TSHIENA-BUALU TSHIA KULONGA 4
MUSAMBU WA 18 Dianyisha bua tshia kutupikula natshi
Tshidi tshia kupikulangana natshi tshitulongesha?
“Mu bualu ebu dinanga dia Nzambi diakamueneshibua.”—1 YONE 4:9.
LUNGENYI LUNENE
Tshidi tshia kupikulangana natshi tshitulongesha bua ngikadilu mimpe ya Yehowa Nzambi ne ya Yezu Kristo.
1. Tuetu tubuela mu Tshivulukilu tshia lufu lua Yezu tshidimu tshionso, bidi mua kutuambuluisha mushindu kayi?
BULELELA, tudi tuitaba ne: tshia kupikulangana natshi ndipa dia mushinga mukole didi Yehowa mutupeshe! (2 Kol. 9:15) Bu muvua Yezu mufile muoyo wende bua bualu buetu, tudi ne mushindu wa kudia bulunda bukole ne Yehowa Nzambi ne kutekemena muoyo wa tshiendelele. Yehowa mmufile tshia kupikulangana natshi bualu mmutunange. Bidi bitusaka bua kumuleja dianyisha dia bungi. (Lomo 5:8) Yezu wakatutumina dîyi bua kuikala kubuela mu Tshivulukilu tshia lufu luende tshidimu tshionso bua kuleja mutudi ne dianyisha bua malu adi Yehowa ne yeye muine batuenzele.—Luka 22:19, 20.
2. Ntshinyi tshituamona mu tshiena-bualu etshi?
2 Tshidimu etshi netuenze Tshivulukilu tshia lufu lua Yezu mu Disambombo dia 12/4/2025. Kakuyi mpata, tuetu bonso tudi tuenda tudilongolola bua kubuelamu. Mu tshikondo tshia Tshivulukilu atshi, tuetu tuelangana meji bua bidi Yehowa ne Yezu batuenzele, nebituambuluishe bikole. Mu tshiena-bualu etshi, netumone tshidi tshia kupikulangana natshi tshitulongesha bua Yehowa ne bua Muanende. Mu tshiena-bualu tshialonda, netumone malu mimpe adi tshia kupikulangana natshi tshitupetesha ne mutudi mua kuleja dianyisha bua bualu buatshi.
TSHIDI TSHIA KUPIKULANGANA NATSHI TSHITULONGESHA BUA YEHOWA
3. Mmunyi muvua lufu lua muntu mulume umue mua kusungila bantu ba bungi? (Tangila kabidi tshimfuanyi.)
3 Tshia kupikulangana natshi tshidi tshitulongesha ne: Yehowa nNzambi udi munange buakane. (Dut. 32:4) Adama wakabenga kutumikila Nzambi, kuluaye muena mpekatu, pashishe kufuaye. Nunku bu mutudi ndelanganyi yende, tudi bapiane mpekatu ne lufu. (Lomo 5:12) Bua kutupikula ku mpekatu ne ku lufu, Yehowa wakatuma Yezu bua kufila tshia kupikulangana natshi. Kadi mmunyi muvua mulambu wa muntu mupuangane umue mua kusungila bantu ba bungi? Mupostolo Paulo wakumvuija, wamba ne: “Anu bu muvua ba bungi bavuijibue bena mpekatu ku dibenga kutumikila dia muntu umue au [Adama], bia muomumue kabidi, ba bungi nebavuijibue bakane ku ditumikila dia muntu umue eu [Yezu].” (Lomo 5:19; 1 Tim. 2:6) Mu mêyi makuabu, bu muvua muntu mulume umue mupuangane mubenge kutumikila Nzambi, mutuvuije bapika ba mpekatu ne lufu, bivua bikengela muntu mulume mukuabu umue mupuangane uvua ne bua kutumikila Nzambi atusungile.
