Kukavua tshidimu tshijima ne ngondo tshivua bena ku Betele benda basa kadiomba ka WBBR mu Staten Island mu New York. Bobu bamane kudima muaba wa kukibakila, bakibakila bantu bavua bakasa nzubu munene, kuibakabu kabidi nzubu wa kutekela biamu. Pakajika mudimu, bana betu bakatuadija kupeta biamu bivua bikengela bua kubanga kuenza ndongamu ku kadiomba aku. Kadi bavua ne ntatu ivuabu ne bua kujikija.

Biakakolela bana betu bua kuasa antene munene. Bivua bikengela kuasa antene wa bule bua metre 91, kumusuikila pankatshi pa makunji a ibidi a mitshi ya bule bua metre 61. Musangu wa kumpala bakapangila bua kuasa antene au. Kadi bumuvuabu batuishibue ne: Yehowa neabambuluishe, bakalua anu kufika ku dimuasa. Calvin Prosser uvua pende munkatshi mua bantu bavua basa antene au wakamba ne: “Bu tuetu bakokeshe bua kuasa antene musangu wa kumpala au, tuvua mua kudituta mu tshiadi, tuamba ne: ‘Antene eu mmuimane buetu tuetu!’” Kadi bana betu bakatumbisha Yehowa bua muvuaye mubambuluishe. Nansha nanku bavua ne lutatu lukuabu.

Kadiomba aku katshivua kapiakapia ne kabivua bipepele bua kupeta biamu bia kusumba bivuabu bakeba to. Nunku bakapeta tshiamu tshitu tshiambuluisha kadiomba bua kupatulaku mêyi tshivua muntu wa muaba au muenze. Pamutu pa kusumbabu mikro, bavua benza mudimu ne mikro ya telefone. Butuku bua dituku kampanda mu ngondo muibidi, bakajinga bua kuteta biamu abi. Bu muvuabu kabayi ne ndongamu wa kuelaku, bakimba misambu ya Bukalenge. Muanetu Ernest Lowe udi uvuluka wamba ne: Pavua bana betu abu bimba misambu,  mulumbuluishi Rutherford b wakabumvua bimba misambu ayi ku kasanji kende, yeye kubabikila ku telefone. Uvua mu ntanta wa kilometre 25.

Muanetu Rutherford wakabambila ne: “Lekelayi mitoyi yenu ayi. Nudi numvuika anu bu miadi ya tumpusu!” Bakumvua kabundu, diakamue kujimabu tshiamu tshia dipatula natshi mêyi atshi; nansha nanku biakabajadikila ne: kadiomba kavua kimpe, bavua pabuipi bua kutuadija kuenzelaku ndongamu.

Mu dia 24/2/1924, muanetu Rutherford wakenzaku muyuki wamba ne: “Kadiomba aka nkasa anu bua malu a Bukalenge bua Masiya.” Wakaleja ne: Tshipatshila tshiaku tshivua tshia “kuambuluisha bantu bua kumanya malu a mu Bible ne kujingulula tshikondo tshitudi etshi.”

Ndongamu wa kumpala uvua muenzeke bimpe menemene. Munkatshi mua bidimu 33 biakalonda, kadiomba ka WBBR kakambuluisha bua kuenza ndongamu ya malu a bantu ba Yehowa.

Mu ngondo wa 7/1924, balongi ba Bible bakenza mpungilu mu Columbus mu Ohio. Bavua bafumina miaba mishilangane ya pa buloba bujima. Bakateleja miyuki ivuabu benza mu tshiena Arabe, mu Anglais, mu Mfualansa, mu tshiena Allemagne, mu tshiena Greke, mu tshiena Hongrie, mu tshiena Italie, mu tshiena Lettonie, mu tshiena Pologne, mu tshiena Russie, mu miakulu ya tshiena Scandinavie, ne mu tshiena Ukraine. Bantu bavua batelejile imue miyuki ya ndongamu au ku tusanji tuabu. Bakalomba bapatudi ba malu mu bikandakanda bua kupatula biena-bualu bivua biakula bua malu a mu mpungilu au dituku dionso.

Mu Dinayi dia 24/7/1924, Balongi ba Bible bapite pa 5 000, bakayisha. Bakapesha bantu mikanda mitue ku 30 000, kutuadijabu kulonga Bible ne bantu binunu bia bungi. Tshibumba tshia Nsentedi tshiakabikila dituku adi ne: “tshitupa tshia mpungilu tshivua tshienza disanka dia bungi.”

