1-2. Leja mudi mêyi adi mu Muambi 11:6 umvuangana ne mudimu wetu wa kuyisha lumu luimpe.

MU AMUE matunga, patu bantu bumvua lumu luimpe lutudi tuyisha batu baluzukila; bualu lolu luine si ke luvuabu bakeba! Mu makuabu owu bantu kabatu batamba kusankidila malu a Nzambi to. Bantu ba muaba uudi bobu batu bishi? Nansha bobu mushindu kayi, Yehowa mmutekemene bua tutungunuke tuetu ne kuyisha too ne padiye yeye nkayende umona ne: biakumbanyi.

² Padi tshikondo tshidi Yehowa mukose tshikumbana, mudimu wa buambi newimane, pashishe “nshikidilu nealue.” (Mat. 24:14, 36) Mu dindila tshikondo atshi, mmunyi mutudi mua kutumikila mêyi a ne: “kulekedi tshianza tshiebe tshikisha”? *​—Bala Muambi 11:6.

3. Ntshinyi tshituakonkonona mu tshiena-bualu etshi?

³ Tshiena-bualu tshishale tshivua tshiakule bua malu anayi atudi ne bua kuenza bua kulua “balobi ba bantu” badi bamanye kuloba. (Mat. 4:19) Etshi tshiotshi netshiakule bua malu asatu adi mua kutuambuluisha bua kukolesha didisuika dietu dia kuyisha, nansha tuetu mu nsombelu kayi. Netumone bua tshinyi bidi ne mushinga bua 1) kudifila mu dienza mudimu wa buambi, 2) kuikala ne lutulu, ne 3) kuikala ne ditabuja dikole.

4. Bua tshinyi bidi bikengela tushale badifile mu mudimu udi Yehowa mutupeshe bua kuenza?

⁴ Yezu wakaleja malu avua ne bua kuenzeka ne nsombelu ivua  ne bua kuleja ne: tukadi mu matuku a ku nshikidilu, ne biobi ebi bivua mua kubueja bayidi bende mu ditanaji, bapangila mua kuenza mudimu wa kuyisha. Wakadimuija bayidi bende bua ‘bashale batabale.’ (Mat. 24:42) Lelu tudi tutuilangana ne malu adi mua kutubueja mu ditanaji a buena avua mapangishe bantu ba mu tshikondo tshia Noa bua kuteleja bualu buvuaye ubadimuija. (Mat. 24:37-39; 2 Pet. 2:5) Ke bualu kayi, tudi basue kudifila mu dienza mudimu wa buambi udi Yehowa mutupeshe.

5. Mmunyi mudi Bienzedi 1:6-8 uleja mushindu udi mudimu wa buambi ne bua kualabala?

⁵ Lelu, bidi bikengela tuetu kudifila bikole menemene ku mudimu wa buambi. Yezu wakamanyisha ne: panyima pa lufu luende, mudimu eu uvua ne bua kualabala bikole ne kushala utungunuka. (Yone 14:12) Yeye mumane kufua, bayidi bende bakuabu bakapingana ku mudimu wa diloba. Pakavuaye mubishibue ku lufu, wakenzela bayidi bende bakuabu tshishima, bobu kukuata mishipa mipite bungi. Wakabuelela pa mpunga awu bua kuleja bayidi bende ne: mudimu wa kuyisha ne kuvuija bantu bayidi uvua ne mushinga wa bungi kupita mudimu kayi mukuabu wonso. (Yone 21:15-17) Kumpala kua Yezu kubandaye mu diulu, wakambila bayidi bende ne: mudimu wa buambi uvuaye mutuadije uvua ne bua kusambuka mikalu ya Isalele kuya kule menemene. (Bala Bienzedi 1:6-8.) Bidimu bia bungi pashishe, wakaleja mupostolo Yone mu tshikena kumona malu avua ne bua kuenzeka “mu dituku dia Mukalenge.” * Mu malu avuaye mumone au, wakamona kabidi bualu bua dikema ebu: Ku bulombodi bua banjelu, “lumu luimpe lua tshiendelele” luvua luenda luyishibua kudi “tshisamba tshionso, tshisa tshionso, muakulu wonso ne bantu bonso.” (Buak. 1:10; 14:6) Mbimueneke bimpe ne: lelu Yehowa mmusue bua tuenze petu mudimu munene wa kuyisha eu too ne padiwu ujika.

