TSHIENA-BUALU TSHIA KULONGA 40
“Badi bafikisha bantu ba bungi ku buakane”
“Badi bafikisha bantu ba bungi ku buakane nebakenke bu mitoto, bua kashidi ne tshiendelele.”—DAN. 12:3.
MUSAMBU WA 151 Neababikile
KADIOSHA *
1. Mmalu kayi a dikema adi matuindile mu bukokeshi bua bidimu tshinunu?
DITUKU diatuadijabu kubisha bantu ku lufu pa buloba apa mu bukokeshi bua Kristo bua bidimu tshinunu, nedikale dituku dimpe dia katshia! Bonso badi bafuishe balela babu, batu ne dijinga dikole dia kubamona kabidi. Yehowa pende udi nadi. (Yobo 14:15) Elabi meji disanka dikala nadi bantu pa buloba bujima patuilanganabu ne balela babu babishabu ku lufu. Anu mutuvua bamone mu tshiena-bualu tshishale, “bakane,” badi ne mêna abu mu mukanda wa muoyo, ‘nebabishibue ku lufu bua muoyo.’ (Bien. 24:15; Yone 5:29) Pamuapa balela betu ba bungi nebikale munkatshi mua bantu badi bapetulula muoyo kumpala pabishabu bantu ku lufu pa buloba apa. * Bualu bukuabu, bantu “badi kabayi bakane,” bu mudi aba bavua kabayi bapete mpunga mukumbane wa kumanya Yehowa ne kumuenzela mudimu ne lulamatu kumpala kua kufuabu, nebabajule bua “dibishibua ku lufu dia dilumbuluisha.”
2, 3. a) Anu mudi Yeshaya 11:9, 10 wamba, mudimu munene wa dilongesha wa katshia ne katshia newikale mudimu kayi? b) Nkonko kayi ituandamuna mu tshiena-bualu etshi?
2 Nebikengele ne: balongeshe bantu bonso babishibua ku lufu. (Yesh. 26:9; 61:11) Ke bualu kayi nebikengele ne: kuenzeke mudimu mutambe bunene wa dilongesha utu katshia kawuyi muanji kuenzeka. (Bala Yeshaya 11:9, 10.) Bua tshinyi? Bualu nebikengele ne: bantu badi kabayi bakane balonge malu a Yezu Kristo, a Bukalenge bua Nzambi, a mulambu wa tshia kupikulangana natshi, ne bamanye mushinga wa dîna dia Yehowa ne bamanye kabidi bua tshinyi anu yeye nkayende ke udi ne bukenji bua kukokesha. Nansha bantu bakane nebikale ne bua kulonga bua kumanya malu adi Yehowa mulongolole bua buloba avuaye mulongeshe bantu bende ku kakese ku kakese. Bamue ba ku bena lulamatu aba bavua bafue bidimu bia bungi kumpala kua Bible kujika yonso mujima. Bantu bakane ne badi kabayi bakane nebikale ne malu a bungi a kulonga.
3 Mu tshiena-bualu etshi, netuandamune nkonko eyi: Mudimu munene wa kulongeshangana eu newenzeke mushindu kayi? Mmushindu kayi wikala malu enza bantu panyima pa bamane kubalongesha mua kuenza bua ne: mêna abu ashale anu mu mukanda wa muoyo anyi kaashadimu? Mandamuna a nkonko eyi adi ne bua kuikala ne mushinga wa bungi kutudi lelu. Anu mutuamona, amue mêyi a buprofete a dikema adi mu mukanda wa Danyele ne wa Buakabuluibua neatuambuluishe bua kutokesha ngumvuilu wetu wa tshienzeka pabishabu bantu ku lufu. Tshia kumpala, tukonkononayi malu a dikema akavuabu bambe mu dîyi dia buprofete didi mu Danyele 12:1, 2.