Muntu umue wakatuvuija bapika ba mpekatu ne lufu. Kadi muntu mukuabu umue mmutupikule ku bubi ne ku lufu (Tangila tshikoso 3)
4. Bua tshinyi Yehowa kakanyishila anu ndelanganyi ya Adama ivua imutumikila bua kushala ne muoyo kashidi?
4 Bua Yehowa kutusungila, bivua bikengela anu ne: Yezu afue anyi? Kavua mua kuanyishila anu ndelanganyi ya Adama ivua imutumikila bua kushala ne muoyo kashidi anyi? Tuetu bantu bapange bupuangane, tudi mua kuela meji ne: ke tshivua tshimpe bua Yehowa kuenza. Kadi bua Yehowa, kuenza nanku kakuvua kuimpe to. Bualu bivua mua kulua kumueneka bu ne: Adama kavua muenze mpekatu munene ne bana bende kabavua balue bena mpekatu to. Pabi Adama uvua muenze mpekatu.
5. Ntshinyi tshidi tshitujadikila ne: Yehowa neenze anu tshidi tshiakane?
5 Kadi bu Yehowa kayi mufile tshia kupikulangana natshi, muteke buakane buende ku luseke bua kuanyishila bana ba Adama bapange bupuangane bua kushala ne muoyo kashidi, ntshinyi tshivua mua kuenzeka? Dîba adi bantu bavua mua kuela meji ne: Yehowa kena unemeka mikenji yende ya tshidi tshimpe ne tshidi tshibi to, ne neapangile mua kukumbaja imue ya ku milayi yende. Kadi ki mbimpe tusamishe mutu nanku to, bualu Yehowa wakenza tshivua tshiakane, tshia kufila too ne Muanende munanga, bualu buvua kabuyi bupepele to. Bidi bitujadikila ne: neenze anu tshidi tshiakane.
6. Mmunyi mudi tshia kupikulangana natshi tshileja ne: Yehowa mmutunange?
6 Tshia kupikulangana natshi ntshituambuluishe bua kumona ne: Yehowa mmuakane. Kadi tshidi nangananga tshituambuluisha bua kumona ne: mmutunange bikole. (Yone 3:16; bala 1 Yone 4:9, 10.) Mmusue bua tuikale ne muoyo kashidi ne tuikale ba mu dîku diende. Pakenza Adama mpekatu, Yehowa wakamuipata mu dîku diende. Ke bualu kayi tuetu bonso katuena baledibue mu dîku dia Nzambi to. Kadi ku diambuluisha dia tshia kupikulangana natshi, Yehowa udi utubuikidila mpekatu yetu. Neanyishile muntu yonso udi umuleja ditabuja ne umutumikila bua abuele mu dîku diende. Nansha mpindieu, tudi mua kuikala mu malanda mimpe ne Yehowa ne bena Kristo netu. Bulelela, Yehowa mmutunange bikole be!—Lomo 5:10, 11.
7. Mmunyi mudi makenga a Yezu atuambuluisha bua kumona ne: Yehowa mmutunange bikole?
7 Tuetu tuela meji a muvuabi bisama Yehowa ku muoyo bikole pavuaye umona Muanende ukenga, nebituambuluishe bua kumona ne: Yehowa mmutunange bikole. Satana udi wamba ne: mutendeledi wa Nzambi nansha umue kena mua kushala ne lulamatu kudi Nzambi padiye utuilangana ne nsombelu mikole to. Kadi Yehowa wakalekela bua Muanende akenge kumpala kua kufuaye bua kuleja ne: Satana uvua mushime. (Yobo 2:1-5; 1 Pet. 2:21) Yehowa uvua mushale anu mutangile muvua bantu baseka Yezu, Muanende munanga; muvuabu bamututa kudi basalayi, bamupopela ku mutshi, ne muvuaye ukenga kumpala kua kufua. (Mat. 27:28-31, 39) Yehowa uvua ne bukole bua kumukuba ku makenga onso au. Tshilejilu, pavua baluishi bende bambe ne: ‘Bikala Nzambi mumusue amusungile mpindieu,’ Yehowa uvua anu mua kumusungila. (Mat. 27:42, 43) Kadi bu yeye mumusungile, Yezu kavua mua kufila tshia kupikulangana natshi ne kupesha bantu ditekemena to. Ke bualu kayi, Yehowa wakalekela Muanende ukenga too muakakulaye muoyo.
