1. Ntshinyi tshitu bantu ba bungi benza lelu eu?

 UKADI pamuapa mumone ne: bantu ba bungi lelu badi ne budinangi. Tshilejilu, bamue batu bela bintu bia bungi miaba ya dipetelangana ku Enternete bua kukoka ntema ya bantu kudibu ne bua kubaleja bikadibu benze. Anu bantu bakese tshianana lelu eu ke batu batumbisha Yehowa. Mu tshiena-bualu etshi, netumone tshidi kutumbisha Yehowa kumvuija ne tshidi ne bua kutusaka bua kumutumbisha. Netumone kabidi tshitudi ne bua kuenza bua kupesha Yehowa butumbi budi bumuakanyine ne mukadiye pa kutumbisha dîna diende.

TSHIDI KUTUMBISHA YEHOWA KUMVUIJA

 2. Mmunyi muvua Yehowa muleje butumbi buende ku mukuna wa Sinai? (Tangila kabidi tshimfuanyi.)

² Bible udi uleja ne: Yehowa nNzambi munene. Wakaleja butumbi buende matuku makese yeye mumane kupatula bena Isalele mu Ejipitu muvuabu bapika. Teta kudifuanyikijila tshivua tshienzeke dituku adi. Bena Isalele ba bungi bavua badisangishe ku mukuna wa Sinai bua kutuilangana ne Nzambi. Ditutu difiike diakabuikila mukuna. Katupa aka, buloba kutuadija kuzakala bikole menemene. Miadi ya mpungi kutuadijayi kumvuika muulu. (Ekes. 19:16-18; 24:17; Mis. 68:8) Bivua mua kuikala bipitshile bena Isalele pavua Yehowa mubaleje bukole buende ne butumbi buende.

 3. Kutumbisha Yehowa nkuenza tshinyi?

³ Tuetu bantu tudi mua kupesha petu Yehowa butumbi anyi? Eyowa. Tudi tuenza nanku patudi tuambila bakuabu malu a dikema adiye muenze ne ngikadilu yende milenga. Tudi tumutumbisha kabidi patudi tumupesha butumbi bua malu adiye  utuambuluisha bua kukumbaja. (Yesh. 26:12) Mukalenge Davidi wakatumbisha Yehowa. Udi tshilejilu tshimpe tshia dikema. Pavuaye usambila kumpala kua tshisumbu tshia bena Isalele, wakambila Nzambi ne: “Wewe Yehowa, bunene ne bukole ne bulengele ne butumbi ne bukokeshi mbiebe, bualu bintu bionso bidi mu diulu ne pa buloba mbiebe.” Pakajikijaye kusambila, “tshisumbu tshionso tshiakatumbisha Yehowa.”​—1 Kul. 29:11, 20.

 4. Mmunyi muvua Yezu mutumbishe Yehowa?

⁴ Pavua Yezu pa buloba, wakatumbisha Tatu wende pavuaye wambila bantu ne: yeye ke uvua mumupeshe bukole bua kuenza bishima. (Mâko 5:18-20) Wakaleja kabidi muvuaye utumbisha Yehowa pavuaye ubambila malu a Tatu wende ne ubenzela malu mimpe. Dimue dituku pavuaye ulongesha mu nsunagoga, kuvua mamu mukuabu munkatshi mua bantu bavuaye ulongesha abu uvuabu batatshisha kudi demon kukavua bidimu 18. Demon au uvua mukobamije mamu au nyima, kayi ne mushindu wa kololoka to. Bivua bibi be! Yezu wakamumvuila luse, kuya kudiye, kumuambilaye ne: “Mukaji, udi musuludibue ku butekete buebe.” Pashishe wakamutentekela bianza, yeye kololoka diakamue, “kutuadijaye kutumbisha Nzambi” bua muvuaye muondopibue! (Luka 13:10-13) Mamu au uvua ne tshivua tshimusake bua kutumbisha Nzambi, nansha tuetu petu.

