1. Ntshinyi tshidi bakuabu mua kumvua padibu bipata muntu udibu banange mu tshisumbu?

 MBIPATE muntu kampanda uudi munange mu tshisumbu anyi? Bidi mua kuikala bikunyingalaja bikole! Muanetu wa bakaji mukuabu diende Hilda udi wamba ne: “Pavua bayanyi mufue panyima pa tuetu bamane kuenza bidimu 41 mu dibaka, mvua ngela meji ne: abu ke bualu bubi buvua bupite onso avua mua kumfikila. * Kadi pakipatabu muananyi mu tshisumbu, kushiyaye mukajende ne bana, biakansama kabidi ku muoyo bikole menemene!”

2-3. Bilondeshile Misambu 78:40, 41, Yehowa utu umvua mushindu kayi padi bantu bende balekela kumutendelela?

² Anji elabi meji muvuabi ne bua kuikala bibungamije Yehowa pavua bamue banjelu bende bamutombokele! (Yuda 6) Ela kabidi meji kanyinganyinga kavuaye mua kuikala naku pavuaye umona bena mu tshisamba tshia Isalele tshivuaye munange bamutombokela misangu ne misangu. (Bala Misambu 78:40, 41.) Ikala mutuishibue ne: Tatu wetu wa mu diulu udi mutunange utu kabidi unyingalala padi muntu uudi pebe munange ulekela kumutendelela. Mmumanye kanyinganyinga kaudi naku. Bua luse luende neakukankamije ne neakukuatshishe mudibi bikengela.

³ Mu tshiena-bualu etshi netumone tshitudi mua kuenza bua Yehowa kutuambuluisha tshikondo tshionso tshitudi ne kanyinganyinga aku. Netumone kabidi tshitudi mua kuenza bua kuambuluisha bena mu tshisumbu bakuabu badi pabu ne lutatu lumue lumue elu. Kadi tuanji kumona imue ngenyi mibi itudi ne bua kuepuka.

4. Mmushindu kayi utu baledi ba bungi bumvua padi muana ulekela kutendelela Yehowa?

⁴ Padi muana ulekela kutendelela Yehowa, pa tshibidilu baledi  batu badiebeja tshivuabu bapangile bua kuenza bua yeye kushala mu bulelela. Bavua bipate muana wa muanetu kampanda diende Luke mu tshisumbu. Uvua muambe ne: “Ngakadiela tshilumbu pambidi. Meme kubanga too ne kulota bilota bibi. Imue misangu mvua ndila ne muadi wetu eu, binsamisha muoyo wa munda.” Muanetu wa bakaji mukuabu diende Elizabeth uvua mutuilangane ne bualu bua muomumue. Uvua udiambila ne: “Mbualu bubi kayi bundi meme mamuende mua kuikala muenze? Mvua mumone ne: mvua mupangile mua kulongesha muananyi njila wa bulelela.”

5. Padi muntu ulekela kutendelela Yehowa tshilema ntshia nganyi?

⁵ Mbimpe tuvuluke ne: Yehowa mmutupeshe tuetu bonso budikadidi bua kudisunguila malu. Mmumue ne: tudi mua kusungula bua kumutumikila anyi kubenga kumutumikila. Kudi bamue bansonga bavua baledi babu kabayi tshilejilu tshimpe tshia kulonda mu ditendelela Yehowa, kadi basungule bobu bua kushala balamate Yehowa too ne lelu. Kudi bakuabu pabu bavua baledi babu benze muabu muonso bua kubakolesha mu diumvuangana ne mêyi manene a mu Bible, kadi padibu bakole balue kubenga bua kutendelela Yehowa. Nanku yonso wa kutudi udi ne bua kudiangatshila dipangadika dia kutendelela Yehowa anyi kubenga kumutendelela. (Yosh. 24:15) Baledi wetu, nuenu ne kanyinganyinga bualu muana mmulekele kutendelela Yehowa, lekelayi kudipisha nuamba ne: bionso ebi ntshilema tshietu!

6. Ntshinyi tshidi muana mua kumvua muledi wende yeye mulekele kutendelela Yehowa?

⁶ Misangu mikuabu, tatu anyi mamu ke utu ulekela bulelela ne umbuka kumbelu. (Mis. 27:10) Bidi mua kubungamija bana bibi menemene bualu batu beyemena baledi babu babangata bu tshilejilu tshia kulonda. Pavuabu bipate tatuende wa muanetu mukuabu diende Esther mu tshisumbu, wakamba ne: “Mvua ndila muadi misangu yonso bualu mvua mumone ne: kavua anu muye kule ne bulelela patupu to, kadi uvua kabidi mudiangatshile dipangadika dia kulekela kutendelela Yehowa. Ndi munange tatu, nanku pavuabu bamuipate mu tshisumbu, mvua anu nsamisha mutu bua kujadika ni uvua bimpe. Bivua bimpande muoyo wa munda.”

