Bamue bana betu ba balume mbakolele miaba itu bantu balume bamona bantu bakaji bu bashadile kudibu. Tshilejilu, Hans mutangidi wa tshijengu udi mu Bolivie udi wamba ne: “Bamue mbakolele miaba itu bantu balume badiangata ne mushinga wa bungi, bibafikisha ku dimona bantu bakaji bashadile kudibu.” Shengxian (mukulu wa mu Taïwan) udi wamba ne: “Muaba undi mukolele, bantu balume kabatu basue bantu bakaji bele dîyi mu malu abu to. Muntu mulume yeye muambile bena diende lungenyi luvua muntu mukaji mufile, badi bamumona bu muntu tshianana.” Bantu balume bakuabu batu bapetula bantu bakaji mu mishindu ya bungi. Tshilejilu, batu babela bilele ne mêyi a kubasendeka nawu.

Bia diakalenga, muntu mulume nansha yeye mukolele muaba kayi, udi mua kushintulula tshilele tshivuaye natshi. Udi mua kushintulula mmuenenu wende wa kumona bantu bakaji bu bashadile kudi bantu balume. (Ef. 4:22-24) Neafike ku dienza nanku yeye widikija Yehowa. Netumone mudi Yehowa wenzela bakaji malu, mudi bana betu ba balume mua kubenzela pabu malu anu bu Yehowa, ne mudi bakulu mua kuikala bantunga mulongo mu dinemeka bana betu ba bakaji.

MUTU YEHOWA WENZELA BANTU BAKAJI MALU

Yehowa ntshilejilu tshitambe buimpe tshia mushindu wa kuenzela bantu bakaji malu. Bu mudiye Tatu wa luse, mmunange bantu badi mu dîku diende. (Yone 3:16) Bana betu ba bakaji ba lulamatu badi anu bu bana bende bakaji badiye wangata ne mushinga. Tumonayi malu adi aleja mudi Yehowa unemeka bantu bakaji.

Katu ubenzela malu ne kansungasunga to. Yehowa mmufuke balume ne bakaji mu tshimfuanyi tshiende. (Gen. 1:27) Ki mmufuke balume ne meji a  bungi anyi mamanya kupita bantu bakaji to; peshi katu munange bantu balume bikole kupita bakaji to. (2 Kul. 19:7) Wakafuka balume ne bakaji bua bikale bumvua bulelela bua mu Bible mushindu wa muomumue, ne bikale bidikija ngikadilu yende milenga. Yehowa katu umona ne: ditabuja dia muntu mulume ndipite dia muntu mukaji; nansha bobu ne ditekemena dia kushala ne muoyo mu Mparadizu pa buloba, anyi dia kuikala bakalenge ne bakuidi mu diulu to. (2 Pet. 1:1, dim.) Mu bulelela, katu wenzela bantu bakaji malu ne kansungasunga to.

Utu uteleja bantu bakaji. Utu uditatshisha bua bantu bakaji ne bua malu adi mabatonde. Tshilejilu, wakateleja masambila a Lakela ne a Hana, kubandamunaye. (Gen. 30:22; 1 Sam. 1:10, 11, 19, 20) Wakasaka bafundi ba Bible bua kufunda malu a bantu balume bavua bateleja bantu bakaji. Tshilejilu, Abalahama wakateleja Sala anu muvua Yehowa mumuambile. (Gen. 21:12-14) Mukalenge Davidi wakateleja Abigayila. Wakajingulula ne: Yehowa uvua mumutume bua ayukile nende. (1 Sam. 25:32-35) Yezu utu widikija ngikadilu ya Yehowa mu mushindu mupuangane, wakateleja mamuende Mariya. (Yone 2:3-10) Bilejilu ebi bidi bileja ne: umue mushindu utu Yehowa unemeka bantu bakaji mpadiye ubateleja.

