1-2. Ntshinyi tshivua tshienzekele bayidi ba Yezu babidi pavuabu mu njila batangile ku Emause?

 TUDI mu dia matuku 16 ngondo wa Nisana mu 33 P.Y. Bayidi ba Yezu badi ne kanyinganyinga kakole, bikale kabidi ne buôwa. Babidi ba kudibu badi bumbuka mu Yelushalema, batangile ku Emause (musoko udi mu kilometre 11 ne Yelushalema). Mbatekeshibue mu mikolo bikole bualu mbashipe Yezu uvuabu balonda. Buabu bobu, ditekemena divuabu nadi dia malu avua Masiya mulaye ndiye mu mâyi. Kadi bualu buvuabu kabayi batekemene buakabenzekela.

² Muntu kampanda udi usemena kudibu mu njila amu, utuadija kuya nabu. Bayidi abu badi batuadija kumulondela mudi malu mabatonde bua tshivua tshifikile Yezu. Muntu au udi utuadija kubalondela malu adibu kabayi mua kupua muoyo. Udi ubumvuija bua tshinyi Masiya uvua ne bua kukenga ne kufua, ‘utuadijila ku Mose too ne ku Baprofete bonso.’ Padibu bafika mu Emause, badi bajingulula ne: muntu au n’Yezu udi Nzambi mubishe ku lufu. Elabi meji disanka divuabu bumvue pavuabu bamanye ne: Masiya uvua ne muoyo!—Luka 24:​13-35.

3-4. Ntshinyi tshivua tshienzekele bayidi ba Yezu? Ntshinyi tshitualonga mu tshiena-bualu etshi? (Bienzedi 1:3)

³ Yezu wakamuenekela bayidi bende misangu ya bungi mu matuku 40 a ndekelu avuaye muenze pa buloba. (Bala Bienzedi 1:3.) Wakakankamija bayidi bende bavua babungame abu, bobu  kupeta disanka ne dikima dia kuyisha ne kulongesha lumu luimpe lua Bukalenge. a

⁴ Kulonga malu avua Yezu muenze mu matuku au kudi mua kutuambuluisha. Mu tshiena-bualu etshi, netumone muvua Yezu 1) mukankamija bayidi bende, 2) mumbambulushe bua kujingulula Mifundu bimpe, ne 3) muvuaye mubalongeshe bua kulua kuenza midimu ivua mibindile kumpala. Netumone mutudi mua kuidikija tshilejilu tshia Yezu mu bualu buonso.

KANKAMIJA BAKUABU

5. Bua tshinyi bayidi ba Yezu bavua dijinga ne kubakankamija?

⁵ Bayidi ba Yezu bavua dijinga ne kubakankamija. Bualu bamue ba kudibu bavua bashiye nzubu yabu, mêku abu, ne bintu biabu bua kutungunuka ne kulonda Yezu. (Mat. 19:27) Bavua bakengesha bakuabu anu bualu bavua balue bayidi bende. (Yone 9:22) Bavua badipangishe malu ne bitabe bua kukenga bualu bavua bamanye ne: Yezu ke Masiya uvuabu balaye. (Mat. 16:16) Kadi pakashipabu Yezu, bakabungama bikole, kutekeshibuabu mu mikolo bualu kabavua bamanye tshivua mua kubafikila to.

6. Ntshinyi tshivua Yezu muenze pavuaye mubishibue ku lufu?

⁶ Kakuyi mpata, pavua Yezu mumone muvua bayidi bende babungame, kakabamona bu bantu batekete mu myuma to. Kadi wakela meji ne: bavua anu mua kumvua dibungama bua lufu luende. Wakatuadija kukankamija balunda bende anu dituku dimue dimue diakabishibuaye ku lufu adi. Tshilejilu, pavua Mariya wa ku Magadala ku lukita udila, wakamumuenekela. (Yone 20:​11, 16) Wakamuenekela kabidi bayidi babidi batudi bakuile ku ntuadijilu, kuluaye kabidi kumuenekela mupostolo petelo. (Luka 24:34) Tshilejilu tshia Yezu tshidi tshitulongesha tshinyi? Tumonayi tshivua tshienzeke pavuaye mumuenekele Mariya wa ku Magadala.

7. Bilondeshile Yone 20:​11-16, Yezu uvua mumone Mariya wenza tshinyi mu dia 16 ngondo wa Nisana mu dinda menemene? Biakamusaka bua kumuenzela tshinyi? (Tangila kabidi tshimfuanyi.)