7. Ntshinyi tshitu Yehowa umvuila bana bena baledi badibu bipate mu tshisumbu?

⁷ Bana wetu, patubu bipata muledi mu tshisumbu, bitu bitusama ku muoyo bua bualu buenu! Ikalayi bajadike ne: Yehowa pende mmumanye kanyinganyinga kanudi naku. Mmununange ne udi unuanyisha bua munudi ne lulamatu, nansha tuetu bena Kristo nenu kabidi. Vulukayi kabidi ne: kanuena ba kuela tshilumbu pambidi bua mapangadika a baledi benu to. Anu mutukavua baleje kuulu eku, Yehowa mmupeshe muntu yonso budikadidi bua kudisunguila malu. Nunku muntu yonso udi mudilambule ne mubatijibue udi ne bua ‘kudiambuila bujitu bua mudimu wende.’​—Gal. 6:5, dim.

8. Ntshinyi tshidi bena mu dîku ba lulamatu ne bua kuenza padibu bindile bua wabu udibu banange apingane kudi Yehowa? (Tangila kabidi kazubu ka “ Pingana kudi Yehowa.”)

⁸ Padi muntu kampanda uudi munange ulekela kutendelela Yehowa, wewe utekemena ne: dimue dituku neapingane kudiye ki mbibi to. Kadi bua mpindieu tshiudi mua kuenza ntshinyi? Dienzeja bua kulama ditabuja diebe dikole. Wewe wenza nanku newikale tshilejilu tshimpe kudi bena mu dîku bakuabu, nansha mene kudi wenu udi mulekele kutendelela Yehowa au. Neupete kabidi bukole buudi nabu dijinga bua kupita ne kanyinganyinga kaudi naku. Tuakule mpindieu bua amue malu masunguluke audi mua kuenza bua kulama ditabuja diebe dikole.

9. Ntshinyi tshiudi mua kuenza bua kulama ditabuja dikole? (Tangila kabidi kazubu ka “ Mvese idi mua kukusamba muntu uudi munange yeye mulekele kutendelela Yehowa.”)

⁹ Dienzeja bua kuikala ne bibidilu bimpe bia mu nyuma. Bidi bikengela utungunuke ne kukolesha ditabuja diebe ne dia bena mu dîku bakuabu. Mmushindu kayi uudi mua kuenza nanku? Ikala ne programe wa kubala Dîyi dia Nzambi, kuela meji a biudi ubala ne kubuela mu bisangilu bua upete bukole bua kudi Yehowa. Tatuende wa muanetu Joanna ne yayende bakalekela kutendelela Yehowa. Joanna udi wamba ne: “Ntu ngumvua muoyo wa munda utukija pantu mbala miyuki ya mu Bible bu mudi wa Abigayila, wa Esetê, wa Yobo, wa Jozefe, ne wa Yezu. Tshilejilu tshiabu ntshimpeteshe ngenyi mimpe idi mikepeshe kanyinganyinga kamvua naku. Misambu yetu ya pa buayi itu kabidi inkolesha.”

10. Bilondeshile Misambu 32:6-8, ntshinyi tshitudi mua kuenza bua kupita ne malu adi atubungamija?

¹⁰ Ambila Yehowa malu onso adi makutonde. Ikala usambila misangu yonso iudi umvua bualu bukubungamija. Sengelela Nzambi wetu wa dinanga bua akuambuluishe umone malu mutuye uamona, ‘akupeshe busunguluji ne akulongeshe njila uudi ne bua kuendela.’ (Bala Misambu 32:6-8.) Bua kuamba bulelela, bidi mua kukukolela bua kuambila Yehowa tshiudi umvua menemene. Kadi Yehowa mmumanye bimpe kanyinganyinga kaudi naku. Mmukunange bikole ne udi ukulomba bua umupuile yebe ya munda.​—Ekes. 34:6; Mis. 62:7, 8.

11. Bilondeshile Ebelu 12:11, bua tshinyi mbimpe tueyemene Yehowa bua mudiye utunyoka ne dinanga? (Tangila kabidi kazubu ka “ Dipatshibua mu tshisumbu mmushindu udi Yehowa unyoka bantu bualu mmubanange.”)