6. Ntshinyi tshidi mua kutuambuluisha bua kutungunuka ne kudifila mu mudimu wa kuyisha?

 ⁶ Tuetu bele meji ku malu onso adi Yehowa wenza bua kutuambuluisha, tudi mua kudifila mu mudimu wa buambi. Tshilejilu, udi utupesha biakudia bia mu nyuma bipite bungi mu mikanda ya pa mabeji ne ya mu biamu. Kudi kabidi bidibu bakuate bia kuteleja, bikuabu mbienzela mu filme, ne binga bidi ku TV wetu wa jw ku Enternete. Anji elabi meji, malu adi mu site wetu adi mu miakulu mipite pa 1 000! (Mat. 24:45-47) Lelu udi malu a tshididi, a bitendelelu, ne a makuta bitapulule bantu, batendeledi ba Nzambi bapite pa miliyo 8 badi bobu mu buobumue bua menemene mu buena muntu bua buloba bujima. Tshilejilu, mu Ditanu dia 19/4/2019, Bantemu bonso ba pa buloba bujima bavua badisangishe bua kulonda diumvuija dia mvese wa ku dituku. Dilolo dia dituku adi, musumba wa bantu 20 919 041 wakadisangisha bua kuenza Tshivulukilu tshia lufu lua Yezu. Patudi tuela meji bua diakalenga ditudi nadi dia kumona mudi tshishima etshi tshienda tshienzeka ne dia kuambuluisha petu mu dienzeka diatshi, muoyo udi utusaka bua kutungunuka anu ne kudifila mu mudimu wa diyisha.

7. Mmunyi mudi tshilejilu tshia Yezu mua kutuambuluisha bua kutungunuka ne kudifila mu mudimu wa buambi?

⁷ Bualu bukuabu budi mua kutuambuluisha bua kutungunuka ne kudifila mu mudimu wa buambi nkulonda tshilejilu tshia Yezu. Kakalekela tshintu nansha tshimue tshimushiya mu ditanaji bua kumupangisha bua kumanyisha bantu bulelela to. (Yone 18:37) Kakakuluka mu buteyi pavua Satana mumuleje “makalenge onso a pa buloba ne butumbi buawu”; ne pavua bantu basue kumuteka mukalenge kakitaba to. (Mat. 4:8, 9; Yone 6:15) Dijinga dia kupeta bubanji kadivua dimulobesha to, nansha buluishi bukole kabuakamuzakeja to. (Luka 9:58; Yone 8:59) Padibu bateta ditabuja dietu, tuetu bavuluke mubelu wa mupostolo Paulo nebituambuluishe bua kushala badifile mu mudimu wa buambi. Wakalomba bena Kristo bua kulonda tshilejilu tshia Yezu bua kabalu ‘kutshioka ne kulekela’ nansha!​—Eb. 12:3.

8. Lutulu ntshinyi, ne bua tshinyi mbimpe kuikala nalu nangananga mpindieu?

⁸ Lutulu nngikadilu udi wambuluisha bua kushala mutukije bua nsombelu kampanda ashintuluke. Nansha tuetu ne mioyo kuulu kuulu tujinga bua nsombelu kampanda mubi ajike anyi bua bualu butudi bindile kukadi matuku a bungi bukumbane, bidi bitulomba lutulu. Muprofete Habakuka uvua ujinga bua tshikisu tshivua mu Yuda tshijike wamba kufua. (Hab. 1:2) Bayidi ba Yezu bavua batekemene ne: Bukalenge bua Nzambi buvua ne bua “kumueneka dîba adi” anyi tshikondo tshiabu atshi bua kubumbusha ku bukokeshi bua bena Lomo. (Luka 19:11) Tudi bindile dituku diumbusha Bukalenge bua Nzambi malu mabi onso ne kutubueja mu bulongolodi bupiabupia bua buakane ne muoyo mujima. (2 Pet. 3:13) Nansha nanku bidi bitulomba tushale ne lutulu ne tuindile dîba dikadi Yehowa mulongolole. Mona imue mishindu idi Yehowa utulongesha mua kuikala ne lutulu.