“BADI BALALE MU LUPUISHI . . . NEBAJUKE”
4, 5. Ntshinyi tshidi Danyele 12:1 wamba bua tshikondo tshia ku ndekelu?
4 Bala Danyele 12:1. Mukanda wa Danyele udi uleja dilondangana dia malu a dikema enzeka tshikondo tshia ku ndekelu. Tshilejilu, Danyele 12:1 udi uleja ne: Mikaele, Yezu Kristo, udi “wimanyina tshisamba [tshia Nzambi].” Tshitupa tshia dîyi dia buprofete etshi tshiakabanga kukumbana mu 1914 pakatekabu Yezu bu Mukalenge wa Bukalenge bua Nzambi bua mu diulu.
5 Kadi bavua bambile Danyele ne: Yezu uvua ne bua ‘kuimana’ mu “tshikondo tshia dikenga tshitu katshiyi tshianji kuikalaku katshia tshisamba tshikalaku too ne tshikondo atshi.” “Tshikondo tshia dikenga” etshi ke “dikenga dinene” didibu batele mu Matayi 24:21. Yezu udi wimana, anyi uluila bantu ba Nzambi ku ndekelu kua tshikondo tshia dikenga, mmumue ne: ku Armagedone. Mukanda wa Buakabuluibua udi wamba bua bantu aba ne: ‘mmusumba munene wa bantu badi bafume mu dikenga dinene.’—Buak. 7:9, 14.
6. Musumba munene wa bantu mumane kupanduka, ntshinyi tshienzeka? Umvuija. (Tangila kabidi tshiena-bualu tshia “Nkonko ya babadi” tshidi tshiakula bua dibishibua ku lufu bua kupeta muoyo pa buloba. Tshidi anu mu tshibejibeji etshi.)
6 Bala Danyele 12:2. Musumba munene wa bantu mumane kupanduka mu tshikondo tshia dikenga, ntshinyi tshienzeka? Kumpala tuvua tuela meji ne: mvese eu uvua wakula bua dibishibua ku lufu bua kuya mu diulu anyi bua muvua mudimu wetu wa diyisha ne bua kuvula nansha muvua baluishi betu benze bu bawimanyike wonso mu 1918. * Kadi lelu tudi tumvua ne: mêyi aa adi akula bua dibishibua dia bantu ku lufu dienzeka mu buloba bupiabupia bualua. Bua tshinyi tudi tuamba nanku? Muaku “lupuishi” udi kabidi mu Yobo 17:16, ne udi upetangana ne muaku “lukita.” Bualu ebu budi buleja ne: Danyele 12:2 udi wakula bua dibishibua ku lufu dietu diena dîna edi, ne nedienzeke panyima pa matuku a ku nshikidilu mamane kujika ne panyima pa mvita ya Armagedone.
7. a) Mmu ngumvuilu kayi muabishibua bamue ku lufu bua “muoyo wa tshiendelele”? b) Bua tshinyi edi ‘ndibishibua ditambe buimpe’?
7 Kadi ntshinyi tshidi Danyele 12:2 umvuija padiye wamba ne: bamue nebabishibue ku lufu bua “muoyo wa tshiendelele”? Bidi biumvuija ne: bantu badibu babisha ku lufu ne bafika ku dimanya Yehowa ne Yezu, anyi batungunuka ne kubamanya ne babatumikila munkatshi mua bidimu 1 000, ndekelu wa bionso nebapete muoyo wa tshiendelele. (Yone 17:3) Adi nedikale “dibishibua ditambe buimpe” dipite dibishibua dia bantu ku lufu divua dienzeka kale. (Eb. 11:35) Bua tshinyi? Bualu bantu abu bakalua kufua kabidi.
