshia nguvena Nehemiya mua kulongesha bakulu? Ntshinyi tshidi tshilejilu tshia mukalenge Davidi mua kulongesha batatu? Ntshinyi tshidi tshilejilu tshia Mariya mamuende wa Yezu mua kulongesha bamamu? Tshiena-bualu etshi netshiandamune nkonko eyi.
BUA TSHINYI BIDI MUA KUTUKOLELA BUA KUKOKELA YEHOWA?
4-5. Bilondeshile Lomo 7:21-23, bua tshinyi bidi mua kutukolela bua kukokela Yehowa?
4 Bualu bua kumpala budi buenza bua bitukolele bua kukokela Yehowa mbua ne: tuetu bonso tudi bapiane bubi ne bapange bupuangane. Ke bualu kayi muoyo utu utusaka anu bua kubenga kutumikila. Adama ne Eve bamane kutombokela Nzambi ne badie tshimuma tshivuabu babakandike, bakadielela yabu mikenji ya tshidi tshimpe ne tshidi tshibi. (Gen. 3:22) Nansha lelu, bantu ba bungi badi babenga kuteleja Yehowa, ne badi badielela mikenji ya tshidi tshimpe ne tshidi tshibi.
5 Nansha bantu badi bamanye Yehowa ne bamunange badi pabu mua kupeta lutatu lua kumukokela ne muoyo mujima. Mupostolo Paulo wakapeta pende lutatu elu. (Bala Lomo 7:21-23.) Anu bu Paulo, tudi basue kuenza tshidi Yehowa musue. Kadi tudi ne bua kutungunuka ne kuluangana ne lungenyi lua kuenza malu mabi.
6-7. Mbualu buibidi kayi budi mua kuenza bua bitukolele bua kukokela Yehowa? Fila tshilejilu.
6 Bualu buibidi budi mua kuenza bua bitukolele bua kukokela Yehowa mbua ne: tudi tuenza malu bilondeshile bilele bia muaba utudi bakolele. Ngenyi ya bungi ya bantu itu ibengangana ne disua dia Nzambi, ne bidi mua kutulomba bua kutungunuka ne kuluangana bua kubenga kulonda ngenyi itu nayi bantu ba bungi. Tuangate tshilejilu.
7 Miaba ya bungi, bantu batu ne tshilele tshia kusaka bansonga bua badifile bua kupeta makuta a bungi. Muanetu mukuabu diende Mary * wakapeta pende lutatu alu. Kumpala kua kumanyaye Yehowa, uvua mulonge mu tshimue tshia ku bilongelu binene bia mu ditunga diabu. Dîku diabu divua dimusaka bua kupeta mudimu munene wa makuta wa bantu bamutshina. Ke tshivuaye pende musue. Kadi yeye mumane kumanya Yehowa ne mufike ku dimunanga, wakashintulula bipatshila biende. Nansha nanku udi wamba ne: “Imue misangu ntu mpeta mpunga ya kuenza midimu minene idi mua kumpetesha makuta a bungi kadi mifuane kumpangisha bua kuenzela Yehowa mudimu. Bilondeshile mushindu undi mukole, bitshidi bintatshisha bua kuyibenga. Ndi ne bua kulomba Yehowa diambuluisha bua ngikale nkandamena buteyi bua kuitaba mudimu udi mua kumpangisha bua kumuenzela mudimu.”—Mat. 6:24.
8. Netukonkonone mpindieu tshinyi?
8 Tuetu tukokela Yehowa, tudi tupeta masanka. Kadi bantu badi ne ndambu wa bukokeshi bu mudi bakulu, batatu, ne bamamu badi ne bualu bukuabu budi bubasaka bua kulonda buludiki bua Nzambi; badi ne mushindu wa kuambuluisha bantu bakuabu. Tukonkononayi bimue bilejilu bia mu Bible bidi bituleja mua kukokesha mu mushindu udi usankisha Yehowa.
TSHIDI TSHILEJILU TSHIA NEHEMIYA MUA KULONGESHA BAKULU
Bakulu benza pabu mudimu ku Nzubu wa Bukalenge anu muvua Nehemiya muditue pende mu dibakulula Yelushalema (Tangila tshikoso 9-11) *
9. Nnsombelu kayi ivua Nehemiya mutuilangane nayi?
9 Yehowa mmupeshe bakulu mudimu munene wa kumulamina bantu bende. (1 Pet. 5:2) Tshilejilu tshia muvua Nehemiya muenzele bantu ba Nzambi malu tshidi mua kubalongesha malu a bungi. Bu muvuaye nguvena wa Yuda, uvua ne bukokeshi bua bungi. (Neh. 1:11; 2:7, 8; 5:14) Kadi anji elabi meji bua imue nsombelu mikole ivuaye mutuilangane nayi. Uvua mumvue ne: bantu bavua banyange ntempelo wa Yehowa ne kabavua bambuluisha bena Lewi ne bintu muvua Mikenji ilomba to. Bena Yuda bavua banyanga mukenji wa Nsabatu, ne kuvua bavua basele bakaji ba bisamba bikuabu. Bivua bilomba nguvena Nehemiya bua kuenza bualu kampanda mu tshilumbu etshi.—Neh. 13:4-30.