TSHIDI TSHITUSAKA BUA KUTUMBISHA YEHOWA

 5. Mmalu kayi adi atusaka bua kunemeka Yehowa?

⁵ Tudi tutumbisha Yehowa bualu tudi tumunemeka bikole. Kudi malu a bungi adi atusaka bua kumunemeka. Yehowa ngua bukole buonso. Bukole buende kabutu ne mikalu to. (Mis. 96:4-7) Meji ende a kukema adi amueneka bimpe mu bintu bidiye mufuke. Yeye ke mpokolo wa muoyo. Udi utupesha bionso bidi bikengela bua tuikale anu nawu. (Buak. 4:11) Mmuena lulamatu. (Buak. 15:4) Bualu buonso butuye wenza, butu anu bupatula bipeta bimpe. Utu anu ukumbaja milayi yende. (Yosh. 23:14) Ke bualu kayi muprofete Yelemiya wakamba bua Yehowa ne: “Munkatshi mua bena meji bonso ba bisamba ne munkatshi mua makalenge abu onso, kamuena muntu nansha umue udi bu wewe to!” (Yel. 10:6, 7) Bushuwa, kudi malu adi ne bua kutusaka bua kunemeka Tatu wetu wa mu diulu. Kadi tudi kabidi ne bua kumunanga.

 6. Bua tshinyi tudi banange Yehowa?

⁶ Tudi tutumbisha Yehowa bualu tudi bamunange bikole. Tuakulayi bua ngikadilu yende idi itusaka bua kumunanga. Utu ne luse ne utu umvuilangana. (Mis. 103:13; Yesh. 49:15) Utu uditeka pa muaba wa bakuabu. Patudi tumvua bibi, udi umvua pende bibi. (Zek. 2:8) Udi utuambuluisha bua kusemena pabuipi nende bua tulue balunda bende. (Mis. 25:14; Bien. 17:27) Utu ne didipuekesha, bualu Bible udi wamba ne: “Udi winama panshi bua kutangila diulu ne buloba, ujula muntu mupuekele mu lupuishi.” (Mis. 113:6, 7) Bua ngikadilu yonso idi Nzambi wetu munene nayi eyi, tudi basue kutumbisha Nzambi wetu munene.​—Mis. 86:12.

 7. Mmpunga kayi wa pa buende utudi nende?

⁷ Tudi tutumbisha Yehowa bualu tudi basue bua bakuabu bamumanye. Bantu ba bungi ki mbamanye malu malelela adi atangila Yehowa to, bualu Satana mmubafofomije mêsu ne malu a dishima adiye umumuangalajila. (2 Kol. 4:4) Satana mmufikishe bantu ku ditaba ne: Yehowa utu ne luonji, katu utabalela bantu, ne utu ubakengesha bikole. Kadi tuetu tudi bamanye Nzambi wetu bimpe! Tudi ne  mpunga wa kulongesha bantu bua bamanye tshidiye menemene ne bafike ku dimutumbisha. (Yesh. 43:10) Musambu wa 96 udi utamba kuakula bua kutumbisha Yehowa. Patuikala tuenda tukonkonona mêyi mafundisha ku bukole bua nyuma adi mu Musambu eu, ela meji a mishindu iudi mua kupesha Yehowa butumbi budi bumuakanyine.

TSHITUDI NE BUA KUENZA BUA KUPESHA YEHOWA BUTUMBI BUDI BUMUAKANYINE

 8. Leja mushindu utudi petu mua kutumbisha Yehowa. (Misambu 96:1-3)

⁸ Bala Misambu 96:1-3. Tudi mua kutumbisha Yehowa mu malu atudi tuamba adi amutangila. Mu mvese eyi, badi balomba bantu ba Yehowa bua ‘kuimbila Yehowa misambu,’ ‘kutumbisha dîna diende,’ ‘kumanyisha lumu luimpe lua lupandu luende’ ne ‘kuamba butumbi buende munkatshi mua bisamba.’ Eyi ke mishindu itudi tutumbisha Tatu wetu wa mu diulu. Batendeledi ba Nzambi ba kale kabavua belakana bua kuambila bakuabu malu onso mimpe avuaye mubenzele ne muvuaye Nzambi muimpe to. (Dan. 3:16-18; Bien. 4:29) Mmushindu kayi utudi petu mua kubidikija?

9-10. Tshilejilu tshia Angelena tshidi tshikulongesha tshinyi? (Tangila kabidi tshimfuanyi.)

⁹ Tuakulayi bua muanetu wa bakaji, Angelena, a wa mu États-Unis. Wakakuila Yehowa ne dikima dionso muaba uvuaye wenzela mudimu. Bu mutshivuaye muntu mupiamupia ku mudimu aku, bakamubikila bua kubuela mu tshisangilu pamue ne bena mudimu bakuabu bapiabapia. Muntu yonso uvua ne bua kuakula bua nsombelu wende mu tshisangilu atshi. Wakalongolola foto ivua ileja muvuaye ne nsombelu wa disanka bua muvuaye Ntemu wa Yehowa. Kadi kumpala kua kumupeshabu dîyi, muena mudimu wabu mukuabu wakadimanyisha muvuaye mukolele mu dîku dia Bantemu ba Yehowa, kutuadijaye kuakula bibi bua Bantemu ne bua malongesha etu. Angelena udi wamba ne: “Biakangosha bibi be! Meme kudiambila ne: ‘Tshiena mua kulekela muntu ushiminyina Yehowa malu nunku to. Ke meme kupangadija bua kumuakuila.’”