Utu ubeyemena. Tshilejilu, wakeyemena Eva pavuaye mumuambile bua kulama buloba. (Gen. 1:28) Pavuaye mumuambile nanku kavua umumona mushadile kudi Adama to. Uvua umumona bu muambuluishi wa bayende. Yehowa wakeyemena kabidi muprofete mukaji Debola ne Hulda bua bapeshe bantu bende mibelu, too ne mulumbuluishi ne mukalenge. (Bal. 4:4-9; 2 Bak. 22:14-20) Lelu, Yehowa utu weyemena bantu bakaji bua kukumbaja mudimu wende. Mu bana betu bakaji ba lulamatu abu mudi bamanyishi ba lumu luimpe, bampanda-njila ne bamisionere. Badi bambuluisha bena mu luibaku lua Nzubu ya Bukalenge ne ya Betele ne bayilama ne mankenda. Kudi badi benza mudimu ku Betele, bakuabu mu biro bia dikudimuna mikanda. Bana betu ba bakaji aba mmusumba munene udi Yehowa ukuata nawu mudimu bua kukumbaja disua diende. (Mis. 68:11) Bushuwa, Yehowa katu umona bantu bakaji bapuyila, kabayi bakumbane bua kuenza bualu to.

MUDI BALUME MUA KUMANYA MUA KUENZELA BAKAJI MALU ANU BU YEHOWA

Nuenu bana betu ba balume, bua kumanya ni nudi nuenzela bana betu ba bakaji malu mutu Yehowa ubenzela, mbimpe nukonkonone ngelelu wenu wa meji ne mushindu wenu wa kuenza malu. Bua kufika kudienza nanku, mbimpe banuambuluishe. Anu mutu tshiamu tshitu baminganga bakuata natshi mudimu tshifika ku dimanya disama didi mu muoyo wa muntu, Dîyi dia Nzambi ne balunda bimpe badi mua kunuambuluisha bua kumone ne: mushindu unudi numona bantu bakaji udi usankisha Yehowa anyi kawena umusankisha. Ntshinyi tshinudi ne bua kuenza bua bobu kunuambuluisha?

Ebeja mulunda muimpe. (Nsu. 18:17) Mbimpe tueyemene mulunda utu wenza malu mimpe, udi ne mmuenenu muimpe wa malu. Tumuebeje ne: “Udi mumone bishi, ntu ngenzela bantu bakaji malu mushindu kayi? Badiku mua kuamba ne: ntu mbanemeka anyi? Kudiku bualu bundi mua kuakaja bua kutuadija kubenzela malu mimpe anyi?” Mulunda webe yeye mukuambile tumalu tua kuakaja, kudibingishi to. Udienzeje bua kuenza malu au pa lukasa.

Dilongela Dîyi dia Nzambi. Mushindu mutambe buimpe wa kumanya ni tudi tuenzela bantu bakaji malu bimpe ngua kukonkonona ngelelu wetu wa meji ne bienzedi bietu bilondeshile Dîyi dia Nzambi. (Eb. 4:12) Patudi tubala Bible, tudi tumanya malu a bantu balume bavua benzele bantu bakaji malu bimpe ne bavua kabayi babenzelawu to. Tudi mua kufuanyikija bienzedi biabu ne bietu. Kufuanyikija mvese mishilangane idi yakula bua bantu bakaji, kudi mua kutuepula ku disobola mvese umuepele mu Bible bua kutua mmuenenu wetu mubi wa bantu bakaji nyama ku mikolo; tuenza nanku katuyi bele meji to. Tshilejilu, mu 1 Petelo 3:7, badi bamba bua kupesha muntu mukaji “bunême bu tshivuadi tshitambe butekete.” b Bidiku biumvuija ne: muntu mukaji mmushadile, kena ne meji, ne ki mmukumbane bua kuenza malu bu muntu mulume anyi? Kabiena nanku to. Fuanyikija mêyi adi Petelo muambe aa ne  adi mu Galatiya 3:26-29 adi aleja mudi Yehowa musungule bantu bakaji ne bantu balume bua kukosha pamue ne Yezu mu diulu. Patudi tudilongela Dîyi dia Nzambi ne tuebeja balunda betu bua batuambile mutudi tuenzela bantu bakaji malu, netumanye mua kunemeka bana betu ba bakaji.

