1. Nku tshinyi kutudi mua kumanyina muntu wa kueyemena?

 MUNTU wa kueyemena utu udienjeza bua kuenza malu adiye mulaye, ne utu wamba bulelela. (Mis. 15:4) Bantu mbamanye ne: mmuntu wa kueyemena. Tudi basue bua bena Kristo netu batumone mushindu au. Ntshinyi tshitudi mua kuenza bua kutueyemenabu?

2. Tshia kuenza ntshinyi bua kuleja ne: tudi bantu ba kueyemena?

² Katuena mua kuenzeja bakuabu bua kutueyemena to. Tudi ne bua kuleja ku malu etu ne: tudi bakumbane bua bakuabu kutueyemena. Bamue batu bamba ne: ditueyemena kudi bakuabu didi anu bu makuta. Mbikole bua kuapeta, kadi mbipepele bua kuajimija. Bushuwa tukadi beyemene Yehowa. Kakuenza bualu nansha bumue buatupangisha bua kumueyemena to, bualu “tshionso tshidiye wenza ntshikumbane kutshieyemena.” (Mis. 33:4) Mmusue bua tumuidikije. (Ef. 5:1) Tukonkononayi bimue bilejilu bia batendeledi ba Yehowa bavua bidikije Tatu wabu wa mu diulu ne baleje muvuabu bantu ba kueyemena. Netumone kabidi ngikadilu itanu yatuambuluisha bua kuikala bantu ba kueyemena.

3, 4. Mmunyi muvua muprofete Danyele muleje ne: uvua muntu wa kueyemena? Tshilejilu tshiende tshidi tshitusaka bua kuenza tshinyi?

³ Muprofete Danyele mmushiye tshilejilu tshimpe bua muvuaye muntu wa kueyemena. Nansha muvuabu bamukuate kudi bena Babilona bu mupika, mu matuku makese wakamanyika bu muntu uvuabu mua kueyemena. Wakatamba kumanyika pavua Yehowa mumuambuluishe bua kumvuija bilota bia Nebukadenesâ, mukalenge wa Babilona. Musangu mukuabu Danyele uvua ne bua kuambila mukalenge ne: Yehowa kavua umuanyisha to. Uvua mukenji uvua mukalenge yonso kayi musue kumvua to. Biakalomba Danyele dikima bualu Nebukadenesâ  uvua muntu wa tshikisu! (Dan. 2:12; 4:20-22, 25) Bidimu bia bungi pashishe, Danyele wakaleja kabidi muvuaye muntu wa kueyemena pakumvuijaye mukenji wa bualu busokoka uvua mumueneke pa tshimanu tshia dibalasa dia mukalenge mu Babilona, yeye kuwumvuija ne bujalame buonso. (Dan. 5:5, 25-29) Pashishe, Dayawesha muena Madayi ne bakokeshi banene bavuabu bateke bakamona kabidi muvua Danyele ne “nyuma wa pa buende.” Bavua anu bamanye ne: Danyele “uvua muntu wa kueyemena ne kabavua mua kumupeta ne lulengu anyi bubi kampanda.” (Dan. 6:3, 4) Bushuwa, nansha bakokeshi ba bampangano bavua bamanye ne: mutendeledi wa Yehowa eu uvua muntu wa kueyemena!

⁴ Tshilejilu tshia Danyele etshi tshitusake bua kudiebeja ne: ‘Ndi ne lumu kayi pambelu pa tshisumbu tshia bena Kristo? Ndi mumanyike bu muntu utu ukumbaja midimu idiye nayi ne udi bantu mua kueyemena anyi?’ Bua tshinyi mbimpe kuandamuna nkonko eyi? Bualu patudi bantu ba kueyemena tudi tutumbisha Yehowa.

5. Bua tshinyi Hananiya uvua mumanyike bu muntu wa kueyemena?

⁵ Mu 455 K.Y., Nguvena Nehemiya mumane kuibakulula bimanu bia Yelushalema, wakakeba bantu balume ba kueyemena bua batabalele tshimenga. Mu bantu abu wakasungula Hananiya, kumutekaye mfumu wa Muaba mukolesha. Bible udi wamba bua Hananiya ne: “uvua muntu wa kueyemena bikole menemene ne uvua utshina Nzambi mulelela kupita bantu bakuabu ba bungi.” (Neh. 7:2) Dinanga divua Hananiya munange Yehowa  ne ditshina divuaye nadi dia kubenga kumunyingalaja biakamusaka bua kuenza mudimu wonso uvuabu bamupesha, uwenza ne muoyo mujima. Ngikadilu eyi idi ituambuluisha bua kuikala bantu ba kueyemena mu mudimu utudi tuenzela Nzambi.

