TSHIENA-BUALU TSHIA KULONGA 5
MUSAMBU WA 108 Dinanga dia Nzambi dia lulamatu
Malu mimpe atudi tupeta bua mudi Yehowa mutunange
“Kristo Yezu wakalua panu bua kupandisha benji ba mpekatu.”—1 TIM. 1:15.
LUNGENYI LUNENE
Malu mimpe adi tshia kupikulangana natshi tshitupetesha ne mutudi mua kuleja Yehowa dianyisha.
1. Ntshinyi tshitudi mua kuenza bua kusankisha Yehowa?
FUANYIKIJABI ne: udi mupeshe muntu uudi munange tshintu tshimpe tshia pa buatshi tshia mushinga mukole. Neumvue bishi yeye mutshiteke anu mu nzubu patupu kayi nansha utumaku meji? Neumvue bibi be! Kadi yeye mukuele tuasakidila ne wenza natshi mudimu bimpe, bushuwa nebikusankishe bikole. Mmunyi mudi tshilejilu etshi tshipetangana ne dipa dia tshia kupikulangana natshi didi Yehowa mutupeshe? Yehowa mmufile Muanende bua bualu buetu. Nunku Yehowa udi umvua disanka dia bungi patudi tumuleja dianyisha bua dipa dia mushinga mukole adi ne bua mudiye mutunange. Dinanga adi ke divua dimusake bua kufila tshia kutupikula natshi!—Yone 3:16; Lomo 5:7, 8.
2. Ntshinyi tshituamona mu tshiena-bualu etshi?
2 Kadi tuetu katuyi kabidi ne dianyisha bua tshia kupikulangana natshi, nebilue anu bu ne: tudi bateke dipa dimpe didi Nzambi mutupeshe muaba utudi katuyi mua kudimona anyi kutumaku meji to. Nunku tshiena-bualu etshi netshituambuluishe bua kuikala ne tshibidilu tshia kuelangana meji bua malu adi Nzambi ne Kristo batuenzele. Dîba adi katuakujimija dianyisha ditudi nadi to. Netumone malu mimpe adi tshia kupikulangana natshi tshitupesha lelu ne matuku atshilualua. Netumone kabidi mutudi mua kuleja dianyisha bua mudi Yehowa mutunange, nangangana mu mbingu ya kumpala kua Tshivulukilu ne ya panyima patshi.
MALU MIMPE ATUDI TUPETA LELU
3. Mbualu kayi buimpe budi tshia kupikulangana natshi tshitupetesha lelu eu?
3 Mulambu wa tshia kupikulangana natshi wa Kristo ukadi mutuadije kutupetesha malu mimpe lelu. Tshilejilu, Yehowa udi utubuikidila mibi yetu. Ki mmuenzejibue bua kutubuikidila to, kadi mmusue kutubuikidila. Muimbi wa misambu wakaleja Yehowa dianyisha, wamba ne: “Bualu wewe, Yehowa, udi muimpe ne udi mudiakaje bua kubuikidilangana.”—Mis. 86:5; 103:3, 10-13.
4. Yehowa mmufile tshia kupikulangana natshi bua banganyi? (Luka 5:32; 1 Timote 1:15)
4 Bamue bantu badi mua kumona ne: ki mbakumbane bua Yehowa kubabuikidila to. Mu bulelela, tuetu bonso katuena bakumbane bua Yehowa kutubuikidila to. Mupostolo Paulo wakajingulula ne: kavua “mukumbane bua kubikidibua mupostolo” to. Kadi wakamba ne: “Ndi tshindi etshi bua ngasa wa Nzambi.” (1 Kol. 15:9, 10) Patudi tunyingalala bua mpekatu yetu, Yehowa udi utufuila luse. Bua tshinyi udi utufuilalu? Ki mbualu tudi balukumbanyine to, kadi mbualu mmutunange. Nunku wewe umvua bibi bua muudi umona ne: kuena mukumbana bua Yehowa kukubuikidila, vuluka ne: Yehowa uvua mufile tshia kupikulangana natshi bua bantu badi banyingalala bua mpekatu yabu, kavua mutshifile bua bantu bapuangane to.—Bala Luka 5:32; 1 Timote 1:15.