MUDI BAKULU BANEMEKA BANA BETU BA BAKAJI

Bana betu ba balume ba mu tshisumbu badi mua kumanya mua kunemeka bana betu ba bakaji, bobu balonda tshilejilu tshia bakulu. Mmunyi mudi bakulu mua kuikala bantunga mulongo mu dinemeka bana betu ba bakaji? Tumonayi mishindu misunguluke idibu benza nanku.

Batu babela kalumbandi. Mupostolo Paulo mmushiye tshilejilu tshidi bakulu ne bua kulonda. Wakela bantu bakaji ba bungi kalumbandi mu mukanda wende uvuaye mufundile tshisumbu tshia ku Lomo. (Nsu. 15:23) Difuanyikijilabi disanka divua bantu bakaji abu mua kuikala bumvua pavuabu babale mukanda uvua Paulo mufunde eu kumpala kua tshisumbu! Bakulu batu bela bana betu ba bakaji kalumbandi ne muoyo mujima bua ngikadilu yabu mimpe ne bua mudimu udibu benzela Yehowa. Bualu ebu butu bufikisha bana betu ba bakaji ku dimanya ne: batu babanyisha bikole ne babanemeka. Mêyi adi mukulu mua kuamba bua kukankamija bana betu ba bakaji, ke adibu mua kuikala nawu dijinga menemene bua bobu kutungunuka ne kuenzela Yehowa mudimu ne lulamatu.—Nsu. 15:23.

Patu bakulu bela bana betu ba bakaji kalumbandi, batu benza nanku ne muoyo mujime bua malu masunguluke. Bua tshinyi? Muanetu Jessica udi wamba ne: “Bitu bienza disanka patu muanetu wa balume wambila muanetu wa bakaji ne: ‘Kalumbandi!’ Kadi bitu bitamba kutusankisha padi bana betu ba balume batuela kalumbandi bua bualu busunguluke bu mudi kulongesha bana betu bua kusomba bimpe mu bisangilu kabayi benza mutoyi anyi kuya kuangata mulongi wetu wa Bible bua kulua nende mu bisangilu.” Patu bakulu bela bana betu ba bakaji  kalumbandi bua bualu busunguluke budibu benze, badi bamona ne: badi ne muaba mu tshisumbu ne badi babangata ne mushinga wa bungi.

Batu babateleja. Bakulu batu ne budipuekeshi. Ke bualu kayi badi bitaba ne: ki mbobu nkayabu badi ne ngenyi mimpe ya kufila to. Bakulu ba nunku batu balomba bana betu ba bakaji ba bungi wabu mmuenenu, babateleja ne ntema yonso padibu bakula. Badi bakulu benza nanku badi bakankamija bana betu ba bakaji ne bidi bibambuluisha pabu. Mushindu kayi? Gerardo, mukulu udi wenza mudimu ku Betele udi wamba ne: “Ndi mufike ku dimanya ne: kulomba bana betu ba bakaji ngenyi kutu ne mushinga, bualu kutu kungambuluisha bua kuenza mudimu wanyi bimpe. Kudi bakadi benze mudimu au bidimu bia bungi kupita bana betu ba balume ba bungi.” Mu tshisumbu, bana betu ba bakaji ba bungi batu bampanda-njila. Nunku, mbamanye bantu ba mu teritware wa muaba udibu bimpe. Mukulu mukuabu diende Bryan, udi wamba ne: “Bana betu ba bakaji batu ne bia bungi bia kuenza mu bulongolodi bua Yehowa. Nanku, longela malu kudibu!”

Bakulu batu ne meji. Ke bualu kayi kabatu babenga ne lukasa ngenyi itu bana betu ba bakaji bafila to. Bua tshinyi? Mukulu mukuabu diende Edward, udi wamba ne: “Mmuenenu wa muanetu wa bakaji anyi bualu budiye wamba bidi mua kuambuluisha muanetu wa balume bua kumanya mudi bualu mu kabujima, bimuambuluisha kabidi bua kumvuila bakuabu.” (Nsu. 1:5) Nansha mukulu yeye kayi ulonda lungenyi lua muanetu wa bakaji, mbimpe anji kumuela tuasakidila bua mmuenenu wende ne dimanya diende.