¹¹ Tuaku dipangadika didi bakulu bangate nyama ku mikolo. Kuipata muntu mu tshisumbu mmushindu udi Yehowa mulongolole malu. Bua dinanga didiye nadi, udi unyoka muntu yonso bua diakalenga diende, too ne muenji wa mpekatu. (Bala Ebelu 12:11.) Kudi bantu badi mua  kuakula bibi bua mushindu udi bakulu bakose tshilumbu; kadi tumanye ne: bantu ba nanku kabatu pa tshibidilu basue kuakula bibi bua udi muenze mpekatu au to. Katuena bamanye malu onso mudiwu to. Ke bualu kayi mbimpe kueyemena bakulu bavua mu komite wa dilumbuluisha bua dipangadika didibu bangate, bualu batu badienzeja bua kulonda mêyi manene a mu Bible ne kulumbuluisha bantu “bua Yehowa.”​—2 Kul. 19:6.

12. Mmalu kayi mimpe adi bakuabu bapete bua muvuabu batue dinyoka dia Yehowa nyama ku mikolo?

¹² Wewe munemeke dipangadika didi bakulu bangate dia kuipata muntu uudi munange mu tshisumbu, udi bushuwa mua kuambuluisha muntu au bua apingane kudi Yehowa. Elizabeth utukadi batele kuulu eku udi wamba ne: “Bivua binsama ku muoyo bua mumvua tshiyi mua kuyukila ne muananyi wa balume mukulumpe anyi kumonangana nende. Kadi pakapinganaye kudi Yehowa, yeye muine wakamba ne: bavua bangate dipangadika dimpe bua muvuabu bamuipate. Panyima pa matuku wakalua kuleja ne: bivua bimulongeshe malu a bungi. Ngakalua kunanga dinyoka dia Yehowa bikole.” Mark bayende wa Elizabeth udi wamba pende ne: “Matuku a bungi pashishe, muananyi au wakangambila ne: bualu bukuabu buvua bumusake bua kupingana kudi Yehowa mbua mutuvua bakose nende malanda onso. Ndi ne disanka dia bungi bua mudi Yehowa mutuambuluishe bua kutumikila.”

13. Ntshinyi tshidi mua kukuambuluisha bua kupita ne kanyinganyinga?

¹³ Yukila ne balunda bebe badi mua kukumvuila. Ikala usomba ne bena Kristo netu bashindame badi mua kukuambuluisha bua kujimiji ditekemena diebe to. (Nsu. 12:25; 17:17) Joanna utukadi batele udi wamba ne: “Mu lungenyi luanyi, mvua ndimona nkaya. Kadi pamvua nyukila ne balunda ba kueyemena, muoyo wa munda uvua utukija.” Ntshinyi tshiwenza bena mu tshisumbu bakuabu bobu bakuambila malu adi akubungamija?

14. Bua tshinyi bidi bikengela ‘tutungunuke ne kulejangana lutulu ne kufuilangana luse ne muoyo mujima’?

¹⁴ Ikala ne lutulu ne bena Kristo nebe. Bua kuamba malu mudiwu, kuedi meji ne: bantu bonso nebakule anu malu mimpe to. (Yak. 3:2) Tuetu bonso tudi bapange bupuangane. Ke bualu kayi kabikukemeshi muntu yeye mupange tshia kukuambila anyi muambe bualu budi bukutapa ku muoyo kayi nansha mujingulule to. Vuluka mubelu wa mupostolo Paulo eu: “Nutungunuke ne kulejangana lutulu ne kufuilangana luse ne muoyo mujima nansha muntu yeye tshilumbu ne mukuabu.” (Kolos. 3:13) Bavua bipate mulela wa muanetu wa bakaji mukuabu mu tshisumbu. Udi wamba ne: “Yehowa mmungambuluishe bua kufuila bena Kristo nanyi luse bua muvua mêyi abu antapa ku muoyo pabu bakula bua kunkankamija.” Ntshinyi tshidi bena mu tshisumbu mua kuenza bua kuambuluisha bena mu dîku bakuabu badi ne lulamatu?

15. Ntshinyi tshitudi mua kuenza bua kuambuluisha bena mu dîku badi ne wabu udibu bipate mu tshisumbu?

¹⁵ Tulejayi bena mu dîku bakuabu badi ne lulamatu mutudi ne muoyo muimpe. Muanetu wa bakaji mukuabu diende Miriam udi uleja ne: uvua utshina bua kuya mu bisangilu pavuabu  bipate muakunyende wa balume mu tshisumbu. Udi wamba ne: “Mvua ntshina bivua bantu mua kuamba. Kadi kuvua balunda bimpe bavua babungame pabu bua tshivua tshienzeke atshi ne kabayi bakula bibi to. Bu muvuabu bumvua pabu nanku bivua bingambuluishe bua kumona ne: tshivua nkaya to.” Muanetu wa bakaji mukuabu kabidi udi wamba ne: “Pavuabu bipate muananyi wa balume mu tshisumbu, balunda banyi ba pa muoyo bakalua kunsamba. Bamue bavua bangambila ne: bavua bapange tshia kungambila. Bakuabu bakalua kudila nanyi ne banga kumfundila mikanda ya kunkankamija nayi. Malu onso au akangambuluisha bikole!”