6. Mmunyi muvua Tukiko muleje ne: uvua mulunda wa kueyemena wa mupostolo Paulo?

⁶ Tuakulayi bua Tukiko, muanetu wa balume uvua mupostolo Paulo mueyemene. Pavua Paulo mu nzubu wa lukanu, uvua mueyemene Tukiko, umuangata bu “muena mudimu wa lulamatu.” (Ef. 6:21, 22) Paulo kavua mumueyemene anu bua kuya kufila mikanda kudi bena Kristo ba ku Efeso ne ba ku Kolosayi patupu to, kadi mumueyemene kabidi bua kubakankamija ne kubakolesha. Tshilejilu tshia Tukiko tshidi tshituvuluija balume ba kueyemena badi batabalela majinga etu a mu nyuma lelu.​—Kolos. 4:7-9.

7. Tshilejilu tshia bakulu ne basadidi ba mudimu ba mu tshisumbu tshienu tshidi tshikulongesha tshinyi bua dikala muntu wa kueyemena?

⁷ Lelu tudi ne disanka dia bungi bua mutudi ne bakulu ne basadidi ba kueyemena. Anu bu Danyele, Hananiya, ne Tikiko, badi benza midimu idibu nayi ne muoyo mujima. Tshilejilu, patudi tubuela mu tshisangilu tshia munkatshi mua lumingu, kakuyi mpata, tutu tumona mudi midimu yonso ya mu tshisangilu atshi miabanya. Patu bana betu badibu bapeshe midimu badilongolola ne bayenza, bakulu batu basanka bikole! Bualu bukuabu, patutu tubikila muntu mu tshisangilu tshia ku ndekelu kua lumingu, tutu batuishibue ne: nekuikale anu muntu wenza muyuki wa patoke. Tutu batuishibue kabidi ne: mikanda ya kuyisha nayi neyikalaku. Bantu balume ba lulamatu aba badi batutabalela bimpe, ne tudi tuela Yehowa tuasakidila bua bualu buabu! Kadi mmushindu kayi utudi mua kuleja ne: tudi bantu ba kueyemena?

8. Mmunyi mutudi mua kuleja ne: tudi ne nkatshinkatshi patudi tutabalela bakuabu? (Nsumuinu 11:13)

⁸ Tudi banange bena Kristo netu, ne tudi tuditatshisha bua kumanya ni badi bimpe. Kadi tudi ne bua kuikala ne nkatshinkashi, katuyi tukeba bua kumanya malu abu adi kaayi atutangila to. Bamue bena Kristo ba mu tshisumbu tshia mu bidimu lukama bia kumpala bavua ‘bena bijanu ne bavua babuelakana mu malu a bakuabu, bakula malu adibu kabayi ne bua kuakula.’ (1 Tim. 5:13) Bushuwa, katuena basue kubafuana to. Kadi tutekabi ne: muntu udi utuambila bualu budi bumutangila tshibi utulomba bua katubuambidi muntu mukuabu to, tshia kuenza ntshinyi? Tshilejilu, muanetu wa bakaji udi mua kutuambila ne: udi ne disama kampanda anyi lutatu kansanga, utulomba bua katuambidi muntu to. Tudi ne bua kunemeka tshidiye mutulombe atshi. * (Bala Nsumuinu 11:13.) Tukonkononayi mpindieu nsombelu mikuabu ndambu idi ileja mudibi ne mushinga bua kulama malu masokoka.

9. Mmunyi mudi bena mu dîku mua kuleja ne: mbantu ba kueyemena?

⁹ Mu dîku. Muena mu dîku yonso udi ne mudimu wa kuenza bua ne: malu a dîku ashadile anu mu dîku. Tshilejilu, muanetu wa bakaji udi mua kuikala ne tshikadilu kampanda tshidi bayende umona ne: tshidi tshienza tuseku. Mbimpe ambile bakuabu bualu abu bua kumufuisha bundu anyi? Tòo! Mmunange mukajende, ne kakujinga kuenza bualu budi mua  kumunyingalaja to. (Ef. 5:33) Bana ba bitende batu basue ne: babenzelaku malu ne kanemu. Mbimpe baledi bavuluke bualu abu. Ki mbimpe bambile bantu bakuabu bilema biabu bua kubapuekesha milongo to. (Kolos. 3:21) Bidi bikengela bana pabu balonge mua kulama malu masokoka pamutu pa kuambila bantu bakuabu, bualu bidi mua kufuisha bena mu dîku bakuabu bundu. (Dut. 5:16) Muena mu dîku yonso yeye wenza bua malu a mu dîku kaapatuki, nebalamatangane bikole mu dîku diabu.