10. Mmunyi muvua Nehemiya muenzele bantu ba Yehowa malu?
10 Nehemiya kavua muenzeje bantu bua benze tshivuaye yeye wamba bualu uvua ne bukokeshi to. Kadi wakasambila Yehowa ne muoyo mujima, umulomba diambuluisha, ne wakalongesha bantu Mikenji ya Yehowa. (Neh. 1:4-10; 13:1-3) Nehemiya wakenza kabidi mudimu ne bena mu tshisamba tshiabu ne budipuekeshi buonso, ubambuluisha too ne bua kuibakulula bimanu bia Yelushalema.—Neh. 4:15.
11. Bilondeshile 1 Tesalonike 2:7, 8, mmushindu kayi udi bakulu ne bua kuenzela bena mu tshisumbu malu?
11 Pamuapa bakulu kabakutuilangana ne nsombelu mikole ya buena ya Nehemiya to, kadi badi mua kumuidikija mu mishindu ya bungi. Tshilejilu, batu baditatshisha bikole bua kuambuluisha bena Kristo nabu. Kabatu balekela bukokeshi buabu bubafikisha ku diditambisha to. Kadi batu benzela bena mu tshisumbu malu ne bulenga. (Bala 1 Tesalonike 2:7, 8.) Dinanga dikole didibu nadi ne budipuekeshi buabu bidi bimuenekela mu mushindu udibu bambila bakuabu malu. Mukulu kampanda ukadi mumonemone malu diende André udi wamba ne: “Ndi mufike ku dimona ne: mukulu yeye wenzela bena Kristo nende malu ne bulenga ne muikale muntu wa kusomba nende, bitu bibalenga ku muoyo bikole. Ngikadilu eyi idi isaka bena mu tshisumbu bua kuitaba mibelu ya bakulu.” Mukulu mukuabu wa kale diende Tony udi wamba ne: “Ndi nditatshisha bua kulonda mubelu udi mu Filipoyi 2:3 ne ntu anu nditatshisha bua kumona bakuabu bu bampite meme. Bidi bingambuluisha bua kubenga kuenzeja bakuabu malu ku bukole.”
12. Bua tshinyi mbimpe bua bakulu bikale ne budipuekeshi?
12 Bakulu badi ne bua kuikala ne budipuekeshi anu bu Yehowa. Nansha mudiye Mukalenge Mutambe Bunene wa diulu ne buloba, utu “winama panshi” bua kujula “muntu mupuekele mu lupuishi.” (Mis. 18:35; 113:6, 7) Mu bulelela, Yehowa utu ukina bena lutambishi ne bena diambu.—Nsu. 16:5.
13. Bua tshinyi bidi bikengela mukulu ‘alame ludimi luende bikole’?
13 Bidi bikengela bua mukulu udi ukokela Yehowa ‘alame ludimi luende bikole.’ Tshianana muntu yeye mumupange kanemu, udi mua kumuandamuna bibi. (Yak. 1:26; Gal. 5:14, 15) André utukadi batele udi wamba ne: “Kudi misangu imvua ngumvua mua kuandamuna muena Kristo kampanda bibi pamvua mumone ne: uvua mumpange kanemu. Kadi kuelangana meji bua bilejilu bia bantu ba lulamatu badi Bible muakuile nkungambuluishe bua kumona mushinga wa kuikala muena budipuekeshi ne muena bupuekele.” Bua bakulu kulejabu mudibu bakokela Yehowa, badi ne bua kuikala ne dinanga ne mêyi mashême padibu bayukila ne bena mu tshisumbu, nansha ne bakulu nabu.—Kolos. 4:6.
TSHIDI TSHILEJILU TSHIA DAVIDI MUA KULONGESHA BATATU
14. Mmuaba kayi udi Yehowa muteke tatu mu dîku? Udi umulomba tshinyi?
14 Yehowa mmuteke tatu ku mutu kua dîku diende, ne udi umulomba bua kulongesha bana bende ne kubabela anyi kubaludika. (1 Kol. 11:3; Ef. 6:4) Kadi bukokeshi bua tatu budi ne mikalu bualu udi ne bua kubadila Yehowa malu. Yeye ngudi dîku dionso dipetele dîna kudiye. (Ef. 3:14, 15) Bua batatu kuleja ne: badi bakokela Yehowa, mbimpe benze malu ne bukokeshi buabu mudi Yehowa musue. Bobu balonge malu a mu nsombelu wa mukalenge Davidi, bidi mua kubambuluisha bikole.