Bualu bukuabu buakenzeka mu Ditanu dia 25 ngondo wa 7 mu mpungilu au pavua muanetu Rutherford mubale mukanda ne dikima dionso, ubipisha bamfumu ba bitendelelu. Wakamba ne: “bamfumu ba tshididi, ba bitendelelu ne ba bangenda bavua bapangisha bantu bua kulonga bulelela bua malu a Bukalenge bua Nzambi  buapetesha bantu masanka.” Wakaleja kabidi muvuabu “batua Nsangilu wa matunga mpanda ne bamba muvua ‘Nzambi ukokesha kudi diambuluisha dia bena tshididi.’” Bivua bilomba Balongi ba Bible dikima dia bungi bua kuambila bantu mukenji au.

Tshibumba tshia Nsentedi tshiakamba bua mpungilu uvua muenzeke mu Columbus au ne: “Bantu ba Yehowa bakapatuka mu mpungilu au bakoleshibue mu ditabuja, bikale ne tshisumi ne dikima dia kuyisha nansha babaluisha mushindu kayi.” Leo Claus uvua pende mu mpungilu au wakamba ne: “Tuakapatuka mu mpungilu au ne disanka dia bungi dia kuyisha mukenji wa dibipisha bamfumu ba bitendelelu au.”

Mu ngondo wa 10, Balongi ba Bible bakatuadija kuabanyina bantu trakte miliyo ya bungi ivua ne mukenji uvua muanetu Rutherford mubale, ubipisha bamfumu ba bitendelelu. Frank Johnson wakabanyina bantu trakte ayi mu katshimenga ka Cleveland mu Oklahoma, kuyijikijaye yonso mu minite 20 kumpala kua bamanyishi bakuabu kuluabu kumuangata. Wakashala musokome bualu bantu ba mu katshimenga aku bavua ne tshiji, benda bamukeba bua muvuaye uyisha. Nunku uvua musokemene mu tshitanda tshia Nzambi tshivua pabuipi apu. Bu muvuaye kayi musanganamu muntu, wakela trakte mu Bible wa muambi, pashishe kutekaye trakte pa tshibasa tshionso, yeye kupatukamu lukasa. Bu mutshivuaye anu ne dîba, wakaya mu bitanda bikuabu bibidi, kushiyamu kabidi trakte.

Frank wakapingana lukasa muaba uvua bamanyishi bakuabu ne bua kulua kumuangatshila. Uvua musokome mu tshipanyishilu tshia kasolonyi, mushale mutangile bantu bavua bamukeba abu. Bakapita mu mashinyi kabayi bamumone to. Katupa aka, bamanyishi nende bavua bayisha luseke lukuabu kufikabu, kumuangatabu, bobu kumbuka lukasa muaba au.

Umue wa ku bana betu abu wakamba ne: “Patuvua tuenda tupatuka mu katshimenga aku, tuakapitshila pa bitanda bia Nzambi bisatu, tuetu kumona bantu bu 50 bimane kumpala kua tshitanda tshia Nzambi tshionso; bamue ba kudibu bavua babala trakte ayi, bakuabu bayileja muambi. Tuakumbuka muaba au bua kubenga bilumbu! Tuakela Yehowa Nzambi wetu tuasakidila bua muvuaye mutukube ne mutuambuluishe bua kumanyisha bantu mukenji au.”

Balongi ba Bible ba mu matunga makuabu bakayisha pabu ne dikima. Józef Krett wakayisha bena mu Pologne bavua balue kusombela ku nord kua France bua kukeba mabanji a muinshi mua buloba. Uvua mulongolole bua kuela muyuki uvua ne tshiena-bualu tshia ne: “Bakadi pa kubisha bantu ku lufu.” Pakabikilabu bantu ba mutshimenga atshi bua kulua kuteleja muyuki au, mumpele kampanda wakakandika bena kuitabuja bende. Kadi tangila tshiakenzeka. Bantu bapite pa 5000 bakalua kuteleja muyuki, too ne mumpele au! Muanetu Krett wakambila mumpele bua apite kumpala bua kumvuija malu avuaye witabuja, mumpele kuambaye ne: abu kabundengi. Muanetu Krett wakabanyina bantu mikanda ivuaye nayi bualu uvua mumone ne: bantu bavuaye muyisha bavua ne nyota ya Dîyi dia Nzambi.—Amo. 8:11.

