Paulo mmuambe mu 1 Kolinto 15:8 ne: “Ndekelu wa bionso, wakammuenekela meme panyi, bienze anu bu mumuenekele muana wa kabishi.” Kumpala tuvua tumvuija ne: Paulo uvua pamuapa wakula bua bualu buvuaye mudimuenene pavuaye mumone tshikena kumona tshia Yezu mutumbishibue mu diulu. Bivua anu bu ne: uvua mupete diakalenga dia kuledibua, anyi dia kubishibua bua kuikala tshifukibua tshia mu nyuma tshidi ne muoyo kumpala kua dîba divua bualu bua nanku ne bua kuenzeka, mmumue ne: bidimu nkama ya bungi kumpala kua dibishibua dia mushindu au kuenzeka. Kadi patudi bakonkonone mvese eu bikole, mbitulombe bua kuakaja diumvuija edi.

Bushuwa, Paulo udi wakula muaba eu bua tshivua tshienzeke dîba dia dikudimuka diende. Kadi ntshinyi tshivuaye usua kuamba pavuaye mudiambe ne: uvua “muana wa kabishi” anyi wa tshituka? Kudi mishindu ya bungi ya kuandamuna lukonko elu.

Dikudimuka diende diakenzeka mu tshimpi tshimpi ne diakamutatshisha. Misangu ya bungi muana wa kabishi utu ulua mu tshimpi tshimpi. Pavua Shaula (wakalua kumanyika bu Paulo) uya ku Damaseka bua kukengesha bena Kristo bavuaku, kavua mumanye ne: uvua mua kumona tshikena kumona tshia Yezu mubishibue ku lufu to. Dikudimuka dia Paulo divua bualu bua tshimpi tshimpi kudiye ne kudi bena Kristo bavuaye uyila bua kukengesha mu tshimenga atshi. Bualu ebu buakamutatshisha bikole, kushalaye katshiyi umona munda mua tshipolu kampanda.​—Bienzedi 9:1-9, 17-19.

Wakakudimuka mu “tshikondo tshibi.” Muaku wa kale wa mu tshiena Greke udibu bakudimune ne: “muana wa kabishi” badi mua kuwukudimuna kabidi ne: “muana mulela mu tshikondo tshibi.” Mbakudimune mêyi a Paulo mu Bible de Jérusalem ne: “Kadi bivua bienze anu bu ne: bavua bandele dîba divua muntu nansha umue kayi mutekemene.” Pavua Paulo mukudimuke, Yezu ukavua mupingane mu diulu. Bantu bavua Paulo mutele mu mvese idi kuulu bakamona Yezu, kadi yeye kakamumona mubishibue ku lufu kumpala kua kubandaye mu diulu to. (1 Kol. 15:4-8) Dimueneka divua Yezu mumuenekele Paulo mu tshimpi tshimpi diakamupesha mpunga wa kumumona panyima pa dibishibua diende, nansha muvuabi bimueneke ne: bivua mu “tshikondo tshibi.”

Uvua wakula buende yeye ne budipuekeshi buonso. Bilondeshile bamue bamanyi ba malu a mu Bible, mêyi adi Paulo muambe adi umvuika bu ne: uvua udibipisha. Pikalabi ne: bivua nanku, mbuena kuamba ne: uvua bushuwa udimona kayi mukumbanyine diakalenga divuabu bamupeshe adi. Yeye muine wakamba ne: “Ndi mutambe bukese ku bapostolo, ne tshiena mukumbane bua kubikidibua mupostolo, bualu mvua mukengeshe tshisumbu tshia Nzambi. Kadi ndi tshindi etshi bua ngasa wa Nzambi.”​—1 Kol. 15:9, 10.

Nunku bidi bimueneka ne: Paulo uvua mua kuikala wakula bua mushindu uvua Yezu mumumuenekele mu tshimpi tshimpi kayi mumanye anyi bua muvua dikudimuka diende dienzeke dîba divuaye kayi mutekemene anyi bua muvuaye kayi mukumbane bua kupeta dibuluibua dia dikema dia mushindu au. Nansha biobi bikale bishi, Paulo uvua muangate tshivuaye mumone atshi ne mushinga wa bungi. Kakuyi mpata, tshivua tshimujadikile ne: Yezu uvua mubishibue ku lufu. Pavua Paulo uyisha bakuabu bualu bua dibishibua dia Yezu ku lufu, kabiena mua kutukemesha bua muvuaye wakula bua bualu buvua bumufikile pa dîba kadiyi ditemena abu to.​—Bien. 22:6-11; 26:13-18.