¹⁰ Pakajikija muena mudimu wabu au kuakula, Angelena wakenza disambila dîpi munda munda. Pashishe wakamuambila ne dîyi dimpe ne: “Mvua panyi anu bu wewe. Ndi mukolele  mu dîku dia Bantemu ba Yehowa ne ntshidi Ntemu wa Yehowa ne lelu eu.” Nansha muvua Angelena mumvue bibi, wakashala anu mutukije, kubalejaye foto ivuabu badikuatshishe mu bibilu bietu binene bivuaye mubuele, muvuaye ne disanka. Wakabumvuija malu avuaye witabuja ne kanemu konso. (1 Pet. 3:15) Tshiakenzeka ntshinyi? Pakajikija Angelena kuakula, muena mudimu wabu au wakashintulula tshiakuidi, kuambaye ne: uvua pende ne malu mimpe avuaye mupete mudikola diende munkatshi mua Bantemu ba Yehowa. Angelena udi wamba ne: “Yehowa mmukumbane bua tuetu kumuakuila. Kuakula bua dîna diende ndiakalenga dinene.” Tuetu petu tudi ne diakalenga dia kutumbisha Yehowa nansha bantu bakuabu bobu bamubipisha.

11. Mmunyi muvua batendeledi ba Nzambi ba kale batumikila dîyi didi mu Misambu 96:8?

¹¹ Bala Misambu 96:8. Tudi mua kutumbisha Yehowa ne bintu bietu bia mushinga. Ke tshitu batendeledi balelela ba Yehowa benza. (Nsu. 3:9) Tshilejilu, bena Isalele bakafila bintu bua kuibaka nabi ntempelo wa Yehowa ne kumulama. (2 Bak. 12:4, 5; 1 Kul. 29:3-9) Bayidi bakuabu ba Kristo bakafila “bintu biabu” bua kumuambuluisha yeye ne bapostolo bende. (Luka 8:1-3) Bena Kristo ba mu bidimu lukama bia kumpala bakafila pabu bintu bua kuambuluisha bena Kristo nabu bavua tshiyole tshia nzala tshikuate. (Bien. 11:27-29) Lelu, tudi tutumbisha Yehowa ne mapa a budisuile.

12. Mmunyi mudi mapa atudi tufila atumbisha Yehowa? (Tangila kabidi tshimfuanyi.)

¹² Tuangatayi tshilejilu tshimue tshianana tshia mudi mapa etu atumbisha Yehowa. Luapolo kampanda lua mu 2020 luvua luakule bua munanga uvua munenga bikole mu Zimbabwe. Bantu miliyo ya bungi pamue ne muanetu wa bakaji mukuabu diende Prisca, bakamba kufua bua nzala. Nansha nanku, Prisca wakatungunuka anu ne kuyisha mu Disatu dionso ne mu Ditanu, too ne mu tshikondo tshia disekuna buloba bua kukuna bintu. Bu muvuaye anu uya mu buambi, kayi uya ku budimi, bena mutumba bavua bamuseka bamba ne: “Neufue ne nzala wewe.” Prisca uvua ubambila ne dishindika dionso ne: “Yehowa katu ulekela batendeledi bende nansha kakese.” Matuku makese pashishe, wakapeta bintu bivua bulongolodi buetu butume bua kuambuluisha bena Kristo netu, bivuabu basumbe ku diambuluisha dia mapa a bana  betu. Bena mutumba bakakema, kumuambilabu ne: “Bushuwa, Nzambi ki mmukulekele to, tudi basue kulonga malu ende.” Bena mutumba bende 7 bakatuadija kubuela mu bisangilu.

13. Mmunyi mudi bienzedi bietu mua kutumbisha Yehowa? (Misambu 96:9)

¹³ Bala Misambu 96:9. Tudi mua kutumbisha Yehowa ne bienzedi bietu. Bakuidi bavua benza mudimu ku ntempelo bavua ne bua kuikala ne mankenda. (Ekes. 40:30-32) Kadi kuikala ne bienzedi bimpe ke kuvua ne mushinga wa bungi. (Mis. 24:3, 4; 1 Pet. 1:15, 16) Tudi ne bua kudienzeja bua kuvula bumuntu bua kale, tuambe ne: kulekela meji mabi ne bienzedi bia bukoya, kadi kuvuala bumuntu bupiabupia, tuambe ne: kuikala ne ngelelu wa meji ne bienzedi bidi bileja mutudi ne ngikadilu ya buena ya Yehowa. (Kolos. 3:9, 10) Yehowa udi mua kuambuluisha benzavi ne bena tshikisu banene bua kushintuluka ne kuvuala bumuntu bupiabupia.