8. Pavua Yehowa mumone Muanende ukenga, uvua mumvue kanyinganyinga anyi? Umvuija. (Tangila kabidi tshimfuanyi.)
8 Katuambi ne: bu mudi Yehowa muikale Nzambi wa bukole buonso kena mua kumvua yeye bibi to! Mmufuke bantu ne bukokeshi bua kumvua bimpe anyi bibi. Bu mudi Bible wamba ne: mmutufuke mu tshimfuanyi tshiende, nunku utu pende umvua bimpe anyi bibi. Bible udi uleja ne: utu umvua ‘kanyinganyinga.’ (Mis. 78:40, 41) Tuakulabi bua tshivua tshifikile Abalahama ne Izaka. Yehowa wakalomba Abalahama bua kumulambula muanende umuepele. (Gen. 22:9-12; Eb. 11:17-19) Elabi meji kanyinganyinga kavua Abalahama mua kuikala mumvue pavuaye udilongolola bua kushipa muanende. Nunku Yehowa uvua mua kuikala mumvue pende dibungama ne kanyinganyinga pavuaye mumone batuta Muanende ne bamushipa!—Tangila filme wa Nuidikije ditabuja diabu—Abalahama, Tshitupa 2 mu jw.org.
Yehowa wakumvua bibi menemene pavuaye umona bakengesha Muanende (Tangila tshikoso 8)
9. Lomo 8:32, 38, 39 udi utulongesha tshinyi bua mushindu udi Yehowa mutunange?
9 Tshia kupikulangana natshi tshidi tshitulongesha ne: kakuena muntu nansha umue, nansha yeye mulela wetu utudi banange bikole anyi mulunda wetu wa pa muoyo, udi mua kutunanga bu Yehowa to. (Bala Lomo 8:32, 38, 39.) Kakuyi mpata, Yehowa mmutunange bikole menemene kupita ne mutudi badinange. Udi musue kushala ne muoyo kashidi anyi? Manya ne: Yehowa musue bua ushale nawu kukupita ne wewe. Udi musue bua akubuikidile mpekatu yebe anyi? Manya ne: dijinga didiye nadi dia kukubuikidila mpekatu ndipite ne diebe wewe. Tshionso tshidiye utulomba bua kuenza nkumuleja dianyisha bua dipa dia mushinga dia tshia kupikulangana natshi ne kumutumikila. Tshia kupikulangana natshi tshidiye mufile ke tshintu tshinene tshidi tshileja mudiye mutunange bikole. Mu bulongolodi bupiabupia, netulonge malu a bungi adiye mutuenzele bua mudiye mutunange.—Muam. 3:11.
TSHIDI TSHIA KUPIKULANGANA NATSHI TSHITULONGESHA BUA YEZU
10. a) Bua tshinyi Yezu uvua mubungame pavuabu bakeba kumushipa? b) Mmushindu kayi uvua Yezu muleje ne: malu avua Satana muambe bua Tatu wende avua a dishima? (Tangila kabidi kazubu ka ne: “ Yezu wakabingisha dîna dia Yehowa bua muvuaye mushale ne lulamatu.”)
10 Yezu uvua uditatshisha bikole bua lumu lua Tatu wende kalunyanguki to. (Yone 14:31) Yezu wakabungama bikole bua muvua bantu bamuamba ne: mmupende Nzambi, bakeba ne kumushipa bua bualu abu; bifuane kupendeshisha dîna dia Nzambi ne kumuangatshisha bibi. Ke bualu kayi wakasambila, wamba ne: “Tatu wanyi, bikalaku mushindu, dikopo edi diyile kule nanyi.” (Mat. 26:39) Pakashalaye ne lulamatu too ne ku lufu luende, wakaleja ne: malu avua Satana muambe bua Tatu wende avua a dishima.