9. Mbilejilu kayi bidi bileja mudi Yehowa ne lutulu?

⁹ Yehowa mmutupeshe tshilejilu tshitambe buimpe tshia lutulu. Wakashila Noa dîba dikumbane dia kuibaka buatu ne dia kuenza mudimu bu “muyishi wa buakane.” (2 Pet. 2:5; 1 Pet. 3:20) Yehowa wakateleja Abalahama pavuaye wenda umukudika nkonko bua dipangadika diende dia kubutula bantu ba mu tshimenga tshibi tshia Sodoma ne tshia Amola. (Gen. 18:20-33) Yehowa wakashala ne lutulu lua katshia ne katshia kudi tshisamba tshia Isalele tshivua katshiyi ne lulamatu munkatshi mua bidimu ne bidimu. (Neh. 9:30, 31) Lelu Yehowa mmushile bantu bonso badiye mukoke kudiye  dîba bua ‘banyingalale bua mpekatu.’ Ntshijadiki tshia ne: utshidi ne lutulu. (2 Pet. 3:9; Yone 6:44; 1 Tim. 2:3, 4) Tshilejilu tshia Yehowa tshidi tshitusaka kabidi bua kuikala ne lutulu patudi tutungunuka ne kuyisha ne kulongesha. Udi utulongesha kabidi mua kuikala ne lutulu ku diambuluisha dia tshilejilu kampanda tshidi mu Dîyi diende.

10. Bilondeshile Yakobo 5:7, 8, tshilejilu tshia tshidime tshidi tshitulongesha tshinyi?

¹⁰ Bala Yakobo 5:7, 8. Tshilejilu tshia tshidime tshidi tshitulongesha mua kuikala ne lutulu. Mu kuamba kuimpe, kutu bikunyibue bitu bikola lukasa lukasa. Kadi bia bungi, nangananga bitu bikuama bimuma, bitu binenga bua kubobesha bimuma. Mu Isalele, tshikondo tshia kudima tshivua tshia ngondo isambombo. Tshidime uvua ukuna bintu panyima pa mvula mbedi ne ulua kubipola tshikondo tshia mvula ya ndekelu. (Mâko 4:28) Tuetu bidikije lutulu lua tshidime, netuleje mutudi ne meji. Kadi bidi mua kutukolela bua kuenza nanku.

11. Mmunyi mudi lutulu lutuambuluisha mu mudimu wetu wa buambi?

¹¹ Tuetu bantu bapange bupuangane, patutu tuenza mudimu kampanda tutu basue kumona bipeta biawu musangu umue. Kadi tuetu basue bua kabudimi ketu kakuamishe bintu, tudi ne bua kuikala tukatabalela, mmumue ne: kudimamu, kukunamu bintu, kuikala kubipila, ne kubiela mâyi. Kuvuija bantu bayidi kutu kulomba paku mudimu wa bungi. Bitu bilomba dîba bua tuetu kufikisha bantu batudi tulongesha ku diumbusha kansungansunga ne ku dikala ne dinanga. Lutulu luetu nelutuambuluishe bua katuteketshi mu mikolo padi ntatu itufikila. Nansha padi bantu bakuabu batuteleja, tudi ne bua kuikala anu ne lutulu. Katuena mua kuenzeja balongi betu ba Bible bua kuyabu kumpala mu nyuma to. Kuvua misangu ivua too ne bayidi ba Yezu bikale ne lujoko lua kumvua bivuaye ulongesha. (Yone 14:9) Tuvulukayi ne: tuetu tudi mua kukuna ne kuela mâyi, kadi Nzambi ke udi ubikolesha.​—1 Kol. 3:6.