8. Bua tshinyi badi babisha bakuabu ku lufu “bua difuishibua bundu ne dipetudibua dia tshiendelele”?
8 Kadi bantu bonso babishibua ku lufu kabakuitaba bua Yehowa abalongeshe to. Dîyi dia buprofete didi mu Danyele didi diamba ne: nebabishe bamue ku lufu “bua difuishibua bundu ne dipetudibua dia tshiendelele.” Bu mualejabu lungenyi lua buntomboji, kabakufunda mêna abu mu mukanda wa muoyo ne kabakupeta muoyo wa tshiendelele to. Bobu ‘nebapetudibue tshiendelele,’ anyi nebababutule. Nunku Danyele 12:2 udi wakula bua tshiafikila bonso babishabu ku lufu bilondeshile malu enzabu panyima pa dibishibua diabu ku lufu. * (Buak. 20:12) Bamue nebapete muoyo wa tshiendelele; kadi bakuabu kabakuwupeta to.
“BADI BAFIKISHA BANTU BA BUNGI KU BUAKANE”
9, 10. Ntshinyi tshikuabu tshienzeka panyima pa dikenga dinene? Mbanganyi ‘bakenka bikole bu tshibuashibuashi tshia diulu’?
9 Bala Danyele 12:3. Ntshinyi tshikuabu tshienzeka panyima pa dilua dia “tshikondo tshia dikenga”? Pakumbusha mvese 2, mvese 3 udi wakula bua bualu buenzeka panyima pa dikenga dinene.
10 Mbanganyi ‘bakenka bikole bu tshibuashibuashi tshia diulu?’ Kudi tshidi tshituambuluisha bua kubamanya mu mêyi a Yezu adi mu Matayi 13:43, a ne: “Tshikondo atshi, bantu bakane nebakenke bu dîba mu Bukalenge bua Tatu wabu.” Bilondedeshile mêyi adi kuulu kua mvese eu, Yezu uvua wakula bua “bana ba Bukalenge,” mmumue ne: bana babu bela manyi bikalaye mua kuenza nabu mudimu mu Bukalenge bua mu diulu. (Mat. 13:38) Nunku Danyele 12:3 udi ne bua kuikala wakula bua bela manyi ne bua mudimu wenzabu mu bukokeshi bua bidimu tshinunu.
Bela manyi 144 000 nebeleshangane diboko bikole ne Yezu bua kulombola mudimu wa dilongesha wenzeka mu bidimu 1 000 (Tangila tshikoso 11)
11, 12. Mmudimu kayi wenza bela manyi 144 000 mu bidimu 1 000?
11 Bela manyi nebafikishe “bantu ba bungi ku buakane” mushindu kayi? Nebeleshangane diboko bikole ne Yezu bua kulombola mudimu wa dilongesha wenzeka pa buloba apa mu bidimu 1 000. Bela manyi 144 000 kabakukokesha anu bu bakalenge to, nebikale kabidi bakuidi. (Buak. 1:6; 5:10; 20:6) Nunku nebambuluishe mu mudimu wa ‘kuondopa bisamba,’ bambuluisha bantu bua kulua kabidi bapuangane ku kakese ku kakese. (Buak. 22:1, 2; Yeh. 47:12) Bua bualu abu bela manyi nebasanke be!
12 Munkatshi mua “ba bungi” bafikishabu ku buakane nemuikale banganyi? Nemuikale bantu badi babishibue ku lufu ne badi bapanduke ku Armagedone pamue ne bana bonso badi mua kuikala baledibue mu buloba bupiabupia. Ku ndekelu kua bidimu 1 000, bantu bonso bikala ne muoyo pa buloba nebikale bapuangane. Mpindieu ndîba kayi diafundabu mêna abu bua kashidi mu mukanda wa muoyo, bienza anu bu baafunde ne mâyi a mukanda kaayi bu mafunda ne kreyon?
DITETA DIA NDEKELU
13, 14. Ntshinyi tshikala bantu bapuangane bonso bikala pa buloba ne bua kuleja bua kupetabu muoyo wa tshiendelele?
