1-2. a) Anu mudibu baleje mu Nsumuinu 16:31, bidi bikengela tuikale tumona bana betu ba lulamatu bakadi bakulakaje mushindu kayi? b) Nnkonko kayi ituandamuna mu tshiena-bualu etshi?

 PADIBU bapatuilaku mabue a mbongo mu buloba, kaatu abalakana anyi akoka ntema to. Nanku padi muntu umona dibue dia mbongo mu buloba, udi mua kudidiata kupita kayi udimona bu tshintu tshia mushinga to.

² Bana betu ba lulamatu bakadi bakulakaje badi pabu anu bu mabue a mbongo mu mishindu ya bungi; badi ne mushinga wa bungi. Dîyi dia Nzambi didi difuanyikija nsuki yabu mitoke ne tshifulu tshia butumbi. (Bala Nsumuinu 16:31; 20:29) Kadi tudi mua kufika ku dipanga kumona mushinga udibu nawu bipepele. Bansonga batu bangata bana betu aba ne mushinga batu bapeta tshintu kampanda tshia mushinga tshidi tshipite bubanji. Mu tshiena-bualu etshi netuandamune nkonko isatu eyi: Bua tshinyi Yehowa utu wangata bana betu ba lulamatu bakadi bakulakaje ne mushinga wa bungi? Bua tshinyi bana betu aba badi ne mushinga mu bulongolodi bua Yehowa? Ntshinyi tshitudi mua kuenza bua tshilejilu tshiabu kutuambuluishatshi bikole?

3. Bilondeshile Misambu 92:12-15, bua tshinyi Yehowa utu wangata bana betu ba lulamatu bakadi bakulakaje ne mushinga wa bungi?

³ Yehowa Nzambi utu wangata bana betu ba lulamatu bakadi bakulakaje aba ne mushinga wa bungi. Utu umona tshidibu munda menemene ne wanyisha ngikadilu milenga idibu nayi. Bitu bisankisha Yehowa patuye umona bana betu aba balongesha bansonga malu adibu bafike ku dimanya mu bidimu bidibu bamuenzele mudimu ne lulamatu. (Yobo 12:12; Nsu. 1:1-4) Yehowa udi kabidi ubanyisha bikole bua dinanukila diabu. (Mal. 3:16)  Mbatuilangane ne ntatu ya mishindu ne mishindu, kadi mbalame anu ditabuja dikole kudiye. Ditekemena didibu nadi dia matuku atshilualua ndilue kushindama kupita dia patshivuabu balongelaku bulelela. Yehowa mmubanange bualu badi batungunuka ne kumanyisha dîna diende “nansha ku bukulakaja.”​—Bala Misambu 92:12-15.

4. Mmalu kayi adi mua kukolesha bana betu bakadi bakulakaje ku muoyo?

⁴ Biwikala wenda uya mutangile ku bukulakaja, ikala mutuishibue ne: Yehowa ki mmupue malu onso audi muenze mu mudimu wende muoyo to. (Eb. 6:10) Bidi bisankisha Tatu wetu wa mu diulu bua muudi mudifile mu mudimu wa diyisha ne tshisumi. Udi munanukile mu ntatu too ne ivua ikubungamija bikole. Udi mutumikile mikenji miakane ya mu Bible, muenze midimu ya mushinga mu bulongolodi bua Yehowa ne mulongeshe bakuabu. Udi muenze muebe muonso bua kuibidilangana ne malu a bungi adi mashintuluke mu bulongolodi bua Yehowa. Udi mukankamije bana betu bakuabu badi mu mudimu wa ku dîba ne ku dîba. Yehowa Nzambi mmukunange bikole bua lulamatu luebe. Mmulaye ne: “Kakulekela bena lulamatu bende nansha”! (Mis. 37:28) Udi ukujadikila wamba ne: “Too ne padi nsuki [yebe] itoka, meme nentungunuke ne [kukuambula].” (Yesh. 46:4) Nunku kuambi ne: bu muukadi mukulakaje, kuena kabidi ne bua nsongo buudi mua kuenza mu bulongolodi bua Yehowa to. Udi ne mushinga wa bungi!