⁷ Bala Yone 20:​11-16. Mu dinda menemene dia 16 ngondo wa Nisana, bantu bakaji  kampanda bakaya ku lukita lua Yezu. (Luka 24:​1, 10) Tuakulayi bua umue wa kudibu, diende Mariya wa ku Magadala. Pakafika Mariya ku lukita, wakalusangana munda mutupu. Ke kuyaye lubilu, kuambilaye Petelo ne Yone. Pakumvuabu nanku, bakasa lubilu batangile ku lukita, Mariya panyima pabu. Pakamonabu ne: lukita luvua munda mutupu, bakapingana kumbelu. Kadi Mariya yeye wakashala ku lukita aku wenda udila; kavua mumanye ne: Yezu uvua muaba au, mumutangile to. Yezu uvua umona muvua muntu mukaji wa lulamatu au udila, yeye kupeta dijinga dikole dia kumukolesha. Nunku wakamuenekela Mariya, yeye kuenza bualu bukese buvua bumukankamije bikole. Wakayukila nende, kumupeshaye mudimu wa mushinga wa kumanyisha bana babu ne Yezu bualu bua dibishibua diende ku lufu.—Yone 20:​17, 18.

8. Mmunyi mutudi mua kuidikija Yezu?

⁸ Mmunyi mutudi mua kuidikija Yezu? Mbimpe tukankamije bena Kristo netu bua batungunuke ne kuenzela Yehowa mudimu, pashishe tukebe bua kumanya ntatu yabu ne tuditeke pa muaba wabu patudi tuyukila nabu. Tuakulayi bua tshivua tshienzekele muanetu wa bakaji Jocelyn uvua mufuishe muakuyende wa bakaji mu njiwu kampanda ivua mienzeke. Udi wamba ne: “Ngakashala ne dibungama dikole munkatshi mua ngondo ya bungi.” Kadi muanetu wa balume kampanda ne mukajende bakamubikila kuabu bua kuyukila nende. Bakamuteleja, bobu kuditeka pa muaba wende; kumujadikilabi ne: uvua ne mushinga ku mesu kua Nzambi. Jocelyn udi wamba ne: “Ngakamona anu bu ne: Yehowa uvua mubatume bua kumpatula mu mbuu mufiike muvua tshipepele tshikole tshituta, kungelabu mu kabuatu bua kumpandisha. Bakangambuluisha bua kupetulula dijanga dianyi dia kutungunuka ne kuenzeIa Yehowa mudimu.” Tuetu tuteleja bakuabu ne ntema yonso padibu batuambila idi mibatonde ne tuditeka pa muaba wabu patudi tuyukila nabu, bidi mua kubakolesha ne kubasaka bua kuenzela Nzambi mudimu.—Lomo 12:15.

AMBULUISHA BAKUABU BUA BUMVUE DÎYI DIA NZAMBI

9. Bayidi ba Yezu bakapeta lutatu kayi? Mmunyi muvua Yezu mubambuluishe?

⁹ Bayidi ba Yezu bavua bitabuja Dîyi dia Nzambi ne benza muabu muonso bua kuditumikila. (Yone 17:6) Kadi pakashipabu Yezu pa mutshi wa makenga, biakabalubakaja; kupetabu dielakana. Yezu wakajingulula ne: bavua ne dielakana adi bualu kabavua bumvue Mifundu bimpe to. (Luka 9:​44, 45; Yone 20:9) Ke bualu kayi wakabambuluisha bua bikale belangana meji a malu adibu babala mu Mifundu. Mona tshiakenzaye pavuaye mumuenekele bayidi babidi bavua mu njila batangile ku Emause.

10. Mmunyi muvua Yezu mujadikile bayidi bende ne: yeye ke uvua Masiya? (Luka 24:​18-27)

¹⁰ Bala Luka 24:​18-27. Mona ne: Yezu kavua mudimanyisha diakamue to, kadi wakabela nkonko. Bua tshinyi? Bualu uvua musue bua baleje malu avuabu nawu ku muoyo. Bakamulejawu, bamba muvuabu batekemene ne: Yezu neansungile Isalele kudi bukokeshi bua bena Lomo. Bobu bamane kuleja Yezu yonso ivuabu nayi munda, wakabatelela Mifundu bua kubafikisha ku diumvua ne: mêyi a buprofete a bungi avua enda akumbana. b Dilolo menemene dia dituku adi, Yezu wakasomba ne bayidi bakuabu, kubumvuijaye mêyi a buprofete. (Luka 24:​33-48) Muyuki eu udi utulongesha tshinyi?