13 Tudi ne bua kuvuluka ne: padi muntu ulua mupuangane, kabiena biumvuija ne: ukadi ne muoyo wa tshiendelele nansha. Vuluka bualu bua Adama ne Eva. Bavua bapuangane, kadi bavua ne bua kuleja muvuabu batumikila Yehowa Nzambi kumpala kua bobu kupeta muoyo wa tshiendelele. Diakabi, kabakamutumikila to.—Lomo 5:12.
14 Nsombelu wa bantu bikala pa buloba ku ndekelu kua bidimu 1 000 neikale mushindu kayi? Bonso buabu nebikale bakadi bapuangane. Nebatue bukokeshi bua Yehowa mpanda ne muoyo mujima bua kashidi anyi? Bamue nebenze malu bu Adama ne Eva bavua bapuangane kadi bakalua kupanga lulamatu anyi? Bidi bikengela kuandamuna nkonko eyi. Mushindu kayi?
15, 16. a) Ndîba kayi diapeta bantu bonso mpunga wa kuleja lulamatu kudi Yehowa? b) Diteta dia ndekelu edi nedipatule bipeta kayi?
15 Nebele Satana mu buloko bua bidimu 1 000. Tshikondo atshi, kakuikala ne mushindu wa kupambuisha muntu to. Kadi nebamupatule mu buloko abu ku ndekelu kua bidimu 1 000. Dîba adi ke diakebaye bua kupambuisha bantu bapuangane. Mu diteta adi, bantu bapuangane bonso bikala pa buloba nebapete mpunga wa kuleja mudibu banemeka dîna dia Nzambi ne batua bukokeshi buende mpanda. (Buak. 20:7-10) Malu enza yonso wa kudibu mu diteta adi ke aleja ni bidi bikengela kufunda dîna diende bua kashidi mu mukanda wa muoyo.
16 Nekuikale bamue bantu, bungi butudi katuyi bamanye, bafuana Adama ne Eva, babenga bukokeshi bua Yehowa. Tshiabafikila ntshinyi? Buakabuluibua 20:15 udi utuambila ne: “Muntu yonso uvuabu kabayi basangane mufunda mu mukanda wa muoyo wakedibua mu dijiba dia kapia.” Bushuwa, nebabutule bantomboji abu bonso bua kashidi. Kadi bantu bapuangane ba bungi nebashale ne lulamatu mu diteta dia ndekelu edi. Bua bualu abu nebafunde mêna abu mu mukanda wa muoyo bua kashidi.
MU “TSHIKONDO TSHIA KU NSHIKIDILU”
17. Ntshinyi tshivuabu bambile Danyele tshivua ne bua kuenzeka tshikondo tshitudi etshi? (Danyele 12:4, 8-10)
17 Bidi bituenza disanka patudi tuela meji a malu enzeka kumpala eku! Kadi muanjelu wakambila kabidi Danyele bualu bua mushinga budi butangila “tshikondo tshia ku nshikidilu” tshitudi etshi. (Bala Danyele 12:4, 8-10; 2 Tim. 3:1-5) Muanjelu wakambila Danyele ne: “Dimanya dilelela nedivulangane.” Bushuwa, bantu ba Nzambi bavua ne bua kumvua mêyi a buprofete adi mu mukanda wende eu bimpe menemene. Muanjelu wakatungunuka wamba ne: ‘bantu babi bavua ne bua kuenza malu mabi, ne muntu mubi nansha umue kavua ne bua kuajingulula to.’
18. Ntshinyi tshikadi pa kufikila bantu babi?
18 Lelu bidi mua kumueneka bu ne: kabena banyoka muntu mubi bua malu ende mabi. (Mal. 3:14, 15) Kadi Yezu ukadi pa kulumbuluisha bantu badi bu mbuji ne kubatapulula ne bantu badi bu mikoko. (Mat. 25:31-33) Bantu babi kabakupanduka ku dikenga dinene, ne kabakubabisha ku lufu bua kusomba mu buloba bupiabupia to. Mêna abu kaakuikala mu “mukanda wa tshivulukilu” udibu batele mu Malaki 3:16 to.