10. Kuikala mulunda mulelela kudi kulomba tshinyi? (Nsumuinu 17:17)

¹⁰ Mu bulunda buetu. Kutu bikondo bitutu tumvua mua kuambila mulunda wetu wa pa muoyo malu atudi nawu. Imue misangu kabitu bipepele to. Pamuapa mbualu katutu ne tshibidilu tshia kuambila muntu mukuabu mutudi tudiumvua, ne mbualu bidi mua kututonda bikole menemene tuetu balue kumvua ne: mulunda wetu au mmuambile bakuabu tshituvua bamuambile. Kadi tudi ne disanka dia bungi bua mutudi ne bana betu batudi mua kuambila itudi nayi batuishibue ne: kabakuambila bantu to. Yonso wa kudibu ‘mmulunda mulelela.’​—Bala Nsumuinu 17:17.

11. a) Mmunyi mudi bakulu ne bakaji babu baleja ne: mbantu ba kueyemena? b) Bikalabi ne: mukulu uvua muye mu malu masokola a tshisumbu pashishe mulue kusomba ne dîku diende, ntshinyi tshitudi mua kukuata muaba au? (Tangila tshimfuanyi.)

¹¹ Mu tshisumbu. Bakulu badi bamanyike bua dilama malu masokoka badi “muaba wa kusokomena tshipepele, muaba wa kupengama” bua bena Kristo nabu. (Yesh. 32:2) Tudi bamanye ne: tudi mua kuyukila nabu badilekelele, batuishibue ne: malu atudi tubambila kaakumanyika kudi bakuabu to. Katuena tubenzeja bua batuambile malu abu masokoka to. Bualu bukuabu, tudi tuanyisha bakaji ba bakulu bualu kabatu bakeba ne: babayabu babambile malu masokoka a bakuabu to. Mu bulelela, mukulu yeye kayi muambile muakajende malu a bena Kristo bakuabu, mbimpe be! Mukaji wa mukulu kampanda wakamba ne: “Ntu ne disanka dia bungi bua mutu bayanyi  kayi ungambila malu masokoka a bana betu batuye uya kutangila mu dikumbula dia bulami anyi a bana betu batu dijinga ne diambuluisha dia mu nyuma; ne katu nansha untelela mêna abu to. Ndi ne disanka bua mudi bayanyi kayi ungambuisha majitu a malu andi tshiyi ne tshindi mua kuenza. Bua bualu abu ndi ndiumvua mupepele bua kuyukila ne muntu yonso mu tshisumbu. Ndi mutuishibue ne: meme muambile bayanyi bualu buanyi panyi anyi mundi ndiumvua, kakuambila bakuabu to.” Bushuwa, tuetu bonso tudi basue kumanyika bu bantu ba kueyemena. Ngikadilu kayi yatuambuluisha bua kukumbaja tshipatshila etshi? Tukonkonona itanu ya kudiyi.

12. Bua tshinyi tudi tuamba ne: dinanga ngikadilu wa mushinga mukole udi utuambuluisha bua kuikala bantu ba kueyemena? Fila tshilejilu.

¹² Dinanga ke didi dituambuluisha bua kuikala bantu ba kueyemena. Yezu wakamba ne: kunanga Yehowa ne mukuetu ke mikenji ibidi minene. (Mat. 22:37-39) Dinanga ditudi banange Yehowa didi ditusaka bua kuidikija tshilejilu tshiende tshipuangane tshia mudiye muntu wa kueyemena. Tshilejilu, dinanga ditudi banange bena Kristo netu didi ditusaka bua kulama malu abu masokoka. Katuena basue kusokolola bualu budi mua kubenzela bibi, kubafuisha bundu, anyi kubanyingalaja to.​—Yone 15:12.

13. Mmushindu kayi udi didipuekesha dituambuluisha bua kuikala bantu ba kueyemena?

¹³ Didipuekesha nedituambuluishe bua kuikala bantu ba kueyemena. Muena Kristo udi ne didipuekesha kena wa kumpala ku diambila bakuabu malu bua kuleja mudiye muamanye to. (Filip. 2:3) Kena ufikisha bakuabu ku diela meji ne: yeye mmuntu wa mushinga udi mumanye malu masokoka adiye kayi mua kuamba to. Didipuekesha didi dimuambuluisha kabidi bua kubenga kuambila bantu ba bungi mmuenenu udiye nende bua malu adi Bible ne mikanda yetu kabiyi biakuile.