Muanetu Claude Brown wakafikisha lumu luimpe mu Afrike mu Côte-de-l’Or ukadibu babikila lelu eu ne: Ghana. Bumuvuaye muenze miyuki ya bungi ne muabanye mikanda mipite mu ditunga adi, bantu bakumvua bulelela. Muntu mukuabu diende John Blankson uvua ulonga tulasa bua kulua muenji wa manga a londapu wakateleja muyuki wa muanetu Claude Brown. Wakajingulula diakamue ne: uvua mupete bulelela. Udi wamba ne: “Ngakumvua disanka  dia buangi, meme kuambila bantu ba bungi ba mu tshilongelu tshietu malu au.”

John uvua mulonga ne: Bible katu ulongesha Busatu bunsatu to. Nunku dimue dituku wakaya mu tshitendelelu tshia Anglikane bua kuela mumpele lukonko bua dilongesha dia Busatu bunsantu. Mumpele wakafiika munda, umukanyina wamba ne: “Kuena muena Kristo to, udi muena Diabolo. Katuka muaba eu!”

Pakapinga John kumbelu, wakafundila mumpele mukanda, umulomba bua balue kumvuija dilongesha dia Busatu bunsantu kumpala kua bantu bonso. Mumpele wakamuambila bua kuya kudi munene wa mu tshilongelu tshia malu a manga atshi. Munene au wakamuebeja bua kumanya bikalabi ni nyeye uvua mufunde mukanda awu.

John wakamuandamuna ne: “Eyowa mmeme.”

Munene au wakamuambila bua afundile mumpele au mukanda, umulomba luse. John wakabanga kumufundila, wamba ne:

“Munene wa tshilongelu tshietu mmungambile bua nkulombe luse. Ndi pabuipi bua kukulombalu, kadi anji itaba ne: malu audi mulongeshe nga dishima.”

Biakakemesha munene au, kumuebejaye: “Blankson, ke tshiudi usua kufunda atshi?

John kumuandamuna ne: “Eyowa.”

Munene au kumuambila ne: “Wewe utungunuka ne kuakula bibi bua mumpele wa mu tshitendelelu tshidi mbulamatadi utua mpanda, ndi nkuipata mu tshilongelu etshi.”

John kuamba ne: “Tuambe ne: wewe mutulongeshe malu atudi katuyi bumvue, katuena mua kukuela nkonko anyi?”

Munene kumuandamuna ne: “Nudi anu mua kuela.”

Ke John kumuambila ne: “Si ke tshivua tshienzeke. Yeye uvua utulongesha malu a mu Bible, meme kumuela lukonko. Pikalaye kavua ne diandamuna dia kumpesha, mbualu bua meme kumulombela luse anyi?”

Kabakipata Blankson mu kalasa to. Nansha luse luine, kakalulomba to.

Tshibumba tshia Nsentedi tshiakamba bua mudimu uvua muenzeke tshidimu atshi ne: “Bushuwa tudi mua kuamba anu bu Davidi ne: Yehowa uvua ‘mutupaye ne bukole bua mvita.’ (Mis. 18:39) Tshivua tshidimu tshituvua bakankamijibue bikole bualu tuvua bamone tshianza tshia Mukalenge . . . Batendeledi bende ba lulamatu bavua bayisha lumu luimpe ne disanka.”

Ku ndekelu kua tshidimu atshi, bana betu bakalongolola bua kuasa kadiomba kakuabu. Bakakashila mu tshimenga tshia Chicago, mu États-Unis. Bavua bakabikila ne: DÎYI. Kadiomba aka kavua paku ne tshiamu tshivua tshiambuluisha bua kupatula mêyi. Mukenji wa Bukalenge uvuabu bayishaku, uvua uya mu ntanta wa kilometre miliyo ya bungi, ufika too ne ku nord kua Canada.

Mu 1925, Yehowa wakambuluisha bana betu bua kupeta ngumvuilu mupiamupia wa malu adi mu Buakabuluibua nshapita wa 12. Ngumvuilu mupiamupia au wakalenduisha bamue bana betu. Kadi wakasankisha bana betu ba bungi bualu bakumvua bimpe malu avua mapitakane mu diulu ne tshivuawu mua kukebela bantu ba Nzambi pa buloba.