TSHIENA-BUALU TSHIA KULONGA 3
MUSAMBU WA 35 “Nukebe mua kumanya malu adi ne mushinga”
Angata mapangadika adi asankisha Yehowa
“Ditshina dia Yehowa didi tshibangidilu tshia meji, ne kumanya Mutambe Tshijila kudi dijingulula dia malu.”—NSU. 9:10.
LUNGENYI LUNENE
Mudi kumanya malu ne kuajingulula kutuambuluisha bua kuangata mapangadika mimpe.
1. Mmapangadika kayi adi mua kutukolela bua kuangata?
BITU bitulomba bua kuangata mapangadika dituku dionso edi. Bitu bipepele bua kuangata amue akudiwu, bu mudi kusungula tshiakudia tshia mu dinda anyi dîba dia kulala. Kadi makuabu atu makole bua kuangata bualu adi atangila makanda etu a mubidi ne a balela betu, adi mua kutuambuluisha bua kuikala ne disanka anyi kutujimijiladi, ne adi atangila mushindu utudi mua kuenzela Yehowa mudimu. Kadi bualu bua mushinga mukole budi ne: tudi basue bua mapangadika etu asankishe Yehowa.—Lomo 12:1, 2.
2. Mmalu kayi atudi ne bua kuenza bua kuangata mapangadika mimpe?
2 Bua kuangata dipangadika dimpe, 1) anji manya malu mudiwu, 2) konkonona muenenu wa Yehowa, ne 3) ela meji bimpe bimpe bua bualu buudi ukeba kuangatshila dipangadika. Netukonkonone malu asatu aa mu tshiena-bualu etshi. Nebituambuluishe kabidi bua kumanya mushindu wa kuibidija bukole buetu bua kujingulula nabu malu.—Nsu. 2:11.
MANYA MALU MUDIWU
3. Fila tshilejilu tshia mudibi ne mushinga bua kumanya malu mudiwu kumpala kua kuangata dipangadika.
3 Bualu bua kumpala budi mua kutuambuluisha bua kuangata mapangadika mimpe nkumanya malu mudiwu. Bua tshinyi bidi ne mushinga? Fuanyikija ne: mubedi mmuye kutangila munganga bua disama dikole didiye nadi. Munganga neamufundile buanga musangu umue kayi muanji kumuela nkonko anyi kumuenza mateta anyi? Tòo. Bua wewe kuangata pebe dipangadika dimpe, mbimpe wanji umanye malu onso adi atangila bualu buudi usua kuangatshila dipangadika. Mmunyi muudi mua kufika ku dienza nanku?
4. Bilondeshile Nsumuinu 18:13, ntshinyi tshiudi mua kuenza bua kumanya malu onso mudiwu? (Tangila kabidi tshimfuanyi.)
4 Mbimpe kuikala ne tshibidilu tshia kuela nkonko bua kumanya malu mudiwu. Fuanyikijabi ne: mbakubikile mu fete kampanda. Neuye anyi? Wewe kuyi mumanye bimpe muntu udi mukubikile anyi malu enzekamu, nebikengele wewe kudiebeja ne: “Neenzekele muaba kayi? Neenzeke dîba kayi? Nemuikale bantu bungi kayi? Nnganyi walombola malu? Mbanganyi bikalamu? Mmalu kayi adibu balongolole bua kuenzamu? Nebelelamu bantu maluvu makole anyi?” Mandamuna a nkonko eyi neakuambuluishe bua kuangata dipangadika dimpe.—Bala Nsumuinu 18:13.
Ela bantu nkonko bua kumanya malu mudiwu (Tangila tshikoso 4) a
5. Wewe mumane kumanya mudi malu, ntshinyi tshiudi mua kuenza?
5 Wewe mumane kupeta mandamuna a nkonko ayi, ela meji bimpe bua malu makuabu adi atangila fete au. Tshilejilu, bobu bakuambile ne: nemuikale bantu badi kabayi banemeka mêyi manene a mu Bible anyi ne: bantu nebadinuine maluvu makole mudibu basue, newenze tshinyi? Udi umona ne: fete au mmufuane kulua wa bisankasanka anyi? (1 Pet. 4:3) Fete au yeye wenzeka dîba dia bisangilu anyi diudi mulongolole bua kuyisha, newenze tshinyi? Paudi umanya malu onso bimpe, newangate dipangadika dimpe. Kadi kudi lukonko lukuabu luudi mua kudiela. Mbimpe udiebeje ne: mundi mmona malu emu ke mudi Yehowa uamona anyi?—Nsu. 2:6.
KONKONONA MMUENENU WA YEHOWA
6. Bilondeshile Yakobo 1:5, bua tshinyi tudi ne bua kulomba Yehowa diambuluisha?
6 Lomba Yehowa akuambuluishe bua umanye mmuenenu wende mu bualu kampanda. Mmulaye bua kutupesha meji bua tujingulule bikala dipangadika ditudi tukeba kuangata didi dimusankisha. Udi uapesha “bantu bonso ne tshianza tshilekelela, kayi ubatobolola.”—Bala Yakobo 1:5.