5. Mbimpe tudiambile ne: Yehowa neatubuikidile anu bua mudimu utudi bamuenzele anyi? Umvuija.
5 Katuena ne bua kudiambila ne: nansha bibande nansha bipueke, Yehowa neatubuikidile anu mibi yetu bualu tudi bamuenzele mudimu munkatshi mua bidimu bia bungi to. Bushuwa, Yehowa udi wanyisha mudimu utudi bamuenzele ne lulamatu. (Eb. 6:10) Wakatupesha Muanende bu dipa difila tshianana, ki mbu difutu bua mudimu utudi bamuenzele to. Kadi tuetu tuamba ne: Yehowa udi utubuikidila mibi yetu anu bua mudimu utudi bamuenzele, mbienze anu bu tudi tuamba ne: kabivua bikengela Yezu atufuile to.—Fuanyikija ne Galatiya 2:21.
6. Bua tshinyi Paulo uvua udifila bikole mu mudimu wa Yehowa?
6 Paulo uvua mumanye ne: kavua mukumbana bua Nzambi kumuanyisha to. Kadi bua tshinyi uvua udifila mu mudimu wa Yehowa? Uvua udifila nanku bua kuleja Yehowa dianyisha bua ngasa uvuaye mumuenzele. (Ef. 3:7) Tutungunukayi ne kuenzela Yehowa mudimu ne tshisumi anu bu Paulo. Ki mbimpe tumuenzelawu ne meji a ne: atubuikidile to. Kadi tumuenzelawu bua kumuleja dianyisha.
7. Mbualu kayi bukuabu buimpe budi tshia kupikulangana natshi tshitupetesha lelu eu? (Lomo 5:1; Yakobo 2:23)
7 Bualu bukuabu buimpe budi tshia kupikulangana natshi tshitupetesha lelu eu budi ne: tudi mua kushemesha malanda etu ne Yehowa. a Anu mutudi bamone mu tshiena-bualu tshishale, katuena baledibue bikale mu malanda ne Nzambi to. Kadi tshia kupikulangana natshi tshidi tshituambuluisha bua tuikale “mu ditalala ne Nzambi,” tshitusemeja pabuipi nende.—Bala Lomo 5:1; Yakobo 2:23.
8. Bua tshinyi tudi ne bua kuikala ne dianyisha kudi Yehowa bua diakalenga dia kumusambila didiye mutupeshe?
8 Bulunda butudi badie ne Yehowa mbutupeteshe diakalenga dia pa buadi dia kumusambila. Yehowa utu utuleja masambila a bantu bende padibu mu bisangilu ne padibu muntu yonso pa nkayende. Disambila didi mua kutukija mioyo yetu ne kutupetesha ditalala dia mu muoyo. Didi dituambuluisha kabidi bua kukolesha bulunda buetu ne Nzambi. (Mis. 65:2; Yak. 4:8; 1 Yone 5:14) Pavua Yezu pa buloba, uvua ne tshibidilu tshia kusambila bualu uvua mumanye ne: Yehowa uvua umuteleja. Uvua kabidi mumanye ne: disambila divua mua kumuambuluisha bua akoleshe malanda ende ne Tatu wende. (Luka 5:16) Tudi ne dianyisha dia bungi bua mudi mulambu wa Yezu utuambuluisha bua kulua balunda ba Yehowa ne bua mudiwu mutupeteshe too ne mushindu wa kumusambila!
MALU MIMPE ATUAPETA MATUKU ATSHILUALUA
9. Tshia kupikulangana natshi netshipeteshe batendeledi ba Yehowa ba lulamatu tshinyi kumpala eku?
9 Tshia kupikulangana natshi netshipeteshe batendeledi ba Yehowa ba lulamatu tshinyi kumpala eku? Netshibapeteshe muoyo wa tshiendelele. Bantu ba bungi badi bela meji ne: kakuena mushindu wa kupeta muoyo wa tshiendelele to, bualu kukadi bidimu bia bungi bidi bantu bafua anu kufua. Kadi Yehowa uvua mufuke bantu bua bikale ne muoyo kashidi. Bu Adama kayi muenze mpekatu, muntu nansha umue kavua mua kuelesha bualu bua dikala ne muoyo wa tshiendelele mpata to. Nansha mudibi bikole bua bantu kuitababu lelu ne: kudi mushindu wa kushala ne muoyo kashidi, tudi batuishibue ne: netuwupete bualu tudi bamanye ne: Yehowa wakafila dipa dia mushinga mukole, tuambe ne: muoyo wa Muanende bua tupete muoyo wa tshiendelele.—Lomo 8:32.