11. Mmunyi muvua Yezu muleje ne: uvua munange bantu? (Yone 13:1)
11 Tshia kupikulangana natshi tshidi tshitulongesha kabidi ne: Yezu udi utabalela bantu bikole, nangananga bayidi bende. (Nsu. 8:31; bala Yone 13:1.) Tshilejilu, Yezu uvua mumanye ne: amue malu avuaye ne bua kuenza pa buloba avua mua kumukebela ntatu ne kumufikisha ku lufu lubi menemene. Wakakumbaja mudimu wende bualu uvua munange bantu, kavua muwukumbaje anu bualu ke tshivua Yehowa mumutumine pa buloba to. Wakadifila ne muoyo mujima mu mudimu wa kuyisha bantu, kubalongesha ne wa kubambuluisha. Nansha dituku divuaye ne bua kufua, wakuowesha bayidi bende mâyi ku makasa, kubakankamija ne kubakolesha. (Yone 13:12-15) Pashishe, nansha pavuabu bamupopele ku mutshi, wakalaya muenzavi uvua ku luseke luende ne: neikale nende mu Mparadizu, kulombaye kabidi Yone bua kushala kutabalela mamuende bua kuleja muvuaye uditatshisha bua bualu buende. (Luka 23:42, 43; Yone 19:26, 27) Nunku Yezu wakalongesha bantu, kubenzela malu mimpe ne kufua bua bualu buabu bua kuleja muvuaye mubanange.
12. Mmalu kayi adi Yezu utuenzela lelu eu?
12 Nansha muvua Kristo mufue “musangu umue bua kashidi,” utshidi anu utuenzela malu mimpe a bungi. (Lomo 6:10) Mmalu kayi au? Udi utungunuka ne kutupesha bintu bimpe bia bungi ku diambuluisha dia tshia kupikulangana natshi. Mona midimu idiye nayi: mMukalenge wetu, Muakuidi munene, ne udi ku mutu kua tshisumbu. (1 Kol. 15:25; Ef. 5:23; Eb. 2:17) Yeye ke udi wenza mudimu wa kusangisha bela manyi ne bantu ba mu musumba munene. Neawujikije kumpala kua dikenga dinene kujika. a (Mat. 25:32; Mâko 13:27) Udi kabidi upesha batendeledi ba Yehowa ba lulamatu biakudia bia mu nyuma mu matuku a ku nshikidilu aa ku diambuluisha dia mupika wa lulamatu. (Mat. 24:45) Neatungunuke ne kutuenzela malu mimpe mu bukokeshi buende bua bidimu tshinunu. Bulelela, Yehowa wakafila Muanende bua bualu buetu!
KULEKEDI KUDILONGELA TO
13. Ntshinyi tshiudi mua kutungunuka ne kuenza bua kumanya malu adi aleja ne: Nzambi ne Kristo mbatunange?
13 Wewe utungunuka ne kuelangana meji bikole bua bidi Yehowa ne Kristo bakuenzele, neumone malu adi akuleja ne: mbatunange. Pamuapa mu tshikondo tshia Tshivulukilu tshienzeka tshidimu etshi, bala Evanjeliyo umue anyi ya bungi ne ntema yonso. Kukebi bua kubala nshapita ya bungi musangu umue to. Kadi bala nshapita mikese; pashishe keba bua kumanya malu makuabu adi mua kukusaka bua kunanga Yehowa ne Yezu. Ambila bakuabu malu audi ulonga.
14. Bilondeshile Misambu 119:97 ne dimanyisha dia kuinshi kua dibeji, mmunyi mudi kuenza makebulula mua kukuambuluisha bua kumanya malu adi atangila tshia kupikulangana natshi ne malongesha makuabu? (Tangila kabidi tshimfuanyi.)