7. Mmunyi muudi mua kumanya mmuenenu wa Yehowa mu bualu kampanda? Fila tshilejilu.
7 Wewe mumane kulomba Yehowa buludiki, shala ne ntema ya bungi bua kumona mudiye ukuandamuna. Tuangate tshilejilu. Wewe mujimine mu luendu, newebeje muntu wa muaba uudi mujiminyine au bua akuleje njila. Kadi newase luendu kayi muanji kukuandamuna anyi? Tòo. Neumuteleje bimpe padiye ukuleja njila wa kuyila. Bia muomumue, wewe mumane kulomba Yehowa meji, keba mikenji ne mêyi manene a mu Bible adi atangila bualu buudi nabu bua ujingulule mudi Yehowa mukuandamune. Tshilejilu, wewe mupangadije bua kuya mu fete utuvua batele au, keba bua kumanya tshidi Bible wamba bua fete ya bisankasanka, bua balunda babi, ne bua mushinga wa kuteka malu a Bukalenge kumpala kua atudi tuetu basue.—Mat. 6:33; Lomo 13:13; 1 Kol. 15:33.
8. Wewe ne dijinga dia kupeta malu audi ukeba, ntshinyi tshiudi mua kuenza? (Tangila kabidi tshimfuanyi.)
8 Kadi kudi misangu iudi mua kuikala dijinga ne diambuluisha bua kupeta malu audi ukeba. Bena Kristo nebe bakadi bamonemone badi mua kukupesha ngenyi ya mua kuapeta. Nebikengele kabidi bua udienzele makebulula. Udi mua kupeta malu a bungi akuambuluisha mu bintu bietu bia kudilongela nabi, bu mudi Mukanda wa makebulula wa Bantemu ba Yehowa ne Mukanda wa Mvese idi itangila nsombelu wa buena Kristo. Vuluka ne: tshipatshila tshiebe ntshia kuangata mapangadika adi asankisha Yehowa.
Konkonona muenenu wa Yehowa (Tangila tshikoso 8) b
9. Ntshinyi tshitudi ne bua kuenza bua kuikala batuishibue ne: dipangadika ditudi tuangata nedisankishe Yehowa? (Efeso 5:17)
9 Ntshinyi tshitudi ne bua kuenza bua kuikala batuishibue ne: dipangadika ditudi tuangata nedisankishe Yehowa? Tudi ne bua kuanji kumumanya bimpe. Bible udi wamba ne: “Kumanya Mutambe Tshijila kudi dijingulula dia malu.” (Nsu. 9:10) Bushuwa, tuetu bamanye ngikadilu ya Yehowa, bamanye malu adiye mulongolole bua kuenza, bamanye bidiye munange ne bidiye mukine, netupete dijingulula dia malu dilelela. Diebeja ne: ‘Bilondeshile malu a Yehowa andi mumanye, ndipangadika kayi dindi mua kuangata didi mua kumusankisha?’—Bala Efeso 5:17.
10. Bua tshinyi mêyi manene a mu Bible adi ne mushinga wa bungi kupita bilele bia kuetu anyi bia muaba utudi basombele?
10 Misangu mikuabu bua kusankisha Yehowa bidi mua kutulomba bua kubenga kuenza malu adi bantu badi batunange batusaka bua kuenza. Tshilejilu, bamue baledi badi belela muanabu wa bakaji meji mimpe badi mua kusumisha bua bamusele kudi muntu wa kantu ku bianza anyi udi mua kubapesha biuma bia bungi nansha biobi ne: muntu au ki mmukole mu nyuma to. Bulelela, mbasue bua muanabu ikale ne nsombelu muimpe. Kadi mulume au neamuambuluishe bua kutungunuka ne kukola mu nyuma anyi? Yehowa udi udi wela meji kayi bua bualu abu? Diandamuna didi mu Matayi 6:33, mudibu balomba bena Kristo bua kutungunuka ne “kukeba tshia kumpala Bukalenge.” Nansha mutudi tunemeka baledi betu ne bantu bakuabu, tshidi ne mushinga wa bungi menemene nkusankisha Yehowa.
ELA MEJI BIMPE BUA BUALU BUUDI UKEBA KUANGATSHILA DIPANGADIKA
11. Nngikadilu kayi udi mu Filipoyi 1:9, 10, udi mua kukuambuluisha bua kuela meji bimpe bua bualu buudi ukeba kuangatshila dipangadika?
11 Wewe mumane kumanya mêyi manene a mu Bible adi akuambuluisha bua kuangata dipangadika kampanda, ela meji bimpe bua bualu buudi usua kudiangatshila. (Bala Filipoyi 1:9, 10.) Wewe ne dijingulula dia malu, nebikuambuluishe bua kumanya tshienzeka bua bualu buudi wangatshila dipangadika. Imue misangu bidi mua kuikala bipepele bua kuangata dipangadika. Kadi mapangadika onso kaatu anu mapepele to. Nunku dijingulula dia malu nedikuambuluishe bua kuangata mapangadika mimpe, nansha kumpala kua nsombelu mikole.