Masambila a tatu wa dîku adi ne bua kuleja mudiye ne budipuekeshi (Tangila tshikoso 15-16) *
15. Bua tshinyi mukalenge Davidi ntshilejilu tshimpe tshidi batatu mua kulonda?
15 Yehowa kavua muteke Davidi bua ikale anu ku mutu kua dîku diende nkayadi to, kadi bua ikale kabidi ku mutu kua tshisamba tshijima tshia Isalele. Bu muvua Davidi mukalenge, uvua ne bukokeshi bua bungi. Kuvua misangu ivuaye wenza malu bibi ne bukokeshi abu ne wenza bilema binene. (2 Sam. 11:14, 15) Kadi uvua ukokela Yehowa. Mushindu kayi? Uvua witaba mibelu ivua Yehowa umupesha. Pavuaye usambila, uvua uleja Yehowa muvuaye udiumvua. Uvua uditatshisha kabidi bikole bua kutumikila mibelu ya Yehowa. (Mis. 51:1-4) Bualu bukuabu, uvua ne budipuekeshi bua bungi bualu kavua witaba anu mibelu mimpe ya kudi balume nende to, uvua witaba kabidi ya kudi bantu bakaji. (1 Sam. 19:11, 12; 25:32, 33) Bilema bia Davidi biakamupesha kalasa, yeye kushala mudifile mu dienzela Yehowa mudimu.
16. Tshilejilu tshia Davidi tshidi mua kulongesha batatu malu kayi?
16 Amue malu adi tshilejilu tshia mukalenge Davidi mua kunulongesha nuenu batatu ngowu aa: Kanuenji malu bibi ne bukokeshi budi Yehowa munupeshe to. Itabayi bilema bienu, ne nuitabe mibelu ya mu Bible idi bantu bakuabu banupesha. Nuenu benze nunku, bena mu mêku enu nebanunemeke bua munudi ne budipuekeshi. Panudi nusambila ne bena mu mêku enu, lejayi Yehowa yenu yonso ya munda, nunku nebamone ne: nudi nueyemena Yehowa bikole. Bualu bua mushinga menemene mbuobu ebu: tekayi mudimu wa Yehowa pa muaba wa kumpala. (Dut. 6:6-9) Tshilejilu tshienu tshimpe ke tshimue tshia ku bintu bia mushinga mukole binudi mua kupesha bena mu mêku enu.
TSHIDI TSHILEJILU TSHIA MARIYA MUA KULONGESHA BAMAMU
17. Yehowa mmupeshe bamamu mudimu kayi?
17 Yehowa mmupeshe mamu mudimu wa lumu mu dîku, ne mmumupeshe kabidi ndambu wa bukokeshi ku mutu kua bana bende. (Nsu. 6:20) Malu adi mamu wenza ne wamba adi mua kuambuluisha bana bende bikole matuku abu onso a muoyo. (Nsu. 22:6) Mona tshidi tshilejilu tshia Mariya mamuende wa Yezu mua kulongesha bamamu.
18-19. Tshilejilu tshia Mariya tshidi mua kulongesha bamamu tshinyi?
18 Mariya uvua mumanye Mifundu bimpe menemene. Uvua unemeka Yehowa bikole ne uvua mushemeshe nende bulunda. Uvua mudiakaje bua kulonda buludiki bua Yehowa, nansha muvuabu bulua kushintulula nsombelu wende mujima.—Luka 1:35-38, 46-55.
Mamu wa dîku yeye mutshioke anyi tua kuabu tuotu tumujuke, bidi mua kumulomba bua aditatshishe bikole bua kuleja bena mu dîku diende mudiye mubanange (Tangila tshikoso 19) *
19 Bamamu wetu, nudi mua kuidikija tshilejilu tshia Mariya mu mishindu ya bungi. Ntshinyi tshinudi mua kuenza? Tshia kumpala, ikalayi ne programe wa didibadila Bible ne kusambila pa nkayenu bua nulame malanda enu ne Yehowa. Tshibidi, ikalayi badiakaje bua kushintulula amue malu bua kusankisha Yehowa. Tshilejilu, badi mua kuikala bakukoleshe kudi baledi bavua bena biji ne bamba bana babu mêyi mashile. Nanku udi mua kuikala mukole wela meji ne: ke mudibi bikengela kukolesha bana. Nansha biwikala ukadi mumane kumanya mikenji ya Yehowa, bidi mua kukutatshisha bua kutukija ne kuikala lutulu ne bana, nangananga paudi mutshioke ne ubambila malu kabayi bumvua. (Ef. 4:31) Dîba dia nunku, tamba kulomba Yehowa bua akuambuluishe. Mamu mukuabu diende Lydia udi wamba ne: “Imue misangu bitu bindomba bua kusambila bikole bua tshiakudi ne tshiji padi muananyi kayi untumikila. Bikadi bimfikile bua kubenga kujikija mêyi amvua nawu pa ludimi, meme kuanji kuimana, kusambila Yehowa munda munda bua angambuluishe. Disambila ditu dingambuluisha bua kushala mutukije.”—Mis. 37:5.