5. Mbualu kayi budi bana betu bakadi bakulakaje kabayi ne bua kupua muoyo?

⁵ Bana betu bakadi bakulakaje badi mua kuambuluisha bulongolodi bua Yehowa mu malu a bungi. Nansha mudibu mua kuikala kabatshiyi ne bukole buvuabu nabu kumpala, badi ne dimanya dia bungi didibu bapete bua bungi bua bidimu bikadibu benze. Yehowa udi mua kutungunuka ne kukuata nabu mudimu mu mishindu ya bungi, anu mudi bilejilu bia kale ne bia matuku etu aa bidi bilonda ebi bileja.

6-7. Fila bilejilu bia mu Bible bia bakulakaje bavua Yehowa muenzele malu mimpe bua muvuabu bamuenzele mudimu ne lulamatu.

⁶ Mu Bible mudi bilejilu bimpe bia bena lulamatu bavua batungunuke ne kuenzela Yehowa mudimu ku bukulakaja. Tshilejilu, Mose wakatuadija mudimu wa buprofete ne wa kulombola tshisamba tshia Isalele pakavuaye ne bidimu  bitue ku 80. Danyele wakatungunuka ne kuenza mudimu bu muprofete wa Yehowa too ne pakavuaye ne bidimu bipite pa 90. Mupostolo Yone pende ukavua ne bidimu bipite pa 90 pavuaye mufunde mukanda wa Buakabuluibua ku bukole bua nyuma wa Nzambi.

⁷ Bena lulamatu bakuabu ba bungi kabavua batambe kumanyika to, nunku bivua bipepele bua bantu kupanga kubamanya. Kadi Yehowa yeye uvua mubamanye ne wakabafuta bua lulamatu luabu. Tshilejilu, mu Bible badi bakula anu kakese bua Shimeona “uvua muntu muakane ne mudifile kudi Nzambi.” Kadi Yehowa yeye uvua mumumanye bimpe, ne wakamupesha diakalenga dia kumona Yezu patshivuaye muana ne dia kuamba mêyi a buprofete avua atangila muana au ne mamuende. (Luka 2:22, 25-35) Vuluka kabidi muprofete mukaji Ana uvua mukaji mukamba. Ukavua ne bidimu 84, kadi “kavua upangika ku ntempelo nansha.” Bu muvuaye uya ku ntempelo pa tshibidilu, Yehowa wakamubenesha kumupeteshaye diakalenga dia kumona Yezu patshivuaye muana. Ana ne Shimeona bavua ne mushinga wa bungi kudi Yehowa.​—Luka 2:36-38.

8-9. Mmushindu kayi udi bana betu bakamba bambuluisha mu bulongolodi bua Yehowa?

⁸ Matuku etu aa, bakulakaje betu ba lulamatu ba bungi badi tshilejilu tshimpe tshitambe kudi bansonga. Tuangate tshilejilu tshia muanetu wa bakaji Lois Didur. Uvua ne bidimu 21 patupu pakaluaye mpanda-njila wa pa buende mu Canada. Pashishe yeye ne bayende John bakenza bidimu bia bungi mu mudimu wa butangidi buena ngendu. Pashishe bakaya kuenza mudimu ku Betele wa Canada munkatshi mua bidimu bipite pa 20. Pakavua Lois ne bidimu 58, bakabalomba bua kuya kuenza mudimu mu Ukraine. Ntshinyi tshivuabu mua kuenza? Bavua mua kudiambila ne: tukadi bakulakaje katuakukumbana bua kuya kuenza mudimu mu ditunga dikuabu anyi? Bakitaba bua kuya, John yeye kulua muena mu Komite wa filiale mu ditunga adi. Pakafua John panyima pa bidimu muanda mutekete, Lois wakitaba bua kutungunuka ne mudimu wende mu ditunga adi. Ukadi mpindieu ne bidimu 81, ne udi anu wenzela Yehowa mudimu ne lulamatu ku Betele wa Ukraine. Mbamunange bikole kudi bana betu bonso ba kuntu aku.

⁹ Bana betu badi bakamba anu bu mudi Lois kabatu batamba kumanyika kudi bantu bu muvuabu bamanyike patshivua babayabu ne muoyo to. Nansha nanku, badi anu ne mushinga wa bungi. Bana betu ba bakaji bavua bakuatshishe babayabu bidimu bia bungi batshidi batungunuka ne kuenzela Yehowa mudimu ne lulamatu; Yehowa udi ubangata ne mushinga wa bungi. (1 Tim. 5:3) Badi kabidi bakankamija bansonga.