12. Leja mutudi mua kuikala ne lutulu patudi tuyisha bantu badi kabayi Bantemu.

 ¹² Bidi mua kutukolela bua kuikala ne lutulu nangananga patudi tuyisha balela betu badi kabayi Bantemu. Dîyi dinene didi mu Muambi 3:1, 7 didi mua kutuambuluisha. Didi diamba ne: “Kudi . . . tshikondo tshia kupuwa ne tshikondo tshia kuakula.” Tudi mua kuenza bua bikadilu bietu bimpe bibayishe mu tshimuma, tshibi eku tuenda tubabidila mpunga idi imueneka bua kubayisha bulelela. (1 Pet. 3:1, 2) Patudi tuyisha bantu ne tubalongesha ne dikima, tudi nabu bonso lutulu nansha bobu balela betu.

13-14. Mbimue bilejilu kayi bia bantu bavua ne lutulu bitudi mua kuidikija?

¹³ Bilejilu bia bena lulamatu badibu bakuile mu Bible ne bia ba matuku etu aa bidi mua kutulongesha mua kuikala ne lutulu. Habakuka uvua ujinga bua malu mabi ajike wamba kufua, kadi wakaleja muvuaye ne lutulu pakambaye ne: “Nenshale muimane pa muaba wanyi wa bulami.” (Hab. 2:1) Mupostolo Paulo wakaleja dijinga divuaye nadi dia ‘kujikija’ mudimu wende. Nansha nanku, wakatungunuka ne “kufila bumanyishi buonso menemene bua lumu luimpe” ne lutulu luonso.​—Bien. 20:24.

¹⁴ Tuangate tshilejilu. Muanetu kampanda ne mukajende bavua baye ku kalasa ka Gilada, pashishe kubatumabu mu ditunga divua ne Bantemu bakese ne muvua ntendelelu wa ba bungi muikale wa batu kabayi bitaba Kristo. Bantu ba bungi kabavua basue kulonga Bible to. Kadi balongi nabu ba mu kalasa ka Gilada bavuabu batume mu matunga makuabu bavua babambila muvuabu balombola malonga a Bible a bungi avua aya kumpala. Nansha muvua bantu kabayi batamba kubateleja muaba uvuabu, bakashala ne lutulu batungunuka anu ne kuyisha. Ndekelu wa bionso, bobu bamane kuyisha muaba uvua umueneka bu uvua kawuyi ne bualu bua nsongo au bidimu 8, bakumvua disanka pakamonabu umue wa ku balongi babu ubatijibua. Bilejilu bia kale ne bia lelu ebi bidi bitulongesha tshinyi? Bena lulamatu aba kabakalekela tshisumi tshiabu anyi kulekela tshianza tshiabu tshikisha to, ne Yehowa wakabafuta bua lutulu luabu. Tuikalayiku “bidikiji ba bantu badi bapiana milayi ku diambuluisha dia ditabuja ne lutulu.”​—Eb. 6:10-12.

15. Ngumue mushindu kayi udi ditabuja dikolesha didisuika dietu dia kuyisha?

¹⁵ Tudi ne ditabuja mu mukenji utudi tuyisha, ke bualu kayi muoyo wetu udi uzuka bua kuwambila bantu ba bungi menemene. Tudi beyemene milayi idi mu Dîyi dia Nzambi. (Mis. 119:42; Yesh. 40:8) Tudi tumona mudi mêyi a buprofete a mu Bible akumbana matuku etu aa. Tudi badimuene mudi bantu balengeja nsombelu wabu padibu batumikila mibelu ya mu Bible. Bualu ebu budi bukolesha dituishibua dietu dia ne: lumu luimpe lua Bukalenge mmukenji udi muntu yonso ne bua kumvua.

16. Anu mudi Misambu 46:1-3 uleja, mmunyi mudi ditabuja dietu kudi Yehowa ne kudi Yezu dikolesha didisuika dietu dia kuyisha?