14 Biwikala ukadi mubatijibue kukadi bidimu bia bungi, udi mua kuikala udiebeja bua kumanya ni kutshidi malu mapiamapia audi mua kulonga adi atangila buakane bua Yehowa, dinanga diende, ne tshia kupikulangana natshi. Wewe manya ne: nekuikale anu malu mapiamapia a kulonga. Nunku ntshinyi tshiudi ne bua kuenza? Ikala ubala malu adi mu mikanda yetu ne ualonga. Wewe kuyi mumvue mvese kampanda bimpe, muenzela makebulula. Pashishe, elangana meji dituku dijima bua malu audi mupete ne bua tshidiwu akulongesha bua Yehowa, bua Yezu, ne bua mudibu bakunange.—Bala Misambu 119:97 ne dimanyisha dia kuinshi kua dibeji.
Nansha tuetu mu bulelela kukadi bidimu bia bungi, tudi mua kuvudija dianyisha ditudi nadi bua tshia kupikulangana natshi (Tangila tshikoso 14)
15. Bua tshinyi mbimpe kutungunuka ne kukebulula malu mapiamapia a mu Bible?
15 Wewe kuyi mupete malu mapiamapia anyi adi akusankisha misangu yonso iudi ubala Bible anyi wenza makebulula, kuteketshi mu mikolo to. Mu ngumvuilu kampanda, udi anu bu muntu utu umbula or. Utu ushala ne lutulu, wenza mudimu mêba a bungi anyi matuku a bungi bua kushisha kupeta nansha kapesa ka or. Utu usuminyina bualu mmumanye ne: yeye mukapete, nansha mudiku kakese, nekikale ne mushinga wa bungi kudiye. Malongesha malelela a mu Bible adi ne mushinga wa bungi kupita or. (Mis. 119:127; Nsu. 8:10) Nunku tungunuka ne kubala Bible ne kuenza makebulula bua kumanya malu mapiamapia.—Mis. 1:2.
16. Leja muudi mua kuidikija Yehowa ne Yezu.
16 Paudi udilongela Bible, keba mishindu iudi mua kutumikila malu audi ulonga. Tshilejilu, bua kuleja muudi widikija buakane bua Yehowa, kuenzedi bantu malu ne kansungansunga to. Itaba bua kukenga bua dîna dia Yehowa ne bua bena Kristo nebe, dîba adi nebileje muudi widikija Yezu uvua munange Tatu wende ne bantu bakuabu. Mushindu mukuabu wa kuidikija Yezu ngowu eu: yisha bantu bakuabu bua bapete mpunga wa kuitabuja tshia kupikulangana natshi tshivua Yezu mufile.
17. Ntshinyi tshituamona mu tshiena-bualu tshialonda?
17 Tuetu batungunuke ne kulonga malu adi atangila tshia kupikulangana natshi, netunange Yehowa ne Yezu bikole menemene. Bobu pabu nebatunange bikole. (Yone 14:21; Yak. 4:8) Nunku tuenzayi mudimu ne bintu bionso bidi Yehowa utupesha bua tutungunuke ne kulonga malu adi atangila tshia kupikulangana natshi. Mu tshiena-bualu tshialonda, netumone imue mishindu idi tshia kupikulangana natshi mua kutuambuluisha ne mutudi mua kuleja Yehowa dianyisha bua mudiye mutunange.
MUSAMBU WA 107 Tshilejilu tshia Nzambi tshia dinanga
a Disangisha dia “bintu bidi mu diulu” didi Paulo muakuile mu Efeso 1:10 ndishilangane ne disangisha dia “basungula” didi Yezu muakuile mu Matayi 24:31 ne mu Mâko 13:27. Paulo udi wakula bua tshikondo tshidi Yehowa wela bantu manyi a nyuma muimpe, tuambe ne: ubasungula bua baye kukokesha ne Yezu. Yezu yeye udi wakula bua tshikondo tshiasangishabu bashadile bela manyi badi pa buloba mu diulu mu tshikondo tshia dikenga dinene.