10. Ntshilejilu kayi tshimpe tshidi Tony mushiye?

¹⁰ Bana betu ba bungi bakadi bakulakaje badi badisombele anyi badi basombe ne balela babu badi pabu ne mushinga wa bungi. Tshilejilu, muanetu wa balume mukuabu diende Tony ukadi mpindieu musombele mu nzubu utubu balamina bakulakaje. Uvua mubatijibue mu ngondo wa 8/1942 ku Pennsylvanie mu États-Unis, pavuaye ne bidimu 20. Panyima pa matuku makese, bakamuambila bua kubuela ku busalayi.  Bu muvuaye mubenge, bakamuela mu buloko kuenzaye bidimu bibidi ne tshitupa. Yeye ne mukajende Hilda mbakoleshe bana babidi mu bulelela. Mu kupita kua bidimu, Tony uvua mutangidi-muludiki (utudi tubikila mpindieu ne: mutangidi wa malu a kasumbu ka bakulu) mu bisumbu bisatu, uvua kabidi mutangidi wa mpuilu wa tshijengu. Uvua ulonga Bible ne bena mu buloko ne wenzejamu bisangilu. Nansha mukadi Tony ne bidimu 98, ki mmulekele kuenzela Yehowa mudimu to. Udi wenza tshionso tshidiye mua kuenza mu mudimu eu, ne weleshangana diboko ne bena mu tshisumbu tshiabu.

11. Ntshinyi tshitudi mua kuenza bua kuleja mutudi tuangata bana betu bakadi bakulakaje badi badisombele anyi badi basombe ne balela babu ne mushinga?

¹¹ Ntshinyi tshitudi mua kuenza bua kuleja mutudi tuangata bana betu bakadi bakulakaje badi badisombele anyi badi basombe ne balela babu ne mushinga? Padiku mushindu, bakulu badi mua kubambuluisha bua bikale babuela bisangilu ne bayisha. Tudi mua kuleja mutudi tutabalela bana betu aba patudi tuya kubatangila anyi tubabikila ku biamu bia tumonangana. Mbimpe tutambe kuvuluka kabidi bakulakaje badi basombele kule ne muaba udi tshisumbu. Tuetu katuyi badimuke, tudi mua kupua bana betu aba muoyo. Bidi mua kukolela bamue ba ku bana betu aba bua kutulondelabu malu abu. Kadi tuetu bakebe dîba dia kubela nkonko ne tubateleja padibu batulondela malu mimpe adibu bamone mu bulongolodi bua Yehowa, nebitukankamije bikole.

12. Mbakulakaje ba mushindu kayi batudi mua kupeta mu tshisumbu?

¹² Bidi mua kutukemesha tuetu balue kujingulula ne: mu tshisumbu tshietu mudi bakulakaje badi tshilejilu tshimpe tshia lulamatu. Muanetu wa bakaji mukuabu diende Harriette uvua muenzele Yehowa mudimu bidimu bia bungi mu tshisumbu tshiabu ku New Jersey, mu États-Unis. Pashishe wakumbuka kuyaye kusombela kua muanende wa bakaji. Bana betu ba mu tshisumbu tshipiatshipia tshivuaye mubuele bakakeba mushindu wa kuibidilangana nende, kuluabu kumona ne: uvua ne mushinga wa bungi. Muanetu au wakabalondela malu adi akankamija avua mamufikile mu mudimu wa buambi patshivuaye ulongelaku bulelela mu bidimu bia 1920. Tshikondo atshi, uvua ne tshibidilu tshia kuenda ne bulosu buende bua mênu pavuaye mu buambi, bualu uvua mumanye ne: bavua mua kumukuata ne kumuela mu buloko. Mu 1933, bakamuela mu buloko misangu ibidi, yeye kuenzamu lumingu lujima misangu yonso ibidi ayi. Tshikondo tshionso atshi, bayende uvua kayi yeye Ntemu uvua umuambuluisha, utabalela kabidi bana babu basatu batshivua batekete. Bushuwa, bana betu ba lulamatu bakadi bakulakaje badi anu bu Harriette mba kutua mushinga wa bungi!