¹⁶ Tudi kabidi tuitabuja Yehowa muena mukenji utudi tuyisha, ne tuitabuja Yezu udiye muteke Mukalenge wa Bukalenge buende. (Yone 14:1) Nansha nsombelu kayi mutufikile, Yehowa neikale anu tshinyemenu tshietu ne bukole buetu. (Bala Misambu 46:1-3.) Bualu bukuabu, tudi bashindike ne: mu diulu mudi Yezu amu udi ulombuelamu mudimu wa diyisha, wenza nanku ne bukole ne bukokeshi budi Yehowa mumupeshe.​—Mat. 28:18-20.

17. Fila tshilejilu tshidi tshileja bua tshinyi tudi ne bua kutungunuka ne kuyisha.

¹⁷ Ditabuja didi dikolesha dituishibua dietu dia ne: Yehowa neabeneshe bitudi tuditatshisha bua kuenza, pamuapa mu mushindu utudi katuyi batekemene to. (Muam. 11:6) Tshilejilu, dituku dionso edi bantu binunu ne binunu batu bapitshila ku mêsa ne ku tumatempu kututu tutekela mikanda. Mushindu wa kuyisha  eu mmushindu muimpe anyi? Wowu muine ke wowu! Mudimu wetu wa Bukalenge wa ngondo wa 11/2014 uvua muakule bua nsongakaji kampanda uvua ulonga tulasa tua bifulu bia mabue a masanga uvua mujinge kufunda malu a Bantemu ba Yehowa mu mukanda wende wa njikijilu. Kavua mumanye muaba uvua Nzubu wa Bukalenge to, kadi wakamona miaba ivua Bantemu batekela mikanda ku tshilongelu tshiabu atshi, kuyaye kuangata mikanda bua kuangatshilamu malu a yeye kufunda. Ndekelu wa bionso, wakalua kubatijibua ne lelu udi mpanda-njila wa pa tshibidilu. Malu a nunku adi atupesha muoyo wa kuyisha bualu adi aleja ne: kutshidi bantu badi bakeba kumvua mukenji wa Bukalenge.

18. Bua tshinyi tudi bashindike ne: mudimu wa diyisha Bukalenge neuye too ne ku ndekelu anu mudi Yehowa musue?

¹⁸ Tuikale bajadike ne: mudimu wa kuyisha newujike anu pa dîba diawu. Mona tshivua tshienzeke mu tshikondo tshia Noa. Yehowa wakaleja ne: utu mumanye kuenza malu anu pa dîba diawu menemene. Bidimu bitue ku 120 kumpala, wakakosa dîba divua Mvula wa kabutu ne bua kutuadija. Panyima pa bidimu bia bungi, Yehowa wakapesha Noa mudimu wa kuenza buatu. Noa wakenza pamuapa bidimu 40 anyi 50 muditue anu mu mudimu mukole kumpala kua Mvula wa kabutu kutuadija. Nansha muvua bantu kabayi bamuteleja, wakatungunuka ne kubayisha bua kubadimuija too ne pakamba Yehowa ne: dîba dia kubueja nyama mu buatu dikavua dikumbane. Pashishe, pakakumbana dîba, “Yehowa wakamukangila tshiibi.”​—Gen. 6:3; 7:1, 2, 16.

19. Tuetu katuyi balekele tshianza tshietu tshikisha, tudi mua kushala bindile tshinyi ne mioyo kuulu kuulu?

¹⁹ Yehowa ukadi pa kuimanyika mudimu wa kuyisha; ‘neakangile’ bulongolodi bua Satana tshiibi, mmumue ne: neabubutule, pashishe ulua kuenza bulongolodi bupiabupia bua buakane. Mu dindila tshikondo atshi, tuidikijayiku Noa, Habakuka, ne bakuabu bavua kabayi balekele tshianza tshiabu tshikisha. Tushalayiku badifile mu mudimu wa buambi, tuikalayi ne lutulu, ne tuikala ne ditabuja dikole mu milayi ya Yehowa.