14. Tshilejilu tshia Jack tshidi tshikulongesha tshinyi? (Tangila kabidi tshimfuanyi.)

¹⁴ Tuakulayi bua Jack. Uvua muntu wa tshikisu tshia bungi uvua bantu batue dîna dia ne: Demon. Bakamuela mu buloko bua malu mabi avuaye wenza, kumukoselabu tshibawu tshia lufu. Patshivua Jack muindile dituku divuabu ne bua kumushipa, wakitaba bua kulonga Bible ne muanetu wa balume kampanda uvua muye kutangila bena buloko. Nansha muvua Jack muenzavi, wakavula bumuntu buende bua kale, panyima pa matuku yeye kubatijibua. Bu mukavua Jack mushintuluke bikole, bamue balami ba buloko bakadila dituku divuabu ne bua kumushipa pavuabu bamuela muoyo wa kumulaya nawu. Musalayi kampanda uvua ulama ku buloko aku wakamba ne: “Kumpala Jack uvua muena buloko mubi menemene, kadi mpindieu ukadi muntu muimpe kupita bena buloko bakuabu.” Lumingu lujima bamane kushipa Jack, bana betu bakalua bua kuenza tshisangilu tshia munkatshi mua lumingu mu buloko amu. Muena buloko kampanda uvua mubuele mu tshisangilu atshi bua musangu wende wa kumpala. Tshivua tshimusake bua kubuelamu ntshinyi? Mushindu uvua Jack mutshintuluke uvua mumukemeshe. Ke bualu kayi wakajinga kumanya tshia kuenza bua kutendelela Yehowa. Mbimueneke bimpe ne: bienzedi bietu bidi bitumbishisha Tatu wetu wa mu diulu.​—1 Pet. 2:12.

 MUKADI YEHOWA PA KUTUMBISHA DÎNA DIENDE

15. Mmunyi mukadi Yehowa pa kutumbisha dîna diende? (Misambu 96:10-13)

¹⁵ Bala Misambu 96:10-13. Mu mvese ya ndekelu ya mu Musambu wa 96 badi bambamu bua Yehowa ne: mMukalenge udi ulumbuluisha ne buakane. Mmunyi mukadi Yehowa pa kutumbisha dîna diende? Neaditumbishe ku diambuluisha dia dilumbuluisha diende. Mu katupa kîpi emu, neabutule Babilona munene bua mudiye upendeshisha dîna diende dia tshijila. (Buak. 17:5, 16; 19:1, 2) Pamuapa, bamue bantu bamona muabutulaye Babilona munene, nebatulonde mu ntendelelu mulelela. Ndekelu wa bionso, Yehowa neabutule ndongoluelu wa malu wa Satana mujima ku mvita ya Armagedone. Neabutule bantu badi bamukine ne badi bamushiminyina malu. Kadi neasungile bantu badi bamunange ne badi bamutumikila ne badi basue kutumbisha dîna diende. (Mâko 8:38; 2 Tes. 1:6-10) Papita diteta dia ndekelu dielabu bantu panyima pa bidimu tshinunu bia Bukokeshi bua Kristo, Yehowa neikale ukadi muleje ne: anu yeye ke udi mukumbane bua bantu kutendelela. (Buak. 20:7-10) Bible udi wamba ne: tshikondo atshi “buloba nebuwujibue tente ne dimanya dia butumbi bua Yehowa bu mudi mâyi a bungi abuikila mbuu.”​—Hab. 2:14.

16. Udi mudisuike bua kuenza tshinyi? (Tangila kabidi tshimfuanyi.)

¹⁶ Netuikale ne disanka dia bungi tshikondo atshi, pikale muntu yonso upeshe Yehowa butumbi budi buakanyine dîna diende! Kadi patutshidi bindile tshikondo atshi, tuenze tshietu tshitudi mua kuenza bua kutumbisha Nzambi dîba dionso ditudi tupeta mpunga. Bua kuleja mudi bualu ebu ne mushinga, Kasumbu kaludiki nkasungule Misambu 96:8 bua ikale mvese wa tshidimu tshia 2025. Udi wamba ne: “Peshayi Yehowa butumbi budi buakanyine dîna diende.”