20. Ndutatu kayi lutu bamue bamamu bapeta? Badi mua kulujikija bishi?
20 Lutatu lukuabu ludi bamue bamamu mua kupeta ndua ne: bitu bibakolela bua kuleja bana babu mudibu babanange. (Tito 2:3, 4) Bamue bamamu mbakolele mu mêku muvua baledi babu nabu ne nsombelu wa makeyikeyi. Baledi bebe bobu bakukoleshe mushindu eu, kuenzedi bebe bana bia buena bivua baledi bebe bakuenzele wewe abi to. Mamu udi ukokela Yehowa udi mua kumona ne: bidi bimulomba bua alonge mua kuleja bana bende mudiye mubanange. Bidi mua kumukolela bua kushintulula ngelelu wende wa meji, mushindu utuye udiumvua, ne wenza malu. Kadi udi anu mua kushintuluka, ne dîba adi, yeye ne dîku diende nebikale ne disanka dia bungi.
TUTUNGUNUKE NE KUKOKELA YEHOWA
21-22. Bilondeshile Yeshaya 65:13, 14, mmasanka kayi atudi tupeta patudi tukokela Yehowa?
21 Mukalenge Davidi uvua mumanye masanka adi muntu upeta padiye ukokela Yehowa. Wakafunda ne: “Mêyi matuma a kudi Yehowa mmakane, adi asankisha muoyo; mukenji wa Yehowa mmukezuke, udi ukenkesha mêsu. Muena mudimu webe mmudimujibue kudibi; kubilama kudi ne difutu dinene.” (Mis. 19:8, 11) Lelu tudi tumona dishilangana didi pankatshi pa bantu badi bakokela Yehowa ne badi babenga mibelu yende mimpe. Bantu badi bakokela Yehowa ne muoyo mujima badi ‘bela mbila ya disanka bualu muoyo wabu udi bimpe.’—Bala Yeshaya 65:13, 14.
22 Padi bakulu, batatu, ne bamamu bakokela Yehowa ne muoyo mujima, nsombelu wabu udi ulengela, badi bapeta disanka dia bungi mu mêku abu, ne tshisumbu tshijima tshidi tshishala mu buobumue. Tshidi tshipite bionso ntshia ne: badi basankisha muoyo wa Yehowa. (Nsu. 27:11) Edi si ndisanka dia katshia ne katshia!
MUSAMBU WA 123 Tukokele bulongolodi bua Nzambi ne lulamatu
^ tshik. 5 Tshiena-bualu etshi netshituleje tshidi tshitusaka bua kukokela Yehowa. Netshituleje kabidi tshidi tshilejilu tshia nguvena Nehemiya, tshia mukalenge Davidi, ne tshia Mariya mamuende wa Yezu mua kulongesha bakulu, batatu, ne bamamu; bidi nanku bualu bobu bonso badi pabu ne ndambu wa bukokeshi.
^ tshik. 1 DIUMVUIJA: Bantu batubu benzeja bua kutumikila muntu kampanda batu bamona muaku kukokela mu mushindu mubi. Kadi bantu ba Nzambi batu basue kumutumikila, ke bualu kayi kabatu bamona tshilumbu tshia dikokela mu mushindu mubi to.
^ tshik. 7 Tudi bashintulule amue mêna mu tshiena-bualu etshi.
^ tshik. 62 DIUMVUIJA DIA TSHIMFUANYI: Mukulu wenza mudimu wa dilongolola Nzubu wa Bukalenge ne muanende anu muvua Nehemiya mudifile pende bua kuibakulula bimanu bia Yelushalema.
^ tshik. 64 DIUMVUIJA DIA TSHIMFUANYI: Tatu wenzela bena mu dîku diende disambila ne muoyo mujima.
^ tshik. 66 DIUMVUIJA DIA TSHIMFUANYI: Muana wa balume muenze mêba a bungi mu dinaya manaya a ku video, bimupangishe mua kuenza midimu ya kumbelu ne ya mu kalasa. Mamuende udi mufume ku mudimu mutshioke udi umubela kayi ufiika munda anyi kayi umuamba mêyi mashile.