10. Ntshinyi tshidi bela manyi ne bena mu mikoko mikuabu bindile ne muoyo kuulu kuulu?
10 Nansha mututshidi bindile bua kupeta muoyo wa tshiendelele matuku atshilualua, Yehowa mmusue bua tutumaku meji etu lelu eu. Bela manyi mbindile ne muoyo kuulu kuulu bua kupeta nsombelu muimpe mu diulu. Nebakokeshe buloba pamue ne Kristo. (Buak. 20:6) Bena mu mikoko mikuabu bobu mbatekemene bua kusomba mu Mparadizu, muikala kamuyi ntatu ne makenga. (Buak. 21:3, 4) Udi wa mu mikoko mikuabu, mutekemene bua kusomba ne muoyo kashidi pa buloba anyi? Kusomba ne muoyo kashidi pa buloba ki ndifutu dishadile ku dia kuikala ne muoyo mu diulu to! Yehowa uvua mufuke bantu bua basombe pa buloba. Nunku patuikala ne muoyo wa tshiendelele pa buloba apa, netuikale ne disanka diyila ne panshi.
11-12. Mmalu mimpe kayi atudi bindile ne muoyo kuulu kuulu mu Mparadizu? (Tangila kabidi bimfuanyi.)
11 Difuanyikijilabi nsombelu uwikale nende mu Mparadizu. Kuakusamisha kabidi mutu bua masama ne lufu to. (Yesh. 25:8; 33:24) Yehowa neakupeshe bionso biudi nabi dijinga. Mmalu kayi awajinga kumanya? Neujinge kumanya malu adi atangila nyama anyi? Neujinge kumanya mua kuimba mijiki ne tshiombelu kampanda anyi? Neujinge kumanya mua kuzola anyi? Kakuyi mpata, nebikengele ne: mu Mparadizu muikale benji ba plan ya nzubu, bibaki, ne babidime. Nebikengele muikale kabidi bantu badi batabalela bia pa madimi, badi benza biamu bia mudimu, ne badi batabalela madimi malenga a bikunyibua. (Yesh. 35:1; 65:21) Bu mutuikala ne muoyo wa tshiendelele tshikondo atshi, netupete dîba dia kuenza midimu yonso ayi ne mikuabu ya bungi.
12 Patuatuilangana ne bantu babishibua ku lufu, netumvue disanka dia dikema! (Bien. 24:15) Ela kabidi meji a disanka diwikala nadi pawikala wenda ulonga malu makuabu adi atangila Yehowa ku diambuluisha dia bintu bia bungi bidiye mufuke. (Mis. 104:24; Yesh. 11:9) Bualu buimpe menemene budi ne: netutendelele Yehowa katuyi tuenza kabidi mpekatu to! Neujinge bua kujimija masanka onso aa anu bua “disanka dia mpekatu dia tshitupa tshîpi” anyi? (Eb. 11:25) Kuitabi bua kuajimije to! Masanka au mmapite malu onso atudi tudipangisha lelu. Manya ne: kamana kamana buloba ebu nebulue anu Mparadizu, kabuakushala mudibu emu to. Bu Yehowa kayi mufile Muanende bua kutufuila, katuvua mua kutekemena malu onso aa to!
Mmalu kayi mimpe audi muindile ne muoyo kuulu kuulu mu Mparadizu? (Tangila tshikoso 11-12)
LEJA YEHOWA DIANYISHA BUA MUDIYE MUKUNANGE
13. Mmunyi mutudi mua kuleja Yehowa dianyisha bua mudiye mutunange? (2 Kolinto 6:1)
13 Mmunyi mutudi mua kuleja Yehowa dianyisha bua mudiye mufile tshia kupikulangana natshi? Mpatudi tuteka mudimu utudi tumuenzela muaba wa kumpala mu nsombelu wetu. (Mat. 6:33) Tuambe eku tuela eku, Yezu wakafuila bantu bonso “bua badi ne muoyo kabikadi ne muoyo buabu nkayabu to, kadi bikale nawu bua yeye uvua mubafuile ne bamujule ku lufu.” (2 Kol. 5:15) Bu mudi Yehowa mutuleje bulenga ne mutubuikidile, mbimpe malu onso atudi tuenza aleja ne: tudi tuangata malu adiye mutuenzele ne mushinga ne tudi ne dianyisha dia bungi kudiye.—Bala 2 Kolinto 6:1.