13. Ntshinyi tshitudi balonge bua mushinga udi nawu bana betu bakadi bakulakaje mu bulongolodi bua Yehowa?

¹³ Bana betu bakadi bakulakaje badi ne mushinga wa bungi mu bulongolodi bua Yehowa. Mbadimuene ne abu abidi mudi Yehowa mubeneshe bulongolodi buende mu mishindu ya bungi ne mudiye mubabeneshe bobu bine. Bilema bivuabu benze mbibambuluishe bua kulonga malu a bungi a mushinga. Tuikalayi tubangata bu “mpokolo wa meji,” ne tulongela malu kudibu. (Nsu. 18:4) Tuetu tukeba dîba dia kubamanya bimpe, ditabuja dietu nedikole ne netumanye kabidi malu makuabu a bungi!

14. Ntshinyi tshidi Dutelonome 32:7 ukankamija bansonga bua kuenza?

¹⁴ Tukebayi mushindu wa kuikala kuyukila ne bana betu bakadi bakulakaje. (Bala Dutelonome 32:7.) Bushuwa, mêsu abu adi mua kuikala akadi bitayitayi, bakadi benda badikoka, ne bidibu bamba kabitshiyi biumvuika bimpe. Kadi batshidi anu ne dijinga dia kuenza malu a bungi, ne badi ne “dîna dimpe” kudi Yehowa. (Muam. 7:1)  Tuikalayi tuvuluka tshidi Yehowa mubanangile. Tutungunuke ne kubatua mushinga. Tuikalayi bu Elisha wakasengelela Eliya dituku dia ndekelu divuabu nende bua ashale anu mumulamate. Wakamuambila misangu isatu ne: “Tshiakukulekela to.”​—2 Bak. 2:2, 4, 6.

15. Nnkonko kayi itudi mua kuela bakulakaje betu?

¹⁵ Ikala ukebaku dîba dia kuyukila ne bakulakaje, ubela nkonko ne dîyi dimpe bua kuleja muudi ubatabalela. (Nsu. 1:5; 20:5; 1 Tim. 5:1, 2) Udi mua kubela nkonko bu mudi eyi: “Pautshivua nsonga, ntshinyi tshivua tshikujadikile ne: uvua mupete bulelela?” “Mmushindu kayi uvua malu avua makufikile au makusemeje pabuipi ne Yehowa?” “Ntshinyi tshidi tshikupeteshe disanka mu mudimu wa Yehowa?” (1 Tim. 6:6-8) Pashishe ubateleja padibu bakulondela malu abu.

16. Padi muanetu ukadi mukulakaje ne utshidi nsonga bayukila, bidi bibambuluisha mushindu kayi?

¹⁶ Padi muanetu ukadi mukulakaje uyukila ne utshidi nsonga bitu bibambuluisha bonso babidi. (Lomo 1:12) Bansonga wetu, nebinuambuluishe bua kuanyisha mushindu utu Yehowa wenzela batendeledi bende ba lulamatu malu kuwanyishilamu, ne muanetu mukulakaje au neamone ne: nudi bamunange. Neikale ne disanka dia kunulondela malu onso mimpe adi Yehowa mumuenzele.

17. Bua tshinyi tudi tuamba ne: bana betu bakadi bakulakaje batu anu benda balengela padi bidimu bienda bipita?

¹⁷ Bulengele bua mubidi butu bujimina padi muntu wenda ukulakaja, kadi bantu badi bashala balamate Yehowa batu anu benda bamulengelela tshidimu tshionso tshidi tshipita etshi. (1 Tes. 1:2, 3) Bua tshinyi bidi nanku? Bualu badi balekela nyuma wa Nzambi ubafumba ne ubalengeja mu kupita kua bidimu. Patudi tudienzeja bua kumanya bakulakaje betu aba bimpe, tubatua mushinga, ne tulongela malu a bungi kudibu, tudi tulua kumona mushinga udibu nawu bushuwa!

18. Ntshinyi tshituamona mu tshiena-bualu tshidi tshilonda?

¹⁸ Tshisumbu tshidi tshitanta padi bansonga bangata bakulakaje ne mushinga, ne bakulakaje pabu bangata bansonga ne mushinga. Mu tshiena-bualu tshialonda, netumone mudi bana betu bakadi bakulakaje mua kuleja ne: badi bangata bansonga ne mushinga mu tshisumbu.