16. Ntshinyi tshidi bena mu tshisumbu mua kuenza bua kusamba badi ne wabu udibu bipate mu tshisumbu ne kubambuluisha?

¹⁶ Tutungunukayi ne kuambuluisha bena mu dîku ba lulamatu. Badi ne dijinga dia kumvua nangananga mpindieu ne: tudi babanange ne mbasue tuikale tubakankamija. (Eb. 10:24, 25) Kudi misangu itu bena mu dîku dia ba udibu bipate mu tshisumbu bamona ne: bena mu tshisumbu bakadi babenzela pabu malu anu bu bantu bipata. Ki mbimpe tubenzele malu nanku to! Mbimpe tuikale tuela bana badi baledi babu balekele kutendelela Yehowa kalumbandi ne tubakankamija. Bavua bipate bayende wa muanetu Maria mu tshisumbu, bayende kumbuka kumushiya ne bana. Udi wamba ne: “Balunda banyi bakuabu bakalua kuanyi bobu kutulambila ne kungambuluishabu bua kulonga ne bana banyi. Bavua baditeke pa muaba wanyi ne tuetu kudila nabu. Bavua bangakuila pavua bantu bangendeshila lumu lubi. Bushuwa, bavua benze bua ndiumvue musulakane!”​—Lomo 12:13, 15.

17. Mmushindu kayi udi bakulu mua kukankamija mikoko idi ne kanyinganyinga?

¹⁷ Bakulu wetu, dîba dionso didi mpunga umueneka ikalayi nukankamija bena mu dîku ba lulamatu. Nudi ne mudimu wa pa buawu wa kukolesha bena Kristo nenu badi ne babu badi balekele kutendelela Yehowa ku muoyo. (1 Tes. 5:14) Ikalayi nukeba mishindu ya kubakankamija kumpala kua bisangilu ne padibi bijika. Ikalayi nuya kubatangila ku mabu ne nusambila nabu. Ikalayi nuya nabu mu buambi, anyi misangu mikuabu nubabikila bua kubuelabu mu ntendelelu wenu wa mu dîku. Bidi bikengela bakulu bikale baditeka pa muaba wa mikoko ya Yehowa idi ne kanyinganyinga, bayinange ne bayitabalela mudibi bikengela.​—1 Tes. 2:7, 8.

18. Bilondeshile 2 Petelo 3:9, ntshinyi tshidi Yehowa mutekemene kudi badi balekele kumutendelela?

¹⁸ Yehowa “ki mmusue bua muntu nansha umue abutudibue, kadi mmusue bua bonso bafike ku dinyingalala bua mpekatu yabu.” (Bala 2 Petelo 3:9.) Nansha muntu muenze mpekatu munene, muoyo wende udi anu ne mushinga kudi Nzambi. Vuluka ne: Yehowa mmufile mulambu wa mushinga mukole wa Muanende udiye munange bu tshia kupikulangana natshi bua benji ba mpekatu. Yehowa udi wambuluisha benji ba mpekatu bua kupingana kudiye bualu udi ne dinanga. Mmutekemene ne: nebapingane kudiye anu mudi tshilejilu tshivua Yezu mufile tshia muana mujimine tshileja. (Luka 15:11-32) Bantu ba bungi bavua balekele kutendelela Yehowa mbalue kupingana kudi Tatu wabu wa mu diulu udi mubanange. Bena mu tshisumbu pabu mbabakidile ne disanka dionso. Elizabeth utukadi batele uvua ne disanka dia bungi pavuabu bapingaje muanende mu bulongolodi. Padiye upingaja meji panyima, udi wamba ne: “Ndi ne disanka dia bungi bua muvua bana betu batukankamije bua kubenga kuteketa mu maboko.”

19. Bua tshinyi mbimpe tutungunuke ne kueyemena Yehowa?

¹⁹ Tueyemenayi Yehowa misangu yonso. Mibelu yonso ituye utupesha mbua diakalenga dietu. Ntatu utu upeshangana bintu, uditeka pa muaba wa bakuabu ne munange bantu bonso badi bamunange ne bamutendelela mubanangilamu. Ikala mutuishibue ne: kakukulekela tshikondo tshiudi ne kanyinganyinga to. (Eb. 13:5, 6) Mark utukadi batele udi wamba ne: “Yehowa kavua mutulekele nansha. Udi anu pabuipi bua kutuambuluisha patudi mu lutatu.” Yehowa neatungunuke ne kukupesha “bukole budi bupite bua pa tshibidilu.” (2 Kol. 4:7) Bushuwa, udi mua kushala ne lulamatu kudi Yehowa ne kuikala ne ditekemena nansha padi muntu uudi munange ulekela kumutendelela.