12-13. Mmunyi mudi dijingulula dia malu mua kukuambuluisha bua kuangata dipangadika dimpe kumpala kua kuitaba mudimu kampanda?
12 Difuanyikijilabi bualu ebu. Udi wenda ukeba mudimu bua kuambuluisha bena mu dîku diebe. Udi upeta midimu ibidi ya kuenza. Udi udienzeja bua kumanya malu onso adi atangila midimu ayi, bu mudi tshidi midimu ayi ilomba bua kuenza, programe yayi, bungi bua mêba adi akengela kuenza bua kufikaku ne malu makuabu. Midimu yonso ibidi ayi ki mmibi bua bena Kristo to. Pamuapa, udi usungula umue bualu badi bafutaku makuta mavumvuke anyi bualu udi mumanye tshidiwu ulomba bua kuenza. Kadi kudi malu makuabu a kutangila kumpala kua kuangata dipangadika dia kuwenza.
13 Tshilejilu, mudimu au neukupangishe bua kuikala kubuela mu bisangilu anyi? Newukudie dîba dia kutabalela bena mu dîku diebe ne kubambuluisha bua kusemenabu pabuipi ne Yehowa anyi? Kudiela nkonko eyi, nekukuambuluishe bua kumona ne: kutendelela Yehowa ne kutabalela majinga a bena mu dîku dietu ke “malu adi ne mushinga wa bungi” kupita dikeba kuikala ne makuta a bungi. Pashishe, Yehowa neabeneshe dipangadika diwangata.
14. Mmunyi mudi dijingulula dia malu ne dinanga bituambuluisha bua kubenga kulenduisha bakuabu?
14 Dijingulula dia malu nedikuambuluishe kabidi bua kuela meji a tshidi dipangadika diudi wangata mua kuenzela bakuabu bua kubenga ‘kubalenduisha.’ (Filip. 1:10) Bualu ebu budi ne mushinga wa bungi nangananga patudi tuangata mapangadika a bia kuvuala ne bua tshimuenekelu tshietu. Tshilejilu, tudi mua kuikala basue kuvuala bilamba kampanda anyi kuikala ne tshimuenekelu kansanga. Kadi netuenze tshinyi biobi kabiyi bisankisha bena Kristo netu anyi bantu ba tshianana? Dijungulula dia malu nedituambuluishe bua kuditeka pa muaba wabu. Dinanga neditusake bua kukeba diakalenga dia bantu bakuabu ne kuikala ne bupuekele. (1 Kol. 10:23, 24, 32; 1 Tim. 2:9, 10) Dîba adi, netuangate dipangadika didi dileja ne: tudi banange bakuabu ne tudi tubanemeka.
15. Ntshinyi tshiudi ne bua kuenza kumpala kua kukumbaja dipangadika diudi muangate?
15 Wewe ukeba kuangata dipangadika dinene, ela meji a tshiudi mua kuenza bua kudikumbaja. Yezu wakalongesha ne: tudi ne bua ‘kubadika bungi bua makuta atudi ne bua kutula.’ (Luka 14:28) Nunku, mbimpe tubadike mêba, bungi bua makuta, ne makanda adibi bitulomba bua kukumbaja dipangadika adi. Imue misangu tudi mua kulomba bena mu dîku dietu ngenyi ya tshia kuenza bua kudikumbaja. Bua tshinyi mbimpe kuenza nanku? Bualu badi mua kutuambuluisha bua kujingulula ne: kudi malu a kuakaja bua dipangadika adi anyi mushindu mukuabu muimpe wa kudikumbaja. Paudi ubambila bua dipangadika adi ne uteleja ngenyi idibu bakupesha, neukumbaje dipangadika adi bimpe.—Nsu. 15:22.
ANGATA DIPANGADIKA DIUDI MUA KUKUMBAJA
16. Mmalu kayi adi mua kukuambuluisha bua kuangata dipangadika diudi mua kukumbaja? (Tangila kabidi kazubu ka ne: “ Mua kuangata mapangadika mimpe.”)
16 Wewe mutumikile malu onso atudi bamone kuulu eku, nebikuambuluishe bua kuangata dipangadika dimpe. Ukadi mumanye malu onso mudiwu ne mukonkonone mêyi manene a mu Bible akuambuluisha bua kuangata dipangadika didi disankisha Yehowa. Mpindieu udi mua kulomba Yehowa bua akuambuluishe ukumbaje dipangadika adi.
17. Ntshinyi tshidi mua kutuambuluisha bua kuangata mapangadika mimpe?
17 Nansha biobi ne: kale ukavua muangate mapangadika avua mapatule bipeta bimpe, manya ne: kueyemena meji adi afumina kudi Yehowa ke kudi mua kukuambuluisha bua kuangata mapangadika mimpe, ki mmeji ebe anyi mamanya audi nawu to. Anu Yehowa nkayende ke udi mua kutupesha dimanya dilelela ne dijingulula dia malu. (Nsu. 2:1-5) Yehowa udi mua kukuambuluisha bua kuangata mapangadika adi mua kumusankisha.—Mis. 23:2, 3.
MUSAMBU WA 28 Mua kudia bulunda ne Yehowa