14. Mmunyi mudi dijingulula dia malu dituambuluisha bua kuikala bantu ba kueyemena?

¹⁴ Dijingulula dia malu nediambuluishe muena Kristo bua kumanya “tshikondo tshia kupuwa ne tshia kuakula.” (Muam. 3:7) Mu imue miaba batu bamba ne: “kuakula kudi bu arjan, kadi kupuwa kudi bu or.” Bidi bisua kumvuija ne: mbimpe kupuwa mu bikondo bikuabu pamutu pa kuakula. Ke bualu kayi Nsumuinu 11:12 udi ufila mubelu eu: “Muntu udi ne dijingulula dia malu dilelela udi ushala mupuwe.” Tuangate tshilejilu. Batu batamba kulomba mukulu kampanda bua kuambuluisha bisumbu mu ntatu idibu nayi. Mukulu nende wakamba ne: “Mukulu eu utu utabalela misangu yonso bua kambidi bakuabu malu a bena mu bisumbu bikuabu nansha.” Dijingulula dia malu didi nadi mukulu eu ndifikishe bakulu nende ba mu kabu kasumbu ka bakulu ku dimunemeke. Mbatuishibue ne: kakuambila bakuabu malu abu masokoka to.

15. Fila tshilejilu tshidi tshileja mudi kuikala muena bululame kuenza bua bakuabu batueyemene.

¹⁵ Bululame budi butuambuluisha pabu bua kuikala bantu ba kueyemena. Tudi tueyemena muntu udi ne bululame bualu tudi bamanye ne: utu anu wamba bulelela. (Ef. 4:25; Eb. 13:18) Tshilejilu, tuteke ne: udi musue kuakaja ndongeshilu webe. Nunku udi ulomba muntu mukuabu bua ateleje muudi wambulula mudimu uwenza mu bisangilu ne umulomba bua akupeshe ngenyi mimpe ya mua kuwakaja. Nnganyi uudi mua kueyemena bua akupeshe mibelu mudibi bikengela? Mmuntu udi ukuambila malu audi musue kumvua anyi ngeu udi ukuambila bulelela ne dîyi dimpe? Ngeu udi ukuambila bulelela. Bible udi wamba ne: “Mubelu  mufila patoke mmuimpe kupita dinanga disokoka. Mputa mitapa kudi mulunda nya lulamatu.” (Nsu. 27:5, 6) Nansha mutubi bianji kutukolela bua kuitaba mibelu idi muanetu mutupeshe mudibi bikengela, kadi yoyi ayi neituambuluishe mu kupita kua matuku.

16. Mmunyi mudi Nsumuinu 10:19 uleja mushinga wa didikanda?

¹⁶ Didikanda didi padi ne mushinga tuetu basue bua bakuabu batueyemene. Nngikadilu udi utuambuluisha bua kupuwa patudi tudimona mu diteta dia kusokolola bualu busokoka buvuabu batuambile. (Bala Nsumuinu 10:19.) Patudi babuele miaba ya dipetelangana ku Enternete, bidi mua kutukolela bua kudikanda. Tuetu katuyi badimuke, tudi mua kudimona tukadi bambile bantu ba bungi malu masokoka a bende. Tuetu bamane kumuangalaja malu ku biamu nanku, katuakumanya tshikala bakuabu mua kuenza ne malu au anyi ntatu ya bungi ikala mua kumueneka to. Didikanda didi dituambuluisha kabidi padi baluishi betu batusaka bua tubambile malu adi mua kukebela bena Kristo netu njiwu. Bidi mua kuenzeka nanku padibu batuela nkonko kudi bampulushi ba mu ditunga mudibu bakandike mudimu wetu. Mbimpe tutumikile dîyi dinene dia ‘kulama mukana muetu ne tshintu tshia kumujika natshi.’ (Mis. 39:1) Bidi bikengela tuikale bantu ba kueyemena kudi bena mu dîku dietu, kudi balunda betu, kudi bena Kristo netu, anyi kudi muntu mukuabu kayi yonso. Bua kuikala bantu ba kueyemena, mbimpe tuikale ne didikanda.

17. Ntshinyi tshitudi mua kuenza bua lungenyi lua dieyemenangana luikale mu tshisumbu?

¹⁷ Tudi ne dianyisha dia bungi kudi Yehowa bua mudiye mutubueje mu dîku dia bana betu dia pa buloba bujima didi dienza ne bantu badi banangangane ne ba kueyemena! Tuetu bonso tudi ne dibanza dia kuenza bua ne: bena Kristo netu batueyemene. Patudi tudienzeja muntu pa nkayende bua kuikala ne dinanga, didipukesha, dijingulula dia malu, bululame anyi diamba bulelela, ne didikanda, tudi tuenza bua ne: lungenyi lua dieyemenangana luikale anu mu tshisumbu. Tudi ne bua kutungunuka ne kudienzeja bua kuleja mutudi bantu badi bakuabu mua kueyemena. Tuidikijayiku Yehowa, Nzambi wetu, tutungunuka ne kuleja ne: tudi bantu ba kueyemena.