19. Edi ndîba dia tuetu kuenza tshinyi? Bua tshinyi? (Malaki 3:16-18)
19 Edi ke dîba dia tuetu kuleja ne: katuena munkatshi mua bantu babi to. (Bala Malaki 3:16-18.) Yehowa udi wenda usangisha bantu badiye wangata bu ‘tshintu tshia pa buatshi,’ anyi tshintu tshia mushinga mukole tshidiye natshi. Bushuwa, tudi basue kuikala munkatshi mua bantu aba.
Patuamona Danyele ne bantu batudi bafuishe ne bantu bakuabu ba bungi ‘bajuka’ bua kuangata tshiabu tshitupa mu bulongolodi bupiabupia, netusanke bikole be! (Tangila tshikoso 20)
20. Mbualu kayi bua ndekelu buvuabu balaye Danyele? Bua tshinyi udi muindile dikumbana diabu ne muoyo kuulu kuulu?
20 Bulelela, tudi mu tshikondo tshia dikema. Kadi malu a dikema menemene akadi pa kuenzeka. Tukadi pa kumona mudi bantu babi bonso babutuka. Pashishe netumone dikumbana dia bualu buvua Yehowa mulaye Danyele ebu: “Neujuke bua kuangata tshiebe tshitupa ku nshikidilu kua matuku.” (Dan. 12:13) Udi muindile dituku dikala Danyele ne balela bebe mua ‘kujuka’, mudindile ne muoyo kuulu kuulu anyi? Biobi nanku, enza muebe muonso ku mpindieu bua kuikala ne lulamatu, nunku dîba adi newikale mutuishibue ne: dîna diebe nedishale difunda mu mukanda wa muoyo wa Yehowa.
MUSAMBU WA 80 ‘Labula, umone ne: Yehowa mmuimpe’
^ Mu tshiena-bualu etshi mbakajilule ngumvuilu utuvua nende bua mudimu munene udibu bakuile mu Danyele 12:2, 3. Netukonkonone bua kumanya dîba dienzekawu ne bantu bawenza. Netumone kabidi muikala mudimu eu mua kulongolola bantu bikala pa buloba ku diteta dia ndekelu ku ndekelu kua bukokeshi bua bidimu tshinunu.
^ Dibishibua dia bantu ku lufu didi mua kutuadija ne bantu bavua bafue ne lulamatu mu matuku a ku nshikidilu, ne pashishe balua kubisha bantu bavua bafue kumpala kuabu benda bapingana panyima, bienzeka nanku ku tshipungu ne ku tshipungu. Biobi bienzeke mushindu au, bena mu tshipungu tshionso nebikale ne mpunga wa kuakidila muntu yonso uvuabu bamanye. Nansha biobi nanku anyi kabiyi nanku, tshibi padi Bible yeye wakula bua dibishibua ku lufu bua kuya mu diulu, udi wamba ne: nebabishe muntu yonso mu “mulongo wende”; nanku tudi mua kuamba ne: bua dibishibua ku lufu bua kusomba pa buloba ne: nedienzeke padi mu bulongame.—1 Kol. 14:33; 15:23.
^ Mbumvuije nunku bua kuakaja ngumvuilu udi mu mukanda wa Tutumayi ntema ku mulayi wa Danyele! nshapita wa 17, ne mu Tshibumba tshia Nsentedi tshia dia 1/7/1987, dib. 21-25 (Mu Mfualansa.)
^ Kadi miaku “bakane” ne “badi kabayi bakane” idi mu Bienzedi 24:15 ne mêyi a ne: “bavua benze malu mimpe” ne “bavua benze malu mabi” adi mu Yone 5:29 mmimanyine pa bienzedi bivua nabi bantu badibu babishe ku lufu kumpala kua kufuabu.