Batu babalongesha mudimu. Bakulu batu bakeba mpunga ya kulongesha bana betu ba bakaji mudimu ne meji onso. Tshilejilu, badi mua kulongesha bana betu ba bakaji mua kulombola tshisangilu tshia mudimu wambi, pikala muanetu wa balume ukadi mubatijibue kayiku to. Badi mua kubalongesha mua kukuata mudimu ne biamu, bua bamone mua kuya kuambuluisha bena mu mudimu wa luibaku lua nzubu yetu ne diyilama. Ku Betele, batangidi mbalongeshe bana betu ba bakaji midimu mishilangane. Mbabalongeshe mua kulongolola bintu, kubisumba, mudimu wa dilama makuta, mua kuenza mudimu ne ordinatere ne midimu mikuabu. Padi bakulu balongesha bana betu ba bakaji mua kuenza mudimu nunku, badi baleja mudibu babeyemena ne: mbakumbane bua kuenza mudimu au.

Bana betu ba bakaji ba bungi batu balongesha bantu bakuabu midimu idi bakulu babalongeshe. Tshilejilu, bamue bana betu ba bakaji batu balongesha bakuabu mua kuibakulule nzubu yabu panyima pa tshipupu. Bana betu ba bakaji bavuabu balongeshe mua kuyisha miaba idi bantu ba bungi, badi balongesha pabu bana betu ba bakaji ba bungi mua kuyisha miaba ayi. Mmunyi mutu bana betu ba bakaji bamona bakulu bavua babalongeshe mudimu? Muanetu mukuabu Jennifer, udi wamba ne: “Pamvua ngenza mudimu wa dibaka Nzubu wa Bukalenge, mutangidi wa mudimu uvua mudienzeje bua kundongesha mudimu, pavuaye umona mumvua nguenza, uvua ungela kalumbandi. Mvua munange kuenza nende mudimu bikole bualu mvua mumone ne: uvua ungeyemena ne ungangata ne mushinga.”

MASANKA A KUENZELA BANTU BAKAJI MALU BU BENA MU DÎKU DIETU

Tudi banange bana betu ba bakaji bikole anu bu Yehowa. Tudi tubenzela malu anu bu bena mu dîku dietu. (1 Tim. 5:1, 2) Tudi tudimona ba diakalenga bua kuenza nabu mudimu pamue. Tutu tumvua disanka padibu bamona ne: tudi babanange ne tudi tubambuluisha. Muanetu Vanessa udi wamba ne: “Ndi ne dianyisha dia bungi kudi Yehowa bua mundi mu bulongolodi buende mutu bana betu ba balume batu bankankamija.” Muanetu mukuabu wa bakaji wa mu Taïwan udi wamba ne: “Ndi ne disanka dia bungi bua mudi Yehowa ne bantu badi mu bulongolodi buende bangata bantu bakaji ne mushinga wa bungi ne babumvuila. Bualu ebu butu bukolesha ditabuja dianyi ne bunsaka bua kuanyisha diakalenga dindi nadi dia kuikala mu bulongolodi bua Yehowa.”

Yehowa udi umvua disanka padiye umona bana betu ba balume badienzeja bua kuenzela bana betu ba bakaji malu anu bu yeye. (Nsu. 27:11) Benjamin, mukulu mukuabu wa mu ditunga dia Écosse udi wamba ne: “Bantu balume ba bungi ba panu kabatu banemeka bantu bakaji to. Nanku, padi bana betu ba bakaji balua ku Nzubu wa Bukalenge katuena basue bikale ne ngelelu wa meji au to.” Tuenzayi muetu muonso bua kunemeka bana betu ba bakaji ne kubananga bua kuidikija Yehowa!—Lomo 12:10.