14. Mmunyi mutudi mua kuleja ne: tudi tulonda buludiki bua Yehowa ne muoyo mujima?
14 Mushindu mukuabu wa kuleja Yehowa dianyisha bua mudiye mutunange, ngua kulonda buludiki buende ne muoyo mujima. Tudi tubulonda patudi tukeba kumanya tshidiye musue kumpala kua kuangata dipangadika, bu mudi dia tulasa tua kulonga anyi dia mudimu wa kuenza. (1 Kol. 10:31; 2 Kol. 5:7) Patudi tuangata mapangadika bilondeshile ditabuja ditudi nadi kudi Yehowa, ditabuja dietu adi didi dikole nansha bulunda buetu nende kabidi. Netuikale anu batekemene bua kushala ne muoyo kashidi.—Lomo 5:3-5; Yak. 2:21, 22.
15. Mmushindu kayi utudi mua kuleja Yehowa dianyisha mu tshikondo tshia Tshivulukilu?
15 Mushindu mukuabu wa kuleja Yehowa dianyisha bua mudiye mutunange ngowu eu: kuenza tshionso tshitudi mua kuenza mu tshikondo tshia Tshivulukilu bua kuleja mutudi ne dianyisha bua tshia kupikulangana natshi. Pa kumbusha didilongolola bua kubuela mu Tshivulukilu, mbimpe tubikile bantu bakuabu bua balue kubuelamu. (1 Tim. 2:4) Ubumvuije malu enzekamu. Mbimpe ubaleje filme udi mu jw.org wa Bua tshinyi Yezu wakafua? ne wa Vuluka lufu lua Yezu. Bakulu badienzeje bua kubikila bantu bakadi balekele kubuela mu bisangilu. Ela meji a disanka dikala mu diulu ne pa buloba padi mikoko ya Yehowa ivua mijimine ipingana mu tshikumbi tshiende! (Luka 15:4-7) Patudi mu Tshivulukilu, mbimpe tuele bantu bonso muoyo, kadi nangananga badi baluamu bua musangu wabu wa kumpala anyi bakadi benze bidimu bia bungi kabayi babuelamu. Tudi basue badiumvue badilekelele!—Lomo 12:13.
16. Bua tshinyi mbimpe kuvudija mudimu wetu wa buambi mu tshikondo tshia Tshivulukilu?
16 Udi mua kuvudija mudimu webe wa buambi mu tshikondo tshia Tshivulukilu anyi? Paudi uwuvudija, bidi bileja muudi ne dianyisha bua malu onso adi Nzambi ne Kristo bakuenzele. Tuetu tudifila mu mudimu wa Yehowa bikole, netudimuenene mudiye utuambuluisha ne netumueyemene bikole. (1 Kol. 3:9) Bualu bukuabu, dienzeja bua kubala Bible, ulonda programe wa dibala dia Bible bua Tshivulukilu udi mu broshire wa Tukonkononayi Mifundu dituku dionso anyi udi mu mabeji a tshisangilu. Udi mene mua kusungula mvese ayi bua kudilongela.
17. Ntshinyi tshidi tshisankisha Yehowa? (Tangila kabidi kazubu ka ne: “ Mishindu ya kuleja Yehowa dianyisha bua mudiye mutunange.”)
17 Pamuapa nsombelu webe kena ukupetesha mushindu wa kuenza malu onso adibu baleje mu tshiena-bualu etshi to. Kadi manya ne: Yehowa kena ufuanyikija biudi wenza ne bia bakuabu to. Mmumanye tshidi mu muoyo webe. Udi usanka padiye ukumona wanyisha dipa dia mushinga didiye mufile, tuambe ne: tshia kupikulangana natshi.—1 Sam. 16:7; Mâko 12:41-44.
18. Bua tshinyi tudi ne dianyisha kudi Yehowa Nzambi ne kudi Yezu Kristo?
18 Bu Yehowa kayi mufile tshia kupikulangana natshi, kavua mua kutubuikidila mibi yetu to; katuvua mua kudia nende bulunda anyi kutekemena muoyo wa tshiendelele nansha. Tutungunukayi anu ne kuleja Yehowa dianyisha bua mudiye mutunange bualu dinanga diende ke didi dimusaka bua kutupetesha masanka onso aa. (1 Yone 4:19) Tuikalayi kabidi ne dianyisha kudi Yezu bua mudiye mutunange bikole, mufile too ne muoyo wende bua bualu buetu.—Yone 15:13.
MUSAMBU WA 154 Dinanga dia kashidi
a Yehowa wakafuila batendeledi bende ba kale luse kumpala mene kua Yezu kufila tshia kupikulangana natshi. Wakabafuilalu bualu uvua mutuishibue ne: Muanende uvua ne bua kushala ne lulamatu too ne ku lufu. Nunku ku mêsu kua Nzambi bikavua anu bu ne: tshia kupikulangana natshi atshi tshikavua tshifidibue.—Lomo 3:25.