11-12. a) Mushindu uvua Yezu mulongeshe malu malelela a mu Bible udi utulongesha tshinyi? (Tangila kabidi bimfuanyi.) b) Mmunyi muvua muanetu wa balume muambuluishe Nortey uvuaye ulongesha Bible?

¹¹ Mmunyi mutudi mua kuidikija Yezu? Tshia kumpala, patudi tulonga Bible ne balongi betu,  tubele nkonko mimpe idi mua kubambuluisha bua kutuambila malu adibu nawu. (Nsu. 20:5) Paudi ujingulula tshidi tshibatonde, baleja mua kupeta mvese idi mua kubambuluisha. Kubambidi tshia kuenza to. Kadi beleshisha meji bilondeshile mvese ya mu Bible, pashishe ubambuluishe bua bajingulule mudibu mua kutumikila mêyi manene a mu Bible. Tuakulayi bua muanetu wa balume Nortey wa mu Ghana.

¹² Nortey uvua ne bidimu 16 pavuaye mutuadije kulonga Bible. Matuku makese yeye mumane kutuadija kumulonga, bena mu dîku diabu bakatuadija kumuluisha. Ntshinyi tshiakamuambuluisha bua kutungunuka ne kulonga? Mulongeshi wende wa Bible ukavua mumubadile mvese kampanda mu Matayi shapita wa 10, mumumvuije ne: bena Kristo balelela nebakengeshibue. Nortey udi wamba ne: “Pakatuadijabu kunkengesha, biakanjadikila ne: mvua mupete bulelela.” Mulongeshi wende wa Bible wakamuambuluisha kabidi bua kuelangana meji a mêyi adi mu Matayi 10:16 bua ikale ne budimu ne kanemu padiye umvuija bena mu dîku diabu malu adiye witabuja. Pakabatijibuaye, wakajinga kuangata bumpanda-njila, kadi tatuende uvua musue bua abuele mu iniversite. Pamutu pa mulongeshi wende wa Bible kumuangatshila dipangadika dia tshia kuenza, wakamuela nkonko, umuambuluisha bua elangane meji bilondeshile mêyi manene a mu Bible. Mmunyi muakambuluishabi Nortey? Wakadisuika anu bua kuangata bumpanda-njila. Tatuende wakamuipata kumbelu. Nortey udi wamba tshinyi bua malu avua mamufikile au? Udi wamba ne: “Ndi mutuishibue ne: mvua muangate dipangadika dimpe”. Tuetu tuambuluisha petu bakuabu bua belangane meji bilondeshile mêyi a mu Bible, bidi mua kubambuluisha bua kulua bena Kristo bashindame.—Eph. 3:​16-19.

AMBULUISHA BANA BETU BA BALUME BUA BALUE “MAPA MIKALE BANTU”

13. Ntshinyi tshivua Yezu muenze bua mudimu wa diyisha ushale anu utungunuka ne kuenzeka? (Efeso 4:8)

¹³ Pavua Yezu pa buloba, wakenza mudimu uvua Tatuende mumuambile, kuwenzaye bimpe menemene. (Yone 17:4) Kadi Yezu kavua ne meji a ne: ‘Bua bualu buimpe kuenzeka, anu yeye nkayende mubuenza to.’ Mu bidimu bisatu ne tshitupa bivuaye muenze mu mudimu wa diyisha, wakalongesha bakuabu bua kuenza mudimu au. Kumpala kua Yezu kupingana mu diulu, wakapesha bayidi bende mudimu wa kulongesha ne kuyisha lumu luimpe ne wa kutabalela bantu  ba Yehowa ba mushinga mukole. Bamue ba ku bayidi abu bavua mua kuikala bansonga ba bidimu muishi mua 30. (Bala Efeso 4:8.) Mu matuku 40 a ndekelu avua Yezu muenze pa buloba, mmunyi muvuaye muambuluishe balume ba lulamatu bavua badifila ne benza mudimu mukole abu bua kulua “mapa mikale bantu”?

14. Mmunyi muvua Yezu muambuluishe bayidi bende bua kushindama mu myuma mu matuku 40 a ndekelu avuaye muenze pa buloba? (Tangila kabidi tshimfuanyi.)

¹⁴ Yezu wakapesha kabidi bayidi bende mubelu muimpe kayi udia tshibanga. Tshilejilu, wakajingulula ne: bamue ba kudibu bavua ne mpata bua dibishibua diende ku lufu. Ke bualu kayi wakababela. (Luka 24:​25-27; Yone 20:27) Wakababela kabidi bua batambe kudifila mu mudimu wa kutabalelela bantu ba Yehowa pamutu pa kuditua mu midimu yabu ya tshianana. (Yone 21:15) Wakabavuluija kabidi bua kabumvu bibi padi bakuabu bapeta diakalenga dia kuenza malu kampanda mu mudimu wa Yehowa to. (Yone 21:​20-22) Wakabapingaja kabidi mu njila bua ngenyi ya dishima ivuabu nayi bua Bukalenge, kumbabilaye kabidi bua badifila mu mudimu wa diyisha lumu luimpe. (Bien. 1:​6-8) Tshilejilu tshia Yezu tshidi tshilongesha bakulu tshinyi?

15-16. a) Mmushindu kayi udi bakulu mua kuidikija Yezu? Umvuija. b) Mubelu uvuabu bapeshe Patrick uvua mumuambuluishe mushindu kayi?

¹⁵ Mmunyi mudi bakulu mua kuidikija Yezu? Badi ne bua kulongesha bana betu ba balume, nansha aba batshidi bansonga bua kuenza midimu mikuabu mu tshisumbu. c Bakulu mbamanye ne: bana betu badibu balongesha badi ne dijinga dia kumanya malu a bungi. Badi ne bua kubapesha mibelu mimpe bua bapete dimanya ne bamone ne: bidi bikengela kuikala ne didipuekesha, lulamatu, ne kuitaba bua kuenzela bakuabu mudimu.—1 Tim. 3:1; 2 Tim. 2:2; 1 Pet. 5:5.

¹⁶ Mona muvua mubelu uvuabu bapeshe Patrick mumuambuluishe. Patshivuaye nsonga, uvua ne tshibidilu tshia kuamba bana betu ba balume ne ba bakaji mêyi mabi ne tshia kubenzela kabidi malu mabi. Mukulu kampanda mushindame  mu myuma wakamona butekete buvua nabu Patrick abu, kumupeshaye mubelu muimpe buludiludi. Patrick udi wamba ne: “Ndi wa diakalenga bua muvuaye mumpeshe mubelu au. Pa tshibidilu, mvua nteketa mu mikolo pamvua mmona bakuabu mu tshisumbu tshietu bapeta diakalenge dia kuenza midimu imvua musue. Kadi bakulu bakambela bua kuenzela bena Kristo nanyi mudimu ne didipuekesha pamutu pa kukeba bua kuikala ne mianzu anyi midimu mu tshisumbu.” Mibelu ayi yakambuluisha Patrick bualu pakakumbajaye bidimu 23, bakamuteka mukulu.—Nsu. 27:9.

17. Mmunyi muvua Yezu muleje ne: uvua weyemena bayidi bende?

¹⁷ Bushuwa, Yezu wakapesha bayidi bende mudimu wa kuyisha lumu luimpe, kadi wakambabila kabidi bua kulongesha bantu. Pamuapa bayidi bakudiumvua kabayi bakumbane bua kuenza mudimu au. Kadi Yezu uvua mutuishibue ne: bavua anu mua kuwenza. Ke bualu kayi wakabambila ne: “Anu bu mudi Tatu muntume, meme panyi ndi nnutuma.”—Yone 20:21.

18. Mmunyi mudi bakulu mua kuidikija Yezu?

¹⁸ Mmunyi mudi bakulu mua kuidikija Yezu? Bakulu ba meji batu balongesha bakuabu ne babapesha imue midimu. (Filip. 2:​19-22) Tshilejilu, bakulu badi mua kulomba bansonga bua kuenza midimu ya dilama Nzubu wa Bukalenge ne ya dimulama. Padibu babapeshayi, mbimpe babalongeshe mua kuyenza ne babeyemene, batuishibue ne: nebayenze bimpe. Tuakulayi bua muanetu wa balume Matthew uvuabu bafume ku diteka mukulu. Udi wamba muvuaye ne dianyisha dia bungi kudi bakulu bavua bamulongeshe bua kuenza mudimu uvuabu bamupeshe, ne bua mudibu bamueyemene, batuishibue ne: neawenze bimpe. Udi wamba ne: “Pamvua ngenza bilema, bavua bangambuluisha bua bilema bianyi abi bindongeshe ne ngakaje mushindu umvua ngenza mudimu.” d

19. Udi ne bua kudisuika bua kuenza tshinyi?

¹⁹ Mu matuku 40 a ndekelu avua Yezu muenze pa buloba, uvua ukankamija bantu ne ubalongesha. Tudisuikayi bua kumuidikija mudibi bikengela. (1 Pet. 2:21) Neatuambuluishe bua kumuidikija. Bualu mmutulaye ne: “Ndi nenu matuku onso too ne ku nshikidilu kua ndongoluelu wa malu eu.”—Mat. 28:20.